Go Back

Isaia Chapter 31

• 1. ATĨRĨRĨ, hĩ! Kaĩ arĩa maikũrũkaga mathiĩ Misiri magateithio marĩ na haaro-ĩ! O acio merĩgagĩrĩra hinya wa mbarathi, na makehoka ngari cia ita nĩ ũndũ nĩciingĩhĩte mũno, o na makehoka arĩa mathiaga mahaicĩte mbarathi nĩ ũndũ atĩ me na hinya mũno; no maticũthagĩrĩria Ũrĩa Mũtheru wa Isiraeli, kana makarongoria Jehova amateithie!
• 2. No rĩrĩ, o nake nĩ mũũgĩ, na nĩagatwarithĩria andũ ũũru: na kiugo kĩrĩa oigĩte-rĩ, ndangĩcoka kwĩricũkwo, no nyũmba ya eki naĩ nĩ kwarahũka akaarahũka amĩũkĩrĩre, o na athahie ũteithio wa andũ arĩa mathugundaga waganu.
• 3. Rĩu-rĩ, andũ a Misiri no andũ a gũkũ thĩ o ro ũguo, na tio Mũrungu, nayo mĩĩrĩ ya mbarathi ciao no nyama theri, na itirĩ maroho thĩinĩ wacio. Na rĩrĩ, hĩndĩ ĩrĩa Jehova agatambũrũkia guoko gwake, andũ acio nĩmakahĩngithio magũe, mũteithania o na mũteithio; nao othe hamwe mahooteke.
• 4. Nĩ gũkorũo Jehova aranjĩra ũũ: Atĩrĩrĩ, o ta ũrĩa mũrũthi, kana kĩana kĩaguo, ũraramaga ũkĩrĩa nyamũ ĩrĩa ũnyitĩte, na ndũmakio nĩ mĩgambo ya arĩithi, o na mokĩte marĩ kĩrĩndĩ kĩingĩ metanĩte nĩguo maũũkĩrĩre, kana wĩtigĩre nĩ ũndũ wa inegene rĩao-rĩ, ũguo noguo Jehova, Mũnene wa Ita, agaikũrũka ahũranĩre kũu kĩrĩma-inĩ gĩa Zayuni igũrũ, o na gĩthũngũri-inĩ gĩakĩo.
• 5. Na rĩrĩ, o ta ũrĩa nyamũ iria irĩ mathagu ibatabataga irerete rĩera-inĩ-rĩ, ũguo no taguo Jehova Mũnene wa Ita akagitĩra Jerusalemu, arĩgitĩre o na arĩhonokie; akarera igũrũ rĩarĩo arĩmenyerere.
• 6. Atĩrĩrĩ, inyuĩ ciana cia Isiraeli, garũrũkai mũcokerere ũcio mũtũire mũremete.
• 7. Nĩ gũkorũo mũthenya ũcio o mũndũ nĩagate mĩhianano yake ya kũhoyũo ya betha, na ya thahabu, o indo icio mwĩthondekeire na moko manyu inyuene cia gũtũma mwĩhie.
• 8. Hĩndĩ ĩo Aashuri nĩmakagũa moragĩtwo na rũhiũ rũa njora, no ti rũa mũndũ; rũhiũ rũa njora nĩruo rũkanianina biũ, no ti rũa mũndũ. Nĩmakorĩra rũhiũ rũu rũa njora, nao aanake ao manyitwo kĩaro.
• 9. Hinya wao ũrĩa ũratariĩ ta rũaro rũa ihiga-rĩ, nĩũkamathengera nĩ ũndũ wa ũrĩa magwatĩtwo nĩ guoya, nao anene ao mamakio na mate kĩbebero kĩao; ũguo nĩguo Jehova ekuuga, o we ũrĩa wakĩtie mwaki wake Zayuni, o na icua rĩake rĩa kĩmwaki kĩnene rĩĩ Jerusalemu.

Home