Go Back

Thimo Chapter 31

• 1. MAYA nĩ mohoro ma mũthamaki wetagwo Lemueli; nĩ ũrathi aarutirũo nĩ nyina.
• 2. Ngũgĩkwĩra atĩa, mũrũ wakwa? ĩ ngũkwĩra atĩa, mwana ũyũ wa nda yakwa? ngũgĩkwĩra atĩa, o we mwana ũyũ ndehĩtaga nĩ ũndũ waku?
• 3. Atĩrĩrĩ, ndũkanatuĩke mũhei andũ-a-nja hinya waku; menya ũkanyarira mĩthiĩre yaku harĩ acio maninaga athamaki.
• 4. Athamaki, Lemueli-ĩ, athamaki-rĩ, matiagĩrĩirũo nĩ kũnyuaga ndibei; anene-rĩ, matiagĩrĩirũo nĩ gũtinda makĩũragia, Njohi ĩrĩ ha?
• 5. Matigatuĩke atĩ maanyua makariganĩrũo nĩ watho, magakĩgaramia ituĩro rĩa mũndũ o na arĩ ũ, arĩa monete thĩna.
• 6. Njohi-rĩ, heaga ũrĩa ũkiriĩ gũthira, ndibei, heaga ũrĩa wĩ na ũcũngũ ngoro;
• 7. Ũcio nĩakĩnyue, nĩguo ariganĩrũo nĩ ũnyamari wake, ũritũ ũcio wake agĩtĩge kũũririkana rĩngĩ.
• 8. Ũrĩa ũtangĩhota kwĩarĩrĩria, wee, tumũraga kanua gaku nĩ ũndũ wake, waragĩrĩrie othe ta acio matigĩtwo oiki.
• 9. Tumũraga kanua, ũtuanagĩre na ũthingu, andũ arĩa athĩnĩki, o arĩa aagi-rĩ, ũkĩmaciragĩre na kĩhooto.
• 10. MŨTUMIA ngatha-rĩ, angĩoneka nũ? nĩ amu thogora wake nĩũkĩrĩte mũno wa ruru iria ndune.
• 11. Ngoro ya mũthuriwe nĩwe ĩĩhokete, na mũthuri ũcio ndarĩkĩagaga kuona thũgũrĩ.
• 12. Mũtumia ũyũ matukũ mothe ma muoyo wake no wega amwĩkaga, ndangĩmwĩka ũũru.
• 13. Eyethagĩra guoya wa ng’ondu o na ndigi cia ũguta, agagĩcirutithagia wĩra na moko make arĩ o na mwĩendero.
• 14. Ahuana ta marikabu iria cia biacara nĩ ũrĩa athũgũraga irio ciake o kũraya.
• 15. O na kũroka arokaga gũũkĩra kũrĩ o ũtukũ, akagagũra andũ a nyũmba yake, nacio ndungata ciake cia airĩtu agaciathĩrĩra mawĩra ma cio.
• 16. Ataranagia ũhoro wa mũgũnda mũna, akaũgũra, agakĩũhandĩthia mĩthabibu na ũrĩmi wa moko make.
• 17. Eohaga hinya njohero ta kwĩoha mwĩhotoro, na kũnyitia akanyitagia moko make marute wĩra.
• 18. Nĩonaga atĩ wonjorithia wake nĩũrĩ wongereri; tawa wake ũgakĩraaraga o ũgĩakana.
• 19. Agwatagĩrĩra mũtĩ ũrĩa wa kuogothithia uuthi, nakĩo gĩcũni agakĩnyita na hĩ.
• 20. Akumbatũragĩria andũ arĩa athĩni rũhĩ, ĩĩ-ni, arĩa aagi agakĩmatambũrũkagĩria moko.
• 21. Ndacakayagĩra andũ a gwake kũngĩgũa tharunji, nĩ gũkorũo andũ ake othe mehumbĩte nguo mũthemba ũrĩa mũtune.
• 22. Ningĩ nĩetumagĩra mĩrengeti ya kwara ĩrĩ mĩcoora, na nguo ciake nĩ cia gatani ĩrĩa njega na tama wa rangi wa zambarau.
• 23. Mũthuriwe nĩekũũraine e thome, rĩrĩa aikaranĩtie na athuri a bũrũri.
• 24. Mũtumia ũcio nĩatumaga matonyo ma gatani akĩmendagia, o na mĩcibi agathondeka o ĩgĩthiaga na mũhũri wa biacara.
• 25. Hinya o na ũtĩĩku nĩcio nguo iria ehumbĩte; ũndũ ũrĩa ũngĩũka thutha agakĩũthekagĩrĩra.
• 26. Kanua gake atumũraga na ndeto cia ũũgĩ-ũrĩa-wa-ma, na kĩrĩra kĩrĩa kĩĩ rũrĩmĩ-inĩ rũake nĩ kĩrĩa gĩa ũtugi.
• 27. Kũrorereria nĩaroragĩrĩria mĩthiĩre ya andũ a nyũmba yake; ndarĩagĩra irio ũgũta.
• 28. Ciana ciake nĩirũgamaga ikoiga arorathimwo; mũthuriwe o nake nĩ kũgatha amũgathaga, akamwĩra,
• 29. Andũ-a-nja nĩ aingĩ maanatuĩka ngatha, no wee-rĩ, nĩũmakĩrĩte othe.
• 30. Ngoga nĩ cia kũhenania, naguo ũthaka nĩ wa tũhũ, ĩndĩ mũtumia ũrĩa mwĩtigĩri Jehova-rĩ, nĩwe wa gũkumagio.
• 31. Mũhei ũrĩmi wa moko make, namo mawĩra make marotũma akumagĩrio thome-inĩ!

Home