Go Back

Isaia Chapter 35

• 1. ATĨRĨRĨ, werũ, o na kũndũ kũrĩa kwagĩte andũ-rĩ, nĩgũgakena; o naruo rũng’ũrĩ no rũgakena, na rũagĩre rũmere mahũa ma nyeki-inĩ.
• 2. Ti-itherũ nĩrũkaagĩra rũrute kĩro kĩingĩ mũno, rũkene gĩkeno rũkĩinaga nyĩmbo; naruo nĩrũkaheo riri o ta wa Lebanoni, o na rũagĩre wega rũtuĩke o ta Karimeli na Sharoni; nakuo nĩgũkona riri wa Jehova, o na kuone ũnene wa Ngai witũ wa ũrĩa ekagĩrĩrũo.
• 3. Atĩrĩrĩ, andũ arĩa maagĩte hinya moko-rĩ, mekĩrei hinya, o na arĩa maregerete maru mũtũme mehande o wega.
• 4. Arĩa marĩ na guoya ngoro merei atĩrĩ, Wĩũmĩrĩriei, mũtige gwĩtigĩra; atĩrĩrĩ, Ngai wanyu agoka na ũhoro wa kũrĩhanĩria, we Ngai agerane ngero iringaine na ũrĩa gwĩkĩtwo. Nĩwe ũgoka amũhonokie.
• 5. Hĩndĩ ĩo maitho ma atumumu nĩmakahingũrũo, o namo matũ ma arĩa mataiguaga nĩmagakunũrũo.
• 6. Hĩndĩ ĩo mũndũ ũrĩa ũthuaga agacimbicaga o ta thwariga, o naruo rũrĩmĩ rũa ũrĩa ũtahotaga kwaria nĩ kũina rũkaina; nĩ gũkorũo werũ-inĩ nĩgũgatathũka maĩ, o na kũu rũng’ũrĩ-inĩ gũthererage tũrũũĩ.
• 7. O naguo mũthanga ũrĩa ũhenahenagia niũkagarũrũo ũtuĩke karia ka maĩ, nakuo kũndũ kũrĩa gwĩ tĩri mũnyotu kũgĩe ithima cia maĩ megũtherũka. Imamo-inĩ cia mbwe, o kũrĩa ikomaga-rĩ, nĩgũkagĩa nyeki o na ithanjĩ na irura.
• 8. Nakuo kũu nĩgũkagĩa njĩra njariĩ ya gĩtwari, o ya barabara, nayo ĩĩtagwo ũũ: Njĩra ĩrĩa nyamũre; ĩndĩ arĩa matarĩ atheru matikamĩgera, nao arĩa makamĩgera agakoragwo e hakuhĩ nao; tondũ ũcio, o na arĩa akĩgu matikamĩhĩtia.
• 9. Gũtirĩ mũrũthi ũkoneka kuo, o na kana nyamũ ndĩani yambate nayo; icio-rĩ, itikoneka kũu njĩra-inĩ ĩo; no rĩrĩ, andũ arĩa makũũrĩtwo nĩo makamĩgera.
• 10. Nao andũ a Jehova arĩa makũũrĩtwo makahũndũrũo makinye Zayuni makĩinaga. Magatũũra makenete ta mekĩrĩtwo thũmbĩ ya gĩkeno gĩtagathira; nĩ gĩkeno makona na macanjamũke ngoro, nakĩo kĩeha o na mũcayo nĩikora biũ.

Home