Go Back

Jeremia Chapter 29

• 1. Atĩrĩrĩ, maya nĩmo mohoro marĩa maandĩkirũo marũa-inĩ marĩa Jeremia, mũnabii, aatwarithĩirie athuri arĩa maatigarĩte a andũ arĩa maarindũrĩtwo, na agĩtwarithĩria athĩnjĩri-Ngai, o na anabii, o na andũ arĩa angĩ othe, arĩa Nebukadinezaru aatahĩte akamaruta Jerusalemu akamatwara Babuloni;
• 2. (na rĩrĩ, nĩ thutha wa rĩrĩa Jekonia, mũthamaki, o na nyina wa mũthamaki, o na andũ arĩa mehokeirũo wĩra wa nyũmba yake, o na anene a Juda na Jerusalemu, o na abundi, o na aturi, maakorirũo marĩkĩtie gũthenga makoima kũu Jerusalemu.)
• 3. Namo maatwarirũo nĩ Elasa wa Shafani, na Gemaria wa Hilikia, arĩa Zedekia, mĩithamaki wa Juda, aatũmire Babuloni kwĩ Nebukadinezaru, mũthamaki wa Babuloĩii. Marũa macio moigĩte atĩrĩ,
• 4. Jehova Mũnene wa Ita, o we Ngai wa Isiraeli, ekwĩra andũ othe arĩa maatahirũo, o acio ndatũmire matahwo matwarũo Babuloni marutĩtwo Jerusalemu, ũũ:
• 5. Wĩakĩrei nyũmba, na mũcitũũre; ningĩ mũrĩme mĩgũnda, mũcoke mũrĩe maciaro mayo.
• 6. Wĩhikĩriei aka, mũciare aanake na airĩtu, o nao ariũ anyu mũmamathĩre aka, nao airĩtu anyu mũreke mahikio, nĩ getha maciare ihĩĩ na airĩtu o nao; nĩguo mũkĩingĩhĩre kũu mũno, na mũtikanyihanyihe.
• 7. Ningĩ mũcarie ũhoro wa atĩ itũũra rĩu ndamũtwarithirie mwatahwo rĩgĩe na thayũ, mũkĩrĩhoere he Jehova; nĩ ũndũ thayũ ũrĩa ũgakorũo itũũra rĩu, nĩguo ũgatũma o na inyuĩ mũgĩe na thayũ.
• 8. Nĩ gũkorũo Jehova Mũnene wa Ita, o we Ngai wa Isiraeli, ekuuga ũũ: Menyai mũreke anabii anyu arĩa matũũraga thĩinĩ wanyu, o na andũ anyu arĩa maragũraga, mamũhenie, o na kana mũgwatĩrie iroto cianyu iria mũrotaga.
• 9. Nĩ ũndũ nĩ ũhoro wa maheni mamũrathagĩra o makĩgwetaga rĩĩtwa rĩakwa. Ti niĩ ndĩmareketie; ũguo nĩguo Jehova ekuuga.
• 10. Nĩ ũndũ Jehova ekuuga atĩrĩ, Mĩaka mĩrongo mũgwanja ĩrĩa ĩtuĩrĩirũo Babuloni yahinga-rĩ, nĩngoka kũmũrora nĩguo ndĩmũhingĩrie ũhoro wakwa mwega ũrĩa ũmũkoniĩ, na ũndũ wa gũtũma mũcoke kũndũ gũkũ.
• 11. Nĩ gũkorũo nĩnjũĩ meciria marĩa ndĩĩciragia ũhoro-inĩ wanyu, o meciria ma thayũ, na ti ma ũũru, nĩ getha ndũme mũgĩe na kĩĩrĩgĩrĩro gĩa atĩ ũhoro wanyu nĩũkaagĩra thutha-inĩ; ũguo nĩguo Jehova ekuuga.
• 12. Na nĩmũkangayagĩra, na mũcokage kũinamĩrĩra mũ’hoe, na niĩ nĩngamũigua.
• 13. Ningĩ nĩmũkanongoragia, na mũkanyona, o hĩndĩ ĩrĩa mũgakoragwo mũnongoretie na ngoro yanyu yothe.
• 14. Niĩ na niĩ-rĩ, nĩngonekaga nĩ inyuĩ; ũguo nĩguo Jehova ekuuga. O na ningĩ ũhoro wanyu wa gũtũũra mũtahĩtwo nĩngaũgarũra, ndĩmũcokererie ndĩmũrute ndũrĩrĩ-inĩ ciothe, o na ndĩmũrute kũndũ guothe kũrĩa ndamũtwarithirie; ũguo nĩguo Jehova ekuuga; na nĩngamũcokia o handũ harĩa ndamũrutithirie rĩrĩa mwatahirũo.
• 15. Tondũ inyuĩ muugaga atĩrĩ, Jehova nĩatwarahũrĩire anabii gũkũ Babuloni.
• 16. No rĩrĩ, ha ũhoro wa mũthamaki ũrĩa ũikarĩire gĩtĩ kĩa ũnene kĩa Daudi, o na ũhoro wa andũ othe arĩa matũũraga itũũra rĩrĩ, o andũ anyu arĩa mataatwaranĩirio hamwe na inyuĩ rĩrĩa mwatahirũo-rĩ,
• 17. Jehova Mũnene wa Ita ekuuga ũũ: Atĩrĩrĩ, nĩngamatwarithĩria rũhiũ rũa njora, o na ng’aragu, o na mũthiro, na nĩngatũma matuĩke o ta ngũyũ njũru itangĩrĩĩka, nĩ ũndũ wa ũrĩa ithũkĩte mũno.
• 18. Ngamarũmĩrĩra ta ndĩmateng’eretie na rũhiũ rũa njora, na ng’aragu, o na mũthiro, na nĩngamarekereria mahũgio maroretio kũndũ guothe kũrĩa gũthamakagwo nĩ athamaki a thĩ, nĩguo matũũre ta magwatĩtwo nĩ kĩrumi, o na matuĩke ta ũndũ wa kũgegania, o na wa gũtũma gũtũũre kuugagwo atĩrĩ, Hi-i-i! o na ningĩ matũũre mamenagĩrĩrio nĩ andũ a ndũrĩrĩ ciothe kũrĩa ngamatwarithia;
• 19. nĩ ũndũ nĩmaregete kũigua ũhoro wakwa ũrĩa ndamatwarithĩirie na tũnua twa anabii akwa arĩa mandungatagĩra, ta arĩ kũroka ndokete gũũkĩra rũcinĩ tene ndĩmarekie; ũguo nĩguo Jehova ekuuga. No rĩrĩ, nĩmwaregire kũigua; ũguo nĩguo Jehova ekuuga.
• 20. Tondũ ũcio thikĩrĩriai ndeto cia Jehova, inyuĩ andũ othe arĩa mũtũire mũtahĩtwo, o inyuĩ arĩa ndaingatithirie Jerusalemu mũtwarũo Babuloni.
• 21. Jehova Mũnene wa Ita, o we Ngai wa Isiraeli, nĩaarĩtie ũhoro ũkoniĩ Ahabu wa Kolaia, na Zedekia wa Maaseia, o acio mamũrathagĩra ũhoro wa maheni makĩgwetaga rĩĩtwa rĩakwa, akoiga ũũ: Atĩrĩrĩ, nĩ kũrekereria ngamarekereria ndĩmaneane moko-inĩ ma Nebukadirezaru, mũthamaki wa Babuloni; nake amoragĩre o mbere yanyu, mũkĩmeonagĩra na maitho manyu;
• 22. naho ha ũhoro wao-rĩ, andũ a Juda arĩa maatahirũo, o acio marĩ Babuloni, nĩmakamoinaga thimo makĩrumana, moige atĩrĩ, Jehova arotũma ũtuĩke o ta Zedekia na Ahabu, arĩa maacinirũo na mwaki nĩ mũthamaki wa Babuloni;
• 23. nĩ ũndũ nĩmekire maũndũ ma ũkĩgu thĩinĩ wa Isiraeli, na magĩtharia na aka a andũ angĩ, o na makĩaria ndeto cia maheni, o iria itaamaathire maarie, makĩgwetaga rĩĩtwa rĩakwa. Niĩ nĩ niĩ ’menyaga maũndũ, na ndĩ mũira wamo; ũguo nĩguo Jehova ekuuga.
• 24. Naho ha ũhoro wa Shemaia, Mũnehelami, nĩũkaheana ũhoro wake, uuge atĩrĩ,
• 25. Jehova Mũnene wa Ita, o we Ngai wa Isiraeli, aarĩtie akoiga ũũ: Tondũ ũtwarithĩtie marũa na rĩĩtwa rĩaku wee mwene kũrĩ andũ othe arĩa marĩ Jerusalemu, o na kũrĩ Zefania wa Maaseia, mũthĩnjĩri-Ngai, o na kũrĩ athĩnjĩri-Ngai othe, ũkoiga atĩrĩ,
• 26. Jehova nagũtuĩte mũthĩnjĩri-Ngai handũ ha Jehoida, ũrĩa mũthĩnjĩri-Ngai, nĩ getha mũtuĩke anene thĩinĩ wa nyũmba ya Jehova a kuohererithia andũ ndungu magũrũ o na ngingo arĩa magũrũkĩte magetua anabii.
• 27. Rĩu-rĩ, nĩ kĩ gĩkĩgirĩtie ũkaanie Jeremia wa Anathothu, o we ũcio wĩtuaga mũnabii wanyu,
• 28. kuona atĩ nĩaatũrekeirie mũndũ o gũkũ Babuloni, akoiga atĩrĩ, Nĩmũgũtũũra mũrĩ atahe hĩndĩ ndaya; wĩakĩrei nyũmba, na mũcitũũre, ningĩ mũrĩme mĩgũnda na mũcoke mũrĩe maciaro mayo?
• 29. Rĩu-rĩ, Zefania, mũthĩnjĩri-Ngai, nĩathomeire Jeremia mũnabii marũa macio,
• 30. nayo ndũmĩrĩri ya Jehova nĩĩgĩkinyĩrĩire Jeremia, akerũo atĩrĩ, Rekania harĩ andũ othe arĩa maatahirũo, ũmere ũũ:
• 31. Ha ũhoro wa Shemaia, Mũnehelami-rĩ, Jehova ekuuga atĩrĩ, Tondũ Shemaia nĩaamũrathĩire ũhoro, na ti niĩ ndamũreketie, agĩtũma mwĩhoke ũhoro wa maheni-rĩ,
• 32. tondũ ũcio Jehova ekuuga ũũ: Nĩngaherithia Shemaia ũcio Mũnehelami, o na rũciaro rũake; ndakagĩa na mũndũ wa gũtũũrania na andũ aya, o na kana eyonere maũndũ mega marĩa ngeka andũ akwa, nĩ ũndũ nĩaarĩtie maũndũ ma kũrema Jehova. Ũguo nĩguo Jehova ekuuga.

Home