Go Back

Isaia Chapter 63

• 1. Nũ ũyũ ũroka oimĩte Edomu, arĩ na nguo ndune irutĩtwo kũu Bozara? O ũyũ wĩhumbĩte nguo ĩrĩ riri mũno ũrathiĩ enenehetie nĩ ũndũ wa hinya mũnene ũrĩa e naguo? Nĩ niĩ ũrĩa waragia ndeto cia ũthingu, na ngagĩa hinya wa kũhonokania.
• 2. Nĩ kĩ gĩtũmĩte mathaga maku macio wĩkĩrĩte matunĩhe, nguo ciaku igagĩikara o ta cia mũndũ ũrangaga kĩhihĩro kĩa ndibei?
• 3. Nĩ kũranga nangĩte kĩhihĩro kĩa ndibei ndĩ o nyiki; naho ha ũhoro wa andũ a ndũrĩrĩ, hatirĩ o na ũmwe twarĩ nake; ĩĩ ti-itherũ ndamarangĩrĩirie na marakara makwa, ngĩkĩmamamĩrĩria na thĩ mũno na mang’ũrĩka makwa; nayo thakame yao ĩkĩnyĩrĩkĩra nguo ciakwa, nacio igĩkĩgĩa manyaga ciothe.
• 4. Nĩ gũkorũo ngoro yakwa yahĩahĩaga nĩ ũndũ wa mũthenya ũrĩa wa kũrĩhanĩria, naguo mwaka ũrĩa wa gũkũũra andũ akwa ũgĩkorũo ũkinyĩte.
• 5. Na niĩ ngĩcũthĩrĩria, ngĩona atĩ hatirĩ mũndeithia, ngĩkĩmaka nĩ ũndũ gũtiarĩ na mũndiirĩrĩri; na tondũ ũcio ngĩkĩhonokania na guoko gwakwa niĩ mwene, ngĩkĩĩrutanĩria nĩ mang’ũrĩka makwa.
• 6. Nacio ndũrĩrĩ ngĩcirangĩrĩria thĩ na marakara makwa, ngĩgĩtũma ituĩke o ta irĩĩtwo nĩ njohi nĩ ũndũ wa ũrĩa ng’ũrĩkĩte, nayo thakame yacio ngĩmĩita thĩ.
• 7. Nĩngũgweta mĩtugĩre ya Jehova, o na maũndũ marĩa ekaga ma gũtũma agoocwo, o ta ũrĩa maũndũ mothe matariĩ marĩa Jehova atũteithĩtie namo, o na ngwete wega ũrĩa mũnene ekĩte nyũmba ya Isiraeli, o ũcio amĩteithĩtie naguo, o ta ũrĩa tha ciake itariĩ, o na ta ũrĩa mĩtugĩre yake mĩingĩ mũno ĩtariĩ.
• 8. Nĩ ũndũ oigire atĩrĩ, Ti-itherũ acio nĩ andũ akwa, na nĩ ciana iria itangĩhenania; na tondũ ũcio agĩgĩtuĩka mũmahonokia.
• 9. Mathĩna-inĩ mao mothe-rĩ, o nake nĩaathĩnĩkire, nake mũraika ũrĩa wareketio nĩwe agĩkĩmahonokia; agĩkĩmakũũra nĩ ũndũ wa ũrĩa aamendete, o na akĩmaiguĩra tha; nake agĩkĩmoya, agĩgĩtũũra amakuuaga matukũ mothe kuuma o tene wa tene.
• 10. No rĩrĩ, nĩmaamũremire, makĩiguithia Roho wake mũtheru ũũru, na tondũ ũcio akĩgarũrũka agĩtuĩka thũ yao, nake we mwene akĩrũa mbaara nao.
• 11. Hĩndĩ ĩo magĩkĩririkana ũrĩa gwatariĩ matukũ-inĩ marĩa ma tene, o hĩndĩ ya Musa na andũ ake, makiuga ũũ: Atĩrĩrĩ, ũrĩa wamaambatirie akĩmaruta iria-inĩ me hamwe na mũrĩithi wa rũũru rũake-rĩ, akĩrĩ ha? Ĩ we ũrĩa wekĩrire Roho wake mũtheru gatagatĩ-inĩ kao,
• 12. na agĩtũma guoko gwake kwa ũnene gũtwarane na guoko kwa ũrĩo kwa Musa-rĩ, akĩrĩ ha? Ĩ we ũrĩa wagayũkanĩirie maĩ mbere yao nĩ getha egĩĩre igweta rĩa tene na tene,
• 13. o na akĩmatongoreria kũndũ kũriku, o ta ũrĩa mbarathi ĩtwaragwo werũ-inĩ, nĩ getha matikahĩngwo-rĩ, akĩrĩ ha?
• 14. Roho ũrĩa wa Jehova nĩwe watũmire mahurũkio, o ta ũrĩa ũhiũ ũthiaga kwarahio gĩtuamba-inĩ; ũguo noguo wee watongoririe andũ aku, nĩ getha wĩgĩĩre rĩĩtwa rĩa kũgoocwo.
• 15. Wee-rĩ, ta cũthĩrĩria thĩ ũrĩ o kũu igũrũ wĩrorere ũrĩa gũtariĩ ũrĩ o kũu gĩikaro-inĩ gĩaku kĩrĩa gĩtheru, o kĩu kĩa riri waku. Rĩu-rĩ, kaĩ maũndũ maku marĩa wĩkaga na kĩyo, o na hinya, makĩrĩ ha? Ũhoro waku wa ũrĩa ũnjiguagĩra tha, o na ũrĩa ũnjakayagĩra ngoro-inĩ yaku, nĩũgirĩrĩirio ũnginyĩrĩre.
• 16. Tondũ o na gwatuĩka Iburahimu ndatũũĩ, o nake Isiraeli agatũrega-rĩ, wee nĩwe ithe witũ. Wee, Jehova, nĩwe ithe witũ; narĩo rĩĩtwa rĩaku nĩ rĩrĩ, nĩ mũkũũri witũ kuuma tene tene.
• 17. Atĩrĩrĩ, wee, Jehova, nĩ kĩ gĩtũmaga ũtũhĩtithie njĩra ciaku, na ũkomia ngoro ciitũ itige gũgwĩtigĩra? Garũrũka nĩ ũndũ wa ndungata ciaku, o mĩhĩrĩga ĩno ĩtuĩtwo ũgai waku.
• 18. Bũrũri ũyũ waheire andũ aku arĩa aamũre-rĩ, nĩmaawĩgwatĩire ũgĩtuĩka wao o ihinda inyinyi, nacio thũ ciitũ nĩirangĩrĩirie handũ haku haamũre thĩ.
• 19. Na ithuĩ tũgagĩtuĩka o ta andũ arĩa matarĩ maathwo nĩwe o na rĩ, o na ta andũ arĩa matetanĩtio na rĩĩtwa rĩaku.

Home