Go Back

Jeremia Chapter 3

• 1. Atĩrĩrĩ, kũũragio atĩrĩ, Mũndũ angĩte mũka, nake oime mũciĩ, athiĩ agatuĩke wa mũndũ ũngĩ-rĩ, kwĩ hĩndĩ mũrũme angĩkĩmũcokerera? Githĩ bũrũri ũcio o naguo ndũngĩgĩthaha mũno? No rĩrĩ, wee nĩ kũhũra ũhũrĩte maraya na anyanya aku aingĩ mũno-ĩ! Githĩ wakĩnjokerera? Ũguo nĩguo Jehova ekũũria.
• 2. Ta tiira maitho maku ũcũthĩrĩrie tũcũmbĩrĩ-inĩ twa irĩma kũndũ kũrĩa gũtigĩtwo ũtheri; harĩa ũtakomeirũo nawe nĩ ha? Mĩkĩra-inĩ ya njĩra-rĩ, kũu nĩkuo waikaraga ũmetereire, o ta Mũarabu ũrĩ werũ-inĩ; nawe nĩũgĩthũkĩtie bũrũri na ũmaraya waku, o na waganu.
• 3. Tondũ ũcio mbura ya maguna-ng’ombe nĩĩgirĩtio yure, o nayo ya gũkũria irio ĩkaaga; no rĩrĩ, nĩ kũniaria ũniarĩtie gĩthiithi ta mũka wa maraya, na ũkaaga rũkobe.
• 4. Githĩ o na rĩu ndũtũire ũnjĩtaga Baba, na ũkoiga atĩ nĩ niĩ ndũire ngũtongoragia kuuma o hĩndĩ ĩrĩa warĩ mũnyinyi?
• 5. Ningĩ ũkoiga atĩrĩ, Kaĩ egũtũũra arakarĩte nginya tene na tene? O na kana atũũre acinĩtwo nĩ marakara nginya ithirĩro? Atĩrĩrĩ, wee-rĩ, nĩ kwaria waragia ũguo, no ũgacoka gwĩka o maũndũ moru na mwĩgerero wa ngoro yaku.
• 6. O na ningĩ atĩrĩ, rĩrĩa Josia ũrĩa warĩ mũthamaki aathamakaga-rĩ, Jehova nĩ kũũria aanjũririe atĩrĩ, Ĩ nĩwonete ũrĩa Isiraeli a’hutatĩire? Nĩ kũhaica ahaicĩte gĩthũngũri-inĩ kĩrĩa gĩothe kĩraya na igũrũ, o na agathiĩ kĩĩruru-inĩ kĩa mũtĩ ũrĩa wothe mũruru, nakuo kũu guothe nĩkuo atũire ahũragĩra maraya.
• 7. Na rĩrĩ, aarĩkia gwĩka maũndũ macio mothe ngĩĩĩra atĩrĩ, Hihi nĩekũnjokerera, no ndaigana kũnjokerera; nake mwarĩ wa nyina, Juda, o we ũcio ũgarũkanaga na ũrĩa-ng’ũũrũ, akĩĩonera maũndũ macio.
• 8. Ningĩ akĩona ũrĩa maũndũ matariĩ, o macio maatũmĩte ndĩmũhe marũa ma gũtigana nake, namo nĩ atĩ Isiraeli nĩ kũ’hutatĩra a’hutatĩire, agacoka gũtharania; no rĩrĩ, mwarĩ wa nyina Juda ndaigana kũigua guoya, o we ũcio ũgarũkanaga na ũrĩa-ng’ũũrũ; ĩndĩ-rĩ, o nake nĩ gũthiĩ aathiire kũhũra maraya o ro ũguo.
• 9. Na gũgĩkinya atĩrĩ, atĩ tondũ wa ũrĩa onaga ũhoro ũcio wa kũhũra maraya ta ũtarĩ ũndũ mũnene-rĩ, bũrũri nĩ gũthaha wathahire, nake agĩkĩrĩrĩria o gũtharania na mahiga, o na kũhoera kĩrĩra mĩtĩ-inĩ.
• 10. Na rĩrĩ, o na kũngĩtuĩka atĩ ũguo noguo gũtariĩ-rĩ, mwarĩ wa nyina Juda ndaigana gũcoka kũrĩ niĩ na ngoro yake yothe, o we ũcio ũgarũkanaga na ũrĩa-ng’ũũrũ, tiga o acoke kũrĩ niĩ e na ũhinga wa kũhenania naguo; ũguo nĩguo Jehova ekuuga.
• 11. Nake Jehova agĩkĩnjĩra atĩrĩ, Isiraeli ũrĩa ũ’hutatĩire nĩeyonanĩtie ta arĩ mũthingu gũkĩra Juda ũrĩa ũgarũkanaga na ũrĩa-ng’ũũrũ.
• 12. Thiĩ ũkahunjanĩrie mohoro maya ũrorete mwena wa gathigathini, uuge ũũ: Atĩrĩrĩ, wee Isiraeli, o we ũrĩa ũ’hutatĩire, coka harĩ niĩ; ũguo nĩguo Jehova ekuuga. Niĩ na niĩ ndigakũhetera ũthiũ na marakara, nĩ ũndũ nĩnjiyũrĩtwo nĩ tha; ũguo nĩguo Jehova ekuuga; ndigatũũra ndakarĩte tene na tene.
• 13. Ũndũ ũrĩa ũgwĩka-rĩ, no kuumbũranĩra mahĩtia maku ma atĩ wanaagarara watho wa Jehova Ngai waku, na ũkahenereria anyanya a ndũrĩrĩ, mwĩ kĩĩruru-inĩ kĩa mũtĩ ũrĩa wothe mũruru, na ũgakĩrega kũigua mũgambo wakwa; ũguo nĩguo Jehova ekuuga.
• 14. Atĩrĩrĩ, inyuĩ ciana ici hutatu, Jehova ekuuga atĩrĩ, Hũndũkai, nĩ ũndũ ndariĩ ta ndĩ mũthuri wanyu, na nĩngamũcokanĩrĩria ndĩmũtware Zayuni ndutĩte mũndũ ũmwe itũũra-inĩ rĩrĩ, na aĩigĩ erĩ thĩinĩ wa mbarĩ ĩngĩ;
• 15. na nĩngamũhe arĩithi arĩa tuumĩranĩtie ngoro nao, na nĩo marĩmũrĩithagia na ũũgĩ o na ũmenyi maũndũ.
• 16. Na nĩgũgakinya atĩrĩ, atĩ hĩndĩ ĩrĩa mũkaingĩha, o na muongerereke mũno bũrũri ũyũ-rĩ, matukũ-inĩ macio gũtigacoka kũgwetwo ũhoro wa ithandũkũ rĩa kĩrĩkanĩro kĩa Jehova, o na kana rĩrũmbũiyo; matikarĩririkana, o na kana marĩng’etie, o na kana rĩcoke gũthondekwo o na rĩ.
• 17. Ihinda rĩu-rĩ, magatua atĩ Jerusalemu nĩrĩo gĩikaro kĩa Jehova gĩa ũthamaki, nacio ndũrĩrĩ ciothe ciũnganĩrio kuo, nĩ ũndũ wa rĩĩtwa rĩa Jehova, ikinye o kũu Jerusalemu; nao andũ matigacoka gũtwarĩrĩrio nĩ ũremi wa uũru wa ngoro ciao.
• 18. Matukũ-inĩ macio-rĩ, andũ a nyũmba ya Juda magatwarana na a nyũmba ya Isiraeli, nao mathiĩ me rũmwe makinye bũrũri ũrĩa ndaheire maithe manyu ũtuĩke igai rĩao, moimĩte bũrũri wa mwena wa gathigathini.
• 19. No rĩrĩ, nĩ gwĩciria ndecirĩtie ngũtue mũrũ wakwa, na ngũhe bũrũri mwega, o na igai rĩega rĩkĩrĩte marĩa ma ndũrĩrĩ ciothe. Ningĩ ngiuga atĩrĩ, Ũrĩnjĩtaga baba, na ndũrĩ hingo ũka’hutatĩra atĩ nĩguo ũtige kũnũmĩrĩra.
• 20. Ti-itherũ o ta ũrĩa mũndũ-wa-nja agarũkaga mũrũme na ũrĩa-ng’ũũrũ oime kũrĩ we, ũguo noguo inyuĩ, andũ a nyũmba ya Isiraeli, mũngarũkĩte na ũrĩa-ng’ũũrũ, nĩguo Jehova oiga.
• 21. Mũgambo nĩũraiguwo kũrĩa gũtigĩtwo ũtheri tũcũmbĩrĩ-inĩ twa irĩma, wa kĩrĩro, o na wa gũthaithana gwa ciana cia Isiraeli; nĩ gũkorũo nĩciĩtwarĩrĩirie o ro ũguo, o na ikariganĩrũo nĩ Jehova Ngai wacio.
• 22. Atĩrĩrĩ, inyuĩ ciana ici mũ’hutatĩire, nĩngũmũhũndũra njoke ndĩmũhonie. Atĩrĩrĩ, tũũkĩte kũrĩ wee, nĩ ũndũ wee nĩwe Jehova Ngai witũ.
• 23. Ti-itherũ maũndũ marĩa macaragio ithũngũri-inĩ nĩ ma tũhũ, hamwe na ironja rĩrĩa rĩrĩ kuo; ti-itherũ ũhoro wa kũhonokia Isiraeli ũkoneka harĩ Jehova Ngai witũ.
• 24. No rĩrĩ, kuuma o hĩndĩ ya ũnyinyi witũ, maũndũ macio maanekwo ma ũũra-thoni maanahomia maithe maitũ makĩng’ũria mawĩra mao mothe, o na ndũru ciao cia mbũri, o na ndũru ciao cia ng’ombe, o na ihĩĩ ciao, o na airĩtu ao.
• 25. Kĩrekei twĩgũithie thĩ nĩ ũndũ wa ũrĩa tũconokete, tũhubwo nĩ inyarara rĩrĩa tũnyararĩtwo; nĩ ũndũ nĩtwĩhĩtie Jehova Ngai witũ, ithuene o na maithe maitũ, kuuma o hĩndĩ ya ũnyinyi witũ o nginya ũmũthĩ, na tũkarega kũigua mũgambo wa Jehova Ngai witũ.

Home