Go Back

Isaia Chapter 45

• 1. Atĩrĩrĩ, ũyũ nĩguo ũhoro ũrĩa Jehova erĩte mũndũ wake ũrĩa ũitĩrĩirio maguta, na nĩwe Kurusu, o we ũrĩa niĩ ’nyitĩte guoko gwake nĩguo ndoorie ndũrĩrĩ iria irĩ mbere yake. Niĩ nĩ kuohora ngohora ndoho njohero-inĩ cia athamaki nĩ getha mamũhingũragĩre mĩrango mbere yake, na ndagakora ihingo cia matũũra mao ihingĩtwo.
• 2. Nĩ niĩ ngathiaga mbere yaku, nakuo kũndũ kũrĩa kwĩ na tũthũngũri nĩngakwaraganithia wega, o nayo mĩrango ya icango ndĩmiunangithie tũcunjĩ, o nayo mĩgĩĩko ĩrĩa mĩtungu ya kĩgera ndĩmiunangithie;
• 3. na ningĩ nĩngakũhe indo cia bata ĩrĩa ihaĩtwo nduma-inĩ, o na ũtonga ũrĩa ũhithĩtwo kũndũ gũtoĩo, nĩ getha ũmenye atĩ niĩ nĩ niĩ Jehova, o we Ngai wa Isiraeli ũrĩa ũgwĩtĩte agĩkũgwetaga rĩĩtwa.
• 4. Nĩ gũkorũo ngwĩtĩte ngĩkũgwetaga rĩĩtwa nĩ ũndũ wa Jakubu ndungata yakwa, o na Isiraeli mũndũ wakwa ũrĩa mũthure, o na ngagũtua rĩĩtwa rĩĩ igweta, o na harĩa ũtanjũĩ.
• 5. Niĩ nĩ niĩ Jehova, na gũtirĩ ũngĩ o na ũrĩkũ; thengia o niĩ-rĩ, hatirĩ Ngai ũngĩ. Nĩ niĩ ngakuoha ndoho o na harĩa ũtanjũĩ,
• 6. nĩ getha ũhoro ũmenyũo kuuma irathĩro-inĩ rĩa riũa, o na kuuma ithũĩro-inĩ rĩarĩo, atĩ gũtirĩ ũngĩ thengia o niĩ nyiki; niĩ nĩ niĩ Jehova, na gũtirĩ ũngĩ o na ũrĩkũ.
• 7. Nĩ niĩ ndũmaga kũgĩe ũtheri, o nayo nduma ngatũma ĩgĩe kuo; nĩ niĩ ndũmaga kũgĩe thayũ, na ngatũma kũgĩe ũũru; nĩ niĩ Jehova ũrĩa wĩkaga maũndũ macio mothe.
• 8. Atĩrĩrĩ, inyuĩ matu-inĩ igũrũ, rekei ime rĩtaate thĩ, o na inyuĩ matu marĩa mairũ itĩrĩriai ũthingu thĩ. Thĩ nayo-rĩ, nĩyemũke, ĩciare ũhonokio, ningĩ ĩkunũke kũgĩe na ũthingu. Niĩ Jehova nĩ niĩ ndũmaga ũndũ ũcio ũgĩe kuo.
• 9. Hĩ! Kaĩ mũndũ ũrĩa ũgianaga na Mũmũũmbi e na haaro-ĩ! Atariĩ o ta rũgĩo rũĩ thĩinĩ wa ngĩo iria ingĩ cia gũkũ thĩ! Githĩ rĩũmba rĩakĩhota kũũria ũrĩa ũũmbaga indo narĩo ũũ: Nĩ kĩ ũromba? O na kana ciũmbe ciaku ciuge ũũ: Ndarĩ moko?
• 10. Hĩ! Kaĩ mũndũ ũrĩa wĩraga ithe ũũ: Nĩ kĩ ũciaraga? arĩ na haaro-ĩ! O na kana akoria mũndũ-wa-nja atĩrĩ, Wee nawe-rĩ, ruo rũrĩa wĩ naruo rũa kũrũmwo nĩ rũa kĩ?
• 11. Jehova, Ũrĩa mũtheru wa Isiraeli, o na Mũmũũmbi, ekuuga ũũ: Atĩrĩrĩ, anga nĩ kwenda mwendete kũnjũria ũhoro wa maũndũ marĩa magoka, o na kana mũnjathe ũhoro-inĩ wa ariũ akwa, o na wa wĩra ũrĩa ndutaga na moko makwa?
• 12. Nĩ niĩ ndatũmire thĩ ĩgĩe kuo, na ngĩũmba andũ mamĩikarage. O na ningĩ nĩ niĩ ndatambũrũkirie matu-mairũ na moko makwa, nacio mbũtũ ciothe ciakuo nĩ niĩ ndaciathire ciĩyumĩrie.
• 13. Mũndũ ũcio-rĩ, nĩ niĩ ndĩmwarahũrĩte na kĩhooto, nayo mĩthiĩre yake yothe nĩngatũma ĩrũngarĩrĩrie. Ũcio nĩwe ũgaaka itũũra rĩakwa, na nĩwe ũgatũma andũ akwa arĩa maarindũrirũo marekwo methiĩre o ro ũguo, matekũrutĩrũo kĩndũ gĩa kũmakũũra, o na kana kũrutwo ihaki nĩ ũndũ wao; ũguo nĩguo Jehova Mũnene wa Ita ekuuga.
• 14. Ningĩ Jehova ekuuga ũũ: Atĩrĩrĩ, aruti wĩra a Misiri, o na onjorithia a Kushi, o na andũ arĩa marĩ ciũga ndaya a Sabea, nĩmagoka harĩ wee, matuĩke aku, na nĩwe makarũmagĩrĩra; nĩmagoka mohetwo na mĩnyororo, makũinamĩrĩre maturumithĩtie mothiũ mao thĩ, o na magũthaithage makiugaga, atĩrĩ, Ti-itherũ Mũrungu e thĩinĩ waku, na gũtirĩ ũngĩ o na ũrĩkũ; ĩĩ, ti-itherũ, gũtirĩ Ngai ũngĩ.
• 15. Ti-itherũ nĩwe Mũrungu ũrĩa ũtũire ta wĩhithĩte, o wee Ngai wa Isiraeli, na nĩwe Mũhonokania.
• 16. Nĩmagaconorithio maconoke othe biũ; andũ arĩa mathondekaga mĩhianano nĩmagaconorithio othe hamwe.
• 17. No rĩrĩ, Isiraeli nĩakahonokio nĩ Jehova atũũre ahonokete tene na tene; inyuĩ mũtigaconoka, o na kana mũconorithio tene na tene.
• 18. Nĩ gũkorũo Jehova ũrĩa wombire matu marĩa mairũ, nake nĩwe Ngai, na nĩwe wathondekire thĩ, agĩtũma ĩgĩe, na agĩcoka akĩmĩrũmia wega, na ndaamĩũmbire hatarĩ ũrĩa yatariĩ, no kũũmba aamĩũmbire ĩtũũragwo nĩ andũ, ekuuga ũũ: Niĩ nĩ niĩ Jehova, na gũtirĩ ũngĩ o na ũrĩkũ.
• 19. Ndirĩ ndaaria na hitho, ta ndĩ bũrũri wĩ nduma; ndirĩ ndera rũciaro rũa Jakubu ũũ: Nongoriai tũhũ. Niĩ Jehova njaragia ũhoro wa ũthingu, na ngoimbũra maũndũ marĩa merekereire.
• 20. Atĩrĩrĩ, wĩcokanĩrĩriei mũũke. Inyuĩ arĩa mwĩũrĩire thĩinĩ wa ndũrĩrĩ mũkahonoka-rĩ, ta kuhanĩrĩriai. Andũ arĩa mathiaga makuuĩte mĩtĩ ya mĩhianano yao ya gwacũhio, na makahoya ngai ĩrĩa ĩtangĩhota kũhonokania-rĩ, matirĩ ũmenyi.
• 21. Umbũrai ũhoro, na mũũhunjanĩrie; ĩĩ, ti-itherũ, rekei andũ macire marĩ othe hamwe. Nũ waheanaga ũhoro ũcio gwata tene o tene? Nũ wauumbũrire tene? Githĩ ti niĩ, Jehova? Na gũtirĩ Ngai ũngĩ o na ũrĩkũ thengia o niĩ nyiki. Niĩ o niĩ ndĩ Mũrungu wĩ kĩhooto, o na Mũhonokania. Ti-itherũ gũtirĩ ũngĩ o na ũrĩkũ, tiga niĩ.
• 22. Atĩrĩrĩ, inyuĩ ituri ciothe cia thĩ, rongoriai harĩ niĩ, mũhonokio, nĩ gũkorũo niĩ nĩ niĩ Mũrungu, na gũtirĩ ũngĩ o na ũrĩkũ.
• 23. Niĩ nĩndĩĩhĩtĩte ngĩgwetaga rĩĩtwa rĩakwa, niĩ mwene, naguo ũhoro ũkoima kanua gakwa na kĩhooto, na ndũgacoka kũhũndũka o na atĩa, wa atĩ maru mothe magaturio mbere yakwa, nacio nĩmĩ ciothe ciĩhĩte ikiugaga ndungatagĩrũo.
• 24. Hĩndĩ ĩo gũkeranwo ũũ: Ũhingu, o na hinya-rĩ, monekaga o thĩinĩ wa Jehova wiki! Nao andũ-rĩ, no kũrĩ we makerekera; no rĩrĩ, andũ othe arĩa maamũrakarĩire nĩmagaconoka.
• 25. Na rĩrĩ, rũciaro ruothe rũa Isiraeli nĩrũkonagwo ta rũtuĩtwo rũthingu nĩ ũndũ wa Jehova, naruo nĩ kwĩraha rũkerahaga.

Home