Go Back

Rũĩmbo rũa Suleimani Chapter 5

• 1. Mwarĩ wa maitũ, mũhiki wakwa, ndĩ gũtonya mũgũnda wakwa: nĩndĩrahũnga manemane yakwa o gwata mahuti makwa marĩa mangĩ manungi wega; nĩndĩrarĩa magua makwa marĩa me na ũũkĩ; na nganyua ndibei yakwa, o na iria. Arata, rĩai! Nyuai! ĩĩ-ni, endwa aitũ, mũkĩnyue o mũno.
• 2. Ndĩrarĩ toro, ĩndĩ ngoro yakwa ĩrarĩ o hindũku, na rĩrĩ, nĩ mũgambo ndĩraiguire wa mwendwa wakwa agĩkomakoma mũrango, akiugaga, Kairĩtu ka maitũ, mũrata wakwa, gatutura gakwa, o wee wakwa ũtarĩ gocuke, ’hingũrĩra! amu mũtwe wakwa nĩũiyũĩre ime, njuĩrĩ ciakwa igakĩiyũra ireera rĩa ũtukũ.
• 3. Ndĩracokia atĩrĩ, Anga ndirutĩte nguo yakwa! nĩ njoke ndĩmĩĩkĩre? ningĩ githĩ ndiĩthambĩte makinya! nĩ njoke ndĩmagwatie gĩko?
• 4. Ũcio mwendwa wakwa aratonyia guoko kamwanya karĩa ka mũrango, nayo ngoro yakwa ĩroka o ĩgĩkundũka nĩ ũndũ wake.
• 5. Ndĩrokĩra ’hingũrĩre mwendwa wakwa, moko makwa o magĩtaataga manemane, ciara igataatĩria ngwatĩro cia rũhindigo rũa mũrango manemane o ĩo ndweku.
• 6. Ndĩrakĩhingũrĩra ũcio mwendwa wakwa: ĩndĩ-rĩ, we mwendwa wakwa nĩ kwĩeherera areehereire, agathiĩ. Rĩrĩa araaririe, ngoro yakwa nĩ kũũrũo ĩrorirũo nĩ hinya: ndĩragĩcoka kũmũcarĩrĩria, ndĩramwaga; ndĩrakĩmwĩta, na ndangĩnjĩtĩka.
• 7. Arangi a camu, arĩa mathiũrũrũkaga itũũra-inĩ, marangora, maraninga, marandihia; ndĩratunyũo nguo yakwa ya igũrũ nĩ arangĩri acio a rũirigo rũa gĩtũũro.
• 8. Ĩ andũ-a-nja aya a Jerusalemu-ĩ, nĩndamwĩhĩtithia atĩ mũngĩona mwendwa wakwa-rĩ, mwĩrei atĩrĩ, atĩ ndĩ mũcuce nĩ rũendo.
• 9. Mwendwa waku kaĩ agĩkĩrĩte endwa arĩa angĩ na kĩ, wee mũthaka kũrĩ andũ-a-nja arĩa angĩ othe? mwendwa waku-rĩ, kaĩ agĩkĩrĩte endwa arĩa angĩ na kĩ, tondũ wagĩtwĩhĩtithia ũguo?
• 10. Mwendwa wakwa-rĩ, nĩ mwerũ na agatunĩha; nowe wa mbere harĩ arũme ngiri ikũmi.
• 11. Mũtwe wake ũhaana ta thahabu o ĩrĩa theru mũno, nacio njuĩrĩ ciake nĩ iria irĩ mĩkumba, na ikaira ta ihuru.
• 12. Maitho make mahaana ta ndutura ciũmbĩte ngiki-inĩ cia ithima, ta marĩa mathambie na mwĩtha, na mũhandĩre wamo no ũrĩa wagĩrĩire o kwagĩrĩra.
• 13. Makai make namo matariĩ ta tũmĩhonia tũtumaine mahuti manungi wega, ningĩ ta tũhumbu tũiyũire tũmĩtĩ twĩ mũrukĩ; mĩromo yake no ta mahũa, nĩ ta ĩitaga manemane ĩrĩa ndweku.
• 14. Ciara ciake cia moko ihaana ta ngome cia thahabu thecerere tũkenyekenyi tũrĩa twĩtagwo thumarati, naguo mwĩrĩ akahaana ta kĩndũ kĩa mũguongo kĩrĩme na gĩkagemio na yakuti nyingĩ iria theru.
• 15. Mĩthimo yake ĩtariĩ ta itugĩ cia mahiga ma mũthemba wĩtagwo marimari, ihandĩrĩirũo makinya-inĩ ma thahabu ĩrĩa ngembu: maũthĩ, atariĩ ta irĩma cia Lebanoni, agagĩthakara o ta mĩtarakwa ĩrĩa yakuo.
• 16. Kanua gake akĩaria ke mũrĩo mũno, nake nĩ mwendeku kii, o kwendeka. Ũguo-rĩ, andũ-a-nja aya a Jerusalemu, nĩguo mwendwa wakwa atariĩ, nĩ ũguo mũrata wakwa ahuana.

Home