Go Back

Jeremia Chapter 49

1. NAHO ha ũhoro wa ciana cia Amoni, Jehova ekuuga ũũ: Atĩrĩrĩ, anga Isiraeli ndarĩ ihĩĩ? O na ningĩ-rĩ, anga ndarĩ mũgai? Nĩ kĩ gĩgĩtũmĩte Milikomu egwatĩre Gadi gũtuĩke gwake, nao andũ ake magatũũra matũũra-inĩ makuo?
2. Tondũ wa maũndũ macio-rĩ, Jehova ekuuga ũũ: Atĩrĩrĩ, matukũ nĩmagoka marĩa ngatũma mbugĩrĩrio ya ita ĩiguwo Raba gũgĩũkanĩrĩrũo, o kũu gũtũũrĩtwo nĩ ciana cia Amoni; narĩo rĩkire ihooru rĩtuĩke hĩba cia mahuti o ro ũguo, o nao airĩtu akuo macinwo na mwaki; hĩndĩ ĩo nĩguo Isiraeli akegwatĩra andũ arĩa maamwĩgwatĩire, matuĩke ake; ũguo nĩguo Jehova ekuuga.
3. Atĩrĩrĩ! Wee Heshiboni, anũka ũrĩre, amu Ai nĩ rĩtahe, o na inyuĩ airĩtu a Raba-rĩ, rĩrai, mwĩohe tama wa ikũnia; rĩrai, mũteng’ere ũũ na ũũ kũu njirigo-inĩ, nĩ ũndũ Milikomu nĩekũrindũruo agatũũre ndaho-inĩ, me na athĩnjĩri-ngai ake, o na anene ake.
4. Rĩu-rĩ, nĩ kĩ gĩgũtũma wĩĩkĩrĩre nĩ ũndũ wa ituamba ciaku, o na wĩĩkĩrĩre nĩ ũndũ wa kĩanda gĩaku kĩrĩa kĩnoru, wee mwarĩ ũyũ mũremu, o wee ũtũire wĩhokete indo ciaku iria wĩigĩire mũthithũ, ũkoiga atĩrĩ, Nũ ũngĩgĩeta gũũka kũrĩ niĩ?
5. Atĩrĩrĩ, nĩ gũtũma ngatũma ũkinyĩrĩrũo nĩ guoya wĩtigĩre andũ othe arĩa matũire makũrigicĩirie; ũguo nĩguo Mwathani ekuuga, o we Jehova Mũnene wa Ita; na inyuĩ nĩmũkaingatwo mũrorio o harĩa mũndũ arĩkinyĩra, na gũtikagĩa mũndũ wa gũcokereria andũ arĩa magakorũo mahurunjũkĩte.
6. No rĩrĩ, thutha-inĩ nĩngacokithia andũ arĩa maagwatirũo mĩgwate a ciana cia Amoni; ũguo nĩguo Jehova ekuuga.
7. O naho ha ũhoro wa Edomu, Jehova Mũnene wa Ita ekuuga ũũ: Anga andũ nĩmathirĩtwo nĩ ũũgĩ kũu Temani, nao arĩa akuũku makaremwo nĩ kũheana kĩrĩra? Anga ũũgĩ wao nĩũbuĩirie ũkaagwo biũ?
8. Kĩũrei mũcoke na thutha; tũũrai mwĩhithĩte marima-inĩ, inyuĩ andũ arĩa mũtũũraga kũu Dedani; nĩ ũndũ nĩngatũma Esau akorererũo nĩ mũtino ũrĩa aathĩrĩirio.
9. Agethi thabibu mangĩũka harĩ wee-rĩ, matingĩtigia tũthabibu twa gũkahaarũo? Ningĩ aici mangĩgũkora ũtukũ-rĩ, to maninane o nginya mone indo cia kũraaigana?
10. No rĩrĩ, Esau ndĩmũtigĩte o ũguo ũtheri, ngaguũria handũ hake harĩa hahitharu, nĩguo ndakanacoke kuona handũ ha kwĩhitha; rũciaro rũake nĩrũananganĩirio hamwe na ariũ a ithe, o na andũ arĩa matũũranĩtie nao; nake we mwene rĩu ndarĩ ho.
11. Ndigĩra ciana ciaku cia ngoriai, na nĩngũcimenyerera itũũre muoyo; o nao aka aku a ndigwa ũreke meĩ’hoke.
12. Nĩ gũkorũo Jehova ekuuga ũũ: Atĩrĩrĩ, kũngĩkorũo arĩa mataathĩrĩirio kũnyuĩra gĩkombe kĩu matirĩ hingo matagakĩnyuĩra-rĩ, wee nawe anga nowe ũgakĩhonoka kũherithio? Ndũrĩ hingo ũtakaherithio, no nĩ kũnyua ũgakĩnyua.
13. Nĩ ũndũ Jehova ekuuga atĩrĩ, Kwĩhĩta nĩndĩĩhĩtĩte ngĩgwetaga rĩĩtwa rĩakwa niĩ mwene, ngoiga atĩ Bozara rĩgatuĩka o ta ũndũ wa kũmakania, na wa kũmenwo, na wa kwanangwo, o na wa gũtũũra rĩgwatĩtwo nĩ kĩrumi. Ningĩ matũũra marĩo mothe magatũũra maanangĩtwo tene na tene.
14. Nĩnjiguĩte ndeto ciumĩte he Jehova cia atĩ nĩhareketio mũrekio athiĩ ndũrĩrĩ-inĩ iria ingĩ, agaciĩre atĩrĩ, Ũnganai mũcokanĩrĩre hamwe, mũgokĩrĩre Edomu; ũkĩrai mũmwarahũrĩre ita.
15. Nĩ ũndũ atĩrĩ, nĩngũtuĩte mũnyinyi mũno thĩinĩ wa ndũrĩrĩ icio, na ngatũma ũmeneke thĩinĩ wa andũ.
16. Naho ha ũhoro waku wa ũrĩa ũguoyohanagia-rĩ, nĩ mwĩgerero wa ngoro yaku ũkũhenetie, wee ũtũũraga ngurunga-inĩ cia ndwaro cia mahiga, na ũkerũmĩria kũu gacũmbĩrĩ-inĩ gacio; no rĩrĩ, o na ũngĩĩthondekera ũtũũro waku handũ hatũũgĩru ta ha nderi-rĩ, nĩ kũharũrũkia ngakũharũrũkia thĩ ngũrute ho; ũguo nĩguo Jehova ekuuga.
17. Edomu nĩgũgatuĩka ũndũ wa kũmakania, nake mũndũ o wothe ũrĩa ũkahĩtũkĩra hakuhĩ nakuo-rĩ, nĩ kũmaka akamaka, o na oige hi-i-i! nĩ ũndũ wa matũhũhũ mothe marĩa magakorũo monekete kuo.
18. O ta ũrĩa Sodomu na Gomora maang’aũranirio me na matũũra marĩa maarigainie namo, gũtirĩ mũndũ ũgacoka gũtũũra kuo, o na kana mũrũ wa mũndũ o na ũrĩkũ arĩĩre ũgeni kuo; ũguo nĩguo Jehova ekuuga.
19. Atĩrĩrĩ, nĩ kũingata ngamaingata na mbũkĩrĩra, nao more ta andũ arĩa mekũũra monete mũrũthi ũkĩambata uumĩte mũiyũro-inĩ wa Jorodani, ũgakinya ũrĩithio-inĩ wa ng’ondu. Nake mũndũ ũrĩa ngethurĩra nĩwe ngatua mwathi wakuo, nĩ ũndũ-rĩ, nũ ũtariĩ ta niĩ? O na ningĩ-rĩ, nũ ũngĩnduĩra gĩathĩ? Na ningĩ nĩ mũrĩithi ũrĩkũ ũngĩeta kũrũgama mbere yakwa?
20. Tondũ wa maũndũ macio, ta thikĩrĩria kĩrĩra kĩa Jehova kĩrĩa athugundĩire Edomu, o na matanya marĩa atanyĩte eke andũ arĩa matũũraga Temani ti-itherũ nĩ gũkururio magakururio marutwo kuo, o na arĩa anyinyi mamakururie; ti-itherũ nĩ gũtũma agatũma ũrĩithio ũcio wao ũkire ihooru nĩ ũndũ wao.
21. Thĩ nĩ gũthingitha ĩgathingitha nĩ ũndũ wao mũrurumo wao makĩgũa thĩ; ningĩ he kĩrĩro kĩrarĩrũo kuo, nako kayũ gakĩo gakaiguwo o kũu Iria Itune.
22. Atĩrĩrĩ, nĩ kũũmbũka akombũka ta nderi, atambũrũkĩrie Bozara mathagu make akũrũũgĩrĩre; naguo mũthenya ũcio-rĩ, ngoro cia andũ arĩa njamba a Edomu igatuĩka o ta ngoro ya mũndũ-wa-nja akĩrũmwo.
23. Naguo ũyũ nĩguo ũhoro ũrĩa ũkoniĩ Dameski. Hamathu nĩ iconorithie rĩrĩ hamwe na Aripadi; nĩ ũndũ andũ arĩo nĩmaiguĩte ndeto njũru, makaiyũrũo nĩ maĩ nda, nao makoirugunyĩka ta maĩ ma iria-inĩ makĩerera, makaaga kũhorera.
24. Dameski nĩrĩũrĩtwo nĩ hinya, nao andũ arĩo makahutata more; nĩrĩiyũrĩte kĩinaino, nao andũ arĩo makagwatwo nĩ ruo rũa ngoro na kĩeha o ta mũndũ-wa-nja akĩrũmwo.
25. Hĩ! Kaĩ rĩu itũũra rĩrĩa rĩrarĩ ngumo nĩ ikiru ihooru-ĩ! O itũũra rĩrĩa rĩratũmaga ngene!
26. Tondũ ũcio aanake arĩo makagũa njĩra-inĩ ciarĩo moragĩtwo, nao andũ othe a ita makirio ngiria mũthenya ũcio; ũguo nĩguo Jehova Mũnene wa Ita ekuuga.
27. Ningĩ thingo cia Dameski nĩngacimundia mwaki, naguo ũrambie nyũmba cia ũnene iria cia Beni-hadadi.
28. Ningĩ ũyũ naguo nĩ ũhoro ũkoniĩ Kedari, o na mabũrũri ma mũthamaki wa Hazoru, kũrĩa kwahũrirũo nĩ Nebukadirezaru, mũthamaki wa Babuloni. Jehova ekuuga ũũ: Atĩrĩrĩ, arahũkai, mwambate mũkinye Kedari, nĩguo mũtahe andũ arĩa matũũraga mwena wa irathĩro.
29. Thũ ciao nĩikamataha hema ciao, na ndũru ciao cia mbũri, na menyitĩre ciandarũa ciao mathiĩ nacio, na indo ciao cia mũciĩ, o na ngamĩra ciao; nao nĩmakaanĩrĩra makĩanũkaga mamere ũũ: Kũguoyohania kuumĩte na ndwere ciothe!
30. Ũrai mũthiĩ mũkorũre kũndũ kũraya; tũũrai mwĩhithĩte marima-inĩ, inyuĩ andũ arĩa mũtũũraga Hazoru; ũguo nĩguo Jehova ekuuga. Nĩ gũkorũo Nebukadirezaru, mũthamaki wa Babuloni, nĩacirĩire kũmũũkĩrĩra, na agathugunda maũndũ ma kũmwĩka.
31. Arahũkai, mũtharĩkĩre rũrĩrĩ rũu rũtũire rũgaacĩire, o na rũtarĩ ũndũ o na ũrĩkũ ũrũhang’agia; ũguo nĩguo Jehova ekuuga. Ningĩ nĩ rũrĩrĩ rũtũire rũĩikarĩtie o ro ũguo rũĩ ruiki, rũtehingagĩra na ihingo, o na kana rũkeirigĩra na igera.
32. Ngamĩra ciaruo nĩ gũtaha mũgacitaha hamwe na ũingĩhu wa ũhiũ waruo wa ng’ombe; nao andũ acio matuagĩrĩrũo ndĩmahurunjĩre ndwere ciothe iria ciumaga rũhuho, na ndĩmarehithĩrie mũtino ũmoimĩte na ndwere ciothe cia kũrĩa matũũraga; ũguo nĩguo Jehova ekuuga.
33. Narĩo itũũra rĩa Hazoru rĩgatuĩka ũtũũro wa mbwe, na rĩtũũre rĩkirĩte ihooru tene na tene; gũtirĩ mũndũ ũgacoka gũtũũra kuo, o na kana mũrũ wa mũndũ o na ũrĩkũ arĩĩre ũgeni kuo.
34. Ĩno nĩyo ndũmĩrĩri ya Jehova ĩrĩa yakinyĩrĩire mũnabii Jeremia ĩkoniĩ Elamu ihinda rĩrĩa Zedekia, mũthamaki wa Juda, aambĩrĩirie gũthamaka, akĩĩrũo atĩrĩ,
35. Jehova Mũnene wa Ita ekuuga ũũ: Atĩrĩrĩ, nĩngoinanga ũta wa kũu Elamu, o ũta wao ũrĩa ũmatiiraga na hinya.
36. O na ningĩ Elamu ngakũrehithĩrie huho inya ciumĩte ituri-inĩ iria inya cia matu-inĩ, njoke ’hurunjĩre andũ a Elamu na kũu huho icio ciumĩte; na gũtirĩ rũrĩrĩ o na rũmwe rũtagakinyũo nĩ andũ acio aikie na kĩano a kũu Elamu.
37. Na nĩngatũma Aelamu acio mamake marĩ o kũu mbere ya thũ ciao, o na marĩ mbere ya andũ arĩa macaragia kũmaruta muoyo; na nĩngamarehithĩrie ũũru uumanĩte na marakara makwa marĩa meĩ mũno; ũguo nĩguo Jehova ekuuga; ndĩkĩmatwarithĩrie rũhiũ rũa njora rũmoime thutha, o nginya ndĩmanine biũ.
38. Ningĩ gĩtĩ gĩakwa kĩa ũnene ndĩkĩige o kũu Elamu, njirithie mũthamaki wakuo, o na anene, nĩguo maninwo biũ; ũguo nĩguo Jehova ekuuga.
39. No nĩgũgakinya atĩrĩ, atĩ thutha-inĩ nĩngacokithia andũ arĩa maagwatirũo mĩgwate a kũu Elamu, macoke kuo; ũguo nĩguo Jehova ekuuga.

Home