Go Back

Isaia Chapter 28

1. KAĨ itũũra rĩrĩa arĩa arĩu a Efiraimu matuĩte tanji yao ya mwĩtĩo rĩĩ na haaro-ĩ, o rĩu rĩrĩ riri mũnene ta wa mahũa marĩa macokaga kũhoha, o rĩu rĩakĩtwo gĩtwe-inĩ gĩa kĩanda kĩrĩa kĩnoru gĩa acio matoragio nĩ ndibei!
2. Atĩrĩrĩ, Jehova e na njamba ĩrĩ hinya mũno, nayo nĩ kũrũnda ĩkarũndana na hinya wayo ta arĩ kĩhuhũkanio kĩa mbura ya mbembe, kana rũhuho rũnene rũrĩa rũninanaga, o na kana kĩguũ kĩa maĩ maingĩ mekuuna.
3. Tanji ĩo ya acio arĩu a Efiraimu, o ĩo ya mwĩtĩo-rĩ, nĩĩkarangĩrĩrio thĩ na magũrũ,
4. naguo riri ũcio ũhaana mahũa marĩa macokaga kũhoha narua, o ũcio wĩ gĩtwe-inĩ gĩa kĩanda kĩu-rĩ, ũgatuĩka o ta ngũyũ ĩrĩa ĩĩruĩte o mbere hĩndĩ ya ũrugarĩ ĩtanakinya, nayo nĩyo mũndũ angĩcũthĩrĩria amĩone, aamĩrĩa o rĩmwe yamũgĩa guoko.
5. Mũthenya ũcio-rĩ, Jehova Mũnene wa Ita, nĩwe ũgatuwo ta arĩ we tanji ĩrĩ riri, na kĩremba kĩa ũgemu, harĩ matigari ma andũ ake arĩa magakorũo matigarĩte,
6. na atuĩke ta roho wa gũtuanĩra cira na kĩhooto harĩ mũndũ ũrĩa ũikaraga cira-inĩ, o na atuĩke hinya wa andũ arĩa mahũndũraga ita cia thũ ciakinya o kĩhingo-inĩ.
7. No rĩrĩ, andũ aya o nao mathiaga magĩtũgũgaga nĩ ũndũ wa ndibei, na magatururio nĩ njohi; athĩnjĩri-Ngai, na anabii, nĩo mathiaga magĩtũgũgagio nĩ njohi; ĩĩ, ti-itherũ nĩmarĩĩtwo nĩ ndibei biũ, na magatururio nĩ njohi; nĩ gũtũgũga maratũgũga o makĩguũranĩria maũndũ marĩa meoneire, na magaturura magĩtuanĩra cira.
8. Metha ciothe nĩciiyũrĩtwo nĩ matahĩko, na ikaiyũrũo nĩ indo irĩ gĩko o nginya hakaaga handũ hatheru.
9. Nao makiugaga atĩrĩ, Hĩ! Nũ ũngĩkĩrutwo nĩwe ũmenyi wa maũndũ? Ningĩ-rĩ, nũ ũngĩkĩmenyithio ndũmĩrĩri? Anga nĩ arĩa merĩgĩte gũtua iria, makarutwo nyondo-inĩ?
10. Ha ũhoro wa ũrutani wake-rĩ, kaĩ nĩ rĩathani rĩthingataine na rĩathani, ĩĩ-ni, no rĩathani rĩthingataine na rĩathani! Nĩ ũtaarani ũthingataine na ũtaarani, ĩĩ-ni, no ũtaarani ũthingataine na ũtaarani! Ningĩ nĩ kohoro kanini na haha, na hau hangĩ no kohoro kangĩ kanini!
11. Aca, tiguo! No rĩrĩ, Jehova akaaragĩria andũ aya na tũnua twa andũ mathiomaga magĩtondoiraga, o arĩa maaragia mwarĩrie wa kũngĩ,
12. o aya erĩte atĩrĩ, Ũyũ nĩguo ũhurũko, atĩ mũtũme ũrĩa ũnogete aikare ahurũkĩte, nayo ĩo nĩyo njĩra ya gũtũma mũndũ aikare ahoreire; no rĩrĩ, nĩmaaregire kũrũmbũiya ũhoro wake.
13. Tondũ ũcio kĩrĩra kĩa Jehova kĩrĩa akamahe-rĩ, kaĩ gĩgatuĩka o rĩathani rĩthingataine na rĩathani, ĩĩ-ni, no rĩathani rĩthingataine na rĩathani! O na ũtaarani ũthingataine na ũtaarani, ĩĩ-ni, no ũtaarani ũthingataine na ũtaarani! Ningĩ nĩ kohoro kanini na haha, na hau hangĩ no kohoro kanini! Ũguo noguo gũgatuĩka, nĩ getha andũ acio methiagĩre, makagũe na ngara moinĩkange, na magwatio na mũtego manyitwo.
14. Tondũ ũcio ta iguai ndũmĩrĩri ya Jehova, inyuĩ andũ aya atendi, o inyuĩ mwathaga andũ aya marĩ gũkũ Jerusalemu.
15. Kuona atĩ muugĩte ũũ: Twĩ karĩĩko na ngoma cia andũ arĩa maanakua, na tũkaiguana na andũ arĩa matũire Kwa-Ngoma, na hĩndĩ ĩrĩa gũgaitĩka kũherithanio ta arĩ kĩguũ gĩgũtherera-rĩ, tũtigakorererũo nĩkuo, tondũ nĩtwĩgitĩire na maheni, na tũkehumba na mathara nĩguo tũikare ta twĩhithĩte;
16. tondũ ũcio Mwathani Jehova ekuuga ũũ: Atĩrĩrĩ, nĩnjigĩte ihiga rĩa gũtuĩka gĩtina kĩrũmu o kũu Zayuni, narĩo nĩ ihiga rĩbarĩrĩre wega, na nĩ rĩa koine-inĩ rĩrĩa rĩĩ goro mũno, na nĩrĩo rĩkũrũmia gĩtina wega; mũndũ ũrĩa ũrĩrĩĩhokaga ndagakĩagaagĩka.
17. Ningĩ ũtuanĩri cira na kĩhooto nĩguo ngagerekania na rũrigi rũa gũthima naruo, naguo ũthingu ndĩũgerekanie na kagera karĩa gacuhagio ga gũthima rũthingo. Ĩndĩ ũhoro ũcio wanyu wa kwĩgitĩra na maheni nĩũkahaatwo ũthire ta ũhuurĩtwo nĩ mbura ya mbembe, namo mathara manyu marĩa mwĩhumbĩte namo mwĩhithe-rĩ, nĩmakaninwo ta mahubĩtwo nĩ kĩguũ kĩa maĩ.
18. Ningĩ karĩĩko kanyu karĩa mwarĩkanĩire na ngoma cia andũ arĩa maanakua nĩgagathũkio, na ũiguano wanyu na andũ a Kwa-Ngoma ndũkarĩĩra o na hanini. Hĩndĩ ĩrĩa gũgaitĩka kũherithanio ta arĩ kĩguũ gĩgũtherera-rĩ, nĩmũkarangĩrĩrio thĩ.
19. Ihinda rĩrĩa rĩothe bũrũri wanyu ũgatuĩkanĩrio gũkĩherithanio-rĩ, mũtirĩ hingo mũtagakorererũo, amu gũgatuĩkanagĩrio rũcinĩ o rũcinĩ, na gũtuĩkanagĩrio mũthenya na ũtukũ. Na atĩrĩrĩ, kĩmako gĩtheri nokĩo gĩkamũmenyithia gĩtũmi kĩa maũndũ marĩa mũiguĩte.
20. Nĩ gũkorũo ũrĩrĩ wanyu ndũngĩmũigana atĩ mwĩtambũrũkie igũrũ rĩaguo nĩ gũkuhĩha, o nakĩo kĩrĩa mwĩhumbagĩra nĩ gĩceke gũkĩra kĩrĩa kĩngĩmũigana mwĩhumbĩrĩte.
21. Nĩ gũkorũo Jehova akaguthũka o ta ũrĩa ekire kĩrĩma-inĩ kĩa Perazimu, na akorũo atũkũyanĩte o ta ũrĩa aatariĩ arĩ gĩtuamba-inĩ kĩa Gibeoni, nĩ getha arute wĩra wake ũrĩa atahũthĩire kũruta, na ahinganĩrie ciĩko ciake iria atatũire ahinganagĩria.
22. Tondũ ũcio tiganai na mena cianyu, nĩ getha nga iria muohetwo itikanyitio makĩria. Amu nĩnjiguĩte ũhoro uumĩte he Mwathani, o we Jehova Mũnene wa Ita, wa atĩ gũkũ thĩ guothe nĩgũkaninanwo biũ, o ta ũrĩa acirĩire gwĩka.
23. Ta tegai gũtũ, mũigue mũgambo wakwa; thikĩrĩriai, mũigue ũrĩa ngwaria.
24. Atĩrĩrĩ, mũrĩmi na mũraũ-rĩ, anga atũũraga arĩmaga kĩrũmanĩrio nĩ getha ahande? Ningĩ-rĩ, anga atũũraga ahũrangaga makĩngĩa ma mũgũnda wake kĩrũmanĩrio?
25. Githĩ aarĩkia kwaragania igũrũ rĩaguo guothe ti kũhura acokaga kũhura mbeũ cia ndengũ, o na akahura tũhĩndĩ twa kumini, na ngano akamĩhanda mĩhari mĩhari, na cairi akamĩhanda kũndũ kũrĩa ĩthurĩirũo, nayo ngano ĩrĩa njirũ akamĩhanda maĩhaka-inĩ ya mũgũnda ũcio wake?
26. Nĩ gũkorũo Ngai wake nĩamũmenyithagia gwĩka ũndũ ũrĩa werekereire, na akamũruta maũndũ.
27. Nĩ ũndũ mbeũ icio cia mĩthemba mĩthemba itihũragwo na mũgogo ũkururĩtio, kana kumini ĩkahũrũo na kũgũrũ kwa ngari; mbeũ icio ihũragwo na mũtĩ mũmata, na kumini ĩkahũrũo na rũthanju.
28. Ngano ya gũthondeka mũgate anga ti gũthĩo ĩthĩagwo? Ndarĩ hingo angĩtũũra amĩthandũraga, kana amĩhũrage na kũgũrũ kwa ngari yake o na kana mbarathi ciake; ndamĩthĩaga ũguo.
29. Ũmenyi ũcio uumanaga na Jehova Mũnene wa Ita, ũrĩa ũgeganagia na undũ wa kĩrĩra kĩrĩa aheanaga, na agekĩrĩrũo mũno nĩ ũndũ wa ũrĩa ohĩgĩte.

Home