Go Back

Isaia Chapter 57

• 1. Hĩ! Kaĩ andũ arĩa athingu no gũkua makuaga o ro ũguo, na gũtirĩ mũndũ ũngĩrũmbũiya ũhoro wao na ngoro yake-ĩ! O nao andũ arĩa maiguanagĩra tha no kweherio meheragio, na gũtirĩ mũndũ ũngĩĩciria ũrĩa andũ acio athingu meheragio matikone mũtino ũrĩa ũgũũka,
• 2. na magatonya thayũ-inĩ; mũndũ o wothe ũrĩa ũtũire athiaga na mĩthiĩre mĩerekereru, rĩu no gũkoma akomete mbĩrĩra-inĩ.
• 3. No rĩrĩ, kuhĩhĩriai haha hakuhĩ, inyuĩ ariũ a mũndũ-wa-nja ũrĩa ũragũraga, o inyuĩ a rũciaro rũa mũndũ-wa-nja mũtharia, na mũmaraya.
• 4. Ũcio mũtũrũhaga ciande nĩwe ũ, o we ũcio mwathamagĩria kanua mũkĩmũcomoragĩra rũrĩmĩ? Githĩ inyuĩ ti inyuĩ ciana iria ciagararaga watho, na rũciaro rũhenania,
• 5. o inyuĩ mwĩhũnagia thuti nĩ maũndũ marĩa mwĩkaga mwĩ mĩgandi-inĩ, o na mwĩ mũtĩ-inĩ o ũrĩa wothe mũruru; o inyuĩ mũthĩnjagĩra ciana gĩtuamba-inĩ, mĩatũka-inĩ ya ndwaro cia mahiga?
• 6. Igai rĩaku rĩĩ mahiga-inĩ marĩa manyoroku ma gĩtuamba-inĩ; macio-rĩ, nĩmo wĩthurĩire, namo nĩmo ũitĩrĩirie igongona rĩaku rĩa kĩndũ gĩa kũnyuwo, o na ũkamarutĩra ihaki. Atĩrĩrĩ, anga ndakirĩrĩria maũndũ ta macio?
• 7. Wee wĩakĩire icoorero kĩrĩma-inĩ kĩrĩa kĩraya igũrũ, kũndũ gũtũũgĩru, amu kũu nokuo ũthang’ataga ũgathiĩ kũrutĩra igongona.
• 8. O na ningĩ ihengere-inĩ cia mĩrango o na hingĩro-inĩ ciayo nĩwacũhĩtie kĩririkania kĩa ũndũ ũcio; ĩĩ, ti-itherũ, nĩ mũndũ ũngĩ waguũrĩirie nguo, tiga niĩ, mũkaambatania nake na kũu igũrũ ũneneheirie ũrĩrĩ waku, na ũgethondekera kĩrĩkanĩro kĩanyu nao, na rĩrĩa rĩothe wona ta ũkũhenerio ũkerekera na ya ũrĩrĩ.
• 9. O na ningĩ ũgacoka ũgathiĩ kwĩ mũnene wa ngai cia mĩhianano ũrĩa wĩtagwo Moloku, wĩhakĩte maguta ma goro, na ũgaitanga maguta maku maingĩ marĩa manungaga wega, nao arekio aku ũkamatũma mathiĩ kũndũ kũraya mũno, nawe ũgeconorithia wee mwene o nginya ũgekinyia kwa ngoma.
• 10. Wee nĩ kũnogia wenogirie na ng’endo icio cia gũthiĩ kũraya, no rĩrĩ, ndũigana gũkua ngoro o na hanini, tiga o gũkĩrĩrĩria wakĩrĩrĩirie kwĩĩkĩra hinya, na tondũ ũcio ndũigana kũringwo nĩ iringi.
• 11. Nake mũndũ ũrĩa wakũiguithĩtie guoya na ũkamwĩtigĩra-rĩ, nĩ ũrĩkũ, atĩ nĩkĩo ũkĩrĩrĩirie kwaga kwĩhokeka, na ũkaaga gũcoka kũndirikana, o na kana ũrũmbũiye ũhoro ũcio na ngoro yaku? Githĩ nditũire ndĩĩkirĩire kuuma o tene, nawe ũkaaga kwĩĩndigĩra?
• 12. Niĩ na niĩ nĩngacoka kuumbũranĩra ũhoro waku wa ũrĩa wagĩte ũthingu, namo mawĩra maku matirĩ ũndũ magakũguna naguo.
• 13. Hĩndĩ ĩrĩa ũgakaya-rĩ, mĩhianano ĩrĩa wĩyũnganĩirie nĩĩgĩkũhonokie! No rĩri, rũhuho nĩrũkamĩoya, o nayo mĩhũmũ ĩmĩeherie yothe; no rĩrĩ, ũrĩa ũikaraga eĩ’hokete niĩ nĩwe ũkegwatĩra thĩ ĩtuĩke yake, na agae kĩrĩma gĩakwa kĩrĩa kĩamũre gĩtuĩke gĩake.
• 14. Nake nĩagacoka oige atĩrĩ, Tũgũtani, tũgũtani, mũthondeke njĩra; na mũkũũre ithukĩ iria ihĩngaga andũ ithenge njĩra-inĩ ya andũ akwa.
• 15. Tondũ rĩrĩ, ũguo nĩguo Ũrĩa wĩ Igũrũ Mũno, We ũtũũgĩrĩtio mũno, ekuuga, o we ũrĩa ũtũũraga tene na tene, na agetwo Mũtheru, Atĩrĩrĩ, niĩ nĩ niĩ njikaraga o kũu igũrũ kũndũ gũtheru, ningĩ ngaikara ndĩ hamwe na mũndũ ũrĩa wĩ na ngoro ĩherete na ĩrĩa ĩĩnyihĩtie, nĩguo ngaarahũre roho wa mũndũ ũcio wĩnyihĩtie, o na ngaramũkie andũ acio maikaraga maherete na ngoro ciao.
• 16. Nĩ gũkorũo ndigũtũũra ngararanagia tene na tene, o na kana ndũũre ndũkũyanĩte hĩndĩ ciothe, andũ matikae gũkua ngoro, namo maroho ma andũ arĩa ndombire mahwererekere.
• 17. Amu nĩ gũtũkũya ndatũkũyanĩte nĩ ũndũ wa waganu wake wa gũcumĩkĩra indo ciene, ngĩkĩmũhũra, ngĩmũhitha ũthiũ wakwa na ngĩgwatwo nĩ matũkũya; nake agĩthiĩ o a’hutatĩire mĩthiĩre-inĩ ya ngoro yake.
• 18. No rĩrĩ, nĩnjokete kuona ũrĩa athĩnĩkĩte, na nĩngamũhonia: ningĩ nĩngamũtongoria, njoke ndĩmũũmĩrĩrie we mwene o na andũ arĩa mamũcakayagĩra.
• 19. Nĩ niĩ ndũmaga ũhoro ũmemerekio, kwĩranwo atĩrĩ, Gwĩ thayũ-ĩ! Ĩĩ, kũrogĩa thayũ kwĩ ũrĩa wĩ kũndũ kũraya mũno, o na ũrĩa wĩ gũkuhĩ; ũguo nĩguo Jehova ekuuga; na niĩ nĩngamũhonia.
• 20. No rĩrĩ, andũ arĩa aaganu matariĩ o ta iria rĩikĩtie ndihũ ciarĩo; nĩ ũndũ rĩtingĩhota kũhorera, namo maĩ marĩo nĩ gũikia maikagia ndaka na gĩko hũgũrũrũ-inĩ ciarĩo.
• 21. Nĩkĩo Ngai wakwa ekuuga atĩrĩ, Mũndũ ũrĩa mwaganu-rĩ, ndarĩ hĩndĩ angĩgĩa na thayũ.

Home