Go Back

Isaia Chapter 34

• 1. ATĨRĨRĨ, inyuĩ ndũrĩrĩ, ta okokai nĩ getha mũigue; o na inyuĩ andũ a mabũrũri ma gũkũ thĩ, ta thikĩrĩriai. Thĩ o nayo nĩĩigue, o na indo ciothe iria ciiyũrĩte kuo, o gũkũ thĩ guothe hamwe na indo ciothe iria ciumaga kuo.
• 2. Nĩ gũkorũo Jehova e na mathũgũta ma gũũkĩrĩra ndũrĩrĩ ciothe, o na agacinwo nĩ mang’ũrĩka ma gũũkĩrĩra mbũtũ yacio yothe ya ita. Nĩamĩninĩte o kũmĩnina biũ, akamĩrekereria akamĩneana yũragwo.
• 3. Andũ arĩa moragĩtwo-rĩ, nĩmagateo o ro ũguo, na mũrukĩ wa ciimba ciao ũtogororoke na igũrũ, o nacio irĩma ciikare o ta itweketio nĩ thakame yao.
• 4. O nayo mbũtũ yothe ya njata cia kũu matu-inĩ marĩa mairũ nĩĩkahomio ĩthire biũ, o namo matu marĩa mairũ mo mene makũnjwo o ta ũrĩa irũa rĩkũnjagwo; o nayo mbũtũ yakuo yothe ya njata ĩhwererekerio ĩthire o ta ũrĩa ithangũ rĩhohaga rĩaahũka mũthabibu-inĩ, o na ta ũrĩa ithangũ rĩa mũkũyũ rĩhohaga rĩaahũka mũtĩ-inĩ.
• 5. Nĩ gũkorũo rũhiũ rũakwa rũa njora nĩrũnyotokeire kũu igũrũ; na atĩrĩrĩ, nĩrũgaikũrũkĩra Edomu o na andũ arĩa ngekete, nĩguo maherithio.
• 6. Rũhiũ rũa Jehova rũa njora-rĩ, nĩrũiyũrĩtwo nĩ thakame, na rũgaikara ta rũnoretio nĩ maguta ma ũnoru, o na thakame ya tũtũrũme na ya mbũri, na maguta ma higo-inĩ ma ndũrũme; nĩ gũkorũo Jehova e na igongona kũu Bozara, o na ithĩnja inene mũno kũu bũrũri wa Edomu.
• 7. Nacio mbogo nĩigathĩnjanĩrio hamwe na mahiũ marĩa mangĩ, o nacio ndegwa iria hakũre ithĩnjanĩrio hamwe na iria itarĩ hakũre; naguo bũrũri wao ũrĩwo nĩ thakame ta ĩrĩ njohi, o naruo rũkũngũ rũao rũmatio nĩ maguta ma ũnoru.
• 8. Nĩ gũkorũo ũcio nĩguo mũthenya wa kũrĩhanĩria wa Jehova, na nĩguo mwaka ũrĩa arĩa marĩ na ngarari na Zayuni makagerũo ngero iria maaganĩrĩirũo nacio.
• 9. Tũrũũĩ twakuo nĩtũkagarũrũo tũtuĩke rami, naruo rũkũngũ rũakuo rũtuĩke ũbiriti, o naguo bũrũri ũcio wothe ũtuĩke o ta rami ũgwakana mwaki.
• 10. Naguo mwaki ũcio ndũkahorio ũtukũ o na kana mũthenya; ndogo yaguo-rĩ, ĩgatũũra ĩtogaga na igũrũ tene na tene, nakuo gũgatũũra njiaro na njiaro kwanangĩkĩte. Gũtirĩ mũndũ o na ũrĩkũ ũgacoka gũgũtuĩkania o na tene na tene.
• 11. No rĩrĩ, gakuua-ũrogi na njege nĩcio igakwĩgwatĩra gũtuĩke gwacio, ningĩ karogi-ngunũ na ihuru nĩcio igatũũraga kuo; o na ningĩ Jehova nĩagagũtambũrũkĩria rũkwaro rũa gũthima naruo, nĩ getha gũtigwo kũrĩ o kĩrigicano gĩtheri, o na kagera ga gũthima nako, nĩ getha gũtigwo o ro ũguo ũtheri.
• 12. Andũ arĩa atĩĩku akuo-rĩ, magetwo mathiĩ makinye bũrũri wa mũthamaki wao; no rĩrĩ, gũtigakorũo kwĩ mũndũ o na ũmwe ũgwĩtĩka; nao anene akuo othe magatuĩka o ta kĩndũ hatarĩ.
• 13. Nayo mĩigua ĩkamera nyũmba cia anene akuo, o nacio ihingo iria nũmu imere thabai o na mahiũ ma nyeki-inĩ, nakuo gũtuĩke ũtũũro wa mbwe, o na gũtuĩke o ta werũ wĩ nyaga.
• 14. Nacio nyamũ cia werũ nĩigacemania na njũi kuo, narĩo irimũ rĩrĩa rĩhaana thenge rĩgambĩre rĩrĩa rĩngĩ rĩa iceera rĩarĩo; ningĩ-rĩ, kĩgugua kĩa irimũ kĩrĩa kĩguoyohanagia ũtukũ gĩtũũrage kuo, na nĩkuo gĩkeyonera ũhurũko.
• 15. Nakuo kũu nĩkuo ndĩanguyo ĩkeyakĩra kĩraaro kĩayo, na ĩrekagĩrie matumbĩ mayo kuo, na ĩmatũrĩkagie, o na ĩcokagĩrĩrie ciana ciayo kĩĩgunyĩ-inĩ kĩayo; nakuo kũu nĩkuo hũngũ ikongana igĩrĩ igĩrĩ, ya mũgoma na ya njamba.
• 16. Atĩrĩrĩ, ta tuĩriai ũhoro ibuku-inĩ rĩa Jehova, na mũũthome; gũtirĩ nyamũ o na ĩmwe ya icio ĩkaaga kuoneka kuo, na gũtirĩ o na ĩmwe ĩkaaga ĩngĩ ya gũtwarana nayo, nĩ gũkorũo kanua gake nĩko gaathanĩte ũguo, naguo roho wake nĩguo ũgũcicokanĩrĩria.
• 17. Ningĩ nĩacicukĩire mĩtĩ, o nakuo guoko gwake gũgacigayanĩria igai rĩacio rĩrĩa acithimĩire na rũkwaro; igai rĩu-rĩ, ikarĩĩgwatĩra rĩtuĩke rĩacio tene na tene, nacio igatũũra kuo njiaro na njiaro.

Home