Go Back

Thimo Chapter 12

• 1. Mwendi gũtaarũo nĩ mwenda ũmenyi, ĩndĩ mũthũũri kũrũithio nĩ kĩrimũ kĩũru.
• 2. Mũndũ mwega nĩ ũtugi arĩĩrutagĩra harĩ Jehova, ĩndĩ mũndũ muungumania, Jehova no amũtue mwĩhia.
• 3. Gũtirĩ mũndũ ũngĩĩhanda na maũndũ ma waganu, ĩndĩ ũrĩa mũthingu, mĩri yake ndĩrĩ hĩndĩ ĩkenyenyeka.
• 4. Mũtumia ũrĩa ngatha nĩwe thũmbĩ ya mũthuriwe, ĩndĩ mũka ũconorithagia mũthuriwe nĩ ta woru ũmũtonyete mahĩndĩ.
• 5. Methugunda ma mũndũ mũthingu nĩ ma kĩhooto, no metaara ma andũ arĩa aaganu nĩ ma ũrĩa-ma.
• 6. Ndeto cia arĩa aaganu no cia kuoheria andũ mamaite thakame, ĩndĩ kanua ka andũ arĩa arũngĩrĩru nĩkamateithũraga.
• 7. Arĩa aaganu maatirũrũo nĩ gũthira mathiraga, no nyũmba ya mũndũ mũthingu nĩĩtũũraga o ĩrũngiĩ.
• 8. Mũndũ arĩgathagĩrĩrio kũringana na ũũgĩ ũrĩa arĩ naguo, ĩndĩ ũrĩa wa ngoro ng’enyũku no kũmenwo arĩmenagwo.
• 9. Kaba mũndũ wonagwo ta atarĩ bata, na e na ndungata, kũrĩ ũrĩa wĩĩkagĩrĩra, na akaaga gĩa-kũrĩa.
• 10. Mũndũ mũthingu nĩamenyagĩrĩra muoyo wa nyamũ yake, no matha ma ũrĩa mwaganu no wĩĩ.
• 11. Mwĩrĩmĩri mũgũnda arĩtũũraga na hũni, ĩndĩ mũrũmanĩrĩri na mbũrũrũ nĩ kwaga aagĩte wĩcirio.
• 12. Ũrĩa mwaganu nĩeriragĩria kĩrĩa kĩgwatie nĩ andũ arĩa oru, ĩndĩ mĩri ya andũ arĩa athingu nĩyumaga maciaro.
• 13. Kwĩhia na mĩromo nĩ mũtego ũgwatagia mwene yo ũcio mũũru, no mũndũ mũthingu nĩ kũhonoka ahonokaga hatĩka-inĩ.
• 14. Mũndũ nĩarĩhũnagio wega nĩ maciaro ma kanua gake, ciĩko iria mũndũ ekaga na moko o nacio no arĩcokagĩrio.
• 15. Njĩra ya mbũra-matũ nĩ njerekereru we akĩĩonera, no mũndũ ũrĩa mũũgĩ nĩ gũthikĩrĩria athikagĩrĩria agĩtaarũo.
• 16. Mang’ũrĩka ma kĩrimũ kĩũra-matũ nĩmoimbũkaga o rĩmwe, no mũndũ mũbarĩrĩri aaconorũo nĩahithaga ngoro.
• 17. Mũtumũri na ndeto cia ma nĩ ũthingu oimũkanagia, no mũira wa maheni nĩ ũrĩa-ma atumũkaga naguo.
• 18. Kũrĩ kanua kaaragia gatecirĩtie ta gũthecanga kwa rũhiũ, no rũrĩmĩ rũa mũndũ mũũgĩ nĩrũrehage ũgima.
• 19. Mũromo mwaria-ma ũgũtũũra na hinya kinya tene, ĩndĩ rũrĩmĩ rũa maheni no rũa ndakinga ĩmwe.
• 20. Ũrĩa-ma nĩguo ũrĩ ngoro cia arĩa athugundi maũndũ moru, ĩndĩ arĩi-kĩrĩra arĩa endi thayũ marĩonaga o gĩkeno.
• 21. Mũtino gũtirĩ ũngĩgwata andũ arĩa athingu, no andũ arĩa aaganu, ũũru nĩ kũiyũra ũrĩmaiyũraga.
• 22. Mĩromo ya maheni nĩ kĩndũ kĩĩ magigi harĩ Jehova, no andũ arĩa eki maũndũ ma ma, nĩ gũkenera amakenagĩra.
• 23. Mũndũ mũbarĩrĩri nĩahithaga ũmenyi wake, ĩndĩ ngoro cia irimũ nĩimemerekagia ũrimũ wacio.
• 24. Guoko kwa mũndũ ũrĩ kĩyo nĩkuo gũgatuĩka gwa gwathana, no mũndũ gĩthayo arĩrutithagio wĩra wa mũnyito.
• 25. Ũritũ ũrĩ ngoro ya mũndũ ũtũmaga ĩiname, ĩndĩ kwarĩrio wega nĩ gũkena gũtũmaga ĩkene.
• 26. Ũrĩa mũthingu nĩwe muonereria mũndũ ũrĩa ũngĩ wa itũũra, no njĩra ya arĩa aaganu nĩ kũhĩtithia ĩmahĩtithagia.
• 27. Gĩthayo gĩtingĩĩnogia gĩkĩhĩhia kĩrĩa kĩgwatire iguĩma-inĩ, ĩndĩ ũmathi wa andũ, ũrĩa wĩ bata, nĩ wa arĩa me kĩyo.
• 28. Muoyo wonekaga na njĩra ya ũthingu, na ũthiĩro wayo ndũngĩoneka gĩkuũ.

Home