Go Back

Isaia Chapter 22

• 1. ŨHORO mũritũ ũkoniĩ Gĩtuamba kĩrĩa gĩa Kĩoneki nĩguo ũyũ: Rĩu-rĩ, kaĩ wonete kĩ, tondũ andũ aku othe marahaica nyũmba ciaku igũrũ?
• 2. Atĩrĩrĩ, wee ũiyũrĩtwo nĩ mbu, wee gĩtaro kĩa ngũĩ, itũũra rĩĩ gĩkeno, andũ aku arĩa moragĩtwo-rĩ, matiũragĩtwo na hiũ cia njora kana magakuĩra ita-inĩ.
• 3. Anene aku othe morire me hamwe, no nĩ gũtahwo maatahirũo o na mataikĩtio mũguĩ; andũ aku othe arĩa maakorereirũo-rĩ, nĩ kuohwo mohanirio hamwe, o acio moraga mathiĩ kũndũ kũraya.
• 4. Tondũ ũcio ngiuga atĩrĩ, Ta rora na kũngĩ ũtige kũndora, amu nĩ kũrĩra ngũrĩra na kĩgi; menya wĩnogie ũkĩ’horeria nĩ ũndũ wa ũrĩa mwarĩ wa andũ akwa ageretwo ngero.
• 5. Amu kũu Gĩtuamba gĩa Kĩoneki, nĩkuo Mwathani, o we Jehova Mũnene wa Ita, akanyarirana mũthenya ũcio, na kũranganĩrĩrio thĩ, o na kũgĩe maũndũ me iriga mũno, nacio thingo imomorũo igũithio thĩ, na gũkayũrũrũkĩrũo irĩma-inĩ.
• 6. Andũ a Elamu nĩ gũkuua makuuĩte mathiaka, me na ngari cia ita na andũ mahaicĩte mbarathi, o nao andũ a Kiri magacuurũria ngo.
• 7. Na gũgĩkinya atĩrĩ, atĩ ituamba ciaku iria njega mũno ikĩiyũra ngari cia ita, na andũ acio mathiaga mahaicĩte mbarathi magĩikara methabĩte wega kĩhingo-inĩ.
• 8. Kĩrĩa kĩahumbĩte Juda nĩkĩeheririo; na mũthenya ũcio mũgĩcũthĩrĩria indo cia mbaara iria ciarĩ nyũmba ya kĩrĩti;
• 9. ningĩ mũkĩrora mũkĩona atĩ kũrĩa thingo cia itũũra rĩa Daudi itharũkĩte nĩ kũingĩ, mũgĩkĩhingĩrĩria maĩ ma karia ka mũhuro.
• 10. Mũgĩgĩcoka gũtara nyũmba cia Jerusalemu, mũgĩtharia imwe ciacio nĩ getha mũcokererie rũthingo mũrũĩkĩre hinya makĩria.
• 11. O na ningĩ kũu gatagatĩ-inĩ ga thingo cierĩ cia itũũra mũkĩenja kũndũ gwa kwaraha maĩ, nĩ getha maĩ ma karia kau ga tene maarahe kuo; no rĩrĩ, mũtiigana kũrongoria ũrĩa watuire atĩ maũndũ macio mekwo, kana mũkĩrũmbũiya ũrĩa waathanĩrĩirie ũndũ ũcio o tene mũno.
• 12. Mũthenya ũcio-rĩ, Mwathani, o we Jehova Mũnene wa Ita, aamwĩtire nĩguo mũrĩre, mũgĩe na kĩeha, na mwenjwo mĩtwe yanyu, na mwĩohe nguo cia ikũnia.
• 13. No rĩrĩ, inyuĩ nĩ gĩkeno mwakorirũo nakĩo, mũgĩthĩnjaga ng’ombe na mbũri, mũkĩrĩaga nyama na mũkĩnyuaga ndibei, ningĩ mũkiugaga atĩrĩ, Nĩtũkĩrĩeni na tũkĩnyue, nĩ ũndũ rũciũ nĩtũkũroka gũkua.
• 14. Jehova Mũnene wa Ita, nĩwe wakĩĩnguũrĩirie we mwene, ngĩmũigua na matũ makwa akiuga atĩrĩ, Ti-itherũ mũtikahoroherio waganu ũcio tiga o mũkue; ũguo nĩguo Mwathani, o we Jehova Mũnene wa Ita, ekuuga.
• 15. NA RĨRĨ, Mwathani, o we Jehova Mũnene wa Ita, ekuuga ũũ: Atĩrĩrĩ, thiĩ ũkinye he Shebina, ũcio mũikaria wa indo cia bata, na mũnene wa nyũmba, ũmũũrie atĩrĩ,
• 16. Ũreka atĩa gũkũ? Na mwĩ na ũ gũkũ, atĩ nĩkĩo wĩenjeire mbĩrĩra gũkũ? Hĩ! Nĩ kwenja eyenjeire mbĩrĩra handũ hatũũgĩru, o na akeicũhĩria handũ ha gũikara rũaro-inĩ rũa ihiga!
• 17. Atĩrĩrĩ, wee mũndũ ũyũ wĩ hinya, menya atĩ Jehova nĩagakũnyuguta, na akũnyite akũrũmie.
• 18. Ti-itherũ nĩagagũthunanĩra, agũikie bũrũri mwaramu ta ũrĩ rĩage. Wee mũndũ ũyũ ũconorithagia nyũmba ya mwathani waku-rĩ, kũu nĩkuo ũgakuĩra, na nĩkuo ngari ciaku iria wĩkenagĩra nĩcio igakorũo irĩ!
• 19. Ngagũtugutania ũrutwo wĩra-inĩ waku, ũguthwo ũrutwo handũ haku hau hatũũgĩru.
• 20. Na nĩgũgakinya atĩrĩ, mũthenya ũcio, atĩ nĩngeta ndungata yakwa Eliakimu wa Hilikia,
• 21. ndĩmũhumbe nguo yaku ĩrĩa ndaya, na ndĩmũhotore mwĩhotoro waku, na wĩra waku wa gwathana ndĩwĩkĩre moko-inĩ make; ũcio nĩwe ũgatuĩka ta ithe wa andũ arĩa matũũraga Jerusalemu, na wa andũ a nyũmba ya Juda.
• 22. Kĩhingũro kĩa nyũmba ya Daudi-rĩ, ngakĩigĩrĩra kĩande-inĩ gĩake, atuĩke mũhingũranĩri, na gũtigĩe mũhinganĩrĩrĩa; na ahinganagĩrĩrie na gũtigĩe mũhingũranĩri o na arĩa;
• 23. na ndĩmuoherere handũ harũmu aikare ho ta mũcumarĩ ũhũrĩirũo handũ, atuĩke o gĩtĩ gĩa ũthamaki kĩĩ riri thĩinĩ wa nyũmba ya ithe.
• 24. Nĩwe ũgacokererio riri wothe wa nyũmba ya ithe, ta ũcuurĩtio harĩ we, o na watuĩka nĩ andũ a njiaro ciao, kana arĩa meongereire thĩinĩ wacio; o na arĩa ao matarĩ kĩene no makamũcuhĩrĩra, o arĩa matariĩ ta indo cia mũthemba wa ikombe, na mũthemba wa ndigithũ.
• 25. Na rĩrĩ, ha ũhoro wa mũthenya ũcio-rĩ, Jehova Mũnene wa Ita ekuuga ũũ, atĩ mũcumarĩ ũcio wahũrirĩirũo handũ haguo ũikare ũrũmĩte-rĩ, nĩũkamunyũka ũkũũrũo ũrekio thĩ, naguo mũrigo ũrĩa waũritũhĩire weherio, nĩ gũkorũo Jehova nĩwe warĩtie ũhoro ũcio.

Home