Go Back

Jeremia Chapter 36

• 1. NA GŨGĨKINYA atĩrĩ, atĩ mwaka wa ĩna ĩrĩa Jehoiakimu, mũrũ wa Josia, mũthamaki wa Juda, aakorirũo athamakĩte, ndũmĩrĩri ĩno ĩgĩkinyĩrĩra Jeremia yumĩte he Jehova, akĩĩrũo atĩrĩ,
• 2. Wĩyoere ibuku rĩa gĩkũnjo wandĩke thĩinĩ warĩo mohoro mothe marĩa ngũheete ma ũũru ũrĩa ũgakora Isiraeli, o na Juda, o na ndũrĩrĩ ciothe, kuuma mũthenya ũrĩa ndaambĩrĩirie kwaria nawe matukũ-inĩ ma Josia, o na nginya ũmũthĩ.
• 3. Hihi no gũkorũo andũ a nyũmba ya Juda nĩmekũigua ũhoro wa ũũru wothe ũrĩa njirĩire kũmeka, nĩguo magarũrũke, mũndũ o mũndũ atige mĩthiĩre yake mĩũru; nĩ getha njohanĩre ũũru wao o na mehia mao.
• 4. Hĩndĩ ĩo Jeremia agĩgĩĩta Baruku wa Neria; nake Baruku agĩkĩandĩka mohoro mothe ma Jehova marĩa moimaga kanua ka Jeremia, o macio Jehova aamũheete akĩaria nake, akĩmaandĩka ibuku-inĩ rĩa gĩkũnjo.
• 5. Nake Jeremia agĩatha Baruku, akĩmwĩra atĩrĩ, Niĩ ndĩ muohe, na tondũ ũcio ndingĩhota gũtonya nyũmba ya Jehova;
• 6. gĩthiĩ arĩ we ũgathome ciugo cia marũa macio wandĩkĩte, o icio ciumĩte kanua gakwa cia ndũmĩrĩri cia Jehova, ũcithomere kũu nyũmba ya Jehova thĩinĩ, ũkĩiguagwo nĩ andũ, mũthenya ũrĩa kwĩhingagwo kũrĩa irio; o na ningĩ ũmathome ũkĩiguagwo nĩ andũ othe a Juda arĩa magakorũo mokĩte kuo moimĩte matũũra-inĩ mao.
• 7. Hihi no gũkorũo nĩmegũthiĩ gũthaitha Jehova, macoke magarũrũke, mũndũ o mũndũ atigane na mĩthiĩre yake mĩũru; nĩ ũndũ marakara ma Jehova o na mang’ũrĩka make nĩ manene mũno marĩa aheanĩte ũhoro wamo makoniĩ andũ aya.
• 8. Nake Baruku wa Neria akĩhingia ũhoro ũcio wothe aathĩtwo nĩ Jeremia, mũnabii, agĩgĩthoma ndũmĩrĩri cia Jehova ibuku-inĩ rĩu arĩ o kũu nyũmba ya Jehova thĩinĩ.
• 9. Na gũgĩkinya atĩrĩ, atĩ mwaka wa ĩtano ĩrĩa Jehoiakimu, mũrũ wa Josia, mũthamaki wa Juda, aakorirũo athamakĩte, o mweri wa kenda-rĩ, andũ othe a kũu Jerusalemu, o na andũ arĩa angĩ othe arĩa moimĩte matũũra ma Juda, makĩũngana, makĩhunjanĩria ũhoro wa atĩ mehinge kũrĩa irio me mbere ya Jehova.
• 10. Hĩndĩ ĩo nĩguo Baruku aagĩthomire mohoro ma Jeremia macio maarĩ ibuku-inĩ rĩu, arĩ kũu nyũmba ya Jehova thĩinĩ, kanyũmba-inĩ ka Gemaria wa Shafani, mwandĩki-marũa, karĩa kaarĩ o kũu nja ya na igũrũ, itonyero-inĩ rĩa kĩhingo kĩrĩa kĩa mũthondekano kĩa nyũmba ya Jehova, nao andũ othe magĩkĩĩiguĩra agĩthoma.
• 11. Na rĩrĩ, hĩndĩ ĩrĩa Mikaia, mũrũ wa Gemaria wa Shafani, aaiguire mohoro macio me ibuku rĩu ma ndũmĩrĩri ciothe cia Jehova,
• 12. agĩikũrũka agĩthiĩ nyũmba ya mũthamaki, agĩtonya kanyũmba ka mwandĩki wake wa marũa; na rĩrĩ, agĩgĩkora anene othe monganĩte magaikara kuo, nao nĩo Elishama ũrĩa mwandĩki-marũa, na Delaia wa Shemaia, na Elinathini wa Akibori, na Gemaria wa Shafani, na Zedekia wa Hanania, o na anene arĩa angĩ othe.
• 13. Nake Mikaia agĩkĩmahe ũhoro wothe ũcio aaiguĩte hĩndĩ ĩrĩa Baruku aathomagĩra andũ acio othe ibuku rĩu makĩĩiguagĩra.
• 14. Tondũ ũcio anene acio othe makĩrekia Jehudi, mũrũ wa Nethania wa Shelemia wa Kushi, harĩ Baruku, makiuga atĩrĩ, Ta oya ibuku rĩu rĩa gĩkũnjo, o rĩu wathomeire andũ, ũcoke ũũke. Tondũ ũcio Baruku wa Neria akĩoya ibuku rĩu rĩa gĩkũnjo, agĩthiĩ kũrĩ o.
• 15. Nao makĩmwĩra atĩrĩ, Rĩu ta ikara thĩ, ũthome tũkĩĩiguagĩra. Tondũ ũcio Baruku agĩkĩmathomera maũndũ macio o makĩĩiguagĩra.
• 16. Na gũgĩkinya atĩrĩ, atĩ maarĩkia kũigua ũhoro ũcio wothe, magĩcũthanĩrĩria o mũndũ na mũndũ ũrĩa ũngĩ nĩ guoya, na makĩĩra Baruku atĩrĩ, Ti-itherũ no mũhaka tũhe mũthamaki ũhoro ũcio wothe.
• 17. Nao makĩũria Baruku atĩrĩ, Rĩu-rĩ, ta twĩre, mohoro macio mothe moimĩte kanua gake-rĩ, wamaandĩkire atĩa?
• 18. Nake Baruku akĩmacokeria akĩmera atĩrĩ, Nĩ kũ’he aaheire ũhoro ũcio wothe na kanua gake, na niĩ ngĩkĩwandĩka na wino ibuku-inĩ rĩrĩ.
• 19. Nao anene acio magĩkĩĩra Baruku atĩrĩ, Thiĩ ũkehithe, wee mwene, o na Jeremia; no mũtikemenyithie harĩa mũrĩ.
• 20. Nao magĩgĩtonya he mũthamaki o kũu nyũmba yake ya na thĩinĩ, harĩa aaikaraga, no maakorirũo maigĩte ibuku rĩu rĩa gĩkũnjo kanyũmba ka Elishama, mwandĩki-marũa; na makĩhe mũthamaki ũhoro ũcio wothe akĩwĩiguagĩra.
• 21. Tondũ ũcio mũthamaki akĩrekia Jehudi agĩre ibuku rĩu rĩa gĩkũnjo, nake akĩrĩoya akĩrĩruta kũu kanyũmba kau ka Elishama ũcio mwandĩki-marũa. Nake Jehudi agĩgĩthomera mũthamaki mohoro macio, o nao anene othe makĩmeiguĩra marũgamĩte hau he mũthamaki.
• 22. Na rĩrĩ, mũthamaki nĩ gũikara aaikarĩte nyũmba yake ĩrĩa aaikaraga kĩmera kĩa heho, tondũ kwarĩ mweri wa kenda; nakuo kwarĩ mwaki waakanaga riiko-inĩ hau mbere yake.
• 23. Na gũgĩkinya atĩrĩ, atĩ Jehudi aathoma icigo ithatũ kana inya-rĩ, mũthamaki agĩcitemenga na kahiũ gake ka raũ, agĩciikia mwaki-inĩ ũcio hau riiko-inĩ, o nginya ibuku rĩu rĩothe rĩa gĩkũnjo rĩkĩhĩa nĩ mwaki ũcio hau riiko-inĩ.
• 24. Nao matiigana gwĩtigĩra, o na kana magĩtembũranga nguo ciao, o ene, o na kana mũthamaki, o na kana mũndũ o na ũmwe wa ndungata ciake iria ciaiguire mohoro macio mothe.
• 25. O na ningĩ atĩrĩ, Elinathani, na Delaia, na Gemaria, nĩmaathaithĩte mũthamaki atĩ ndagacine ibuku rĩu rĩa gĩkũnjo; no rĩrĩ, ndaigana kũmaigua.
• 26. Nake mũthamaki agĩgĩatha Jerameeli, mũrũ wa mũthamaki, na Seraia wa Azirieli, na Shelemia wa Abideeli, manyite Baruku ũcio mwandĩki-marũa, na Jeremia mũnabii; no Jehova nĩaamahithire.
• 27. Ningĩ ndũmĩrĩri ya Jehova ĩgĩkinyĩrĩra Jeremia thutha wa mũthamaki aacina ibuku rĩu rĩa gĩkũnjo, o na mohoro macio Baruku aandĩkĩte moimĩte kanua ka Jeremia, akĩĩrũo atĩrĩ,
• 28. Ta coka wĩyoere ibuku rĩngĩ rĩa gĩkũnjo, wandĩke thĩinĩ warĩo mohoro mothe marĩa maarĩ ibuku-inĩ rĩu rĩa mbere rĩacinirũo nĩ Jehoiakimu, mũthamaki wa Juda.
• 29. Naho ha ũhoro ũkoniĩ Jehoiakimu, mũthamaki wa Juda, uuge atĩrĩ, Jehova ekuuga ũũ: Wee ũcinĩte ibuku rĩu rĩa gĩkũnjo ũkĩũragia atĩrĩ, Nĩ kĩ gĩtũmĩte wandĩke na uuge ũũ: Ti-itherũ mũthamaki wa Babuloni nĩagoka kwananga bũrũri ũyũ, na nĩagatũma wage gũcoka gũtũũrũo nĩ mũndũ o na kana nyamũ?
• 30. Tondũ ũcio Jehova nĩaarĩtie ũhoro wa Jehoiakimu, mũthamaki wa Juda, akoiga atĩrĩ, Hatirĩ mũndũ o na ũmwe wa rũciaro rũake ũgacoka gũikarĩra gĩtĩ kĩa Daudi; ningĩ kĩimba gĩake gĩgaikio nja kĩarĩrũo nĩ riũa mũthenya, o na kĩgwatwo nĩ mbaa ũtukũ.
• 31. Na niĩ nĩngamũherithia, o na ’herithie rũciaro rũake o na ndungata ciake nĩ ũndũ wa ũmaramari wao, na ndũme macokererũo nĩ ũũru wothe ũrĩa ndaaririe ũhoro waguo ũmakoniĩ, me na andũ arĩa matũũraga Jerusalemu, o na andũ a Juda, no makĩrega kũnjigua.
• 32. Hĩndĩ ĩo Jeremia agĩkĩoya ibuku rĩngĩ rĩa gĩkũnjo akĩrĩnengera Baruku wa Neria ũcio mwandĩki-marũa, nake agĩcoka kwandĩka ibuku-inĩ rĩu mohoro mothe marĩa aacokire kũheo nĩ Jeremia, o macio maandĩkĩtwo ibuku-inĩ rĩrĩa Jehoiakimu, mũthamaki wa Juda, aacinĩte na mwaki; na hakĩongererũo mohoro mangĩ maingĩ maatariĩ ta macio ma mbere.

Home