Go Back

Isaia Chapter 26

• 1. Atĩrĩrĩ, mũthenya ũcio rũĩmbo rũrũ nĩruo rũkainwo bũrũri wa Juda, ũũ: Twĩ na itũũra rĩĩ hinya, nake Jehova nĩagatua atĩ kũhonokania gwake gũtuĩke thingo ciarĩo na njirigo ciarĩo cia hinya.
• 2. Ta kĩhingũrei ihingo, nĩguo rũrĩrĩ rũthingu rũrĩa rũmenyagĩrĩra ũhoro-wa-ma rũtonye kuo.
• 3. Atĩrĩrĩ, mũndũ ũrĩa ũtũmĩte meciria make makindĩrie harĩ wee-rĩ, nĩwe ũgatũũria na thayũ mũkinyanĩru, nĩ ũndũ nĩakwĩhokete.
• 4. Tũũrai mwĩhokete Jehova tene na tene, nĩ gũkorũo JAHU JEHOVA nĩwe Rũaro rũa Ihiga rũa tene na tene.
• 5. Amu-rĩ, nĩanyihĩtie arĩa matũire kũndũ gũtũũgĩru mũno, o itũũra-inĩ rĩrĩa itũũgĩru, akarĩgũithia arĩkurumanĩtie thĩ, o nginya akarĩaragania rũkũngũ-inĩ.
• 6. Magũrũ ma andũ nĩmo makarĩrangĩrĩria thĩ, o magũrũ ma athĩni, na makinya ma ngĩa.
• 7. Mĩthiĩre ya mũndũ mwagĩrĩru nĩ mĩerekereru, nawe Jehoya, wee mũthingu, nĩwe ũrũngagĩrĩria njĩra ya mũndũ ũrĩa mwagĩrĩru.
• 8. Ĩĩ, ti-itherũ, Jehova, wee nĩwe twetereire ũhingie matuĩro maku ma cira, na ngoro ciitũ igaikara ciĩrirĩirie rĩĩtwa rĩaku, o na atĩ ũririkanagwo.
• 9. Niĩ-rĩ, ndũire ngwĩrirĩirie ũtukũ, naguo roho ũrĩa ũrĩ thĩinĩ wakwa ũgagũcaragia na kĩyo, nĩ gũkorũo watuanĩra macira maku ma kĩhooto gũkũ thĩ-rĩ, andũ arĩa matũũraga mabũrũri mayo nĩmaitĩkaga kwĩruta ũhoro wa ũthingu.
• 10. O na mũndũ mwaganu angĩiguĩrũo tha-rĩ, ndangĩĩruta ũhoro wa ũthingu; o na arĩ bũrũri ũrĩa wĩkagwo maũndũ ma ũthingu-rĩ, no gwĩka arĩĩkaga andũ maũndũ moru, na ndarĩ hingo akona ũkaru wa Jehova.
• 11. Atĩrĩrĩ, Jehova, guoko gwaku nĩkwambararĩtio na igũrũ, no matingĩkuona o na atĩa; no rĩrĩ, kwĩrutanĩria kũrĩa wĩrutanĩirie nĩ ũndũ wa andũ aku-rĩ, matirĩ hingo matagakuona maconoke; ti-itherũ arĩa marĩ ũthũ nawe nĩ gũcinwo magacinwo na mwaki ũmang’arie biũ.
• 12. Wee, Jehova, nĩwe ũgũtũũra ũtũrũmĩirie thayũ, nĩ gũkorũo nĩwe ũtũrutĩire mawĩra maitũ mothe.
• 13. Atĩrĩrĩ, Jehova Ngai witũ, nĩharĩ aathani angĩ maanatũthamakĩra thengia wee; no rĩrĩ, wee wiki nowe ũrĩtũhotithagia kũgweta rĩĩtwa rĩaku.
• 14. Acio nĩmaakuire, na matigacoka gũtũũra muoyo; no ciĩruru itagacoka kũriũka; tondũ wee nĩwe wamakorereire nĩguo ũmaherithie, ũmanine biũ, na ũgĩtũma matige kũririkanwo o na atĩa.
• 15. Wee, Jehova, nĩwe ũtũmĩte rũrĩrĩ ruitũ ruongerereke, ũkarũingĩhia; ti-itherũ nĩwongereire rũrĩrĩ ruitũ ũkarũingĩhia; no kũgathwo ũragathwo nĩ ũndũ nĩwe ũnenanenehetie mĩhaka yothe ya bũrũri witũ.
• 16. Atĩrĩrĩ, Jehova, andũ aku maakũrongoririe ũmateithie rĩrĩa maakoretwo nĩ mathĩna, na magĩkũhoya na ngoro rĩrĩa wamaherithagia.
• 17. O ta ũrĩa mũndũ-wa-nja wĩ ihu agwatagwo nĩ ruo aakuhĩhĩria kuohoka, na akaarunyĩka hĩndĩ ĩrĩa ekũrũmwo-rĩ, ũguo noguo na ithuĩ twatariĩ tũkĩonwo nĩwe, Jehova.
• 18. Ha ũhoro witũ-rĩ, nĩ ta twarĩ ihu, na tũgakinyĩrĩrũo nĩ ruo; no rĩrĩ, nĩ ta tũciarĩte o rũhuho, tondũ gũtirĩ ũndũ o na ũrĩkũ wa kũhonokania twĩkĩte gũkũ thĩ, kana andũ arĩa matũũraga gũkũ thĩ makongerereka.
• 19. Atĩrĩrĩ, andũ aku arĩa makuĩte nĩmagacoka gũtũũra muoyo, na ciimba cia andũ akwa nĩikariũka. Atĩrĩrĩ, inyuĩ mũtũire rũkũngũ-inĩ, ta ũkĩrai toro mũine, nĩ gũkorũo ireera rĩrĩa agakuurĩria riumaga ũtheri-inĩ, nayo thĩ nĩĩgacokia ngoma cia andũ akuũ muoyo.
• 20. Atĩrĩrĩ, inyuĩ andũ akwa, ta tonyai tũnyũmba twanyu, mwĩtiirĩrie, mwĩhithe kahinda kanini mũira wa mathũgũta mathire.
• 21. Amu Jehova nĩaroka oimĩte gwake, aherithie andũ arĩa matũũraga thĩ nĩ ũndũ wa mawaganu mao; nayo thĩ ndĩgũcoka kũhitha thakame ĩrĩa ĩitĩtwo kuo, kana ĩcoke kũhumbĩra andũ ayo arĩa moragĩtwo.

Home