Go Back

Kohelethu Chapter 1

• 1. ATĨRĨRĨ, ici nĩcio ndeto cia Mũhunjia, ũrĩa mũrũ wa Daudi, mũthamaki wa Jerusalemu.
• 2. Maũndũ mothe nĩ ma tũhũ, ũguo nĩguo Mũhunjia ũcio ekuuga; ĩĩ, ti-itherũ mothe nĩ ma tũhũ mũtheri, mothe nĩ tũhũ biũ.
• 3. Nĩ uumithio ũrĩkũ mũndũ onaga harĩ wĩra wothe ũrĩa arutaga gũkũ thĩ kwaraga riũa?
• 4. Rũciaro rũmwe rũathira-rĩ, nĩ rũngĩ rũũkaga; no rĩrĩ, thĩ ĩtũũraga ĩrĩ o ho tene na tene.
• 5. O narĩo riũa rĩrathaga, na rĩgathũa, ningĩ rĩgacoka kũhanyũka na kũrĩa rĩrathagĩra.
• 6. Rũhuho rũhurutanaga, rũgathiĩ rũrorete gũthini, na rũgacoka mwena wa gathigathini; naruo rũthiũrũrũkangaga o kũrĩa rũgeraga rũtegũtigithĩria.
• 7. Njũĩ ciothe ciitagĩrĩra iria-inĩ; no rĩrĩ, iria rĩu rĩtiiyũraga; ningĩ kũndũ kũu njũĩ icio ciumaga-rĩ, nokuo icokaga.
• 8. Maũndũ mothe-rĩ, marehanagĩrĩre mĩnoga ĩrĩa ĩtangĩgweteka; narĩo riitho-rĩ, rĩtihũnaga kuona; o nakuo gũtũ-rĩ, gũtiiganagia kũigua.
• 9. Maũndũ marĩa maarĩ kuo tene, nomo magacoka kũgĩa kuo, namo marĩa maatũire mekagwo, nomo magacoka gwĩkwo thutha-inĩ; na gũtirĩ ũndũ o na ũrĩkũ ũtarĩ wa ndũire gũkũ thĩ kwaraga riũa.
• 10. Ĩ hihi nĩkũrĩ ũndũ ũngĩĩrũo nĩ andũ atĩ, Onei, ũyũ ti wa ndũire? Gũtirĩ; nĩ gũkorũo ũndũ ũcio warĩ o kuo tene mahinda marĩa tũtaaciarĩtwo.
• 11. Andũ arĩa maarĩ kuo tene-rĩ, matiririkanagwo, o nao arĩa magaciarũo thutha matikaririkanagwo nĩ arĩa makamarũmĩrĩra.
• 12. Niĩ Mũhunjia ndarĩ mũthamaki wa gũthamakĩra Isiraeli Jerusalemu.
• 13. Na nĩndageririe na ngoro kũbara, na gũtuĩria maũndũ mothe marĩa mekagwo gũkũ thĩ; no rĩrĩ, nĩ gũtangĩka kũnene Ngai aatũmire ciana cia Adamu itangĩkage.
• 14. Mawĩra mothe marĩa marutagwo gũkũ thĩ kwaraga riũa-rĩ, nĩndĩmabarĩte; na atĩrĩrĩ, mothe nĩ ma tũhũ, o na gwĩthĩnia gũtheri.
• 15. Harĩa hogomu hatingĩrũngarĩka; o nakĩo kĩrĩa kĩagĩte gĩtingĩtarĩka.
• 16. Nĩ gwĩciria ndeciririe na ngoro yakwa, ngiuga atĩrĩ, Nĩngĩĩte na ũũgĩ mũnene gũkĩra andũ othe arĩa maarĩ mbere yakwa Jerusalemu; ĩĩ, ti-itherũ ngoro yakwa nĩĩgĩĩte na ũũgĩ mũno, o na ũmenyi maũndũ.
• 17. Na niĩ ngĩĩhaarĩria na ngoro yakwa kũmenya maũndũ ma ũũgĩ, o na kũmenya ũrĩa ũgũrũki na ũkĩgu itariĩ: ngĩkĩona atĩ o na ũndũ ũcio naguo, no wa gwĩthĩnia gũtheri.
• 18. Nĩ ũndũ kũũhĩga mũno nĩ kwĩreherere ruo rũingĩ; nake mũndũ ũrĩa wĩyongereire ũmenyi maũndũ, nĩ kĩeha kĩingĩ eyongereire.

Home