Go Back

Isaia Chapter 25

• 1. Atĩrĩrĩ, Jehova, wee nĩwe Ngai wakwa, na nĩwe ndĩrĩtũũgagĩria; ndĩrĩgathaga rĩĩtwa rĩaku, tondũ nĩwĩkĩte maũndũ ma kũgegania, nacio irĩra iria waheanire tene itirĩ ciagarũrũka, na nĩ hingie na ma.
• 2. Tondũ nĩwe ũtũmĩte itũũra rĩtuĩke hĩba ya mahuti, itũũra rĩrĩa rĩirigĩtwo ũgatũma rĩtuĩke iganjo, ningĩ kũrĩa kwarĩ nyũmba nene cia ndũrĩrĩ ũgatũma gũikare gũtarĩ itũũra, na gũtigacoka gwakwo mĩako o rĩ o rĩ.
• 3. Tondũ ũcio, andũ arĩa marĩ hinya nĩmarĩkũgathaga, na itũũra rĩa ndũrĩrĩ iria iguoyohanagia rĩgwĩtigagĩre.
• 4. Nĩ gũkorũo wee nĩwe kĩhingo kĩrũmu harĩ mũndũ ũrĩa mũthĩni, naho ha ũhoro wa ngĩa, nĩwe kĩhingo kĩayo kĩrĩa kĩrũmu gĩa kũmĩgitĩra thĩna, na handũ hayo ha kũũrĩra kĩhuhũkanio kĩa mbura, o na ta kĩĩruru gĩa kwĩyũa hĩndĩ ya ũrugarĩ, na rĩrĩa hinya wa arĩa maguoyohanagia ũkũhurutana ta rũhuho rũkĩgũtha rũthingo na nditi.
• 5. Wee-rĩ, ũkanyihia inegene rĩa ndũrĩrĩ o ta ũrĩa ũrugarĩ wa kũndũ gũtarĩ maĩ ũnyihagio nĩ kĩĩruru gĩa itu, o naruo rũĩmbo rũa arĩa maguoyohanagia rũkahwererekera rũthire biũ.
• 6. Kĩrĩma-inĩ gĩkĩ-rĩ, nĩkuo Jehova Mũnene wa Ita akarugithĩria ndũrĩrĩ ciothe iruga rĩa nyamũ noru, na rĩa ndibei njega ĩĩkĩrĩtwo mũrĩo nĩ kĩnyita ĩtanakeerũo, acirugithĩrie iruga rĩa nyamũ noru ii na maguta maingĩ mĩthimo-inĩ, na rĩa ndibei ĩrĩa njega makĩria ĩĩkĩrĩtwo mũrĩo nĩ kĩnyita ĩtanakeerũo.
• 7. Nĩakeheria kĩndũ kĩrĩa kĩhumbĩte andũ a mĩhĩrĩga yothe akĩninĩre kĩrĩma-inĩ gĩkĩ, hamwe na tama wa kwĩhumba mũtwe ũrĩa ũthiĩkĩrĩirie andũ a ndũrĩrĩ ciothe.
• 8. Gĩkuũ nĩ kũng’aria akĩng’arĩtie agakĩnina biũ tene na tene; ningĩ Mwathani Jehova nĩakagiria maithori mothiũ mothe, na rũmena rũrĩa andũ ake mamenetwo arũnine rũthire thĩ; tondũ Jehova nĩwe warĩtie ũhoro ucio.
• 9. Mũthenya ũcio nĩgũkeranwo ũũ: Atĩrĩrĩ, ũyũ nĩwe Ngai witũ, na nĩwe twetereire atũhonokie. Ũyũ nĩwe Jehova, na nĩwe twetereire, nĩ getha tũkene na tũcanjamũke nĩ ũndũ wa kũhonokania gwake.
• 10. Amu-rĩ, kĩrĩma-inĩ gĩkĩ nĩkĩo guoko kwa Jehova kũrĩikaraga, na Moabi akarangĩrĩrio thĩ arĩ o gwake, o ta ũrĩa rũwa rũrangagĩrĩrio thĩ maĩ-inĩ marĩa me kĩara-inĩ.
• 11. Na nĩagatambũrũkia moko make maĩ-inĩ macio o ta ũrĩa mũndũ ũgũthambĩra atambũrũkagia moko make athambĩre, no Jehova nĩakanyihia rũtũrĩko rũake hamwe na wĩra wa wara ũrĩa anaruta na moko make.
• 12. Kũndũ kũrĩa kũirigĩtwo na hinya na gũgaakwo mĩthiringo ya nyũmba ndaya na igũrũ thingo-inĩ ciakuo-rĩ, nĩagakũgũithia, agũkurumanie thĩ o nginya akwaraganie rũkũngũ-inĩ.

Home