Go Back

Isaia Chapter 53

• 1. Nũ wĩtĩkĩtie ũhoro ũrĩa aaiguire na ithuĩ? O nakuo guoko kwa Jehova-rĩ, kũguũrĩirio ũ?
• 2. Nĩ ũndũ ndungata ĩo yatũire ĩkũraga ĩrĩ mbere yake o ta mũtĩ mwĩthĩ, o na ta mũri ũmerete rũng’ũrĩ-inĩ; ndĩarĩ kĩĩrorerũa, o na kana ĩgathakara o na atĩa na rĩrĩa tũkũmĩona ũthiũ, tũtimĩonaga ĩrĩ na ũthaka o na atĩa wa gũtũma tũmĩĩrirĩrie.
• 3. Nĩyamenirũo o na ĩkĩregwo nĩ andũ; nĩ mũndũ wĩ kĩeha, ũrĩĩte thĩna, o na agatuĩka ta mũndũ ũhithagwo ũthiũ nĩ andũ a gũkũ thĩ na akamenwo nĩo, na tũtiigana kũmũtĩa.
• 4. Ti-itherũ ruo ruitũ nĩwe waruoire, o nakĩo kĩeha giitũ nĩwe wagĩkuuire; no ithuĩ tũkĩmuona ta ahootekete e mũhũre nĩ Ngai, o na akanyarirũo.
• 5. No rĩrĩ, aatihirio nĩ ũndũ wa mahĩtia maitũ, o na akĩhehenjwo nĩ ũndũ wa waganu witũ; nakuo kũhũrũo kũrĩa gwatũmire tũgĩe na ũiguano, nĩwe wagũire nakuo, na ithuĩ tũhonagio nĩ ũndũ wa mĩtunda ya kũrĩa aahũrirũo.
• 6. Ithuothe nĩtũtigĩte njĩra ĩrĩa njega, nĩ gũturura tũtururĩte ta mbũri, o mũndũ agathiĩ na njĩra yake mwene; nake Jehova nĩamũigĩrĩire waganu witũ ithuothe.
• 7. Nĩaahinyĩrĩirio; no rĩrĩ, nĩ kwĩnyihia enyihirie we mwene, na ndaigana gũtumũra kanua; aakirire o ta ũrĩa gatũrũme gakiraga ki gagĩthiĩ gũthĩnjwo, agĩgĩkira o ta ũrĩa ng’ondu ĩkiraga ki ĩrũgamĩte mbere ya mũmĩmuri guoya; ti-itherũ ndaigana gũtumũra kanua.
• 8. Kweherio eheririo nĩ ũndũ wa ũrĩa aahinyĩrĩirio mũno na agatuĩrũo cira ũũru hatarĩ kĩhooto; naho ha ũhoro wa andũ a rũciaro rũake-rĩ, nũ thĩinĩ wao wegeragĩria atĩ aathengirio oime kũrĩ arĩa matũũraga muoyo? Nĩ kũhũrũo aahũrirũo nĩ ũndũ wa mahĩtia ma andũ akwa.
• 9. Na rĩrĩa aakuire-rĩ, aaigirũo mbĩrĩra-inĩ cia andũ aaganu, o na andũ arĩa itonga, o na harĩa atekĩte ũndũ o na ũrĩkũ mũũru, o na kana kanua gake gakĩaria maheni o na atĩa.
• 10. No rĩrĩ, Jehova nĩonire arĩ wega amũhehenje, agĩkĩmũiguithia ũũru ngoro; na rĩrĩ, hĩndĩ ĩrĩa akeruta muoyo wake ũtuĩke igongona rĩa mehia, nĩakona rũciaro rũake, na nĩakaingĩhia matukũ make, o namo maũndũ marĩa Jehova endaga mekwo nĩmakagaacĩra nĩ ũndũ wake.
• 11. Nĩakona kĩguni kĩa ũrĩa ngoro yake yanaigua ruo mũno, na tondũ ũcio nĩakaigua wega. O na ningĩ tondũ wa ũmenyi wayo, ndungata ĩo yakwa thingu ĩgatũma andũ aingĩ matuwo athingu; namo maũũru mao nĩĩkamakuua ĩmeherie.
• 12. Tondũ ũcio nĩngamĩgayanĩria igai hamwe na arĩa anene, o na magayane itaha na arĩa marĩ hinya; nĩ ũndũ nĩyeheanire ĩkue, na ĩgĩtaranĩrio hamwe na arĩa aagarari watho. Ĩndĩ, nĩ gũkuua yakuuire mehia ma andũ aingĩ; o nao aagarari watho ĩkĩmathaithanĩrĩra.

Home