Go Back

Isaia Chapter 7

• 1. NA GŨGĨKINYA atĩrĩ, atĩ matukũ ma Ahazu, mũrũ wa Jothamu wa Uzia, mũthamaki wa Juda-rĩ, Rezini, mũthamaki wa Suriata, na Peka wa Remalia, mũthamaki wa Isiraeli, makĩambata mathiĩ Jerusalemu makarĩtharĩke; no nĩmaaremirũo nĩ kũrĩhoota.
• 2. Nao andũ a nyũmba ya Daudi magĩkĩheo ũhoro ũcio makĩĩrũo atĩrĩ, Andũ a Suriata nĩmeturanĩire na a Efiraimu. Nayo ngoro ya Ahazu, o na ngoro cia andũ ake, ikĩinaina o ta ũrĩa mĩtĩ ya kĩrĩti ĩinainagio nĩ rũhuho.
• 3. Hĩndĩ ĩo Jehova agĩkĩĩra Isaia atĩrĩ, Ta umagara wee mwene, mwĩ na mũrũguo Sheari-jashubu, ũgatũngane na Ahazu o kũu mũthia-inĩ wa mũtaro ũrĩa uumĩte karia-inĩ ka rũgongo igũrũ, o njĩra-inĩ ya gĩtwari ya gũthiĩ gĩthaka kĩa mũthambia nguo,
• 4. ũmwĩre atĩrĩ, Wĩmenyerere na ũikare ũkindĩirie; na ndũgetigĩre, kana ũreke ngoro yaku yũrũo nĩ hinya nĩ ũndũ wa tũmĩthia tũu twĩrĩ twa icinga igũtoga ndogo; ndũkanetigĩre marakara marĩa meĩ ma Rezini na ma Suriata, o na ma mũrũ wa Remalia.
• 5. O na harĩa Suriata me na Efiraimu, o na mũrũ wa Remalia, maciranĩire magwĩke ũũru, makoiga atĩrĩ,
• 6. Rekei twambate tũkahũrane na Juda, tũkũnyarire, tũtharie handũ tũtonye kuo, tũcoke tũtue mũrũ wa Tabeeli mũthamaki wa gũthamaka kuo-rĩ,
• 7. Mwathani Jehova ekuuga ũũ: Atĩrĩrĩ, ũhoro ũcio ndũngĩrĩĩra, o na kana ũkinye.
• 8. Nĩ gũkorũo itũũra rĩrĩa inene rĩa Suriata nĩ Dameski, na mũnene wa Dameski nĩ Rezini; na rĩrĩ, mũira wa mĩaka mĩrongo ĩtandatũ na ĩtano ĩthire-rĩ, andũ a bũrũri wa Efiraimu nĩ kũhehenjwo makahehenjwo, na matigacoka gũtuĩka rũrĩrĩ;
• 9. ningĩ itũũra rĩrĩa inene rĩa Efiraimu nĩ Samaria, na mũnene wa Samaria nĩ mũrũ wa Remalia. Mũngĩaga gwĩtĩkia-rĩ, ti-itherũ mũtikehanda o na atĩa.
• 10. Ningĩ Jehova agĩcoka akĩarĩria Ahazu, akĩmwĩra atĩrĩ,
• 11. Wĩĩtĩrie kĩmenyithia he Jehova Ngai waku, kiume kũndũ kũriku mũno, kana o igũrũ matu-inĩ.
• 12. No rĩrĩ, Ahazu akiuga atĩrĩ, Ndiĩtia, kana ngerie Jehova o na atĩa.
• 13. Nake Isaia agĩkiuga atĩrĩ, Ta thikĩrĩriai, inyuĩ andũ a nyũmba ya Daudi, anga mũkuona ta arĩ ũndũ mũnyinyi mũno gũtũũra mũnogagia andũ, atĩ nĩkĩo mũkwenda kũnogia Ngai wakwa o nake?
• 14. Mwathani we mwene nĩakamũhe kĩmenyithia. Atĩrĩrĩ, mũirĩtu nĩakagĩa ihu, aciare kahĩĩ, agatue Imanueli.
• 15. Ngorono na ũũkĩ nĩcio gakarĩaga, kaamenya kũrega ũũru, na gwĩthurĩra maũndũ mega.
• 16. Amu-rĩ, kaana kau gatanamenya kũrega ũũru na gwĩthurĩra maũndũ mega, bũrũri wa athamaki acio erĩ ũthũũrĩte nĩũgathamwo ũtigwo ũtheri.
• 17. Matukũ nĩmagoka marĩa Jehova agakũrehithĩrie wee mwene, o na andũ aku, o na nyũmba ya thoguo, maũndũ matarĩ moka tamo gwata mũthenya ũrĩa Efiraimu aatiganire na Juda; namo maũndũ macio makoimana na mũthamaki wa Ashuri.
• 18. Na nĩgũgakinya atĩrĩ, atĩ mũthenya ũcio Jehova nĩakoigĩra ngi iria irĩ o mũthia-inĩ kũna wa njũĩ cia Misiri mĩrũri, aciĩte na iyũ, na ete njũkĩ iria irĩ bũrũri wa Ashuri.
• 19. Nacio nĩ gũũka igoka ciothe ciũmbe ihũhi-inĩ iria irĩ igaragaro, o na mĩatũka-inĩ ya ndwaro cia mahiga, o na mĩigua-inĩ guothe, o na morĩithio-inĩ mothe.
• 20. Mũthenya ũcio Mwathani akenjana na rũenji rũa ũhoyo, rũrĩa rũtũire mbarĩ ĩrĩa ĩngĩ ya rũũĩ rũa Farati, (naruo nĩruo mũthamaki wa Ashuri,) enjane naruo mũtwe, o nginya rũcuĩrĩ rũa kũgũrũ, ningĩ rũenji rũu rũnine nderu ciothe o gũcinina biũ.
• 21. Na mũthenya ũcio nĩgũgakinya atĩrĩ, atĩ mũndũ akarĩithia o mori ĩmwe na ng’ondu igĩrĩ;
• 22. na nĩgũgacoka gũtuĩke atĩrĩ, atĩ tondũ wa ũrĩa iria rĩgakorũo rĩingĩhĩte rĩrĩa igakamagwo, mũndũ ũcio akarĩaga ngorono, nĩ gũkorũo ngorono na ũũkĩ nĩcio ikarĩagwo nĩ mũndũ o wothe ũrĩa ũgatigwo atũũre bũrũri ũyũ.
• 23. Na nĩgũgakinya mũthenya ũcio atĩrĩ, atĩ kũndũ kũrĩa guothe kwarĩ mĩthabibu ngiri ĩmwe ingĩendirio cekeri ngiri ĩmwe-rĩ, nĩgũgakorũo o mĩtĩ ya mĩigua, o na cong’e.
• 24. Na mũndũ ũrĩa ũkagera kuo agathiaga agwete mĩguĩ na ũta, nĩ gũkorũo bũrũri ũcio wothe ũkaiyũra mĩtĩ ĩo ya mĩigua o na cong’e.
• 25. Nacio irĩma ciothe iria ciacimbagwo na macembe tene kũrĩa gũtetigagĩrũo mĩtĩ ĩo ya mĩigua na cong’e-rĩ, gũgatuĩka o gwa kũrĩithagio ng’ombe, na gwa kũrangagwo nĩ ndũru cia mbũri.

Home