Go Back

Thimo Chapter 8

1. MŨTUMIA ũrĩa, ti Ũũgĩ-ũrĩa-wa-ma, anga tiwe ũragũtũka, o we Ũtaũku-rĩ, githĩ tiwe ũraruta mũgambo?
2. Tũcũmbĩrĩ-inĩ twa kũrĩa gũtũũgaraire gũkuhĩ na njĩra, o na kũrĩa njĩra igomanĩire-rĩ, nĩkuo arũgamaga;
3. Ningĩ kĩhingo-inĩ, o hau rĩingĩrĩro-inĩ rĩa itũũra, o igukumĩro-inĩ rĩa mĩrango, nĩho aanagĩrĩra:
4. Akoiga, Nĩ inyuĩ, o inyuĩ andũ, ndĩragũtũkĩra; mũgambo wakwa nĩ inyuĩ ciana cia kĩrĩndĩ njerekeirie.
5. Inyuĩ mũtarĩ ogĩ-rĩ, ĩmenyerei wara; o inyuĩ irimũ, gĩai na ngoro ndaũku.
6. Kĩiguei! amu nĩ mohoro me bata mũno ngwaria; ũrĩa nguuga ndatumũra mĩromo no maũndũ marĩa marũngĩrĩru.
7. Tondũ kanua gakwa no ũhoro ũrĩa wa ma kangiuga; mĩromo yakwa ĩthũire waganu ta kĩndũ kĩĩ magigi.
8. Ciugo ciothe cia kanua gakwa nĩ cia ũthingu, itirĩ na ũndũ o na ũmwe mũhĩngĩcanu kana mũhotomu.
9. Ciothe no nguũku wega harĩ mũndũ mũtaũku, na harĩ arĩa agĩu na ũmenyi nĩ njerekereru.
10. Amũkĩrai ũtaaro wakwa, tiga betha; iyũkiai ũmenyi, tiga thahabu, o na ĩrĩ ya ũthuro.
11. Nĩ gũkorũo ũũgĩ-ũrĩa-wa-ma nĩ kĩndũ kĩega kũrĩ ruru iria ndune, na indo ciothe iria ciendagwo itingĩgerekanĩka naguo.
12. Niĩ, o niĩ Ũũgĩ-wa-ma, wara mwega ndĩũtuĩte gĩtũũro gĩakwa, na ngetuĩrĩria ũmenyi wa gũthugunda maũndũ.
13. Gwĩtigĩra Jehova-rĩ, nĩ gũthũũra ũũru: mwĩtĩo, na mwĩtũũgĩrio, na ũthii njĩra njũru, o na kanua ka rũtũrĩko-rĩ, maũndũ macio niĩ nĩndĩmathũire.
14. Nĩ niĩ mwene kĩrĩra, o na ũmenyi ũrĩa mũkinyanĩru; ũtaũku no niĩ, na nĩ niĩ ndĩ na ũhoti.
15. Nĩ ũndũ wakwa-rĩ, athamaki mahotaga gũthamakĩra mabũrũri mao, na anene makahota gũtuagĩra andũ maũndũ ma ũthingu.
16. No ũndũ wakwa aathani nĩmamenyaga gwathana, na makang’ũ ma bũrũri o ũndũ ũmwe, o kinya atua-cira othe a thĩ.
17. Andũ arĩa manyenda, nĩo na niĩ nyenda; arĩa manjaragia na kĩyo-rĩ, kũnyona nĩmarĩnyonaga.
18. Harĩ niĩ he na ũtonga o na gĩtĩo, ĩĩ-ni, ũtonga o ũrĩa wa ndĩrĩri, na nĩngĩ ũthingu.
19. Maciaro makwa nĩ mega kũrĩ thahabu, gwata thahabu ĩrĩa theru mũno, uumithio wakwa ũgakĩra betha, na ĩrĩ ya ũthuro.
20. ’Thiaga na rũtumo o rũrĩa rũa ũthingu, ngakĩgeraga njĩra o iria cia kĩhooto.
21. Nĩguo ndũmage arĩa manyenda magwate magai, njiyũragie mĩthithũ yao.
22. Jehova nĩegĩĩrĩire na niĩ o kĩambĩrĩria-inĩ kĩa njĩra yake, o mbere ya kũruta mawĩra marĩa make ma tene.
23. Ndathondeketwo kuuma tene wa tene, o kuuma kĩambĩrĩria, thĩ ĩtarĩ yagĩa.
24. Hingo ĩrĩa maria-inĩ kũu kũriku gũtaagĩĩte o na kũmwe, norĩo ndaciarirũo; hingo gũtaarĩ na matherũkĩro ma gũtothokaga maĩ.
25. Ndaciarirũo mbere ithuri itarĩ ciahandwo, o rĩrĩa gũtaanagĩa na irĩma,
26. O we ataanomba thĩ, o na kana mawerũ, kana kĩambĩko kĩa ngũmba iria ciombire mabũrũri.
27. Hĩndĩ ĩrĩa aathondekire igũrũ, niĩ ndarĩ ho; rĩrĩa aathiũrũrũkĩirie ũthiũ wa iria kũu kũriku na rũkiriri,
28. O rĩrĩa aarũmirie matu mairũ ma igũrũ, rĩrĩa ningĩ matherũkĩro ma maĩ ma kũrĩa kũriku mũno maagwatire hinya;
29. Rĩrĩa ekĩrĩire iria rĩu inene mũhaka, nĩ getha maĩ matikanaagarare rĩathani rĩake; o ro rĩrĩa aakururire mĩkaro ya gĩtina gĩa thĩ:
30. Hingo ĩo yothe niĩ ndarĩ hamwe nake ndĩ wa kwĩrererũo nĩwe, ngatuĩka nĩ niĩ aakenaga nĩ niĩ mũthenya o mũthenya, ngatũhatũhaga ndĩ mbere yake hĩndĩ ciothe,
31. Ngagĩtũhatũha nĩ ũndũ wa thĩ ĩo yake ya gũtũũrũo nĩ andũ, o ngĩkenaga nĩ rũruka rũu rũa andũ.
32. Rĩu, ariũ akwa-rĩ, no kĩiguei ũrĩa ndĩroiga, amu arĩa marũmagĩrĩra njĩra ciakwa no-o a gũkena.
33. Tuĩkai a kũigua ũtaarani, nĩguo mũũhĩge; menyai mũũrege!
34. Gũkena-rĩ, no mũndũ ũrĩa ũnjiguaga, ũrĩa ũtindaga andorereirie ihingo-inĩ cia gwakwa, agakĩnjetagĩrĩra o hingĩro-inĩ cia mĩrango yakwa.
35. Thima-rĩ, ũrĩa ũgĩĩte na niĩ nĩ muoyo agĩĩte naguo, nake nĩarĩĩrutagĩra ũtugi harĩ Jehova.
36. Nake ũrĩa ũhĩtainie na niĩ nĩ kwĩĩka eĩkaga ũũru ngoro yake mwene, amu arĩa othe ma’thũũraga nĩ gĩkuũ makoragwo mendete.

Home