Go Back

Jeremia Chapter 46

1. NINGĨ ici nĩcio ndũmĩrĩri cia Jehova iria ciakinyĩrĩire Jeremia, mũnabii, ikoniĩ ndũrĩrĩ iria ingĩ.
2. Ha ũhoro wa Misiri-rĩ, nĩ ũhoro ũkoniĩ mbũtũ cia ita cia Firauni Neko, mũthamaki wa kũu Misiri, iria ciathiĩte igakinya gũkuhĩ na Rũũĩ rũa Farati o kũu Karikemishi, iria Nebukadirezaru, mũthamaki wa Babuloni, aahũrire mwaka wa ĩna ĩrĩa Jehoiakimu, mũrũ wa Josia, mũthamaki wa Juda, aakorirũo athamakĩte.
3. Atĩrĩrĩ, wĩhotorei muoe ndari o na ngo, mũthengerere ita-inĩ.
4. Tandĩkai mbarathi mũcihaice, inyuĩ andũ aya mũthiaga mũhaicĩte mbarathi; umagarai mũthiĩ mwĩĩkĩrĩte itukũ cianyu cia ita. Thũai matimũ manyu mahenie, na mwĩhumbe nguo cianyu cia mbaara cia igera.
5. Nĩ kĩ kĩratũma ndĩmone matariĩ ũguo? Nĩ agegearu, na magacoka na thutha; na njamba ciao iria irĩ hinya nĩihehenjetwo, igethara, ti-itherũ ciĩtharĩte o gwĩthara, na itingĩikĩa riitho na thutha. Kũguoyohanĩtio na ndwere ciothe; ũguo nĩguo Jehova ekuuga.
6. Arĩa me ihenya matikahota kũũra, o na kana njamba iria irĩ hinya ihonoke; na kũu mwena wa gathigathini gũkuhĩ na Rũũĩ rũa Farati-rĩ, nĩkuo ihĩngĩirũo ikagũa.
7. Nũ ũyũ wĩambararĩtie na igũrũ agatuĩka ta mũiyũro wa rũũĩ rũa Nili, akarũgarũga ta ndihũ cia njũĩ?
8. Bũrũri wa Misiri nĩguo wĩambararĩtie ũgatuĩka o ta rũũĩ rũa Nili, na ũkarũgarũga ta ndihũ cia njũĩ; nao andũ aguo makoiga atĩrĩ, Nĩ kwarahũka tũkwarahũka tũhumbe thĩ, na tũnine matũũra mayo, o na andũ arĩa mamĩtũũraga.
9. Atĩrĩrĩ, inyuĩ mbarathi ici, ta cimbicai, o na inyuĩ ngari ici cia ita-rĩ, ta bucunai; nacio njamba iria irĩ hinya irekwo ciumagare, nacio nĩcio andũ a Kushi, na Putu, arĩa moĩ kũrũmia ngo; o na andũ a Ludu arĩa moĩ kũrũmia mota, o na kũmatunga wega.
10. Nĩ gũkorũo mũthenya ũcio nĩ wa Mwathani, o we Jehova Mũnene wa Ita, na nĩ mũthenya wa kũrĩhanĩrio, nĩ getha erĩhĩrie harĩ thũ ciake. Rũhiũ rũa njora nĩ kũrĩa rũkarĩana rũhũne, ta arĩ kũnyua rũnyuĩte thakame yacio o nginya rũkanyotoka; nĩ gũkorũo Mwathani, o we Jehova Mũnene wa Ita, e na igongona rĩake rĩkũrutwo bũrũri wa mwena wa gathigathini, o kũu gũkuhĩ na Rũũĩ rũa Farati.
11. Atĩrĩrĩ, mũirĩtu ũyũ mwarĩ wa Misiri, ambata ũkinye Gileadi, woe mũthaiga; no rĩrĩ, mĩthaiga ĩo ũtũire wĩhokete mĩingĩ-rĩ, nĩ ya tũhũ, na ndĩngĩkuonera kĩhonia.
12. Ndũrĩrĩ nĩciiguĩte ũhoro waku wa ũrĩa ũconorithĩtio, nayo thĩ ĩkaiyũrũo nĩ mũcakayo waku; nĩ ũndũ njamba ĩrĩa ĩrĩ hinya nĩĩhĩngĩtwo ĩng’ethanĩire na ĩrĩa ĩngĩ, cierĩ ikagũanĩra o hamwe.
13. Ũyũ nĩguo ũhoro ũrĩa Jehova aarĩirie Jeremia, ũcio mũnabii, wa ũrĩa Nebukadirezaru, mũthamaki wa Babuloni, agoka kũhũra bũrũri wa Misiri.
14. Heanai ũhoro gũkũ Misiri, mũũhunjanĩrie Migidoli, na Nofu, o na Tahapanihesi, muuge atĩrĩ, Ũkĩrai, mwĩthagathage; nĩ ũndũ rũhiũ rũa njora nĩ rũrĩanu rũkaninana na kũu ndwere-inĩ cianyu ciothe.
15. Nĩ kĩ gĩtũmĩte ndegwa cianyu cieherio o kweherio ta ihaatĩtwo biũ? Itiigana gwĩtiiria, nĩ ũndũ Jehova nĩwe waciingataga;
16. ningĩ agĩkĩhĩngithia andũ aingĩ, nao makĩgũa, o mũndũ akĩgũĩra ũrĩa ũngĩ. Nao makiuga atĩrĩ, Arahũkai, tũcoke kũrĩ andũ aitũ, o bũrũri ũrĩa twaciarĩirũo, tũũrĩre rũhiũ rũa njora rũrũ rũtũhatĩrĩirie.
17. Ningĩ makĩanĩrĩra kuo, makiuga atĩrĩ, Firauni, mũthamaki wa Misiri, nĩatuwo Inegene-rĩa-Tũhũ; tondũ nĩarekete ihinda rĩrĩa aatuĩrĩirũo rĩhĩtũke.
18. No rĩrĩ, mũthamaki, o we ũrĩa wĩtagwo Jehova Mũnene wa Ita, ekuuga ũũ: Ti-itherũ o ta ũrĩa niĩ ndũũraga muoyo-rĩ, he thũ ĩgoka, nayo ĩkonwo ĩhaana o ta ũrĩa kĩrĩma gĩa Taboru kĩonagwo kĩhaana harĩ irĩma iria ingĩ, o na ta ũrĩa kĩrĩma gĩa Karimeli kĩhaana gĩkĩonwo nĩ mũndũ arĩ iria-inĩ rĩrĩa inene.
19. Atĩrĩrĩ, wee mwarĩ ũyũ ũtũũraga Misiri, wĩthagathagĩre indo ciaku cia gũgathiĩ nacio ndaho-inĩ, nĩ ũndũ Nofu gũgatigwo gũkirĩte ihooru, na gũcinwo biũ, kwage mũndũ wa gũgũtũũra.
20. Bũrũri wa Misiri ũhaana ta mori njega mũno, no ũhoro wa kũninanwo nĩũũkorete uumĩte na mwena wa gathigathini.
21. Ningĩ athigari aguo a mũcara arĩa matũũraga kuo marutĩtwo ndũrĩrĩ ingĩ matariĩ ta tũcaũ twa gĩcegũ; nĩ acoku na thutha makora othe hamwe; matiigana gwĩtiiria, nĩ gũkorũo mũthenya wao wa mũtino nĩũmakorete, na nĩrĩo ihinda rĩao rĩa gũkorererũo nĩ ndirũ.
22. Mũrurumo wa andũ a bũrũri ũcio ũgatuĩka ta wa nyamũ-ya-thĩ ĩgĩthiĩ, nĩ ũndũ magathiĩ gũkorerera Misiri na mbũtũ ciao cia ita, magũtharĩke na mathanwa, o ta ũrĩa andũ matemaga mĩtĩ.
23. Nakĩo kĩrĩti kĩaguo nĩmagakiuna, o na harĩa mĩtĩ yakĩo ĩtumanĩte mũno, nĩ gũkorũo andũ acio nĩmaingĩhĩte magakĩria ngigĩ, na matingĩtarĩka; ũguo nĩguo Jehova ekuuga.
24. Ĩĩ, ti-itherũ, mwarĩ wa Misiri nĩagaconorithio, na arekererio aneanwo moko-inĩ ma andũ a mwena wa gathigathini.
25. Ningĩ Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, nĩngaherithia Amoni wa kũu No, na ’herithie Firauni, na Misiri, hamwe na ngai ciakuo, na athamaki akuo; naguo ũguo nĩ ta kuuga Firauni, na andũ arĩa mamwĩhokete.
26. Nĩngamarekereria ndĩmaneane moko-inĩ ma andũ arĩa macaragia kũmaruta muoyo, o moko-inĩ ma Nebukadirezaru, mũthamaki wa Babuloni, na moko-inĩ ma ndungata ciake; no thutha-inĩ nĩgũgacoka gũtũũrũo nĩ andũ, o ta ũrĩa gwatũũrĩtwo tene; ũguo nĩguo Jehova ekuuga.
27. No rĩrĩ, wee Jakubu, ndungata yakwa, tiga gwĩtigĩra; o na ningĩ atĩrĩ, wee Isiraeli, menya ũmake; nĩ ũndũ-rĩ, ngakũhonokia ngũrutĩte kũndũ kũraya, o naruo rũciaro rũaku ruume bũrũri ũrĩa rũarindũrĩirũo. Jakubu nĩakahũndũka, na aikare ahoreire na agaacĩire, na gũtirĩ mũndũ ũgacoka kũmũguoyohia.
28. Nawe, wee Jakubu ndungata yakwa, Jehova egũkwĩra atĩrĩ, Menya wĩtigĩre, nĩ gũkorũo ndĩ hamwe nawe; nĩ ũndũ nĩnganina ndũrĩrĩ ciothe cia kũndũ guothe kũrĩa ndamũtwarithirie ndamũingata, ndĩcininũkie biũ; no wee ndigakũnina biũ, tiga o ngũherithie na kĩhooto; amu ndirĩ hingo ingĩgũtua ta ũtahĩtĩtie.

Home