Go Back

Rũĩmbo rũa Suleimani Chapter 4

• 1. Ĩ ndũkĩrĩ mũthaka, mũrata wakwa! anga ndũkĩrĩ mwega o mũno! maitho maku mahaanaine na ma ndutura makĩonerũo hau tama-inĩ ũcio wĩhumbĩte ũthiũ naguo: njuĩrĩ ciaku no ta rũũru rũa mbũri ikomete ciĩaraganĩtie hũgũrũrũ-inĩ cia kĩrĩma kĩa Gileadi.
• 2. Magego maku namo mahaana karũũru ka mĩatĩ ĩrĩa mĩmure guoya, rĩrĩa yumĩte kĩanda gũthambio; nayo-rĩ, gũtirĩ ũtarĩ wa mahatha, na gũtirĩ o na ũmwe ũkuĩrĩirũo nĩ mũiruwe.
• 3. Mĩromo yaku ĩtariĩ ta kauuthi gatune, kanua gaku gagakĩagĩra mũno: naguo thiithi waku ũkahaana o ta gĩatũ gĩa itunda rĩĩtagwo ikomamanga ũkĩonerũo hau tama-inĩ ũcio wĩhumbĩte ũthiũ naguo.
• 4. Ngingo yaku ĩtariĩ ta nyũmba ya Daudi ĩrĩa yakĩtwo mũthiringo ya kũigagwo mathaita, nakuo gũgacuurio ngo ngiri ng’ima, na ciothe no ngo cia njamba cia ita.
• 5. Nyondo ciaku cierĩ ihaanaine na ciana igĩrĩ cia thiya, cia mahatha, irarĩa mahũa-inĩ.
• 6. Nĩngwĩtwara kĩrĩma-inĩ kĩrĩa kĩa manemane, ngĩkinye gĩthũngũri-inĩ kĩrĩa kĩa ubani, njikare kuo nginya rĩrĩa kũrĩrura, nacio ciĩruru ciirĩrie.
• 7. Wee ũrĩ mũthaka guothe, mũrata wakwa; ndũrĩ na kĩmeni o na kanini.
• 8. Ndũũke tũthiĩ nawe, mũhiki wakwa, tuume Lebanoni, niĩ tũthiĩ nawe tũkiume Lebanoni: uma kũu gacũmbĩrĩ ka Amana, uume gacũmbĩrĩ ga Seniru na ka Herimoni, wĩumĩre kũu ciemo-inĩ cia mĩrũthi, ũkiume irĩma-inĩ icio cia ngarĩ!
• 9. Kairĩtu gaka ka maitũ, o wee mũhiki wakwa, ngoro yakwa nĩ gũtwarĩrĩria ũmĩtwarĩrĩirie; nĩũtwarĩrĩirie ngoro yakwa na irora o rĩmwe rĩa riitho, ũkamĩhoota na karengeri o kamwe gaku ka ngingo.
• 10. Kairĩtu ka maitũ, o wee mũhiki wakwa, wendani waku kaĩ nĩ mũthaka-ĩ! mĩendere yaku-rĩ, nĩ mĩega mũno o na gũkĩra ndibei! naguo mũtararĩko wa maguta maku macio wĩhakaga-rĩ, nĩ mwega kũrĩ wa mahuti mothe marĩa manungi wega!
• 11. Mĩromo yaku, wee mũhiki wakwa, nĩ ta magua magĩtaatia ũũkĩ: nguruĩ ya rũrĩmĩ rũaku nĩ ũũkĩ harĩ, o na iria; naguo mũnungĩre wa nguo ciaku no ta mũnungĩre wa Lebanoni.
• 12. Mwarĩ ũyũ wa maitũ, o wee mũhiki wakwa, ahuana ta mũgũnda mũirigĩre; ningĩ ta gĩthima kĩirigĩre, itherũkĩro rĩa maĩ ihinge na rĩgathingĩrĩrũo.
• 13. Thuna ciaku no ta kamũtitũ ka mĩtĩ ya matunda ĩrĩa ĩĩtagwo mĩkomamanga, ĩrĩ maciaro mendeku mũno; ningĩ mĩhanuni, na mĩtĩ ĩrĩa yumaga uundi,
• 14. Uundi o na manjano, ningĩ irago na mĩndarathini, hamwe na mĩtĩ yothe ĩrĩa yumaga ubani; ningĩ manemane na thubiri, hamwe na mahuti mothe marĩa makĩrĩtie mangĩ kũnunga wega.
• 15. Wee-rĩ, ũtariĩ ta itherũkĩro rĩa maĩ rĩĩ mũgũnda, gĩthima kĩa maĩ marĩ muoyo; na ta tũrũũĩ tũrĩa tũthereraga tuumĩte Lebanoni.
• 16. Ĩ wee rũhuho rũa gathigathini-rĩ, ĩribaribe! nawe rũa gũthini-rĩ, o nawe, ũka! hurutai mũgũnda ũyũ wakwa, nĩguo mĩtararĩko yaguo ĩhunje. Mwendwa wakwa nĩatonye mũgũnda wake, akĩrĩe matunda make o macio mendeku mũno!

Home