Go Back

Thimo Chapter 18

• 1. Mwĩbũngia arũmagĩrĩra o kwenda gwake mwene, akang’athithagio nĩ ũũgĩ wothe ũrĩa mũkinyanĩru.
• 2. Kĩrimũ gĩtikenagio nĩ ũmenyi; ũrĩa kĩendaga no gũtengũra ngoro yakĩo.
• 3. Rĩrĩa hoka mwaganu, nĩhoka ningĩ mũrurũkano, na ũhoro wa thoni ũrehage ũmeneku.
• 4. Ndeto cia kanua ka mũndũ nĩ ta ndia ĩrĩa ndiku; gĩthima kĩa ũũgĩ no ta rũũĩ rũikũrũkaga o wega.
• 5. Ti wega gũtĩĩra mũndũ mwaganu maũthĩ, na kũgaramĩria ũrĩa mũthingu ituĩro.
• 6. Mĩromo ya kĩrimũ ĩgĩtonyagia mburuga-inĩ, na kanua gakĩo nĩgagĩĩtagĩria icamiũ.
• 7. Kanua ga kĩrimũ nĩgakĩũnũhithagia, mĩromo yakĩo nĩ mũtego ũgwatagia ngoro yakĩo.
• 8. Ndeto cia mũndũ wa mũhuhungo nĩ ta macũno ma kĩhembe, na kũmerũka imerũkaga nginya tũturi-inĩ twa nda tũrĩa twĩ thĩinĩ mũno.
• 9. Ũrĩa nake ũrutaga wĩra wake na mũhũthia nĩ wa nyina na mwanangi.
• 10. Rĩĩtwa rĩa Jehova nĩ nyũmba ya hinya njake mũthiringo; nĩyo mũndũ mũthingu ahanyũkagĩra agatonya, akarema gũkinyĩrĩrĩka.
• 11. Ũtonga wa mũndũ gĩtonga nĩ ta gĩtũũro e nakĩo kĩirige na hinya; ũhaana ta rũthingo rũraya na igũrũ, we akĩĩgereria.
• 12. Ĩtanona mwanangĩko, ngoro ya mũndũ ĩkoragwo ĩĩgoocete; gũtĩĩka gũtongoirio nĩ kwĩnyihia.
• 13. Mũndũ gũcokia ũhoro atanaigua nĩ ũrimũ, na nĩ ũndũ wa gũtũma one thoni.
• 14. Roho wa mũndũ nĩguo ũmũũmagĩrĩria ahinyarĩte, no guo roho ũthuthĩkĩte-rĩ, nũ ũngĩhota gwĩtiiria?
• 15. Ngoro ya ũrĩa wĩ na mbuguĩro nĩĩĩthũgũragĩra ũmenyi; gũtũ kwa mũndũ mũũgĩ o nakuo no ũmenyi gũcaragĩrĩria.
• 16. Kĩheo mũndũ aheanĩte nĩkĩmuonagĩra ha kũhĩtũkĩra, na gĩkamũkinyia harĩ andũ arĩa anene.
• 17. Mwambĩrĩria cira onagwo ta arĩ we wĩ na kĩhooto, ĩndĩ ũrĩa me cira nake okaga agakĩmuururia.
• 18. Ũcuki wa mĩtĩ nĩũninaga ngarari, gũtuithania nĩũtuithanagia makarau.
• 19. Mũndũ ekĩte mũrũ wa nyina ũũru, nĩ hinya agĩcoka kwĩiguithania nake gũkĩra kwĩgwatĩra itũũra rĩirige; ngarari ta icio nĩ ta mĩgĩĩko ĩrĩa ĩhingaga njera.
• 20. Maciaro ma kanua ka mũndũ nĩmo makamũiyũra nda; uumithio wa mĩromo yake kũmũhũnia no ũkamũhũnia.
• 21. Rũrĩmĩ rũĩ na hinya wa gwathĩrĩra mwene muoyo o na gĩkuũ, nao arĩa marũenda no marĩage maciaro maruo.
• 22. Ũrĩa wĩgĩĩrĩire na mũtumia nĩagĩĩte na kĩndũ kĩega; nĩ gũtugwo atugĩtwo nĩ Jehova.
• 23. Mũkĩa no gũthaithana athaithanaga, no gĩtonga gĩcokagia ũhoro na mũgoromoko.
• 24. Mũtumi ndũgũ nyingĩ nĩ wa kwĩũnũhithia, no nĩkũrĩ mũrata wa gũtũũra anyitaine na mũndũ gũkĩra mũrũ wa nyina.

Home