Go Back

Isaia Chapter 43

• 1. No rĩrĩ, rĩu wee, Jakubu, Jehova ũcio watũmire ũgĩe muoyo egũkwĩra ũũ, o nawe Isiraeli-rĩ, ũrĩa wakũũmbire ekuuga atĩrĩ, Menya wĩtigĩre, nĩ gũkorũo niĩ nĩ niĩ ngũkũũrĩte; ningĩ ngwĩtĩte na ũndũ wa gũkũgweta rĩĩtwa rĩaku; wee nĩwe wakwa.
• 2. Hĩndĩ ĩrĩa ũkũgera maĩ-inĩ ũkĩhĩtũkĩra kuo-rĩ, ndĩrĩkoragwo ndĩ hamwe nawe; o na ũkĩgera njũĩ-inĩ-rĩ, itigakũrindania; o na hĩndĩ ĩrĩa ũkũgera mwaki-inĩ-rĩ, ndũgacinwo nĩguo, o na kana ũrĩrĩmbũkĩrũo nĩ rũrĩrĩmbĩ rũaguo.
• 3. Nĩ gũkorũo niĩ nĩ niĩ Jehova Ngai waku, o we Ũrĩa Mũtheru wa Isiraeli, na nĩ niĩ mũhonokia waku; nĩ’heanĩte bũrũri wa Misiri ũtuĩke kĩndũ gĩa gũgũkũũra, o nakuo Kushi na Sela ngakũheana ithenya rĩaku.
• 4. Kuona atĩ nĩũtũire wonagwo ta wĩ bata mũno nĩ niĩ, nĩkĩo wĩkĩrĩirũo, o na niĩ ngakwenda; tondũ ũcio nĩngũneana andũ angĩ nĩ ũndũ waku, o nacio ndũrĩrĩ ndĩcineane o ro ũguo ithenya rĩa muoyo waku.
• 5. Menya wĩtigĩre, nĩ gũkorũo ndĩ hamwe nawe. Njiaro ciaku-rĩ, ngacirehe ndĩcirutĩte mwena wa irathĩro, na ngũcokererie ngũrutĩte mwena wa ithũĩro.
• 6. Nĩ kwĩra ngera gathigathini atĩrĩ, Maneane; o nakuo gũthini ndĩkwĩre atĩrĩ, Tiga kũmagirĩrĩria; ariũ akwa-rĩ, kĩmarehei moime kũndũ kũraya, o nao airĩtu akwa-rĩ, marehei moime ituri-inĩ cia thĩ,
• 7. o acio othe metanagio na niĩ, o acio ndombire nĩ getha riri wakwa woneke. Nĩ niĩ ndamombire; ĩĩ, ti-itherũ, acio nĩo wĩra wa moko makwa.
• 8. Umiai atumumu na nja, o acio me na maitho; o na andũ arĩa mataiguaga, o acio me na matũ.
• 9. Andũ othe a ndũrĩrĩ nĩmacokanĩrĩrio hamwe, nao andũ a mabũrũri mothe nĩmongane. Nĩ mũndũ ũrĩkũ thĩinĩ wao ũngĩhota kuumbũra ũhoro, na atuonie ũhoro wa maũndũ ma tene? Ta nĩmarehe aira ao nĩ getha monanie atĩ ũhoro wao nĩ wa ma o ma o na kana marekwo maigue ũhoro moige atĩrĩ, Ũcio nĩ wa ma.
• 10. Inyuĩ nĩ inyuĩ aira akwa, ũguo nĩguo Jehova ekuuga, o na nĩ inyuĩ ndungata ciakwa iria ’thurĩte, nĩ getha mũ’menye na mũnjĩtĩkie, na mũmenye atĩ nĩ niĩ we; mbere yakwa-rĩ, gũtiarĩ Ngai ũngĩ wombĩtwo, o na nĩngĩ thutha wakwa gũtikagĩa ũngĩ.
• 11. Niĩ o niĩ-rĩ, nĩ niĩ Jehova, na thengia o niĩ, gũtirĩ mũhonokania ũngĩ.
• 12. Ũrĩa njĩkĩte-rĩ, nĩ kuumbũra nyumbũranĩire ũhoro, na ngahonokania, o na ngonania ũrĩa maũndũ matariĩ, rĩrĩa gũtaarĩ ngai ũngĩ thĩinĩ wanyu. Tondũ ũcio nĩ inyuĩ aira akwa, ũguo nĩguo Jehova ekuuga, o na nĩ niĩ Mũrungu.
• 13. Atĩrĩrĩ, gwata hĩndĩ ĩrĩa kwaambĩrĩirie kũgĩa mũthenya-rĩ, niĩ nĩ niĩ we. Gũtirĩ mũndũ o na ũmwe ũngĩhota kũhonokia mũndũ amũrute guoko-inĩ gwakwa. Kũruta nĩngaruta wĩra-ĩ! Nũ ũgakĩgiria ũrutĩke?
• 14. Atĩrĩrĩ, Jehova, mũkũũri wanyu, o we Ũrĩa Mũtheru wa Isiraeli, ekuuga ũũ: Nĩ kũrekania ndekanĩtie Babuloni nĩ ũndũ wa ũhoro wanyu, na nĩngatũma anene akuo maikũrũke rũũĩ othe, o Akalidei acio marĩ marikabu-inĩ ciao iria mekenagĩra nĩcio, makĩũrĩra thũ ciao.
• 15. Niĩ nĩ niĩ Jehova, Ũrĩa Mũtheru wanyu, na nĩ niĩ Mũũmbi wa Isiraeli, na Mũthamaki wanyu.
• 16. Atĩrĩrĩ, Jehova, o we ũrĩa ũtemaga njĩra iria-inĩ, o na agatema gacĩra kũndũ kũrĩa kũrĩ maĩ me hinya,
• 17. na akoimagarithia ngari cia ita, o na mbarathi, o na mbũtũ cia ita hamwe na anene a cio, ekuuga ũũ: Hĩ! Magakoma othe hamwe, na maticoke kwarahũka; nĩmacingimanĩtio makahora ta rũtambĩ rũa ũguta.
• 18. No rĩrĩ, tigai kũririkana maũndũ marĩa mahĩtũkĩte, o na kana mwĩcũranie maũndũ ma tene.
• 19. Atĩrĩrĩ, nĩngwĩka ũndũ ũngĩ mwerũ, naguo ũgũkunũka o ro rĩu; githĩ mũtirĩkĩũmenya? Ũrĩa ngwĩka nĩguo ũũ, atĩ nĩngatema njĩra werũ-inĩ, o nakuo rũng’ũrĩ-inĩ ndũme kũgĩe na njũĩ.
• 20. Nyamũ cia gĩthaka ta mbwe, na nyaga, nĩikanjĩkĩrĩra, nĩ gũkorũo kũu werũ-inĩ nĩngatũma kũgĩe na maĩ, o na ndũme o kũu rũng’ũrĩ-inĩ kũgĩe na njũĩ, nĩ getha andũ akwa manyuage maĩ kuo, o andũ arĩa akwa athure;
• 21. nao nĩo andũ arĩa ndeyũmbĩire, nĩ getha maheanage ũhoro wa ũrĩa njagĩrĩirũo nĩ gũkumagio.
• 22. No rĩrĩ, wee Jakubu, o na gwatuĩka nĩ ũguo-rĩ, ndũigana kũngaĩra, nĩ gũtua mũtuĩte atĩ ndĩmũnogetie, wee Isiraeli.
• 23. Wee ndwandeheire mbũri ciaku cia mahaki ma njino, o na kana ũkĩnjĩkĩrĩra na ũndũ wa kũndutĩra magongona. Ndikũhatĩrĩirie ũndutĩre indo ciaku cia magongona ma mũtu, o na kana ngakũnogia nĩ gũgwĩtia mahuti marĩa manungaga wega.
• 24. Wee-rĩ, ndũngũrĩire igwa iria irĩ mũrĩo, o na kana ũka’hũnia maguta ma magongona maku. No rĩrĩ, wee ũ’hatĩrĩirie ũka’nyarira na ũndũ wa mehia maku, o na ũka’nogia na mawaganu maku.
• 25. Niĩ o na niĩ-rĩ, nĩ niĩ ũrĩa ũhuuraga mahĩtia maku mathire biũ, nĩ ũndũ wa ũrĩa ndĩyendeire gwĩka ũguo; na ndigacoka kũririkana mehia maku.
• 26. Ta ndirikania maũndũ, na tũtue cira twĩ hamwe; ningĩ ũhoro waku-rĩ, ũũguũrie, nĩ getha ũhootane cira-inĩ.
• 27. Mũcũkũrũguo ũrĩa warĩ kĩhumo kĩa mũhĩrĩga wanyu-rĩ, nĩwe waambĩrĩirie kwĩhia, nao andũ aku arĩa matũire mataũranagĩra kĩrĩra-rĩ, nĩmaagararaga watho wakwa.
• 28. Ũndũ ũcio nĩguo ũtũmĩte ’thahie anene a handũ harĩa haamũre, na njathĩrĩrie Jakubu kĩrumi, o nake Isiraeli ndĩmũtue wa kũmenagĩrĩrio.

Home