Go Back

Thimo Chapter 2

• 1. MŨRŨ wakwa, akorũo nĩũgwĩtĩkĩra ciugo ciakwa, namo maathani makwa ũmaige mũthithũ harĩ wee,
• 2. Ũgĩtuĩke atĩ ũũgĩ-ũrĩa-wa-ma nĩguo ũrĩtegagĩra matũ, na werekagĩrie ngoro yaku njĩra ya kwĩgĩĩra na ũtaũku-rĩ;
• 3. Akorũo nĩũgũtuĩka wa kwanĩria ũũgĩ wa kũhota gũkũũrana maũndũ, ũgakĩoyagĩrĩra mũgambo atĩ ũheo ũtaũku;
• 4. Akorũo ningĩ nĩũgũtuĩka wa kũũcaragĩrĩria o ta ũrĩa betha ĩcaragio, na ũũtuĩragie na kĩyo ta ũrĩa gũtuĩragio managĩ marĩa mahitharu;
• 5. Weka ũguo-rĩ, nĩrĩo ũrĩtaũkagĩrũo nĩ ũrĩa gwĩtigĩra Jehova gũtariĩ, ũgĩkinyĩrĩre kũmenya Ngai.
• 6. Amu ũũgĩ-ũrĩa-wa-ma nĩ Jehova ũheanaga, kanua gake noko kene ũmenyi, gwata ũtaũku:
• 7. Andũ arĩa arũngĩrĩru nĩamaigĩire mũthithũ wa ũũgĩ mũkinyanĩru; andũ acio me na mĩthiĩre mĩgima-rĩ, atũũraga arĩ ngo yao,
• 8. Nĩ getha agitagĩre ikĩro iria cia kĩhooto, andũ arĩa maiguaine nake-rĩ, amenyagĩrĩre njĩra yao.
• 9. Ningĩ weka ũguo nĩrĩo ũrĩtaũkagĩrũo nĩ ũhoro ũrĩa wa ũthingu na wa kĩhooto, na ũhotage gũkũũrana maũndũ marĩa marũngĩrĩru, ĩĩ-ni, ũkĩmenye njĩra o yothe njega.
• 10. Nĩ gũkorũo ũũgĩ no ũgũtonye o ngoro-inĩ thĩinĩ, naguo ũmenyi ũiguithagie roho waku wega;
• 11. Ũgerereri-rĩ, nĩguo ũrĩkũmenyagĩrĩra, ũtaũku nĩguo ũrĩkũrindagĩrĩra,
• 12. Ũteithũrithagio harĩ njĩra ĩrĩa ya ũũru, ũthenganagĩre na andũ arĩa maaragia maũndũ ma rũng’athio,
• 13. O arĩa matigaga mĩthiĩre ĩrĩa mĩerekereru, magathiaga na njĩra iria ii nduma;
• 14. Nĩo arĩa makenagio nĩ gwĩka ũũru, na rũng’athio rũa mũndũ ũrĩa mũũru makaiguaga wega nĩruo;
• 15. No-o arĩa mahotomagia mĩthiĩre yao, ikĩro ciao igagĩtuĩka nĩ iria hĩtanu--
• 16. Gũteithũrũo ũteithũragwo ningĩ harĩ mũndũ mũka wa kwene, ũgĩteithũkage harĩ mũgeni ũcio ũnyorokagia ciugo ciake,
• 17. Ũrĩa ũtigĩte mũratawe ũrĩa maatumire ndũgũ e mũirĩtu, agakĩriganĩrũo nĩ kĩrĩkanĩro kĩa Ngai wake.
• 18. Amu nyũmba yake nĩ kĩharũrũka kĩinamĩrĩire gĩkuũ-inĩ, na ikĩro ciake irorete o kũu kwa arĩa akuũ.
• 19. Arĩa mamũceeragĩra gũtirĩ ũcokaga kuuma ho, matiumagĩrĩra njĩra iria cia muoyo--
• 20. Wee-rĩ, ũgĩteithũke, nĩ getha ũgerage njĩra ya andũ arĩa ega, ũrũmagĩrĩre o ikĩro cia andũ arĩa athingu.
• 21. Nĩ gũkorũo andũ arĩa arũngĩrĩru nĩo a gũtũũra bũrũri, acio akinyanĩru-rĩ, nĩo a gũgatigara kuo.
• 22. No andũ arĩa aaganu nĩ kũrindũrũo makarindũrũo bũrũri, mĩgarũka ĩo nĩ kuombororio ĩkombororio kuo.

Home