Go Back
Jeremia Chapter 23
- 1. Hĩ! kaĩ arĩithi arĩa maninaga mbũri cia rũũru rũakwa o na magacihurunja marĩ na haaro-ĩ! Ũguo nĩguo Jehova ekuuga.
- 2. Tondũ ũcio, Jehova Ngai wa Isiraeli ekuuga ũũ ha ũhoro wa arĩithi acio marĩithagia andũ akwa-rĩ: Nĩ kũhurunja mũhurunjĩte mbũri cia rũũru rũakwa, na mũgacihahũra, na mũkaaga gũthiĩ gũcirora; atĩrĩ, nĩngamũherithĩria ũũru o ro ũcio wa ciĩko cianyu; ũguo nĩguo Jehova ekuuga.
- 3. Niĩ na niĩ nĩngacokereria mbũri iria itigarĩte cia rũũru rũakwa, ciume mabũrũri mothe marĩa ndacitwarithirie, ndĩcicokie ciugũ ciacio; nacio nĩigaciara ciongerereke mũno.
- 4. Na rĩ nĩngaciigĩra arĩithi a gũcirĩithia; na itigacoka gwĩtigĩra o na rĩ, o na kana imakio, na hatirĩ o na ĩmwe yacio ĩkaagwo; ũguo nĩguo Jehova ekuuga.
- 5.
Jehova ekuuga ũũ: Atĩrĩrĩ, matukũ nĩmagoka marĩa ngaarahũrĩra Daudi mũndũ mũthingu ũgerekanĩtio na Thuuna ya mũtĩ, na nĩwe ũgathamaka, na thĩinĩ wa ũthamaki wake agaacĩre o kũgaacĩra; na nĩagatuanagĩra cira wega, na ekage maũndũ ma kĩhooto bũrũri ũcio.
- 6. Matukũ-inĩ make-rĩ, Juda nĩakahonokio, nake Isiraeli atũũre egangarĩte; narĩo rĩĩtwa rĩrĩa agetagwo nĩrĩo rĩrĩ, Jehova-Ũthingu-Witũ.
- 7. Tondũ ũcio Jehova ekuuga ũũ: Atĩrĩrĩ, matukũ nĩmagoka marĩa gũtagacoka kwĩhĩtwo gũkiugwo atĩrĩ, O ta ũrĩa Jehova atũũraga muoyo, o we ũrĩa warutire ciana cia Isiraeli bũrũri wa Misiri,
- 8. no nĩkũrĩĩhĩtagwo gũkiugwo atĩrĩ, O ta ũrĩa Jehova atũũraga muoyo, o we ũrĩa warutire ciana cia Isiraeli bũrũri wa mwena wa gathigathini, o na mabũrũri-inĩ mothe marĩa aacitwarithirie; nacio nĩ gũtũũra igatũũra bũrũri wacio kĩũmbe.
- 9. Atĩrĩrĩ, ha ũhoro ũkoniĩ anabii-rĩ, ngoro yakwa nĩ thuthĩku thĩinĩ wakwa, namo mahĩndĩ makwa mothe makanyegenya. Ndariĩ ta mũrĩu, o na ngatuĩka o ta mũndũ ũhinyarĩtio nĩ njohi, nĩ ũndũ wa ndeto iria njiguĩte he Jehova, o na ũndũ wa ndũmĩrĩri ciake theru.
- 10. Nĩ gũkorũo thĩ nĩĩiyũrĩte itharia, ningĩ bũrũri wothe nĩ ta kũrĩra ũrarĩra na kĩgi nĩ ũndũ wa kĩrumi kĩrĩa ũrumĩtwo, naguo ũrĩithio waguo wothe wa werũ-inĩ nĩ kũũma ũũmĩte; o naguo ũhoro wa andũ akuo wa maũndũ marĩa mekaga nĩ mũũru, o na hinya ũrĩa me naguo ndwerekereire.
- 11. Nĩ gũkorũo anabii o na athĩnjĩri-Ngai nĩmethahĩtie, na atĩrĩrĩ, waganu wao ndĩwonete ũrĩ o nyũmba yakwa thĩinĩ; ũguo nĩguo Jehova ekuuga.
- 12. Tondũ ũcio njĩra ĩrĩa mathiagĩra ĩkamatuĩkĩra o ta kũndũ gũtenderu nduma-inĩ, nao nĩ gũtindĩkwo magatindĩkwo makagũe kuo, nĩ gũkorũo nĩngamarehithĩrie ũũru o mwaka ũrĩa ũtuĩtwo wa kũmaherithia; ũguo nĩguo Jehova ekuuga.
- 13. Nao anabii arĩa matũũraga Samaria-rĩ, nĩndĩmonete magĩĩka maũndũ ma ũkĩgu, amu nĩ kũratha maarathaga mohoro makĩgwetaga rĩĩtwa rĩa Baali, na makahĩtithia andũ akwa Isiraeli.
- 14.
No rĩrĩ, anabii arĩa matũũraga Jerusalemu-rĩ, ndĩmonete magĩĩka maũndũ mathũku mũno, amu nĩ gũtharia matharagia, na magathiĩ na mĩthiĩre ya kũhenania, o na ningĩ magekĩra andũ arĩa eki naĩ hinya, o nginya hakaaga mũndũ o na ũmwe ũngĩtigana na waganu wake; nao othe hamwe nĩmatuĩkĩte o ta Sodomu harĩ niĩ, nao andũ arĩa othe matũũraga bũrũri ũyũ magatuĩka o ta Gomora.
- 15. Tondũ ũcio, ũhoro-inĩ wa anabii acio, Jehova Mũnene wa Ita ekuuga ũũ: Atĩrĩrĩ, nĩ kũrĩithia ngamarĩithia mũtĩ wa ũrũrũ, na ndĩmanyuithie maĩ marũrũ ta nyongo; nĩ ũndũ ũũru wa anabii a Jerusalemu nĩũhunjĩte bũrũri wothe.
- 16. Rĩu-rĩ, Jehova Mũnene wa Ita ekuuga ũũ: Atĩrĩrĩ, tigai kũigua ndeto cia anabii acio mamũrathagĩra mohoro, tondũ nĩ maũndũ ma tũhũ mamũrutaga, na makaaria o mohoro ma ngoro ciao o ene, na ti marĩa moimĩte kanua ka Jehova.
- 17. Matũire meraga andũ arĩa ma’menete atĩrĩ, Jehova ekuuga ũũ: Nĩmũkũgĩa na thayũ o nao andũ arĩa matwaragĩrĩrio nĩ ũremi wa ũũru wa ngoro ciao makamera atĩrĩ, Gũtirĩ ũũru ũkamũkora.
- 18. Nĩ ũndũ thĩinĩ wao-rĩ, nũ ũrĩ warũgama cira-inĩ wa Jehova, nĩguo akorũo agwatĩte ũhoro wake na akaũigua? Ũrĩa ũgwatĩirie ũhoro wakwa, o na akaũigua, nũ?
- 19. Atĩrĩrĩ, mang’ũrĩka ma Jehova nĩmonekete matariĩ ta kĩhuhũkanio kĩa rũhuho; ĩĩ, ti-itherũ mahaana ta kĩhuhũkanio kĩa rũhuho kĩrĩa kĩhurutanaga mũno, na nĩmagakora mũndũ ũrĩa mwaganu na kĩguũ.
- 20. Ningĩ marakara ma Jehova matikahũahũa tiga o hĩndĩ ĩrĩa agakorũo ekĩte na akahingia o ũndũ ũrĩa acirĩire gwĩka na ngoro yake; na rĩrĩ, matukũ-inĩ ma kũrigĩrĩria nĩguo mũgakuũka, mũmenye ũhoro ũcio wega.
- 21. Anabii acio-rĩ, ti niĩ ndamarekirie, no nĩ kwĩhĩka mehĩkire o ene; niĩ ndiaaririe nao, na no maarathaga mohoro.
- 22. No rĩrĩ, korũo nĩ kũrũgama maarũgamĩte cira-inĩ wakwa, nĩmangĩaiguithirie andũ akwa ũhoro wakwa, mamagarũre matigane na mĩthiĩre yao mĩũru, o na matigane na ũũru wa ciĩko ciao.
- 23. Anga nyonagwo ndĩ Ngai o gũkũ gũkuhĩ, na ngakorũo itarĩ Ngai kũndũ kũraihu? Ũguo nĩguo Jehova ekũũria.
- 24. Anga he mũndũ ũngĩhota kwĩhitha handũ hahitharu mũno na njage kũmuona? Ũguo nĩguo Jehova ekũũria. Githĩ ndiiyũrĩte kũndũ guothe igũrũ na thĩ? Ũguo nĩguo Jehova ekũũria.
- 25. Nĩnjiguĩte ũrĩa anabii moigĩte, o acio marathaga ũhoro wa maheni makĩgwetaga rĩĩtwa rĩakwa, makoiga atĩrĩ, Nĩndotete; ĩĩ, ti-itherũ, nĩndotete.
- 26. Nĩ nginya hĩndĩ ĩ ũndũ ũcio ũgũtũũra ngoro-inĩ cia anabii acio marathaga ũhoro wa maheni, o acio marathaga ũhoro wa ũrongo na mwĩĩro wa ngoro ciao o ene,
- 27. o acio macirĩire gũtũma andũ akwa mariganĩrũo nĩ rĩĩtwa rĩakwa nĩ ũndũ wa iroto icio ciao iria maheanaga ũhoro wacio o mũndũ na mũndũ ũrĩa ũngĩ, o ta ũrĩa maithe mao maariganagĩrũo nĩ rĩĩtwa rĩakwa nĩ ũndũ wa Baali.
- 28. Mũnabii ũrĩa ũrotete kĩroto-rĩ, nĩakĩheane ũhoro wa kĩroto kĩu arotete o ro ũguo, ĩndĩ ũrĩa ũreheirũo ndũmĩrĩri yakwa-rĩ, nĩaheane ũhoro wayo ehokekete. Kaĩ rũwa rũa ngano rũĩ bata wa kĩ rũkĩgerekanio na ngano? Ũguo nĩguo Jehova ekũũria.
- 29. Githĩ ũhoro wakwa ndũtariĩ o ta mwaki? Ũguo nĩguo Jehova ekũũria. O na ningĩ githĩ ndũtariĩ o ta nyondo ĩrĩa ĩhehenjaga rũaro rũa ihiga?
- 30. Tondũ ũcio-rĩ, ndĩ wa kũhũrana na anabii acio, o acio maiyaga ndeto ciakwa, o mũndũ akaiya cia mũndũ ũrĩa ũngĩ. Ũguo nĩguo Jehova ekuuga.
- 31. Atĩrĩrĩ, ndĩ wa kũhũrana na anabii acio maaragia na tũnua twao o ene, makoiga ũũ: Oigĩte ũna na ũna. Ũguo nĩguo Jehova ekuuga.
- 32. Atĩrĩrĩ, ndĩ wa kũhũrana na andũ arĩa marathaga mohoro ma iroto cia maheni, na makaheana ũhoro wacio, makahĩtithia andũ akwa na ũndũ wa maheni mao, o na mwĩgatho wao wa tũhũ, na ti niĩ ndamarekirie, o na kana ngĩmaatha. Matigunaga andũ aya o na hanini. Ũguo nĩguo Jehova ekuuga.
- 33. Na rĩrĩ, hĩndĩ ĩrĩa andũ acio magakũũria ũhoro, kana ũũrio ũhoro nĩ mũnabii, o na kana mũthĩnjĩri-Ngai, makũũrie atĩrĩ, Ũhoro mũritũ wa Jehova nĩ ũrĩkũ hihi? Hĩndĩ ĩo wee nawe ũgakĩmera ũũ: Ũhoro mũritũ wa Jehova nĩguo ũyũ, atĩrĩ, Nĩ gũtugutania ngamũtugutania; ũguo nĩguo Jehova ekuuga.
- 34. Naho ha ũhoro wa anabii na athĩnjĩri-Ngai, na andũ arĩa magwetaga kiugo kĩu kĩa ũhoro mũritũ wa Jehova-rĩ, ndirĩ hingo itakaherithia mũndũ ũcio o na andũ a nyũmba yake.
- 35. Naguo ũndũ ũrĩa mũkorania o mũndũ na mũndũ ũrĩa ũngĩ, o na mũndũ na mũrũ wa ithe, nĩ ũyũ, atĩrĩ, Jehova atũcokeirie ũhoro ũrĩkũ? Ningĩ nĩ atĩa aarĩtie?
- 36. Naguo ũhoro mũritũ wa Jehova mũtigacoka kũũgweta o na rĩ; nĩ gũkorũo kiugo kĩa mũndũ we mwene nĩkĩo agetitikithia we mwene, nĩ ũndũ ciugo cia Ngai ũrĩa ũrĩ muoyo nĩmũcirarĩtie, o iria cia Jehova Ngai witũ Mũnene wa Ita.
- 37. Anabii mũkamoria ũũ: Jehova agũcokeirie ũhoro ũrĩkũ? Ningĩ rĩ atĩa Jehova aarĩtie?
- 38. No rĩrĩ, mũngĩgweta kiugo kĩu kĩa ũhoro mũritũ wa Jehova-rĩ, Jehova ekuuga ũũ: Kuona atĩ nĩmwagweta ũhoro mũritũ wa Jehova, o na harĩa ndĩmũrekeirie mũndũ, amwĩre ũũ: Mũtaaanagwete kiugo kĩu kĩa ũhoro mũritũ wa Jehova-rĩ,
- 39. tondũ ũcio, atĩrĩrĩ, nĩngariganĩrũo nĩ inyuĩ o kũriganĩrũo biũ, na nĩngamũtugutania ndĩmũte biũ, o na itũũra rĩrĩ ndamũheire inyuene o na maithe manyu, nĩguo mũnjeherere;
- 40. na nĩngatũma mũtũũre mũmenetwo tene na tene, o na mũconorithĩtio iconorithia rĩtagathira na rĩtangĩriganĩra.
Home