Go Back

Thimo Chapter 29

• 1. Ũrĩa wĩũmagia ngingo o na akĩrũithagio kaingĩ agathuthĩka o gũthuthĩka, na hatigĩe kĩhonia.
• 2. Rĩrĩa arĩa athingu matuĩkĩte nĩo me na hinya, andũ nĩ gũkena makenaga, no rĩrĩa gũgwathanwo nĩ mũndũ mwaganu, nĩ gũcaya macayaga.
• 3. Mũndũ wendaine na ũũgĩ-ũrĩa-wa-ma atũũragia ithe na gĩkeno, ĩndĩ ũrĩa wa thiriti na aka a maraya nĩ gũitanga aitangaga ũmathi wake.
• 4. Mũthamaki anyitagia bũrũri na matuĩro make ma kĩhooto, no ũrĩa ũtuĩkaga mwĩtia wa iheo nĩ kũinamania aũinamanagia.
• 5. Mũndũ ũmonjoraga ũrĩa ũngĩ nĩ kwamba araamba wabu ya kũmũnyita magũrũ.
• 6. Kwĩhia kwa mũndũ ũrĩa mũũru kwĩ na mũtego wa kũmũtega, no mũndũ mũthingu aikaraga o agĩkũngũyagia nĩ gũkena.
• 7. Mũndũ mũthingu nĩemenyithagia cira wa arĩa ahũthũ, ũrĩa mwaganu-rĩ, ndangĩrũĩria aũmenye.
• 8. Andũ arĩa atendi matũmaga itũũra rĩrĩrĩmbũke mwaki, no andũ arĩa ogĩ, nĩ gũthengia mathengagia marakara.
• 9. Mũndũ mũũgĩ aagĩa cira na kĩrimũ, o na aatuta, o na aatheka, gũtirĩ ũhurũko ũrĩoneka.
• 10. Aiti-thakame nĩ gũthũũra mathũũraga mũndũ mũkinyanĩru, no andũ arĩa arũngĩrĩru macaragia ũrĩa mangĩgitĩra muoyo wake.
• 11. Kĩrimũ, marakara makĩo nĩkĩmoimagĩria mothe, no mũndũ mũũgĩ, make nĩamagiragĩrĩria agakĩmahoreria.
• 12. Mwathi-bũrũri angĩtuĩka wa gũthikagĩrĩria maheni, ndungata ciake ciothe no ituĩke njaganu.
• 13. Mũnyamari na mũnyarirani magomanaga hamwe: maitho mao erĩ no Jehova wĩkagĩra ũtheri.
• 14. Mũthamaki ũrĩa ũtuaga macira ma arĩa ahũthũ o na ma, gĩtĩ gĩake kĩa ũnene gĩgũtũũra kĩrũmĩte nginya tene na tene.
• 15. Rũthanju, na kũrũithio, nĩciĩkagĩra mũndũ ũũgĩ-ũrĩa-wa-ma, no mwana wa kũrekererio nĩaconorithagia nyina.
• 16. Rĩrĩa arĩa aaganu matuĩkĩte nĩo me na hinya, mehia namo nĩmathegeaga, ĩndĩ andũ arĩa athingu nĩ kwĩrorera makerorera igũa rĩao.
• 17. Herithagia mũrũguo, na nĩagatũma wonage ũhurũko, ĩĩ-ni, agatũma ũkĩiguage wega ngoro.
• 18. Kũrĩa gũtarĩ kĩoneki kĩonagwo, kĩrĩndĩ nĩgĩtuaga mĩkwa, ĩndĩ mũndũ ũrĩa ũrũmagia kĩrĩra, ũcio nĩ wa gũkenaga.
• 19. Ngombo ndĩngĩhera no kwarĩrio, amu, o na yataũkĩrũo, kũrũmbũiya ndĩngĩrũmbũiya.
• 20. Wĩ mũndũ wonete mũhiũ na kwaria? atĩrĩrĩ, kĩrimũ-rĩ, kĩerĩgĩrĩrĩka gũkĩra ũcio!
• 21. Mũndũ wa kũrera ngombo yake na ũnani kuuma ĩĩ mwana, marigĩrĩrio-inĩ akona ĩgĩĩtua ta mũrũwe.
• 22. Mũndũ wa marakara nĩathombothaga mahiũrania, mũndũ wa marũrũ-rĩ, agĩaga na mehia maingĩ.
• 23. Mwĩtĩo nĩ wa gũtũma mũndũ akanyihio, no ũrĩa wa ngoro ya kwĩnyihia agatuĩka wa gũtĩwo.
• 24. Mũndũ wa kũgĩa rũmwe na mũici nĩ ngoro yake mwene athũire: nĩaiguaga akĩĩhĩtithio, na ndarĩ ũndũ angiumbũra.
• 25. Gwĩtigĩra andũ kũrehagĩre mũndũ mũtego, ĩndĩ ũrĩa mwĩhoki Jehova, we ndangĩkinyĩrĩrĩka.
• 26. Andũ aingĩ nĩmeendagĩrĩria harĩ mwathi wa bũrũri, ĩndĩ ituĩro rĩa mũndũ riumaga kũrĩ Jehova.
• 27. Mũndũ muogogi nĩ kĩndũ kĩĩ magigi harĩ arĩa athingu, nake mũndũ wĩ na mĩthiĩre mĩerekereru nĩ wa magigi harĩ arĩa aaganu.

Home