Go Back

Jeremia Chapter 50

1. ĨNO NĨYO ndũmĩrĩri ya Jehova ĩkoniĩ Babuloni, o na ĩkoniĩ bũrũri wa Akalidei, ĩrĩa aaheanire ũhoro wayo na kanua ka Jeremia, mũnabii.
2. Umbũranĩrai ũhoro harĩ ndũrĩrĩ, mũũhunjanĩrie, na mũhande kĩbebero; ũhunjanĩriei, na mũtikaũhithe; ugai atĩrĩ, Babuloni nĩ rĩĩgwatĩre; Beli nĩ njonorithie, nayo Merodaki ĩgatengemanio; mĩhianano yarĩo ya kũhoyũo nĩ mĩconorithie, nacio ngai ciarĩo cia mĩhianano igatengemanio.
3. Nĩ ũndũ-rĩ, nĩharoima rũrĩrĩ mwena wa gathigathini, rũrĩa rũgũthiĩ kũrĩtharĩka, naruo nĩrũgatũma bũrũri ũcio ũkire ihooru, wage mũndũ wa kũũtũũra; andũ aguo nĩmagakorũo morĩte, magethiĩra na ũhiũ.
4. Matukũ-inĩ macio, o na ihinda-inĩ-rĩu-rĩ, ciana cia Isiraeli o na cia Juda nĩ gũthiĩ igathiĩ irĩ hamwe, ciĩthiĩre o ikĩrĩraga, na icarie Jehova Ngai wacio; ũguo nĩguo Jehova ekuuga.
5. Nĩigatuĩria njĩra ya gũthiĩ Zayuni cierekeire kuo, ikiugaga atĩrĩ, Ũkai mwĩgiritanie na Jehova mũrĩkanĩre nake kĩrĩkanĩro gĩa tene na tene, kĩrĩa gĩtagacoka kũriganĩra.
6. Andũ akwa matuĩkĩte o ta mbũri iria ciũrĩte, nao arĩithi ao nĩo matũmĩte more nĩ kũgarũra mamagarũrĩte makamaroria irĩma-inĩ, nao makorũra moimĩte kĩrĩma-inĩ gĩkĩ magathiĩ gĩthũngũri-inĩ kĩu kĩngĩ, nĩ ũndũ nĩmaariganĩirũo nĩ ũhurũko wao;
7. nao arĩa othe maamonaga makamarĩa. Nacio thũ ciao ikoiga atĩrĩ, Ithuĩ tũtihĩtĩtie, nĩ ũndũ nĩo mehĩtie Jehova, o we ũrĩithio wao wa ma, naguo ũguo nĩ ta kuuga Jehova ũrĩa watũire ehokagwo nĩ maithe mao.
8. Ũrai muume Babuloni mwehere bũrũri wa Akalidei, mũtuĩke o ta thenge iria itongoragia ndũru cia mbũri.
9. Nĩ ũndũ-rĩ, nĩngaarahũra ũũngano wa ndũrĩrĩ nene ciume bũrũri wa gathigathini ithiĩ igokĩrĩre Babuloni; nacio nĩ gwĩthaba igethaba irĩtharĩke o nginya rĩĩgwatĩrũo nĩcio; mĩguĩ yacio ĩgaikio o ta ya mũndũ njamba mũũgĩ mũno, na gũtirĩ o na ũmwe wayo ũgacoka ũtheri.
10. Kalidei nĩ gũtahwo gũgatahanwo, nao arĩa othe magagũtaha makaigania indo o kũigania; ũguo nĩguo Jehova ekuuga.
11.
12. Atĩrĩrĩ, inyuĩ mũtahaga ũgai wakwa, nyina wanyu nĩ gũconoka agaconoka mũno nĩ ũndũ wa ũrĩa mũtũire mũkenaga, na mũkagĩa na ndũrũhĩ; ningĩ mũtumia ũrĩa wamũciarire nĩ gũconorithio agaconorithio, nĩ ũndũ wa ũrĩa mũtũũhaga o ta mori ĩkũranga ngano ĩkĩmĩhũra, na mũkagamba ta mbarathi irĩ na hinya; akarigia thutha wa ndũrĩrĩ iria ingĩ ciothe, atuĩke werũ mũtheri, o na bũrũri mũũmũ, o na rũng’ũrĩ.
13. Tondũ wa marakara ma Jehova-rĩ, bũrũri ũcio ndũgatũũrũo nĩ andũ, no nĩ gũkira ũgakira ihooru, nake mũndũ o mũndũ ũrĩa ũkahĩtũkĩra hakuhĩ na Babuloni amake, na oige hi-i-i, nĩ ũndũ wa matũhũhũ marĩa mothe makuo.
14. Wĩthabei wega mũtharĩkĩre Babuloni na ndwere ciothe, inyuĩ andũ othe arĩa mũtungaga mota; rĩrathei, na mũtigacaĩre mĩguĩ, nĩ ũndũ nĩrĩĩhĩtie Jehova.
15. Riugĩrĩriei na ndwere ciothe ciarĩo; rĩu nĩrĩĩneanite rĩo rĩene; njirigo ciarĩo cia hinya nĩ ngũu thĩ, nacio thingo ciarĩo ikabacanio na thĩ, nĩ gũkorũo rĩu nĩrĩo rĩĩrĩhĩria rĩa Jehova; wĩrĩhĩriei harĩ rĩo; o ta ũrĩa rĩanekana-rĩ, rĩĩkei o taguo.
16. Ninai ahandi mehere kũu Babuloni, hamwe na arĩa maikagia rũhiũ magetha-inĩ ageni akuo nĩmakagarũrũka, mũndũ o mũndũ ahũndũke acoke kũrĩ andũ ao, nao mũndũ o mũndũ orĩre bũrũri wao, nĩ ũndũ wa gwĩtigĩra rũhiũ rũa njora rũrĩa rũmahinyagĩrĩria.
17. Isiraeli atariĩ ta ng’ondu yũrũrĩte, ĩhahũrĩtwo nĩ mĩrũthi; o mbere nĩ mũthamaki wa Ashuri wamũrĩire o kũmũrĩa, o na wa kũrigĩrĩria nĩ Nebukadirezaru, mũthamaki wa Babuloni, ũmuunangĩte mahĩndĩ.
18. Tondũ ũcio Jehova Mũnene wa Ita, o we Ngai we Isiraeli, ekuuga ũũ: Atĩrĩrĩ, nĩ kũherithia ngaherithia mũthamaki wa Babuloni, o na bũrũri wake, o ta ũrĩa ndaherithirie mũthamaki wa Ashuri;
19. nake Isiraeli ndĩmũcokie ũrĩithio-inĩ wake, nake arĩithagio o kũu Karimeli na Bashani, na ahũnagĩre ndĩa ithũngũri-inĩ cia Efiraimu na Gileadi.
20. Matukũ-inĩ macio, o ihinda rĩu-rĩ, ũũru wa Isiraeli nĩũgatũĩrio, na akorũo atarĩ naguo, namo mehia ma Juda matuĩrio, na mationeke; amu andũ arĩa ngatigaria nĩngamohera mehia mao; ũguo nĩguo Jehova ekuuga.
21. Atĩrĩrĩ, ambatai, mũkinye bũrũri wa Merathaimu, mũkaũũkĩrĩre, o na mũũkĩrĩre andũ arĩa matũũraga Pekodi; ũraganai kuo o na mũmanine biũ; ũguo nĩguo Jehova ekuuga; mũgwĩke o ta ũrĩa maũndũ mothe marĩa ndĩmwathĩte matariĩ.
22. Kĩgirĩko gĩa ita nĩkĩraiguwo bũrũri ũcio, o na mbu ya ũrĩa kũraninanwo mũno.
23. Hĩ! Kaĩ nyondo ĩrĩa ĩtũire ĩhũraga thĩ yothe nĩĩtemengetwo ĩkoinangwo-ĩ! Hĩ! Kaĩ Babuloni nĩrĩkirĩte ihooru thĩinĩ wa ndũrĩrĩ-i!
24. Nĩngũigĩire mũtego wa gũkũgwatia, nawe, wee Babuloni, ũkagwatio ũtekũmenya. Wĩ mũkorerere na ũkanyitwo, nĩ ũndũ nĩũgianĩte na Jehova.
25. Jehova nĩ kũhingũra ahingũrĩte ũigo wake wa indo cia mbaara, akaruta matharaita marĩa ma mathũgũta make, nĩ gũkorũo Mwathani, o we Jehova Mũnene wa Ita, e na wĩra ekũruta kũu bũrũri wa Akalidei.
26. Thiĩi mũgagũũkĩrĩre mũkuumĩte na ndwere ciothe; hokorai indo ciakuo iria irĩ makũmbĩ thĩinĩ; mũkũhĩbe o hĩba, ningĩ mũkũnine o gũkũnina biũ; menyai mũgũtigĩrie kĩndũ o na kĩ.
27. Ũragai ndegwa ciakuo ciothe, mũreke ciikũrũke ikinye ithĩnjĩro-inĩ. Hĩ! Kaĩ irĩ na haaro-ĩ! Nĩ gũkorũo mũthenya wacio nĩ mũkinyu, o na ihinda rĩacio rĩrĩa ciatuĩrĩirũo.
28. He mũgambo ũraiguwo wa arĩa maroora magethara moimĩte bũrũri wa Babuloni, nĩguo makoimbũranĩre ũhoro o kũu Zayuni wa ũrĩa Jehova Ngai witũ erĩhĩirie, akerĩhĩria nĩ ũndũ wa maũndũ marĩa mekirũo hekarũ yake.
29. Ĩtai andũ arĩa maikagia mĩguĩ mokĩrĩre Babuloni, o arĩa othe matungaga mota; ambai hema mũrĩrigicĩrie na ndwere ciothe nĩ getha mũrĩtharĩkĩre, na mũtikareke mũndũ o na ũmwe warĩo ahonoke; rĩgerei ngero iringaine na ciĩko ciarĩo, na mũrĩĩke maũndũ maringaine na maũndũ mothe marĩa rĩaneka, nĩ ũndũ nĩrĩetĩĩire Jehova, rĩgetũũgĩria harĩ Ũrĩa Mũtheru wa Isiraeli.
30. Tondũ ũcio aanake arĩo nĩ kũgũa makagũa njĩra-inĩ ciarĩo moragĩtwo, o nao andũ arĩo othe a ita makirio ngiria mũthenya ũcio; ũguo nĩguo Jehova ekuuga.
31. Atĩrĩrĩ, wee mwĩtĩi ũyũ, Mwathani, o we Jehova Mũnene wa Ita, ekuuga ũũ: Ndĩ wa kũhũrana nawe, amu mũthenya waku nĩ mũkinyu, o ihinda rĩaku rĩrĩa ndagũtuĩrĩire.
32. Mwĩtĩi ũcio nĩekũhĩngwo agũe thĩ, na gũtirĩ mũndũ ũkũmũũkĩria na igũrũ. Ningĩ matũũra make nĩngamamundia mwaki, naguo ũrambie arĩa othe matũire mamũrigicĩirie, maninwo biũ.
33. Ningĩ Jehova Mũnene wa Ita ekuuga ũũ: Ciana cia Isiraeli o na cia Juda nĩihinyĩrĩirio ciothe hamwe, nao andũ othe arĩa maacitahire nĩmacirũmĩtie mũno, makarega gũcirekia.
34. No rĩrĩ, mũkũũri wacio e na hinya, nake etagwo Jehova Mũnene wa Ita; ningĩ nĩwe ũgacirũĩrĩra cira-inĩ wacio, nĩ getha atũme thĩ igĩe ũhurũko; no anyaririthie andũ arĩa matũũraga Babuloni.
35. He rũhiũ rũa njora rũcomoreirũo Akaiidei o na andũ arĩa matũũraga Babuloni, na anene akuo, o na andũ akuo arĩa ogĩ; ũguo nĩguo Jehova ekuuga.
36. Ningĩ rũhiũ rũa njora rũgacomorerũo andũ akuo arĩa a mwĩnyogoro, nao nĩ kũhũhũta makahũhũtaga; o na ningĩ rũhiũ rũa njora rũgacomorerũo njamba ciakuo iria irĩ hinya, nacio nĩ kũgegeara ikagegeara.
37. Ningĩ he rũhiũ rũa njora rũcomoreirũo mbarathi ciakuo, o na ngari ciakuo cia ita, o na rũgacomorerũo andũ othe a ndũrĩrĩ iria thombocanu arĩa matũire na kũu thĩinĩ, nao magatuĩka o ta andũ-a-nja; ningĩ rũhiũ rũa njora rũgacomorerũo indo ciakuo ciothe cia bata iria ciĩigĩirũo mũthithũ, nacio nĩigatunyanwo.
38. Maĩ makuo nĩ kũhũithio mahũithĩtio, makang’ara o kũng’ara, nĩ gũkorũo bũrũri ũcio ũiyũrĩte mĩhianano ya gwacũhio, nao andũ aguo makagũrũka nĩ ũndũ wayo.
39. Tondũ ũcio nyamũ cia gĩthaka na mbwe nĩcio igatũũra kuo, o na nyaga itũũre kuo; na gũtigacoka gũtũũrũo nĩ andũ o na tene na tene, o na kana gũtũũrũo nĩ andũ a njiaro irĩkũ kana irĩkũ.
40. O ta ũrĩa gwatuĩkire Ngai aang’aũrania Sodomu na Gomora, o na matũũra marĩa maariganĩtie nakuo-rĩ, ũguo noguo kũu gũtagacoka gũtũũrũo nĩ mũndũ o na ũrĩkũ, o na kana mũrũ wa mũndũ o na ũrĩkũ arĩĩre ũgeni; kuo ũguo nĩguo Jehova ekuuga.
41. Atĩrĩrĩ, he rũrĩrĩ rũroka ruumĩte mwena wa gathigathini, o na rũrĩrĩ rũnene rũraarahũka rũkoima ituri-inĩ cia thĩ, rũĩ hamwe na athamaki aingĩ.
42. Andũ acio maroka magwete mota mao na matimũ, nao nĩ eĩ mũno, na matirĩ tha; mũrurumo wao magĩũka-rĩ, ũragamba o ta ndihũ cia maĩ ma iria rĩrĩa inene, nao mathiaga mahaicĩte mbarathi, na magethaba wega o ta andũ merekeire ita-inĩ, nĩguo magũũkĩrĩre, wee mwarĩ wa Babuloni.
43. Mũthamaki wa Babuloni nĩaiguĩte ngumo yao, namo moko make magaitĩka kũũrũo nĩ hinya; ningĩ nĩ mũgwate nĩ thĩna mũnene ngoro-inĩ yake, o na ruo ta rũa mũndũ-wa-nja akĩrũmwo.
44. Atĩrĩrĩ, nĩ kũingata ngamaingata na mbũkĩrĩra, nao more ta andũ arĩa mekũũra monete mũrũthi ũkĩambata uumĩte mũiyũro-inĩ wa Jorodani, ũgakinya ũrĩithio-inĩ wa ng’ondu. Nake mũndũ ũrĩa ngethurĩra nĩwe ngatua mwathi wakuo, nĩ ũndũ-rĩ, nũ ũtariĩ ta niĩ? O na ningĩ-rĩ, nũ ũngĩnduĩra gĩathĩ? Na ningĩ nĩ mũrĩithi ũrĩkũ ũngĩeta kũrũgama mbere yakwa?
45. Tondũ wa maũndũ macio ta thikĩrĩriai kĩrĩra kĩa Jehova kĩrĩa athugundĩire Babuloni; o na matanya marĩa atanyĩte eke andũ arĩa matũũraga Kalidei; ti-itherũ nĩ gũkururio magakururio marutwo kuo, o na arĩa anyinyi mamakururie; ti-itherũ nĩ gũtũma agatũma ũrĩithio ũcio wao ũkire ihooru nĩ ũndũ wao.
46. Thĩ nĩ gũthingitha ĩrathingitha nĩ mũrurumo wa Babuloni rĩkĩĩgwatĩrũo, nako kayũ karĩo gakaiguwo kũndũ kũraya ndũrĩrĩ-inĩ.

Home