Go Back

Isaia Chapter 14

1. Nĩ gũkorũo Jehova nĩakaiguĩra Jakubu tha, ethurĩre Isiraeli o rĩngĩ, amacokie bũrũri wao kĩũmbe; nao ageni nĩmagetonyia thiritũ-inĩ yao, megwatanie na nyũmba ya Jakubu.
2. Andũ a ndũrĩrĩ nĩo makamoya, mamacokie kũndũ kwao, nao andũ a nyũmba ya Isiraeli mamegwatĩre matuĩke ao, maikare o kũu bũrũri wa Jehova, nĩguo matuĩke ndungata ciao cia arũme na cia airĩtu; na rĩrĩ, nĩ gũtaha magataha andũ o arĩa maamatahĩte tene, macoke gwathaga andũ arĩa maatũire mamahinyagĩrĩria tene.
3. Na nĩgũgakinya atĩrĩ, atĩ mũthenya ũrĩa Jehova agakwehereria kĩeha kĩrĩa ũrĩ nakĩo na mathĩna maku, na agũtigithie wĩra wa hinya ũrĩa warutithagio,
4. nĩrĩo nawe ũkoina mũthamaki wa Babuloni thimo ĩno, uuge atĩrĩ, Hĩ, kaĩ mũndũ ũrĩa wahinyanagĩrĩria tene aanatiga kũhinyanĩrĩria-ĩ! O narĩo itũũra rĩrĩa rĩa thahabu, kaĩ rĩanahora nduma-rĩ!
5. Jehova nĩoinangĩte mũthĩgi wa andũ arĩa aaganu, o nako karũthanju ka ũnene ka arĩa maathanaga agakoinanga;
6. ũcio wahũraga andũ a ndũrĩrĩ na mahũra mategũtuĩkĩrĩra atũkũyanĩte, na agaatha ndũrĩrĩ na marakara-rĩ, rĩu nĩ mũnyarire inyarira rĩtangĩgirĩrĩka.
7. Rĩu thĩ yothe nĩĩhurũkĩte, ĩkahorera, na ĩgaitĩka kũinwo.
8. Ti-itherũ mĩthengera o na mĩtarakwa ya Lebanoni ĩragũkenerera, ĩkiugaga atĩrĩ, Gwata hĩndĩ ĩrĩa wagũithirio thĩ-rĩ, gũtirĩ mũgũithia mĩtĩ o na ũrĩkũ ũrĩ woka gũtũũkĩrĩra.
9. Kũndũ kwa ngoma kũrĩa kũrĩ mũhuro wa thĩ nĩkwĩarahũrĩte gũgũthaganie ũgĩthiĩ ũkinye kuo, na gũgakwarahũrĩra andũ arĩa maakuire tene, o arĩa othe maarĩ atongoria a thĩ, na gũkaarahũra athamaki othe a ndũrĩrĩ arĩa me kuo moime itĩ-inĩ ciao cia ũthamaki.
10. Acio othe nĩmagacokia ũhoro makũũrie atĩrĩ, Anga o nawe wanakĩaga hinya o ta ithuĩ? Anga wanakĩhaanana o na ithuĩ?
11. Mwago wa ũnene waku nĩũhwererekeirio ũgakinyio Kwa Ngoma hamwe na mĩgambo ya inanda ciaku cia mũgeto; igunyũ nĩcio ũkomeire, nacio igunyũ nĩcio ikũũmbĩrĩire mwĩrĩ.
12. Hĩ! Kaĩ wee njata ya kĩwariĩ, wee mũrũ wa rũcinĩ gwakĩa, anga wanagũa thĩ, ũkoima igũrũ? Ningĩ wee wahomirie andũ a ndũrĩrĩ-rĩ, anga wanatemengwo ũkabacanio na thĩ?
13. Nĩ kwĩĩra weĩraga na ngoro yaku atĩrĩ, Ngũhaica nginye o igũrũ matu-inĩ, o nakĩo gĩtĩ gĩakwa gĩa ũthamaki ndĩkĩambatĩrie gĩkinye o igũrũ gĩkĩrũke njata cia Mũrungu, na niĩ njikare kĩrĩma-inĩ kĩrĩa kĩũnganagĩrũo nĩ kĩrĩndĩ, o kũrĩa gĩturi-inĩ kĩa mwena wa gathigathini.
14. Ĩĩ-ni, ngakĩhaica nginye o kũndũ kũrĩa kũraihu mũno igũrũ rĩa matu, ndĩĩhananie na Ũrĩa-wĩ-Igũrũ Mũno.
15. No rĩrĩ, nĩũkahwererekerio ũkinyio Kwa Ngoma, o gĩturi-inĩ kĩa irima rĩu.
16. Nao arĩa marĩkuonaga-rĩ, magagũkũũrĩra maitho, mecũranie ũhoro waku makiugaga atĩrĩ, Ĩ anga ũyũ nĩwe ũrĩa watũmaga thĩ ĩinaine, na agĩtũma mabũrũri marĩa mathamakagwo nĩ athamaki menyenye?
17. O we ũrĩa watũmire thĩ yothe ĩtuĩke o ta werũ mũtheri, na akĩng’aũrania matũũra mayo? Ningĩ ũrĩa ũtetĩkagĩra kuohora andũ arĩa ohete, meinũkĩre kwao mũciĩ?
18. Athamaki arĩa angĩ othe a ndũrĩrĩ, othe othe, nĩ gũkoma makometio na mwago, o mũndũ agakomio nyũmba yake kĩũmbe ĩrĩa ĩtuĩtwo mbĩrĩra.
19. No rĩrĩ, wee nĩ gũteo ũteetwo o ro ũguo, ũgaikio haraya na mbĩrĩra yaku, ũgatuĩka o ta kĩhuno kĩĩ magigi, na ũkahumbwo nĩ ciimba ithecangĩtwo na hiũ cia njora na igaikio irima-inĩ kũrĩa kwĩ mahiga, ũgaikara ta kĩimba kĩrangĩrĩrie thĩ na magũrũ.
20. Wee ndũgathikwo tao, nĩ gũkorũo nĩwaninire bũrũri waku, ũkĩũragithia andũ aku; mbeũ ya eki-naĩ ndĩkagwetagwo o na tene na tene.
21. Ta thondekerai ciana ciake handũ ha gũciũragĩra nĩ ũndũ wa waganu wa maithe, nĩ getha itikanacoke kwarahũka ciĩgwatĩre thĩ ĩtuĩke yacio, o na kana ciĩyakĩre matũũra maiyũre thĩ yothe.
22. Niĩ-rĩ, nĩ kwarahũka ngaarahũka ndĩciũkĩrĩre; ũguo nĩguo Jehova Mũnene wa Ita ekuuga. Ningĩ rĩĩtwa rĩacio ndĩrĩeherie kũu Babuloni, njeherie matigari ma cio, na ihĩĩ ciacio, o na ariũ a ihĩĩ icio ciacio; ũguo nĩguo Jehova ekuuga.
23. Itũũra rĩu nĩngatũma rĩtuĩke ũtũũro wa njege, na kũgĩe maria ma maĩ; ngarĩhaata na kĩhaato gĩa kũninana; ũguo nĩguo Jehova Mũnene wa Ita ekuuga.
24. Jehova Mũnene wa Ita nĩ kwĩhĩta ehĩtĩte, akoiga atĩrĩ, Ti-itherũ o ta ũrĩa ndĩĩcirĩtie, ũguo noguo gũgakinya, o naguo ũndũ ũrĩa nduĩte gwĩka-rĩ, noguo ũgaikara ũrũmĩte,
25. wa atĩ Mũashuri ũcio wĩ bũrũri wakwa nĩngamũhehenjithia, na ndĩmũrangĩrĩrie na magũrũ makwa kũu irĩma-inĩ ciakwa. Hĩndĩ ĩo nĩguo mũtĩ wake wa ngingo ũkamoima mwĩrĩ, na mũrigo wake ũmoime cianda-inĩ ciao.
26. Ũguo nĩguo nduĩte gwĩka thĩ yothe, nakuo guoko kũrĩa gũtambũrũkĩirio ndũrĩrĩ ciothe nĩkuo kũu.
27. Amu-rĩ, Jehova Mũnene wa Ita nĩwe ũtuĩte ũndũ ũcio wĩkwo, na rĩrĩ, ũrĩa ũngĩkĩhota kũũthahia nũ? Guoko gwake nĩgũtambũrũkĩtio-ĩ! Ũrĩa ũngĩkĩhota gũgũthuna-rĩ, nũ?
28. ATĨRĨRĨ, mwaka ũrĩa mũthamaki Ahazu aakuire-rĩ, nĩguo ũhoro ũyũ mũritũ waguũranĩirio.
29. Atĩrĩrĩ, wee bũrũri wothe wa Filisitia, menya ũkene nĩ ũndũ rũthanju rũrĩa rũakũhũraga nĩruunĩkangĩte, nĩ gũkorũo rũciaro-inĩ rũa nyamũ-ya-thĩ nĩhakoima nduĩra, na mbeũ yayo ĩtuĩke mũthemba wa nyamũ-ya-thĩ ĩkũũmbũka, na ĩkũhenia ta mwaki.
30. Irigithathi rĩa mũthĩni nĩrĩkona irio cia kũrĩa, na mũndũ mũkĩa akomage atarĩ na ũgwati. No rĩrĩ, rũciaro rũaku nĩngarũũraga na ng’aragu, o namo matigari ma andũ aku moragwo.
31. Atĩrĩrĩ, wee kĩhingo gĩkĩ, ta rĩra na kĩgi! Itũũra rĩrĩ o nawe-rĩ, ta kĩrĩre! Wee Filisitia nĩ ta gũtwekio ũtweketio na mwaki, ũgathira wĩ wothe biũ, nĩ ũndũ he ndogo ĩkuuma na mwena wa gathigathini, nake ũcio ũroka-rĩ, hatirĩ mũndũ o na ũmwe wake ũkuuma handũ hake, atigwo na thutha nĩ kũhooteka.
32. Hĩndĩ ĩo-rĩ, arekio a rũrĩrĩ rũu magagĩcokerio atĩa? Magacokerio ũũ, atĩ Jehova nĩwe ũtũmĩte Zayuni rĩakwo gĩtina kĩrũmu, na thĩinĩ warĩo nĩho andũ ake arĩa anyarire monaga ha kũũrĩra.

Home