Go Back

Isaia Chapter 15

• 1. ŨHORO mũritũ ũkoniĩ Amoabi nĩguo ũyũ: Ĩiya-ĩ, amu Ari rĩa Amoabi nĩ rĩanange o kwanangwo biũ, rĩkahorio nduma ũtukũ o ũmwe! Ĩiya-ĩ, amu Kiri rĩa Amoabi o narĩo nĩ rĩanange o kwanangwo biũ, rĩkahorio nduma ũtukũ o ũmwe!
• 2. Andũ a Bayithu na Diboni nĩmaambatĩte matĩri-inĩ ma kũndũ gũtũũgĩru, makarĩrĩre kuo. Amoabi nĩ kũrĩra mararĩra na kĩgi nĩ ũndũ wa Nebo, na makarĩrĩra Medeba; mĩtwe yao yothe nĩĩgĩĩte ihara, na nderu ciao ciothe ikenjwo.
• 3. O kũu njĩra-inĩ ciao-rĩ, nĩ gũthiĩ marathiĩ meyohete makũnia; o mũndũ wao araanũkĩra nyũmba-inĩ yake igũrũ, o na kũndũ kwao kũrĩa kwariĩ, makĩrĩraga na kĩgi.
• 4. Heshiboni-rĩ, nĩ kũrĩra kũrarĩrũo, o na Eleale, nako kayũ kamo gakaiguwo o Jahazu. Tondũ ũcio andũ a Moabi arĩa meohaga indo cia mbaara nĩ kũrĩra mararĩra makĩanũkaga, na ngoro ciao ikainaina thĩinĩ wao.
• 5. Ngoro yakwa-rĩ, nĩ kũrĩra ĩrarĩrĩra Amoabi, nĩ ũndũ anene ao nĩ kũũra morĩire Zoaru, magatuĩka ta marĩ mori ya mĩaka ĩtatũ, nĩ ũndũ maraambata rĩambatĩrĩro-inĩ rĩa Luhithu makĩrĩraga; o na ningĩ-rĩ, njĩra-inĩ ya Horonaimu nĩkuo maraanĩrĩra makarĩra nĩ ũndũ wa ininana rĩrĩa rĩrĩ kuo.
• 6. Ithima-inĩ cia maĩ cia Nimurimu gũgatigwo gũkirĩte ihooru, amu nyeki yakuo o na rĩu yũmĩte o kũũma biũ, nayo nyeki ĩrĩa njigũ nĩ kũhoha ĩrahoha, na gũtirĩ kĩndũ o na kĩmwe kĩruru.
• 7. Tondũ ũcio indo nyingĩ iria merĩmĩire, o na iria meigĩire mũthithũ, nĩmagacikuua macitware mũrĩmo ũrĩa ũngĩ wa karũũĩ karĩa ke mĩtĩ hũgũrũrũ-inĩ ciako.
• 8. Kĩrĩro kĩu nĩgĩtheete gĩgakinya o mĩhaka-inĩ yothe ya Moabi, na kwanũka kwao gũgathea gũgakinya Egilaimu, na gũgakinya o Biri-elimu.
• 9. Maĩ mothe ma Dimoni nĩmaiyũrĩtwo nĩ thakame, o nakuo kũu Dimoni nĩngakũrehithie maũndũ mangĩ, ta arĩ mũrũthi ũkũguthũkĩra Mũmoabi ũrĩa wothe ũkũhonoka, na ũguthũkĩre matigari mothe ma andũ a bũrũri ũcio.

Home