Go Back

Isaia Chapter 19

• 1. ŨHORO mũritũ ũkoniĩ Misiri nĩguo ũyũ: Atĩrĩrĩ, Jehova arathiĩ ahaicĩte itu rĩthiaga na ihenya mũno, akinye Misiri, nayo mĩhianano ĩrĩa ĩtarĩ kĩene ya Misiri nĩĩkainaina aakinya kũrĩa ĩrĩ, o nacio ngoro cia andũ a Misiri nĩikaringĩkĩra o kũu thĩinĩ wao.
• 2. Na niĩ nĩngathugathuga Amisiri mokanĩrĩre na Amisiri arĩa angĩ, nao nĩmakarũa mbaara o mũndũ na mũrũ wa ithe, nake mũndũ o mũndũ ahũrane na ũrĩa ũngĩ wa itũũra rĩao; ningĩ itũũra rĩmwe rĩũkĩrĩre itũũra rĩrĩa rĩngĩ, na ũthamaki ũũkĩrĩre ũthamaki ũrĩa ũngĩ.
• 3. Na andũ a Misiri mahũe ngoro marĩ o kũu bũrũri-inĩ wao o ene, na maũndũ marĩa maacirĩire gwĩka ndĩmathahie. Nao mathiĩ magatuĩrie ũhoro he mĩhianano ĩo ya kũhoyũo, na harĩ athingi-ithitũ, na harĩ arĩa marĩ na maroho maragũraga, o na harĩ ago.
• 4. Nao andũ acio a Misiri ndĩmaneane moko-inĩ ma mũndũ mũmaramari maathagwo nĩwe, na mathamakĩrũo nĩ mũthamaki mwĩĩ; ũguo nĩguo Mwathani, Jehova Mũnene wa Ita, ekuuga.
• 5. Maĩ nĩmakahũa iria-inĩ, na rũũĩ rũhũe rũũre.
• 6. Njũĩ nĩikanunga, na tũrũũĩ twa Misiri tũhwererekere tũhũe biũ; irura o na ithanjĩ nĩ kũũma ikoma.
• 7. Morĩithio ma nyeki marĩa megiritanĩtie na rũũĩ rũa Nili, o kũu hũgũrũrũ-inĩ cia rũũĩ rũu rũa Nili, o na indo ciothe iria ikahandwo gũkuhĩ na rũũĩ rũu rũa Nili-rĩ, nĩikoma biũ ithengio kuo, na itigacoka kuoneka kuo o na rĩ.
• 8. Ningĩ ategi ciũngũyũ nĩmakarĩra nĩ kũigua ũũru, na andũ othe arĩa maikagia ndwano kũu rũũĩ rũa Nili thĩinĩ maigue kĩeha, na arĩa matambũrũkagia mĩtego yao makĩmĩikia maĩ igũrũ morũo nĩ hinya.
• 9. O na ningĩ-rĩ, andũ arĩa marutaga wĩra wa kũguta ũguta, na arĩa mogothaga ndigi magatuma matama merũ cua nacio, nĩmagaconoka.
• 10. Atiirĩrĩri bũrũri wa Misiri nĩmakahehenjeka, na aruti wĩra wa mũcara othe maigue ũũru na ngoro ciao.
• 11. Anene a Zoani-rĩ, nĩmakĩgĩte o gũkĩga biũ, nao andũ arĩa ogĩ makĩria thĩinĩ wa arĩa maheaga Firauni kĩrĩra-rĩ, kĩrĩra kĩu kĩao gĩtuĩkĩte o ta kĩa nyamũ itaaragia. Kaĩ mũngĩkĩhota atĩa hihi kwĩra Firauni ũũ: Niĩ ndĩ mũrũ wa mũndũ mũũgĩ, na ndĩ wa rũciaro rũa anene arĩa maathamakaga tene?
• 12. Kaĩ andũ aku arĩa ogĩ makĩrĩ ha? Ta nĩmagĩkũhe kĩrĩra rĩu! Na makĩmenye maũndũ marĩa Jehova Mũnene wa Ita acirĩire gwĩka makoniĩ Misiri!
• 13. Anene a Zoani nĩmakĩgĩte o gũkĩga, na anene a Nofu makahenio o kũhenio; acio matariĩ ta ihiga rĩa koine rĩa mĩhĩrĩga yakuo nĩmatũmĩte andũ a Misiri maturure.
• 14. Jehova nĩwe ũtũmĩte roho wa ũmaramari ũtonye thĩinĩ wa ngoro ciao, nao magatũma andũ a Misiri maturure mawĩra-inĩ mao mothe marĩa marutaga, o ta ũrĩa mũndũ mũrĩu atũgũgagĩra matahĩko-inĩ make.
• 15. Ha ũhoro wa Misiri-rĩ, gũtikagĩa wĩra o na ũrĩkũ ũngĩrutwo nĩ mũtwe kana gĩcuthĩ, kana ũrutwo nĩ ithangũ rĩa mũnathi kana itothua.
• 16. Mũthenya ucio-rĩ, Amisiri magatuĩka o ta andũ-a-nja, mainaine nĩ guoya nĩ ũndũ wa gũthũngũthio gwa guoko kwa Jehova Mũnene wa Ita, kũrĩa akamathũngũthĩria.
• 17. Bũrũri wa Juda ũgatuĩka ta wĩ itua-nda harĩ Amisiri, nake mũndũ o wothe wao ũrĩa ũkagweterũo ũhoro waguo nĩagetigĩra nĩ ũndũ wa maũndũ marĩa Jehova Mũnene wa Ita acirĩire gwĩka kuo agĩgũũkĩrĩra.
• 18. Mũthenya ũcio-rĩ, gũkagĩa matũũra matano bũrũri wa Misiri marĩa makaaragio mwarĩrie wa Kanaani, gũkĩĩhĩtagwo mwĩhĩtwa wa atĩ andũ amo marĩtungatagĩra Jehova Mũnene wa Ita; na itũũra rĩmwe rĩamo rĩgetwo Itũũra rĩa Kũninanwo.
• 19. Mũthenya ũcio-rĩ, nĩgũkagĩa kĩgongona gĩakĩirũo Jehova o kũu gatagatĩ ka bũrũri wa Misiri, na kũgĩe gĩtugĩ mĩhaka-inĩ yakuo kĩhandĩirũo Jehova.
• 20. Nakĩo gĩgatuĩka kĩmenyithia o na kĩonereria kĩa maũndũ ma Jehova Mũnene wa Ita kũu bũrũri wa Misiri, nĩ gũkorũo andũ akuo nĩmagakaĩra Jehova rĩ ũndũ wa arĩa mamahinyagĩrĩria, nake amatwarithĩrie mũhonokia na mũmagitĩri, na amahonokie.
• 21. Nake Jehova nĩakemenyithia Amisiri, nao Amisiri acio mamenye Jehova mũthenya ũcio. Ĩĩ, ti-itherũ makamũinamagĩrĩra makĩmũthĩnjagĩra magongona, na mamũrutagĩre indo, na nĩngĩ mehĩtagĩre mwĩhĩtwa mbere ya Jehova, na maũhingie.
• 22. Ũguo nĩguo Jehova akahũra Misiri, amaherithie nĩguo acoke amahonie; nao nĩmagacokerera Jehova, nake etĩkĩre kũigua gũthaithana kũu kwao na amahonie.
• 23. Mũthenya ũcio-rĩ, nĩgũkagĩa njĩra ya gĩtwari yumĩte Misiri ĩgakinya Ashuri, nao Aashuri mathiage magakinya Misiri, nao Amisiri mathiage magakinya Ashuri; ningĩ Amisiri nĩmakahoyaga Ngai me hamwe na Aashuri.
• 24. Mũthenya ũcio-rĩ, Isiraeli agatuĩka wa gatatũ me hamwe na Misiri na Ashuri, nao nĩmagatũma thĩ yothe ĩgĩe na kĩrathimo magĩtũũra o kũu gatagatĩ kayo.
• 25. Amu Jehova Mũnene wa Ita nĩamarathimĩte, akoiga atĩrĩ, Kũrathimwo-rĩ, nĩ andũ akwa Amisiri, o na Aashuri arĩa ndeyũmbĩire, o na Aisiraeli arĩa ndegwatĩire matuĩke igai rĩakwa.

Home