Go Back

Jeremia Chapter 42

• 1. Hĩndĩ ĩo anene othe a mbũtũ cia ita, me na Johanani wa Karea, na Jezania wa Hoshaia, o na andũ othe kuuma o ũrĩa mũnyinyi mũno nginya o ũrĩa mũnene gũkĩra arĩa angĩ, magĩthengerera Jeremia, mũnabii,
• 2. makĩmwĩra atĩrĩ, Twagũthaitha wĩtĩkĩre atĩ gũthaithana gwitũ tũgũgũthaitha twĩ haha mbere yaku gwĩtĩkĩrĩke nĩwe, atĩ ũtũhoere he Jehova Ngai waku, ithuĩ matigari ma andũ a bũrũri ũyũ, nĩ ũndũ tũtigĩtwo tũrĩ o anyinyi na twarĩ aingĩ, o ta ũũ ũgũtuona wee mwene tũigana rĩu;
• 3. nĩ getha Jehova Ngai waku atuonererie njĩra ĩrĩa twagĩrĩirũo nĩ gũthiaga nayo, o na ũndũ ũrĩa twagĩrĩirũo nĩ gwĩka.
• 4. Hĩndĩ ĩo Jeremia ũcio mũnabii agĩkĩmera atĩrĩ, Nĩndamũigua; na atĩrĩrĩ, nĩngũmũhoera he Jehova Ngai wanyu kũringana na ũguo muugĩte; na nĩgũgakinya atĩrĩ, atĩ ũndũ o wothe ũrĩa Jehova akamũcokeria, nĩngamuumbũrĩra; ndirĩ ũndũ o na ũmwe ngamũhitha.
• 5. Hĩndĩ ĩo makĩĩra Jeremia atĩrĩ, Jehova arotuĩka mũira wa ma na mwĩhokeku harĩ ithuĩ, wa kuumbũra ũũru witũ, tũngĩaga gwĩka o ta ũrĩa maũndũ mothe matariĩ marĩa Jehova Ngai waku agakũrekia ũtwĩre.
• 6. O na marĩ mega, o na kana moru, nĩtũkũigua mũgambo wa Jehova Ngai witũ, o we ũcio tũrakũrekia harĩ we; nĩ getha tũtũũre tuonaga wega nĩ ũndũ wa kũigua uuge wa Jehova Ngai witũ.
• 7. Na gũgĩkinya atĩrĩ, atĩ matukũ ikũmi maathira, ndũmĩrĩri ya Jehova ĩgĩkinyĩrĩra Jeremia.
• 8. Nake agĩgĩĩta aa Johanani wa Karea, na anene othe a mbũtũ cia ita acio maarĩ hamwe nake, o na andũ arĩa angĩ othe kuuma o arĩa anyinyi nginya o arĩa anene, akĩmera atĩrĩ,
• 9. Jehova ũrĩa mwandekirie harĩ we ndĩmũtwarĩre ũhoro wanyu wa kũmũthaitha-rĩ, ekuuga ũũ:
• 10. Atĩrĩrĩ, mũngĩkorũo nĩmũgũtũũra mũikarĩte o gũkũ bũrũri ũyũ-rĩ, nĩngatũma mũikare mũrũmĩte, na ndicoke kũmũhurunja; na ningĩ njikare ta ndĩmũhandĩte kuo, na ndicoke kũmũhandũra, nĩ ũndũ nĩ ta ndĩĩricũkĩtwo nĩ ũndũ wa ũũru ũrĩa ndĩmwĩkĩte.
• 11. Ningĩ Jehova ekuuga ũũ: Tigai gwĩtigĩra mũthamaki wa Babuloni, ũcio mũtũire mwĩtigĩrĩte; menyai mũcoke kũmwĩtigĩra, nĩ gũkorũo ndĩ hamwe na inyuĩ ndĩmũhonokie, na ndĩmũrute moko-inĩ make.
• 12. Nĩngũmũiguĩra tha, nĩguo ndũme o nake amũiguĩre tha, na atũme mũcoke gũtũũra bũrũri ũyũ wanyu kĩũmbe.
• 13. No rĩrĩ, mũngiuga atĩ, Tũtiikara bũrũri ũyũ, na tondũ ũcio mũrege kũigua mũgambo wa Jehova Ngai wanyu,
• 14. muuge atĩrĩ, Aca, no nĩ gũthiĩ tũgũthiĩ bũrũri wa Misiri, kũrĩa tũtakona mbaara, o na kana tũigue mũgambo wa coro ũkĩhuhwo, o na kana tũigue ng’aragu, nakuo kũu nĩkuo tũgatũũra-rĩ,
• 15. rĩu ta iguai ũhoro wa Jehova ũkoniĩ ũhoro ũcio. Atĩrĩrĩ, inyuĩ matigari ma Juda, Jehova Mũnene wa Ita, o we Ngai wa Isiraeli ekuuga ũũ: Mũngĩtuĩka ti-itherũ nĩmũkũroria mothiũ manyu Misiri nĩguo mũthiĩ mũtonye kuo, mũkarĩĩre ũgeni kuo-rĩ,
• 16. hĩndĩ ĩo nĩgũgakinya atĩrĩ, atĩ rũhiũ rũa njora rũu mwĩtigagĩra nĩrũkamũkorerera o kũu bũrũri ũcio wa Misiri, o nayo ng’aragu ĩo mwĩtigagĩra ĩmũrũmĩrĩre na ihenya o ro kũu Misiri; nakuo kũu nokuo mũgakuĩra.
• 17. Ũguo nĩguo ũhoro wa andũ arĩa makaroria mothiũ mao Misiri makarĩĩre ũgeni kuo, ũgaikara; nĩ kũũragwo makoragwo othe na hiũ cia njora, na ng’aragu, o na mũthiro; na gũtirĩ o na ũmwe wao ũgatigara, o na kana ahonoke gũkorũo nĩ ũũru ũrĩa ngamatwarithĩria.
• 18. Nĩ ũndũ Jehova Mũnene wa Ita, o we Ngai wa Isiraeli, ekuuga ũũ: O ta ũrĩa marakara makwa, o na mang’ũrĩka, maaitirũo magĩkora andũ arĩa maatũũraga Jerusalemu, ũguo noguo mang’ũrĩka makwa magaitwo mamũkore inyuĩ hĩndĩ ĩrĩa mũgatonya Misiri; na nĩmũgatuĩka ta kĩndũ gĩthemenge, o na ta ũndũ wa kũmakania, na mũgwatwo nĩ kĩrumi, o na mũmeneke; na mũtigacoka kuona kũndũ gũkũ rĩngĩ o na rĩ.
• 19. Atĩrĩrĩ, inyuĩ matigari ma Juda, Jehova nĩaarĩtie ũhoro ũmũkoniĩ akoiga atĩrĩ, Mũtikanatonye Misiri. Menyai na ma o ma atĩ nĩndĩmuumbũrĩire ũhoro ũcio ũmũthĩ.
• 20. Nĩ ũndũ-rĩ, kũhenania kwanyu nĩ gwa kũmũreherere ũũru inyuene; nĩ gũkorũo nĩmwandekirie he Jehova Ngai wanyu, mũkĩnjĩra atĩrĩ, Tũhoere Jehova Ngai witũ; na rĩrĩ, maũndũ mothe marĩa Jehova Ngai witũ ariuga, nĩ wega ũtuumbũrĩre, na ithuĩ nĩtũkũmeka;
• 21. niĩ na niĩ-rĩ, nĩndĩmuumbũrĩire maũndũ macio ũmũthĩ, no mũtiathĩkĩire uuge wa Jehova Ngai wanyu ũndũ-inĩ o na ũrĩkũ wa maũndũ marĩa maatũmire andekie kũrĩ inyuĩ.
• 22. Rĩu-rĩ, tondũ wa ũhoro ũcio, menyai na ma o ma, atĩ nĩ kũũragwo mũkoragwo na hiũ cia njora, na mũninwo na ng’aragu, o na mũthiro, mwĩ kũndũ kũu mwĩendeire gũthiĩ kũrĩĩra ũgeni.

Home