Go Back

Isaia Chapter 24

• 1. ATĨRĨRĨ, Jehova nĩaratũma thĩ yage andũ, ĩtigwo ĩrĩ theri o ro ũguo; nĩaramĩng’aũrania, nao andũ arĩa mamĩtũũraga akamaharagania.
• 2. Na nĩgũgatuĩka atĩrĩ, atĩ o ta ũrĩa ũhoro wa andũ arĩa angĩ ũkahaana-rĩ, ũguo noguo wa mũthĩnjĩri-Ngai ũgaikara; ningĩ o ta ũrĩa ũhoro wa ndungata ũkahaana, ũguo noguo wa mũmĩathi ũgaikara; ningĩ o ta ũrĩa ũhoro wa ndungata ya mũirĩtu ũkahaana, ũguo noguo wa mũtumia ũrĩa mũmĩathi ũgaikara; ningĩ o ta ũrĩa ũhoro wa mũgũri indo ũkahaana, ũguo noguo wa ũrĩa mwendia indo ũgaikara; na ningĩ o ta ũrĩa ũhoro wa muohoranĩri ũkahaana, ũguo noguo wa muohori ũgaikara; na ningĩ o ta ũrĩa ũhoro wa muohoranĩri agĩĩtagia uumithio ũkahaana, ũguo noguo wa mũmũrutĩri mbia icio ũgaikara.
• 3. Thĩ ĩno ĩgatigwo ĩrĩ theri o ro ũguo, yanangĩke o kwanangĩka biũ, nĩ gũkorũo Jehova nĩwe warĩtie ũhoro ũcio.
• 4. Thĩ ĩno-rĩ, nĩĩgwatĩtwo nĩ kĩeha, ĩgaikara o ta ĩkũhwererekera yũre biũ; mabũrũri mayo mothe nĩmorĩtwo nĩ hinya wamo, magaikara o ta mekũhwererekera more biũ; ningĩ andũ a gũkũ thĩ arĩa ekĩrĩre nĩ kũũrũo marorũo nĩ hinya.
• 5. O na thĩ nayo nĩ ta ĩgwatĩtio thahu nĩ andũ arĩa mamĩtũũraga, nĩ gũkorũo nĩmaagararĩte mawatho, na makagarũra mĩtugo ĩrĩa ĩtuĩtwo ya kũrũmagĩrĩrũo, na magathũkia kĩrĩkanĩro kĩrĩa gĩa tene na tene.
• 6. Tondũ ũcio kĩrumi nĩkĩo kĩrĩĩte thĩ gĩkamĩng’aria biũ, na andũ arĩa mamĩtũũraga makonwo marĩ ehia. Tondũ ũcio andũ arĩa matũire gũkũ thĩ nĩmacinĩtwo na mwaki, gũgatigara o andũ matarĩ aingĩ.
• 7. Ndibei ya mũthondekano nĩ ta ĩgwatĩtwo nĩ kĩeha, na mũthabibu ũgaikara ta ũũrĩtwo nĩ hinya waguo, ningĩ andũ othe arĩa acaũku ngoro nĩ gũcaya maracaya.
• 8. Gĩkeno kĩrĩa kiumanaga na kũhũra tũhembe nĩgĩtigĩte gũkenwo, na inegene rĩa arĩa me na ndũrũhĩ rĩgathira, ningĩ gĩkeno kĩrĩa gĩkenagwo gũkĩhũrũo kĩnanda kĩa nga nĩgĩtigĩte gũkenwo.
• 9. Matigacoka kũnyua ndibei makĩinaga nyĩmbo, na anyui njohi nĩmakarũrĩrũo nĩyo.
• 10. Itũũra rĩrĩa rĩatigirũo rĩtarĩ ũrĩa rĩhaana-rĩ, nĩrĩtharĩtio, na nyũmba o yothe yarĩo ĩkahingwo nĩ getha ndĩgatonyũo nĩ mũndũ o na ũrĩkũ.
• 11. Njĩra-inĩ nĩ kũrĩrũo kũrarĩrũo nĩ wagi wa ndibei, na gũkena guothe gũkahorio nduma, gĩkeno gĩa thĩ gĩgathengio.
• 12. Kũu itũũra-inĩ thĩinĩ nĩ gũkira gũkirĩte ihooru, na kĩhingo kĩarĩo nĩ kĩhũrange gĩkonũhwo biũ.
• 13. Amu-rĩ, o ta ũrĩa mũtamaiyũ ũikaraga wainainio, o na ta ũrĩa mũthabibu ũikaraga thabibu ciahaarũo hĩndĩ ĩrĩa magetha ma cio maaninwo-rĩ, ũguo nĩguo ũhoro ũgaikara gũkũ thĩ ndũrĩrĩ-inĩ guothe.
• 14. No kũrĩ andũ makaanĩrĩra na mũgambo mũnene, moige ngemi, na andũ maanĩrĩre na mũgambo mũnene mũno maũrutĩtie o iria-inĩ kũndũ kũraya nĩ ũndũ wa ũnene wa Jehova.
• 15. Kuona atĩ ũguo nĩguo gũkahaana-rĩ, ĩkĩrĩrai Jehova mũrĩ o kũu mwena wa irathĩro, mwĩkĩrĩre rĩĩtwa rĩa Jehova, Ngai wa Isiraeli, mũrĩ o kũu hũgũrũrũ-inĩ cia iria rĩrĩa inene.
• 16. Nĩtũiguĩte nyĩmbo ikĩinwo na kũu ituri-inĩ cia thĩ, na nĩ cia gwĩkĩrĩra andũ arĩa athingu. Ĩndĩ niĩ ngiuga atĩrĩ, Wũi-ĩiya-wakwa-ĩ! Kaĩ ndĩ na haaro-ĩ! Ĩĩ, ti-itherũ, kaĩ ndĩ na haaro-ĩ, amu arĩa-ng’ũũrũ nĩmageranĩte ngero cia ũrĩa-ng’ũũrũ, makagerana ngero njũru mũno cia ũrĩa-ng’ũũrũ.
• 17. Atĩrĩrĩ, wee mũndũ ũyũ ũtũire thĩ, nĩũkorereirũo nĩ guoya, nĩguo ũharũke irima, na ũgwatio nĩ mũtego.
• 18. Na nĩgũgakinya atĩrĩ, atĩ mũndũ ũrĩa ũkora nĩ ũndũ wa inegene rĩrĩa rĩguoyohanagia-rĩ, akagũa irima rĩu; nake ũrĩa ũkoima irima rĩu, nĩakagwatio nĩ mũtego ũcio; nĩ ũndũ ndirica cia igũrũ nĩ hingũku, na itina iria nũmu cia thĩ nĩirenyenya.
• 19. Thĩ nĩ ta yunĩkangĩte biũ, ĩgaikara ta ĩtwekete ĩgathira biũ; ningĩ nĩĩrathingitha mũno mũno.
• 20. Thĩ-rĩ, iratũgũga o ta mũrĩu, na ĩgathũngũthio ũũ na ũũ ta kĩegege; ihĩtia rĩayo nĩrĩkonwo ta rĩmĩritũhĩire mũno; kũgũa nĩĩkagũa, na ndĩcoke gwĩtiira.
• 21. Na nĩgũgakinya atĩrĩ, mũthenya ũcio, atĩ Jehova nĩakaherithia mbũtũ ya ita ya kũrĩa igũrũ, o kũu matu-inĩ, ĩĩ hamwe na athamaki a thĩ ĩno, o acio matũire gũkũ thĩ.
• 22. Nao nĩmagacokanĩrĩrio hamwe o ta ũrĩa andũ ohe macokanagĩrĩrio hamwe kĩoho-inĩ, makahingĩrũo korokoro-inĩ, na matukũ maingĩ maathira nĩguo magathiĩ kũherithio.
• 23. Hĩndĩ ĩo mweri ũgaikara ta ũconokete, na riũa ta rĩconorithĩtio, nĩ gũkorũo Jehova Mũnene wa Ita nĩwe ũgathamakaga Zayuni, na Jerusalemu, na mbere ya athuri ake arĩa agathamakĩra hagĩe riri.

Home