Go Back

Isaia Chapter 30

• 1. NA RĨRĨ, Jehova ekuuga ũũ: Kaĩ ciana iria nemu o kũrema irĩ na haaro-ĩ, o icio iciragĩra ũrĩa igeka, na itihoe kĩrĩra harĩ niĩ! Ningĩ ciĩhumbaga na maũndũ ma cio cio nyene, no timo ma roho wakwa, nĩ getha cioranagĩrĩre mehia!
• 2. Nacio nĩcio ciikũrũkaga ithiĩ Misiri itahoete kĩrĩra harĩ niĩ, nĩguo ikegiritanie na hinya wa Firauni, na ikehoka kĩĩruru kĩa Misiri gĩcigitĩre!
• 3. Tondũ ũcio hinya ũcio wa Misiri nĩguo ũkamũconorithia inyuĩ, o nakuo kwĩhoka kĩĩruru kĩa Misiri kũmũrehithĩrie ngũĩ.
• 4. O na harĩa anene ake maikarĩte Zoani, nao arekio ake magakinya Hanesi-rĩ,
• 5. othe nĩmagaconokera andũ acio matangĩmaguna na ũndũ o na ũrĩkũ, o acio matarĩ gĩteithio o na kĩrĩkũ kana kĩguni, tiga o maconorithio nĩo na mameneke.
• 6. Ũhoro mũritũ ũkoniĩ nyamũ cia Mwena wa Gũthini nĩguo ũyũ: Atĩrĩrĩ, nĩ gũkuua makuuaga ũtonga wao maũigĩrĩire mĩgongo ya njaũ cia ndigiri, na indo ciao cia bata magaciigĩrĩra maguku-inĩ ma ngamĩra, magatuĩkania bũrũri wa thĩna na wa ruo, o bũrũri ũrĩa uumaga mĩrũthi ya mũgoma na ya njamba, na nduĩra, o na nyamũ-cia-thĩ ikũhenia ta mwaki na ikombũka na mathagu, macitware kũrĩ andũ arĩa matarĩ ũndũ o na ũrĩkũ mangĩmaguna naguo.
• 7. Nĩ ũndũ-rĩ, ũteithio wa Misiri nĩ wa tũhũ, na ndũrĩ kĩguni; tondũ ũcio kũndũ kũu ndĩgwĩtĩte ’Rahabu mwĩikarĩri thĩ o ro ũguo’.
• 8. Na rĩrĩ, rĩu thiĩ ũgakurure ũhoro ũcio kĩbaũ-inĩ o ũkĩonagwo nĩo, na ũwandĩke ibuku-inĩ, nĩ getha ũgatũũra wonagwo mahinda marĩa magoka, o nginya tene na tene.
• 9. Nĩ gũkorũo andũ aya nĩ aremu, na nĩ ciana itũire ihenanagia, na itaiguaga ũtaaro wa Jehova:
• 10. ningĩ nĩcio ciĩraga arĩa oni maũndũ atĩrĩ, Ta tigai gũtuonera maũndũ; o nao anabii ikamera atĩrĩ, Tigai gũtũrathĩra maũndũ marĩa merekereire; nĩ kaba mũtwaragĩrie ndeto nyoroku, o mũgĩtũrathagĩra ndeto cia maheni;
• 11. ta thengai, mwehere njĩra-inĩ, mũreke Ũrĩa Mũtheru wa Isiraeli atige gũcoka kũgwetwo mbere iitũ!
• 12. Tondũ wa ũhoro ũcio-rĩ, Ũcio Mũtheru wa Isiraeli ekuuga ũũ: Atĩrĩrĩ, kuona atĩ nĩmũmenete ndũmĩrĩri ĩo-rĩ, mũkehoka ũhinyanĩrĩria na ũremi, mũkamatua mwĩtiiro wanyu-rĩ,
• 13. waganu ũcio wanyu ũgatuĩka o ta mwatũka watũkĩte rũthingo-inĩ rũraya na igũrũ, ũrĩa ũikaraga ũkĩaraaramaga, naruo rũkamomoka o narua kahinda kanini.
• 14. Ningĩ Jehova nĩakaũnina biũ o ta ũrĩa nyũngũ ya mũũmbi yũragagwo ĩkamemendwo ĩtegũcaĩrũo, o nginya hakaaga o na karũgĩo kamwe kangĩhota kũruta mwaki riiko, kana gatahe maĩ gĩthima-inĩ.
• 15. Nĩ gũkorũo Mwathani Jehova, Ũrĩa Mũtheru wa Isiraeli, oigire ũũ: Atĩrĩrĩ, njĩra ĩrĩa ĩgatũma mũhonoke no ya kwĩrira na ya gũikara mũtegwĩtanga, naguo hinya ũrĩa mũkagĩa naguo ũkoneka nĩ ũndũ wa gũikara mũhoreire mwĩĩ’hokete; no mũtiigana gwĩtĩkĩra.
• 16. Ĩndĩ inyuĩ nĩ kuuga mwoigire atĩrĩ, Aca, nĩ kũũra tũkora tũhaicĩte mbarathi; tondũ ũcio no mũhaka mũgakĩũra. Ningĩ mũkiuga atĩrĩ, Tũgathiĩ tũhaicĩte nyamũ iria ithiaga na ihenya mũno; na tondũ ũcio arĩa makamũteng’eria magakorũo me ihenya mũno o nao.
• 17. Andũ ngiri makora nĩ ũndũ wa ikũũmana rĩa mũndũ ũmwe, ningĩ mũũre inyuothe nĩ ũndũ wa ikũũmana rĩa andũ atano, o nginya mũgatigwo mũtariĩ ta mũtĩ ũhandĩtwo wĩ wiki kĩrĩma igũrũ, o na ta kĩbebero kĩrĩ gĩthũngũri-inĩ.
• 18. O na harĩa gũtariĩ ũguo-rĩ, Jehova agaikara o endete kũmũtuga, na atũũgĩrio nĩ getha acoke amũiguĩre tha, nĩ gũkorũo Jehova nĩwe Ngai ũrĩa ũtuaga cira na kĩhooto. Gũkena-rĩ, nĩ arĩa othe maikaraga mamũcũthĩrĩirie.
• 19. Nĩ gũkorũo andũ magatũũra Zayuni, o kũu Jerusalemu; nawe ndũgacoka gũita maithori o na rĩ; na rĩrĩ, aaigua mũgambo waku ũkĩmũkaĩra-rĩ, ndarĩ hingo atagakũiguĩra tha, na rĩrĩa akaũigua, no gũcokia agagũcokeria ũhoro.
• 20. Na rĩrĩ, o na kũngĩtuĩka atĩ Jehova nĩakamũhe irio ta cia hĩndĩ ya wathima, o na maĩ marĩa monekaga na thĩna-rĩ, arutani aku matigacoka kũhithĩka o na rĩ; no rĩrĩ, maitho maku nĩmagatũũra monaga arutani aku,
• 21. o namo matũ maku maiguage mũgambo na thutha waku hĩndĩ ĩrĩa ũgũkerũra na mwena wa ũrĩo, o na kana wa ũmotho, ũgĩkwĩra atĩrĩ, Ĩno nĩyo njĩra, gera yo.
• 22. Atĩrĩrĩ, betha ĩrĩa ĩĩkĩrĩtwo igũrũ rĩa mĩhianano yaku ya gwacũhio ĩkamĩhumba, o na thahabu ĩrĩa mĩhianano yaku ya gũtwekio ĩhũrĩrĩirũo-rĩ, nĩũgacithũkia, ũcihurunje ũcite o ta kĩndũ gĩĩ thahu, ũcoke ũciĩre atĩrĩ, Thengai, muume haha.
• 23. Mbura, o ĩo mbeũ ciaku ciendaga, nĩakamiuria, nĩguo ũhande mĩgũnda, na akũhe irio iria ciumaga thĩ, nacio ikoragwo itunguhĩte na ikaingĩha; ningĩ mũthenya ũcio-rĩ, ũhiũ waku ũkarĩithagio nyeki-inĩ kũndũ kwariĩ mũno;
• 24. ningĩ ndegwa na njaũ cia ndigiri iria irĩmaga mũgũnda irĩage irio igũcama cumbĩ, o iria ihuhĩtwo wega na ihakũri o na itarũrũ.
• 25. Na kĩrĩma-inĩ o gĩothe kĩrĩa kĩraihu, o na gĩthũngũri-inĩ kĩrĩa gĩothe gĩtũũgĩru-rĩ, nĩgũkagĩa njũĩ, o na twanda twĩ maĩ megũtherera; ũguo nĩguo gũgatuĩka mũthenya ũrĩa gũkoraganwo mũno, o hĩndĩ ĩrĩa mĩthiringo ya nyũmba irĩ hinya ĩkagũithio.
• 26. Ningĩ-rĩ, ũtheri wa mweri ũgatuĩka o ta wa riũa, o naguo ũtheri wa riũa ũnenehio maita mũgwanja, ũigane o ta ũtheri wa mĩthenya mũgwanja, o mũthenya ũrĩa Jehova agaitĩka kuoha kũndũ kũrĩa andũ ake magurarĩtio, na amahonie kũrĩa matihangĩtio makĩgũthwo.
• 27. Atĩrĩrĩ, Jehova we mwene aroka oimĩte kũndũ kũraya, na acinĩtwo nĩ marakara, atariĩ o ta itu ithimbu rĩkwambata; mĩromo yake ĩiyũrĩtwo nĩ mathũgũta, o naruo rũrĩmĩ rũake rũtariĩ o ta mwaki ũrĩa ũrambaga ũkaninana biũ;
• 28. nayo mĩhũmũ yake ĩtariĩ o ta karũũĩ kaiyũrĩte gakoina, gagakinya o ngingo ya mũndũ, nĩguo athũngũthie ndũrĩrĩ ta irĩ gĩtarũrũ-inĩ, acianange biũ, nao andũ a ndũrĩrĩ mahaane ta mekĩrĩtwo matamu ma kanua ma kũmahĩtithia.
• 29. No inyuĩ nĩmũkagĩa na rũĩmbo rũa mũthemba ũrĩa ũinagwo ũtukũ hĩndĩ ĩrĩa kũgomanĩtwo nĩ ũndũ wa gĩathĩ kĩamũre, o na mũcanjamũke ngoro o ta mũndũ ũrĩa ũthiaga akĩhuhaga mũtũrirũ kĩrĩma-inĩ kĩa Jehova, o we Rũaro rũa Ihiga rũa Isiraeli.
• 30. Nake Jehova nĩagatũma mũgambo wake ũrĩa wĩ riri ũiguwo, na ahiũrie guoko gwake na mathũgũta ta arĩ rũheni nĩ ũndũ wa ũrĩa arakarĩte, na atuĩke ta rũrĩrĩmbĩ rũa mwaki rũa kũninana biũ, hĩndĩ ya mbura ya kĩboboto, o na ya kĩhuhũkanio kĩa rũhuho, o na ya mbura ya mbembe.
• 31. Nĩ gũkorũo Jehova akahehenja Mũashuri na mũgambo wake, na amũhũre na rũthanju.
• 32. Narĩo igũtha o igũtha rĩrĩa Jehova akamũgũtha na rũthanju rũu rũtuĩtwo rũa kũgũthana naruo-rĩ, rĩkaamũkĩrio na ihũra rĩa inanda iria nene cia mũgeto, o na tũhembe; ti-itherũ nĩakarũa mbaara nao ategũtigithĩria gũikia guoko.
• 33. Nĩ gũkorũo kũndũ gwa gũcinĩra akuũ, ta kũrĩa gwĩtagwo Tofeti, gwathondekirũo o tene. Ĩĩ-ni, gũthondekeirũo mũthamaki; Jehova agũthondekete kũriku mũno, na kwariĩ, nakuo kwĩ mwaki, na gũkarũndwo ngũ nyingĩ; nayo mĩhũmũ ya Jehova nĩyo ĩgwakia mwaki ũcio, ĩhaanaine na ũbiriti ũgũtherera ta rũũĩ.

Home