Go Back

Thimo Chapter 3

• 1. MŨRŨ wakwa, menya gũkariganĩrũo nĩ kĩrĩra gĩakwa, ngoro yaku ta nĩĩĩikaragĩrie maathani makwa o wega!
• 2. Thima-rĩ, magakuongererithia ũraihu wa matukũ, ũgĩtũũre mĩaka mĩingĩ, na ũikarage o na thayũ.
• 3. Ũtugi, na ũhoro-wa-ma-rĩ, ndũkanareke igũthame: ciĩoherere ngingo; ciandĩke kĩhengere-inĩ gĩaku kĩa ngoro:
• 4. Weka ũguo, no ũtuĩke wa kwendwo na ũgĩe na gĩtĩo maitho-inĩ ma Ngai o na ma andũ.
• 5. Ĩhokage Jehova na ngoro yaku yothe, ũtigage gwĩtiirania na mbuguĩro yaku mwene;
• 6. Mwĩtĩkagĩre o we mĩthiĩre-inĩ yaku yothe, nacio njĩra ciaku nĩarĩkũrũngagĩra.
• 7. Tigaga kwĩona wee mwene ta wĩ mũũgĩ; ĩtigagĩre Jehova, ũthemage maũndũ marĩa moru:
• 8. Na ũhoro ũcio no ũtuĩke wa gũtũũria mũkonyo waku na hinya na wa gũikaragia mahĩndĩ maku na ũigũ
• 9. Tĩithagia Jehova na indo iria ũrĩ nacio, ningĩ na mĩgerio ya uumithio wothe ũrĩa wonaga:
• 10. Hĩndĩ ĩo makũmbĩ maku no maiyũrage bũthi, nacio itumbĩ ciaku ciiyũragĩrĩre ndibei ya mũhihano.
• 11. MŨRŨ wakwa, menya gũgatirika ihũra rĩa Jehova, kana ũnoge nĩ kũrũithio nĩwe,
• 12. Nĩ gũkorũo Jehova arũithagia ũrĩa endete, o ta ũrĩa ithe wa mũndũ arũithagia mũriũ o ũcio akenagĩra.
• 13. Gũkena-rĩ, nĩ mũndũ ũrĩa wonete ũũgĩ-ũrĩa-wa-ma, na mũndũ wĩrutagĩra ũtaũku mũthithũ-inĩ wake.
• 14. Amu wonjoria waguo nĩ mwega kũrĩ wonjoria wa betha, uumithio waguo ũgagĩkĩra wa thahabu ĩrĩa theru mũno.
• 15. Mũtumia ũcio ũgwĩtwo Ũũgĩ-ũrĩa-wa-ma e bata gũkĩra ruru iria ndune, na indo ciothe iria ũngĩĩrirĩria gũtirĩ kĩngĩhota kũgerekanĩka nake.
• 16. Rũhĩ-inĩ rũake rũa ũrĩo arĩ na ũraihu wa matukũ, naruo rũa ũmotho arĩ na ũtonga na gĩtĩo.
• 17. Njĩra ciake irĩ o maũndũ ma kũiguithia mũndũ wega, na tũcĩra twake tuothe no twa thayũ.
• 18. Harĩ arĩa mamwĩgwatĩrĩire nĩ mũtĩ wa muoyo; mũndũ wa gũtũũra amwĩnyitĩrĩire, kaĩ nowe wa gũkena-ĩ!
• 19. Ũũgĩ-rĩ, nĩguo Jehova aahandire gĩtina gĩa thĩ naguo, igũrũ narĩo aarĩrũmirie na ũtaũku ũcio wake.
• 20. Nĩ ũmenyi wake watũmire maria-inĩ kũu kũriku gũtuthũrũrũke, nakuo matu-inĩ gũgataatangagia ime.
• 21. MŨRŨ wakwa, ndũkanareke maũndũ maya mathenge maitho-inĩ maku; ũũgĩ ũrĩa mũkinyanĩru, gwata ũgerereri-rĩ, ciĩikaragĩrie:
• 22. Weka ũguo, no ituĩke cia gũtũũria roho waku muoyo, na ituĩke wagĩru wĩ ngoga wĩkĩrĩte ngingo.
• 23. Hĩndĩ ĩo no ũthiage na njĩra yaku o wĩgangarĩte, na kũgũrũ gwaku gũtingĩkahĩngwo.
• 24. Wakoma, ndũrĩ ũndũ ũngĩĩtigĩra, ĩĩ-ni, no gũkoma ũrĩkomaga ũkona toro mwega.
• 25. Ndũngĩgĩa na bata wĩtigĩre kĩmakania kĩrĩa kĩngĩũka na kĩguũ, o na kana gĩcanjamo kĩa arĩa aaganu, rĩrĩa kĩngĩmakinyĩrĩra,
• 26. Nĩ gũkorũo Jehova nĩwe ũgũtuĩka mwĩhoko waku, nake no amenyagĩrĩre kũgũrũ gwaku gũtikagwatio nĩ mũtego.
• 27. Menya gũkaima andũ ũndũ mwega, arĩa maagĩrĩirũo nĩ gwĩkwo, guoko gwaku gwakorũo gũtaagĩte hinya wa kũwĩka.
• 28. Tiga kwĩra mũndũ wa itũũra rĩanyu, Thiĩ, ũcoke rĩngĩ, nĩngakũhe rũciũ; na kĩrĩa ekwenda ũrĩ o nakĩo hakuhĩ.
• 29. Ndũkanathugundĩre mũndũ wa itũũra rĩanyu ũndũ mũũru, kuona nĩmũtũũrainie atarĩ na ũndũ angĩĩgigima.
• 30. Ndũkanahiũranie na mũndũ tũhũ, atarĩ ũũru agwĩkĩte.
• 31. Menya ũigue ũiru nĩ ũndũ wa mũndũ ũrĩa mũtoi, na ndũkanethurĩre njĩra ciake o na ĩmwe ũmĩrũmĩrĩre.
• 32. Amu mũndũ mũhĩtanu nĩ kĩndũ kĩĩ magigi harĩ Jehova, no andũ arĩa arũngĩrĩru nĩo agĩaga ndundu nao.
• 33. Mũciĩ wa arĩa aaganu ũtũũraga ũrumĩtwo nĩ Jehova, nakĩo gĩtũũro kĩa mũndũ mũthingu nĩ kũrathima akĩrathimaga.
• 34. O na aatuĩka atĩ arĩa atendi, gũtenda nĩakĩmatendaga, andũ arĩa matarĩ etĩi-rĩ, nĩ wega wake amakinyagĩria.
• 35. Andũ arĩa ogĩ, igai rĩrĩa makagaya nĩ riri, ĩndĩ ngatho ĩrĩa ĩgwatagwo nĩ irimũ no njono.

Home