Go Back

Isaia Chapter 41

1. Atĩrĩrĩ, inyuĩ ithama, ta kirai ki mwĩ mbere yakwa, o nao andũ-rĩ, ta nĩmarekwo maambe macokie hinya; ta nĩmarekwo mokoke nĩguo maarie; nĩtuokoke tũthenganĩrĩre hamwe tũcire.
2. Nũ waarahũrire mũndũ oime mwena wa irathĩro, o ũcio ũhootanaga kũndũ guothe kũrĩa kũgũrũ gwake gũkinyaga? Ha ũhoro wa mũndũ ũcio-rĩ, Jehova nĩwe ũrekagĩrĩria andũ a ndũrĩrĩ magũe thĩ mbere yake megwatĩrũo nĩwe, o na agatũma atuĩke mwathi wa gwatha athamaki. Amaneanaga o ro ũguo moragwo na rũhiũ rũake rũa njora o ta marĩ rũkũngũ, o na moragwo na ũta wake o ta marĩ kahuti kombũrĩtwo nĩ rũhuho.
3. Amateng’eragia akamahĩtũka, na ndone ũũru o na atĩa, o na kũngĩtuĩka nĩ njĩra ĩrĩa atarĩ aagera rĩngĩ na magũrũ make.
4. Ũrĩa wathondekire ũhoro ũcio, o na akĩwĩka akĩũhingia, o we ũrĩa watuire njiaro ciothe marĩĩtwa ma cio kuuma o kĩambĩrĩria-rĩ, nũ? Niĩ Jehova, o niĩ mwene, nĩ niĩ wa mbere, o na wa kũrigĩrĩria.
5. Ithama-rĩ, nĩ kuona cionire ũndũ ũcio igĩĩtigĩra, o nacio ituri cia thĩ igĩitĩka kũinaina; igĩthenganĩrĩra, igĩcokanĩrĩra hamwe.
6. Na mũndũ o mũndũ agĩteithia mũndũ ũrĩa ũngĩ wa itũũra rĩao, na akĩĩra mũrũ wa ithe atĩrĩ, Wĩũmĩrĩrie mũno!
7. Ũguo nĩguo mũtharamara omĩrĩirie mũturi wa thahabu, o nake mũndũ ũrĩa wanyorokagia thahabu na kĩriha akĩũmĩrĩria ũrĩa waturagĩra ihiga-inĩ rĩa ũturi, akiuga atĩ wĩra ũcio wake wa kũnyitithania ithuma nĩ mwega; nake akĩnyitithania kĩndũ kĩu maathondekete na mĩcumarĩ agĩkĩrũmia, nĩ getha gĩtikanenyenyio.
8. No rĩrĩ, wee, Isiraeli, ndungata yakwa, o wee Jakubu ũrĩa ndathurire, wa rũciaro rũa Iburahimu mũrata wakwa,
9. o wee ũrĩa ndanyitire ngĩkũruta uume ituri-inĩ cia thĩ, o na ngĩgwĩta, uume kũrĩa iturĩire, ngĩkwĩra atĩrĩ, Wee nĩwe ndungata yakwa, nĩngũthurĩte na ndigũteete,
10. atĩrĩrĩ, tiga gwĩtigĩra, nĩ gũkorũo ndĩ hamwe nawe; menya ũmake nĩ ũndũ niĩ nĩ niĩ Ngai waku; nĩngũkuongerera hinya waku, ĩĩ, ti-itherũ nĩndĩĩgũteithagia, na ti-itherũ nĩndĩĩgũtiiragĩrĩra na guoko gwakwa kwa ũrĩo gwa ũthingu.
11. Atĩrĩrĩ, andũ othe arĩa moirugĩtwo magagũũkĩrĩra-rĩ, nĩmagaconoka, o na maconorithio, o nao arĩa magianaga nawe magatuĩka o ta kĩndũ hatarĩ, na nĩmakora biũ.
12. Atĩrĩrĩ, acio magianaga nawe nĩũkamacaria, na ndũmone, nao arĩa mahũranaga mbaara nawe matuĩke o ta kĩndũ hatarĩ, o ro kĩndũ gĩtarĩ kĩene.
13. Nĩ gũkorũo niĩ, Jehova Ngai waku, nĩngakũnyita guoko gwaku kwa ũrĩo, ngĩkwĩraga atĩrĩ, Tiga gwĩtigĩra, amu nĩngũgũteithia.
14. Wee Jakubu, kagunyũ gaka, tiga gwĩtigĩra, o na inyuĩ gakundi gaka ka andũ a Isiraeli, menyai mwĩtigĩre, amu niĩ nĩ niĩ ngũgũteithia; ũguo nĩguo Jehova ekuuga. Na rĩrĩ, mũgũkũũri-rĩ, nĩ Ũrĩa Mũtheru wa Isiraeli.
15. Atĩrĩrĩ, ngagũtua ta mũnyamũ wa mũthondekano wa kũhũra ngano wĩ na magego mogĩ, nawe ũhũre irĩma, ũcinyihanyihie, o nacio ithũngũri ũcitue o ta mũũngũ wa ngano.
16. Wee nĩ kũhuha ũgacihuha, naruo rũhuho rũcigũrũkie, nakĩo kĩhuhũkanio kĩa rũhuho gĩcihurunje; nawe nĩũgekenera nĩ Jehova, na wĩrahage nĩ ũndũ wa Ũrĩa Mũtheru wa Isiraeli.
17. Andũ arĩa athĩni, o na arĩa akĩa, nĩ maĩ maracaria, na hatirĩ o na tũnini, nacio nĩmĩ ciao nĩ kũũma ciũmĩte nĩ nyota; niĩ Jehova-rĩ, nĩ niĩ ngũmacokeria ũhoro; niĩ, Ngai wa Isiraeli, ndikũmatirika.
18. Atĩrĩrĩ, kũndũ kũrĩa gũtheri gũtũũgĩrũ-rĩ, nĩkuo ngatathũra njũĩ, o nacio ithima nene itathũke o kũu ituamba-inĩ gatagatĩ. O na ningĩ kũu werũ-inĩ-rĩ, nĩngatũma kũgĩe maria ma maĩ, o nakuo bũrũri ũrĩa mũũmũ-rĩ, ndũme kũgĩe ithima cia maĩ.
19. Kũu werũ-inĩ-rĩ, nĩkuo ngahanda mĩtarakwa, na mĩgaa, na mĩhandathi, o na mĩbarĩki; nakuo rũng’ũrĩ-inĩ ’hande mĩbinde na mĩthengera na mĩkarakaba ĩthombocanĩte,
20. nĩ getha andũ mone, na mamenye, na mecirie, na metĩkĩre me hamwe, atĩ guoko kwa Jehova nĩkuo gwĩkĩte maũndũ macio, o na atĩ Ũrĩa Mũtheru wa Isiraeli nĩwe wathugundire ũguo.
21. Cira wanyu ũrĩa mwĩ naguo-rĩ, ũreharehei; ũguo nĩguo Jehova ekuuga. Ningĩ ihooto cianyu iria imũgĩtĩire hinya-rĩ, ta kĩheanei; ũguo nĩguo Mũthamaki wa Jakubu ekuuga.
22. Nĩmarekwo macĩheane, na matuumbũrĩre ũrĩa gũgakinya. Ningĩ umbũrai maũndũ ma tene, mũtwĩre ũrĩa maatariĩ nĩ getha twĩcirie ũhoro wamo, nĩguo tũmenye ũrĩa makarigĩrĩria; o na kana mũtuonie maũndũ marĩa magoka thutha-inĩ.
23. Kiumbũrei ũhoro wa maũndũ marĩa magoka thutha ũyũ, nĩ getha tũmenye atĩ mũrĩ ngai. Ĩĩ, ti-itherũ, mũtiĩke wega, o na kana mwĩke ũũru, nĩ getha tũcũthanĩrĩrie tũgegete, twĩonere maũndũ macio ithuothe hamwe.
24. Atĩrĩrĩ, inyuĩ mũtikĩrĩ kĩene, o naguo wĩra wanyu ndũrĩ bata; mũndũ ũrĩa ũmwĩthurĩire inyuĩ-rĩ, atariĩ o ta kĩndũ kĩĩ magigi.
25. Nĩnjarahũrĩte mũndũ oime mwena wa gathigathini, nake nĩ mũũku; ĩĩ, ti-itherũ nĩnjarahũrĩte mũndũ ũkayagĩra rĩĩtwa rĩakwa oime mwena wa irathĩro, nake nĩagakorerera andũ arĩa maathanaga, amarangĩrĩrie thĩ o ta ndaka ĩrĩa ĩrangagĩrĩrio thĩ, o na ta ũrĩa mũũmbi akĩmangaga rĩũmba.
26. Nũ woimbũranĩire ũhoro ũcio rĩrĩa waambĩrĩirio, nĩ getha tũũmenye? O na kana akĩuumbũra o tene nĩ getha tuuge atĩ nĩ mũthingu? Ti-itherũ gũtirĩ ũrĩ woimbũra. O na ningĩ-rĩ, gũtirĩ ũrĩ wawonanĩa; ĩĩ, ti-itherũ gũtirĩ mũndũ ũrĩ waigua ũhoro wanyu.
27. Niĩ nĩ niĩ ngaamba kwĩra Zayuni ũũ: Atĩrĩrĩ, ta rora andũ acio! Narĩo Jerusalemu-rĩ, nĩ niĩ ngarĩhe mũrĩtwarĩri ũhoro mwega.
28. No ndaroranga-rĩ, ndikuona mũndũ. Thĩinĩ wao-rĩ, hatirĩ mũheani kĩrĩra ũrĩa ũngĩhota gũcokia ũhoro hĩndĩ ĩrĩa ndamoria ũndũ.
29. Atĩrĩrĩ, ha ũhoro wao othe-rĩ, mawĩra mao no ma tũhũ, na matirĩ kĩene; mĩhianano yao ya gũtwekio ĩtariĩ o ta rũhuho, na nĩ ya tũhũ mũtheri.

Home