Go Back

Jeremia Chapter 34

• 1. ĨNO NĨYO ndũmĩrĩri ĩrĩa yakinyĩrĩire Jeremia yumĩte he Jehova, rĩrĩa Nebukadinezaru, mũthamaki wa Babuloni, aarũaga mbaara na Jerusalemu na matũũra marĩo mothe, we mwene o na mbũtũ ciake ciothe cia ita, me hamwe na andũ othe a mothamaki mothe marĩa maathagwo nĩwe, o na ndũrĩrĩ ciothe ciakuo, akĩĩrũo ũũ:
• 2. Jehova Ngai wa Isiraeli ekuuga atĩrĩ, Thiĩ ũkaarie na Zedekia, mũthamaki wa Juda, ũmwĩre atĩrĩ, Jehova ekuuga ũũ: Atĩrĩrĩ, itũũra rĩrĩ nĩngarĩneana he mũthamaki wa Babuloni, na nĩakarĩcina na mwaki;
• 3. nawe ndũkahonoka atĩ nĩguo wage kũnyitwo nĩwe, no ndũrĩ hingo ũtekũrekererio ũneanwo moko-inĩ make; ningĩ mũgakũũranĩra maitho na mũthamaki ũcio wa Babuloni, na mwaranĩrie nake mũgĩcokanagĩria na tũnua; nawe nĩũkarindũrĩrũo Babuloni.
• 4. No o na kũngĩtuĩka nĩ ũguo-rĩ, ta thikĩrĩria ndũmĩrĩri ĩno ya Jehova, wee Zedekia mũthamaki wa Juda; ha ũhoro waku-rĩ, Jehova ekuuga ũũ: Ndũgakua ũũragĩtwo na rũhiũ rũa njora;
• 5. wee ũgakua o wega na thayũ, na nĩũgacinithirio mahuti marĩa manungaga wega o ta ũrĩa aa thoguo maacinithagĩrio, o athamaki a tene arĩa maarĩ mbere yakui ũguo noguo andũ magagũcinithĩria mahuti macio manungaga wega; nao nĩmagakũrĩrĩra makiugaga atĩrĩ, Ĩiya mwathi witũ-ĩ! Nĩ gũkorũo niĩ Jehova nĩ niĩ njarĩtie ũhoro ũcio.
• 6. Hĩndĩ ĩo Jeremia ũcio mũnabii agĩkĩhe Zedekia, mũthamaki wa Juda, ũhoro ũcio wothe arĩ kũu Jerusalemu,
• 7. o hĩndĩ ĩo mbũtũ cia ita cia mũthamaki wa Babuloni ciarũaga mbaara kũu Jerusalemu, o na matũũra-inĩ mothe ma Juda marĩa maatigarĩte, namo nĩmo Lakishi, o na Azeka; nĩ ũndũ macio moiki nomo maatigarĩte me mairige kũu Juda.
• 8. Ningĩ ĩno nĩyo ndũmĩrĩri ĩrĩa yacokire gũkinyĩrĩra Jeremia yumĩte he Jehova, hĩndĩ ĩrĩa mũthamaki ũcio ti Zedekia aarĩkahĩire kĩrĩkanĩro na andũ othe arĩa maarĩ Jerusalemu, gĩa atĩ kũhunjanĩrio ũhoro wa kuohoranwo;
• 9. nĩ getha mũndũ o mũndũ areke ndungata yake ya mũndũ mũrũme ya Mũhibirania, o na ndungata yake ya mũirĩtu ya Mũhibirania, ciohorũo itige gũcoka gũtuĩka ngombo, no ituĩke cia kwĩathaga; nĩ getha mũndũ o na ũrĩkũ ndakanacoke gũcitua ngombo, naguo ũguo nĩ ta kuuga Mũyahudi ndakanacoke gũtua Mũyahudi mũrũ wa ithe ngombo.
• 10. Nao anene othe o na andũ arĩa othe magĩĩtĩkĩra ũhoro ũcio, magĩkĩĩĩkĩra ho ũhoro-inĩ wa kĩrĩkanĩro kĩu, atĩ mũndũ o mũndũ areke ndungata yake ya mũndũ mũrũme o na ya mũirĩtu ĩĩthiĩre o ro ũguo ĩtuĩke ya kwĩathaga, nĩguo atĩ itikanacoke gũtuĩka ngombo ciao o na rĩ; nao magĩgĩĩtĩkĩra ũhoro ũcio, magĩcireka ciĩthiĩre.
• 11. No thutha-inĩ nĩmaacokire kwĩricũkwo, magĩcoka kwĩnyitĩra andũ acio maareketio methiĩre o ro ũguo nĩguo macoke gũtuĩka a kwĩathaga, magĩtũma macokerere ũkombo ũcio wao, arũme o na airĩtu.
• 12. Tondũ ũcio ndũmĩrĩri ya Jehova ĩgĩkinyĩrĩra Jeremia, akĩĩrũo atĩrĩ,
• 13. Jehova Ngai wa Isiraeli ekuuga ũũ: Nĩndarĩkanĩire na maithe manyu hĩndĩ ĩrĩa ndamarutire bũrũri wa Misiri, ngĩmaruta nyũmba ya ũkombo, ngĩkĩmera atĩrĩ,
• 14. Mwaka o wothe wa mũgwanja-rĩ, mũndũ o mũndũ wanyu nĩarekage mũrũ wa ithe Mũhibirania ũrĩa wendetio kũrĩ we, na akamũtungatĩra mĩaka ĩtandatũ, ethiĩre o ro ũguo, oime gwake na atuĩke wa kwĩathaga; no rĩrĩ, maithe manyu matiigana kũnjigua, o na kana makĩndegera matũ.
• 15. Na inyuĩ-rĩ, nĩ kũgarũrũka mũragarũrũkĩte, mũgeka ũndũ ũrĩa werekereire ũkĩonwo nĩ niĩ, nĩ ũndũ wa ũrĩa mũranunjanĩirie ũhoro o mũndũ na mũndũ ũrĩa ũngĩ wa atĩ kuohoranwo; nakĩo kĩrĩkanĩro kĩu mũrakĩrĩkanĩire mbere yakwa thĩinĩ wa nyũmba ĩrĩa ĩĩtanĩtio na rĩĩtwa rĩakwa.
• 16. No rĩrĩ, nĩmũcokete kwĩricũkwo mũgathahia rĩĩtwa rĩakwa, mũndũ o mũndũ wanyu agagĩcokia ndungata yake ya mũndũ mũrũme, o na ya mũirĩtu, iria mwarekirie ciĩthiĩre o ro ũguo o ta ũrĩa ikwenda; na nĩmũtũmĩte icoke ũkombo-inĩ, na icokage gũtuwo ndungata cianyu cia arũme, o na cia airĩtu.
• 17. Tondũ ũcio Jehova ekuuga ũũ: Mũtinjiguĩte o na hanini ũhoro-inĩ ũcio wa kũhunjanĩria ũhoro wa atĩ kuohoranwo, o mũndũ ohore mũrũ wa ithe, o na mũndũ ohore mũndũ wa kwao. Atĩrĩrĩ, Jehova ekuuga ũũ: Niĩ o na niĩ nĩ kũhunjia ndĩramũhunjĩria ũhoro wa kuohoranwo, muohorũo, mũneanwo harĩ rũhiũ rũa njora, na mũthiro, o na ng’aragu; na nĩngatũma mũtuĩke ũndũ wa kũguoyohania kũndũ guothe kũrĩa gũthamakagwo nĩ athamaki a thĩ.
• 18. Na rĩrĩ, nĩnganeana andũ arĩa maagararĩte kĩrĩkanĩro kĩu gĩakwa harĩ thũ ciao, o acio matahingĩtie mohoro ma kĩrĩkanĩro kĩu maarĩkanĩire mbere yakwa, rĩrĩa maatinanirie njaũ icunjĩ igĩrĩ magĩcoka makĩhĩtũkĩra gatagatĩ-inĩ ga icunjĩ icio ciayo;
• 19. nao nĩ anene a Juda, na anene a Jerusalemu, na andũ arĩa ehokere wĩra wa mũthamaki, na athĩnjĩri-Ngai, o na andũ othe a bũrũri, arĩa maahĩtũkĩire gatagatĩ ga icunjĩ icio cierĩ cia njaũ ĩo;
• 20. ndĩkĩmaneane moko-inĩ ma thũ ciao, o na ndĩmaneane moko-inĩ ma arĩa macaragia kũmaruta muoyo; nacio ciimba ciao igatuĩka nyama cia kũrĩo nĩ nyamũ cia rĩera-inĩ, o na nyamũ cia gĩthaka.
• 21. Nake Zedekia, mũthamaki wa Juda, na anene ake, nĩngamaneana moko-inĩ ma thũ ciao, o na moko-inĩ ma andũ arĩa macaragia kũmaruta muoyo, o na moko-inĩ ma mbũtũ cia ita cia mũthamaki wa Babuloni, o icio ciambatĩte ikamweherera.
• 22. Atĩrĩrĩ, Jehova ekuuga atĩrĩ, Nĩ gwathana ndĩrĩathana, ndũme macokerere itũũra rĩrĩ mahũrane mbaara narĩo, macoke marĩĩgwatĩre, na marĩcine na mwaki. Na nĩngatũma matũũra ma Juda makire ihooru, maage andũ mamatũũrĩte.

Home