Go Back

Isaia Chapter 5

• 1. TA REKA nyinĩre ũrĩa mwendwa wakwa rũĩmbo rũake, ũcio nyendete mũno, rũkoniĩ mũgũnda wake wa mĩthabibu. Ũcio mwendwa wakwa aarĩ na mũgũnda wa mĩthabibu kĩrĩma-inĩ handũ hanoru mũno,
• 2. nake akĩũthiũrũrũkĩria mũtaro, akĩũngania mahiga mothe marĩa maarĩ kuo, akĩmate, agĩcoka akĩhanda mũthemba wa mũthabibu ũrĩa mwega gũkĩra ĩrĩa ĩngĩ, agĩgĩaka mũthiringo wa nyũmba ndaya na igũrũ o kũu gatagatĩ kaguo, akĩenja handũ ha kũhihĩra thabibu kũu thĩinĩ waguo; agĩgĩikara ehokete atĩ mũgũnda ũcio nĩũgaciara thabibu njega; no rĩrĩ, waciarire o thabibu-cia-gĩthaka.
• 3. Rĩu-rĩ, inyuĩ andũ aya mũtũũraga Jerusalemu, o na inyuĩ andũ a Juda, ta tũtuithaniei cira, niĩ na mũgũnda ũcio wakwa wa mĩthabibu.
• 4. Atĩrĩrĩ, nĩ ũndũ ũrĩkũ ũngĩagĩĩkirũo mũgũnda ũcio wakwa wa mĩthabibu itaakĩwĩkire? Kũngĩkorũo nĩ ũguo-rĩ, wagĩciarire thabibu-cia-gĩthaka nĩkĩ, na niĩ ndũire ndĩĩhokete atĩ nĩũgaciara thabibu njega?
• 5. Atĩrĩrĩ, rĩu ta kĩrekei ndĩmwĩre ũrĩa ngwĩka mũgũnda ũcio wakwa wa mĩthabibu; nĩ kweheria ngweheria rũgiri rũaguo, ndĩũrĩithie, njoke ’tharie rũirigo rũaguo, ũrangwo na magũrũ,
• 6. ndĩũtige wanangĩkĩte. Naguo ndũgacoka gũcehwo mĩtĩ yaguo, kana ũrĩmwo, no nĩ kũmera ũrĩmeraga mĩtĩ ya mĩigua na rĩa ta cong’e; ningĩ njathane njĩre matu atĩ mbura ndĩkanauurĩre.
• 7. Nĩ gũkorũo mũgũnda wa mĩthabibu ũrĩa wa Jehova Mũnene wa Ita nĩguo nyũmba ya Isiraeli, nao andũ a Juda nĩo mũtĩ ũrĩa mwega ekenagĩra nĩguo. Nake ehokaga atĩ nĩarĩonaga cira wa kĩhooto; no rĩrĩ, ũhoro wa kũhinyanĩrĩria noguo onaga. Ningĩ akehoka atĩ nĩekuona ũthingu; no rĩrĩ, kĩrĩro nokĩo aiguaga.
• 8. Hĩ! Kaĩ andũ arĩa maikaraga makĩingaingĩhagia nyũmba ciao marĩ na haaro-ĩ, o acio mongagĩrĩra mĩgũnda yao nĩguo ĩnyitane ta ĩrĩ ũmwe o nginya hakaaga handũ ha gũtigĩria arĩa angĩ, nĩguo magĩtũũre marĩ oiki kũu bũrũri ũcio!
• 9. Jehova Mũnene wa Ita nĩwe wanjarĩirie, ngĩĩiguĩra na matũ makwa niĩ mwene, akĩnjĩra ũũ: Ti-itherũ nyũmba nyingĩ nene na ikaagĩra igatigwo ikirĩte ihooru, ciagĩte andũ a gũciikara.
• 10. Nĩ ũndũ-rĩ, mũgũnda wa eka ikũmi wa mĩthabibu, uumithio waguo ũrĩtuĩkaga o ta mbathi ĩmwe, nacio mbeũ cia kori ĩmwe, uumithio wacio ũrĩtuĩkaga o eba ĩmwe.
• 11. Hĩ! Kaĩ andũ arĩa marokaga gũũkĩra rũcinĩ tene nĩguo makahang’ĩre njohi, mamĩnyue mũno, marĩ na haaro-ĩ! O acio maikaraga gũgakũra o nginya rĩrĩa marĩrũndwo nĩ ndibei.
• 12. Inanda iria nene cia mũgeto, o na iria nyinyi, nĩcio cionekaga maruga-inĩ mao, na tũhembe, na mĩtũrirũ, hamwe na ndibei; no matirũmbũyagia wĩra wa Jehova, kana mageciria maũndũ marĩa mekagwo na moko make.
• 13. Tondũ ũcio andũ akwa nĩ atahe, nĩ kwaga kũmenya maũndũ, na andũ ao arĩa atĩĩku nĩ ahooteku nĩ ng’aragu, na ikundi nyingĩ thĩinĩ wao ikahooteka nĩ nyota.
• 14. Tondũ ũcio Kwa-Ngoma nĩkwĩaramĩtie nĩ ũndũ wao, ta gwathamĩtie kanua gakuo gũtekũgerera; naguo riri wao wa ũrĩa mekĩrĩirũo, o na kũingĩha kũrĩa maingĩhĩte, o na ngothogotho ya inegene rĩao-rĩ, maũndũ macio mothe nĩmaikũrũkĩte magatonya kuo, hamwe na mũndũ o wothe wao ũrĩa mũkeni.
• 15. Tondũ ũcio mũndũ ũrĩa ũtarĩ mũnene aikaraga e mũinamanie, o nake ũrĩa mũnene akanyihanyihio, naruo rũng’athio rũa maitho ma andũ arĩa etĩi rũkanyihio;
• 16. no rĩrĩ, Jehova Mũnene wa Ita, nĩwe mũnenehie nĩ ũndũ wa ũrĩa atuanagĩra cira na kĩhooto, nake Mũrungu, o we Ũrĩa Mũtheru, nĩwe ũgũtũũra onagwo e mũthingu kũna kũna.
• 17. Hĩndĩ ĩo tũgondu nĩtũkarĩithagio o harĩa he na ũrĩithio, o nakuo kũndũ kũrĩa kwanangĩku kwa andũ arĩa aaramu nĩkuo oki makarĩithagia ndũru ciao.
• 18. Hĩ! Kaĩ andũ arĩa magucagia ũũru na mĩhĩndo ya maũndũ ma tũhũ marĩ na haaro-ĩ! O acio magucagia mehia na mĩkanda ya ngari,
• 19. na makoigaga atĩrĩ, Ndakĩhĩkĩrĩrie wĩra wake aũrute narua nĩ getha tũwone! O namo maũndũ marĩa Ũcio Mũtheru wa Isiraeli ataaranaga namo-rĩ, matigĩkuhĩhĩrie moke tũmamenye!
• 20. Hĩ! Kaĩ andũ arĩa matuaga maũndũ moru mega, o namo marĩa mega makamatua moru, marĩ na haaro-ĩ! O acio matuaga nduma ũtheri, naguo ũtheri makaũtua nduma, ningĩ ũrũrũ makaũtua kĩndũ kĩĩ mũrĩo, nakĩo kĩrĩa kĩĩ mũrĩo magagĩtua kĩrũrũ!
• 21. Hĩ! Kaĩ andũ arĩa meyonaga ta marĩ ogĩ, o nao arĩa meyonaga ta marĩ na ũmenyi wa kũbarĩrĩra maũndũ, marĩ na haaro-ĩ!
• 22. Hĩ! Kaĩ andũ arĩa me hinya wa kũnyua ndibei, na makohĩgĩrĩra ũthondeki wa kĩndũ kĩrũrũ gĩa gũtũma andũ marĩwo, marĩ na haaro-ĩ!
• 23. Nao nĩo matuaga mũndũ mwaganu atĩ nĩ mũthingu nĩ ũndũ wa ũrĩa mahakĩtwo, nake ũrĩa mũthingu makamũthahĩria ũthingu wake!
• 24. Tondũ ũcio, o ta ũrĩa rũrĩrĩmbĩ rũa mwaki rũcinaga itira iria itigĩtwo mũgũnda ikaninwo biũ, o na ta ũrĩa nyeki ĩrĩa nyũmũ ĩgũaga thĩ yahutio nĩ rũrĩrĩmbĩ rũa mwaki-rĩ, ũguo noguo gĩtina kĩao gĩgatuĩka o ta kĩndũ kĩbuthu, o nakĩo kĩro kĩao kĩgũrũkio na igũrũ ta rũkũngũ; nĩ gũkorũo nĩmaregete watho wa Jehova Mũnene wa Ita, na makamena ndũmĩrĩri ya Ũcio Mũtheru wa Isiraeli.
• 25. Tondũ ũcio marakara ma Jehova nĩmaakanĩte mokĩrĩre andũ ake, na agatambũrũkia moko amatharĩkĩre, na akamahũra; irĩma nacio igathingitha na ciimba ciao ikaaraganio njĩra gatagatĩ ta indo iteetwo. Na rĩrĩ, o na harĩa gũtariĩ ũguo-rĩ, marakara ma Jehova matirĩ marahũahũa guoko gwake no gũtambũrũkĩtio o na rĩu.
• 26. Nake nĩakahanda bendera handũ igũrũ, ete ndũrĩrĩ iria irĩ kũraya mũno, aciĩte na iyũ, ciume ituri-inĩ cia thĩ; nacio ciũke iteng’erete na ihenya mũno.
• 27. Thĩinĩ wacio-rĩ, gũtikagĩa mũndũ o na ũmwe ũkũnoga, kana ũkũhĩngwo; ningĩ gũtirĩ mũndũ o na ũmwe wacio ũkagwatwo nĩ toro, kana acũnge, kana mĩcibi ĩrĩa meyohete ĩregere, o na kana mĩkwa ya iratũ ciao ĩtuĩke.
• 28. Nao nĩo me na mĩguĩ mĩũgĩ mũno, na mota mao mothe makagetwo; mahũngũ ma mbarathi ciao matariĩ ta ihiga rĩa nyaigĩ, namo magũrũ ma ngari ciao cia ita mathiaga o ta rũhuho.
• 29. Mũthungurumo wao ũgatuĩka ta wa mũrũthi, nao magathunguruma o ta njaũ cia mĩrũthi. Ĩĩ, ti-itherũ makararama, na matahe indo mathiĩ nacio, maciinũkie kwao, na gũtikoneka wa gũcicokia.
• 30. Hĩndĩ ĩo makararama o ta ũrĩa iria rĩrurumaga rĩgĩikia ndihũ; na mũndũ angĩgĩcoka kũrora bũrũri ũcio-rĩ, akona atĩ no nduma theri ĩrĩ kuo, na maũndũ ma gũthĩnania; o naguo ũtheri nĩũgathiĩkĩrĩrio nĩ matu makuo.

Home