Go Back

Isaia Chapter 54

• 1. Atĩrĩrĩ, wee mũtumia mũthatu ũtaciaraga, ina rũĩmbo; itĩkana na kũina, wanĩrĩre mũno, wee ũtarĩ waigua ruo rũa kũrũmwo; nĩ gũkorũo ciana cia mũndũ-wa-nja ũrĩa ũtigĩtwo wiki nĩ nyingĩ gũkĩra cia mũndũ-wa-nja ũrĩa ũhikĩtio; ũguo nĩguo Jehova ekuuga.
• 2. Wĩaramĩrie handũ ha hema yaku, na ũtambũrũkithie matama ma ciikaro ciaku marĩa macunjurĩte, na ndũkamacaĩre; raihia mĩhĩndo ya hema yaku, o nacio higĩ ciayo ũcikindĩre makĩria.
• 3. Nĩ ũndũ nĩũkahurunjũkĩra mwena waku wa ũrĩo, o na wa ũmotho; naruo rũciaro rũaku nĩrũkegwatĩra ndũrĩrĩ ituĩke ciaruo, namo matũũra marĩa matigĩtwo ũtheri rũtũme matũũrũo nĩ andũ.
• 4. Menya wĩtigĩre, nĩ ũndũ ndũgaconoka; o na kana ũigue thoni, nĩ gũkorũo ndũrĩ hingo ũgaconorithio; nĩ ũndũ nĩũkariganĩrũo nĩ thoni cia ũrĩa waconokire ũnyinyi-inĩ waku, o naruo rũmena rũrĩa wamenetwo rĩrĩa waikarĩte wĩ wa ndigwa ndũgacoka kũrũririkana rĩngĩ o na rĩ.
• 5. Nĩ gũkorũo ũrĩa wakũũmbire nĩwe mũthuriguo, narĩo rĩĩtwa rĩake nĩ Jehova, Mũnene wa Ita; nĩngĩ Ũrĩa Mũtheru wa Isiraeli nĩwe mũgũkũũri, nake arĩĩtagwo Ngai mwene thĩ yothe.
• 6. Nĩ gũkorũo Jehova aragũcokia ta ũrĩ mũndũ-wa-nja ũrateetwo na akaigua ũũru na ngoro, o ta mũndũ-wa-nja wahikirio e mũnyinyi, na agacoka gũteo; ũguo nĩguo Ngai waku ekuuga.
• 7. Nĩ ũndũ ndĩragũteete kahinda kanini; no rĩrĩ, ngũgũcokanĩrĩria ngĩkũiguagĩra tha mũno.
• 8. Tondũ wa ũrĩa ndatũkũyanĩte mũno, ndĩrakũhithĩte ũthiũ wakwa kahinda kanini; no rĩrĩ, nĩngakũiguĩra tha ngĩgũtugaga na mĩtugĩre ĩrĩa ĩtagathira tene na tene; ũguo nĩguo Jehova, mũgũkũũri, ekuuga.
• 9. Nĩ gũkorũo harĩ niĩ-rĩ, ũndũ ũcio ũtariĩ o ta maĩ ma kĩguũ kĩa hĩndĩ ya Nuhu; nĩ ũndũ o ta ũrĩa ndehĩtire atĩ kĩguũ kĩa maĩ kĩa Nuhu gĩtigacoka gũũka gũkũ thĩ guothe, ũguo noguo ndĩĩhĩtĩte rĩu ngoiga atĩ ndigacoka gũtũkũyana nĩwe, o na kana ngũkũme.
• 10. Nĩ gũkorũo irĩma nĩikehera, o na ithũngũri ithamio; no rĩrĩ, mĩtugĩre yakwa ĩrĩa ngũtugaga nayo ndikehera harĩ wee, o na kana kĩrĩkanĩro gĩakwa kĩa ũiguano gĩthamio harĩ wee; ũguo nĩguo Jehova ũrĩa ũkũiguagĩra tha ekuuga.
• 11. Atĩrĩrĩ, itũũra rĩrĩ, wee ũnyarirĩtwo, na ũgathukathukwo nĩ kĩhukũkanio kĩa rũhuho, na ũkaaga ũhoreri, atĩrĩrĩ, mahiga maku ngamanyitithania na mũnyamũ wa rangi wa mĩthemba mĩingĩ mĩega; o nacio itina ciaku ndĩcihande na mahiga ma yakuti.
• 12. Ndirica ciaku-rĩ, ngacithondeka na mahiga mega matune, o nacio ihingo ciaku ndĩcithondeke na mahiga ma baregathu, nayo mĩhaka yaku yothe-rĩ, ĩirigwo na thingo cia mahiga marĩa me goro mũno.
• 13. Nacio ciana ciaku ciothe nĩikarutwo maũndũ nĩ Jehova, naguo ũiguano ũrĩa ikagĩa naguo nĩũkaneneha mũno.
• 14. Nawe nĩũgaikara ta ũhandĩtwo wega ũhoro-inĩ wa ũthingu, naguo ũhoro wa kũhinyĩrĩrio ũikare wĩ haraya mũno nawe, nĩ gũkorũo ndũkona ũndũ o na ũmwe wa gũkũguoyohia; nakĩo kĩmako nĩgĩgakũraihĩrĩria, nĩ ũndũ gĩtigagũthengerera.
• 15. Atĩrĩrĩ, hihi andũ nĩmakaarahũra ngũĩ, no rĩrĩ, niĩ ndigakorũo ũhoro-inĩ ũcio. Mũndũ o wothe ũrĩa ũkaarahũra ngũĩ agũũkĩrĩre-rĩ, nĩ kũgũithio akagũithio nĩwe.
• 16. Atĩrĩrĩ, nĩ niĩ ndombire mũturi ũrĩa ũhurutaga mwaki wa makara, agacoka agathondeka indo cia igera iria cia kũruta wĩra wake nacio; o nake mũndũ ũrĩa wananganaga akaninana nĩ niĩ ndĩmũũmbĩte.
• 17. Gũtirĩ mũtĩ wa mbaara o na ũrĩkũ, ũrĩa ũthondeketwo wa gũgũũkĩrĩra, ũkaagĩrĩra wĩra-inĩ waguo; ningĩ wĩ cira-inĩ-rĩ, nĩũkahoota ciugo ciothe cia mũndũ ũrĩa ũgagũũkĩrĩra. Rĩu nĩrĩo igai rĩa ndungata cia Jehova, o naguo ũhoro wacio wa gũtuwo thingu uumaga kũrĩ niĩ; ũguo nĩguo Jehova ekuuga.

Home