Go Back

Thama Chapter 9

• 1. THUTHA wa ũguo Jehova agĩkĩĩra Musa atĩrĩ, Thiĩ he Firauni ũmwĩre ũũ: Jehova Ngai wa Ahibirania ekuuga atĩrĩ, Reka andũ akwa mathiĩ, nĩguo makandungatĩre.
• 2. Tondũ wamagiria mathiĩ, ũtuĩke no ũkũmaikaria-rĩ,
• 3. Jehova nĩegũũkĩrĩra ũhiũ waku ũrĩa ũrĩ rũũru, mbarathi, na ndigiri, na ngamĩra, o na ndũru cia ng’ombe, na cia mbũri, acirehithĩrie mũrimũ mũũru mũno.
• 4. Nake Ngai nĩekwamũrania ũhiũ wa Isiraeli, ũgĩe ngũũrani na wa andũ a Misiri; na gũtigakua nyamũ o na ĩmwe ya ciana cia Isiraeli.
• 5. Ngai agĩgĩtua mũthenya ũrĩa guo, akiuga atĩrĩ, Rũciũ nĩguo Jehova ageka ũndũ ũcio bũrũri ũyũ.
• 6. Nake Jehova agĩkĩroka gwĩka ũndũ ũcio, ũhiũ wothe wa andũ a Misiri ũgĩgĩkua; no rĩrĩ, ũhiũ wa Isiraeli ndũigana gũkua o na atĩa.
• 7. Nake Firauni akĩrekania, agĩkĩmenyithio atĩ hatirĩ nyamũ o na ĩmwe ya andũ a Isiraeli ĩkuĩte. No rĩrĩ, ngoro ya Firauni ĩkĩũma, na ndaigana kũreka andũ mathiĩ.
• 8. Ningĩ Jehova akĩarĩria Musa na Haruni, akĩmera atĩrĩ, Hakũrai mũhu wa icua na hĩ, nake Musa aũminje aũroretie na igũrũ, Firauni akĩĩonagĩra.
• 9. Naguo mũhu ũcio nĩũgũtuĩka rũkũngũ rũceke rũiyũre bũrũri wothe wa Misiri, rũcoke rũtuĩke mahũha ma ironda, moimĩrĩre andũ mĩĩrĩ o na nyamũ, o kũu bũrũri ũcio wothe wa Misiri.
• 10. Nao magĩkĩhakũra mũhu wa icua, makĩrũgama mbere ya Firauni, nake Musa akĩũminja aũroretie na igũrũ, naguo ũgĩtuĩka mahũha ma ironda, magĩkiumĩrĩra andũ o na ũhiũ, bũrũri wothe wa Misiri.
• 11. Nao ago makĩremwo nĩ kũrũgama mbere ya Musa nĩ ũndũ wa mahũha, tondũ o nao nĩmoimĩrĩirũo nĩ mahũha hamwe na andũ othe a Misiri.
• 12. Nake Jehova akĩũmia ngoro ya Firauni, agĩkĩrega kũigua ũhoro wao, o ta ũrĩa Jehova erĩte Musa.
• 13. Ningĩ Jehova akĩĩra Musa atĩrĩ, Ta roka gũũkĩra rũcinĩ tene ũkarũgame mbere ya Firauni, ũmwĩre atĩrĩ, Jehova, Ngai wa Ahibirania, ekuuga atĩrĩ, Reka andũ akwa mathiĩ, nĩguo makandungatĩre.
• 14. Nĩ gũkorũo ihinda rĩrĩ, nĩngũkũrehithĩrie mahũra makwa mothe, wee mwene, na ndungata ciaku, o na andũ aku, nĩguo ũmenye atĩ gũtirĩ ũngĩ ta niĩ thĩ yothe.
• 15. Nĩ ũndũ-rĩ, ingĩtambũrũkĩtie guoko gwakwa ngũhũre na mũrimũ mũũru, wee mwene o na andũ aku-rĩ, rĩu ũngĩrĩ mũnine ndũkanacoke kuonwo gũkũ thĩ.
• 16. No rĩrĩ, ũhoro ũyũ kĩũmbe nĩguo ũtũmĩte ngũtũũrie muoyo, nĩguo nguonie hinya wakwa, o narĩo rĩĩtwa rĩakwa riumbũranĩrũo thĩ yothe.
• 17. Githĩ o na rĩu nĩ kwĩnenehia ũkwĩneneheria andũ akwa ũkarega kũreka mathiĩ?
• 18. Atĩrĩrĩ, rũciũ, ihinda o ta rĩrĩ, nĩngoiria mbura ya mbembe nene mũno ĩtarĩ yoira ĩngĩ tayo gwata hĩndĩ ĩrĩa Misiri kwaambĩrĩirie gũtũũrũo, o nginya rĩu.
• 19. Tondũ wa ũguo, rekania, ũgĩrithie ũhiũ waku ũrĩa wĩ rũũru narua, na kĩrĩa gĩothe wĩ nakĩo mĩgũnda tondũ-rĩ, mũndũ o wothe ũrĩa ũrĩkorũo kũu mũgũnda, o na nyamũ o yothe ĩrĩa ĩrĩaga kũrehwo mũciĩ, mbura ĩo ya mbembe nĩĩkũmiurĩra ĩkue.
• 20. Tondũ ũcio thĩinĩ wa ndungata cia Firauni, mũndũ ũrĩa wetigĩrire ũhoro wa Jehova nĩaahĩkĩrĩirie ndungata ciake ciinũke, o na ciinũkie ũhiũ narua iũtonyie nyũmba;
• 21. nake ũrĩa ũtaarũmbũirie ũhoro wa Jehova akĩrekereria ndungata ciake, o na ũhiũ wake, ciikare o kũu ciarĩ.
• 22. Nake Jehova akĩĩra Musa atĩrĩ, Tambũrũkia guoko gwaku ũkũroretie igũrũ, nĩguo mbura ya mbembe yure bũrũri wothe wa Misiri, yurĩre andũ, o na nyamũ, o na yurĩre kĩrĩa gĩothe kĩmeraga kũu bũrũri wa Misiri wothe.
• 23. Nake Musa agĩtambũrũkia guoko anyitĩte rũthanju rũake, akĩrũroria igũrũ nake Jehova akĩrehithie marurumĩ, o na mbura ya mbembe, bũrũri wothe wa Misiri, naruo rũheni ruumĩte igũrũ rũgĩakana kũu guothe thĩ Jehova agĩkiuria mbura ya mbembe bũrũri wothe wa Misiri.
• 24. Nĩ ũndũ ũcio gũkĩgĩa mbura ya mbembe, na rũheni rũtukanĩte nayo, ĩgĩkĩneneha o mũno mũno, na ndĩoirĩte ĩngĩ tayo bũrũri ũcio wothe, kuuma rĩrĩa Misiri kwaambĩrĩirie gũtũũrũo nĩ andũ.
• 25. Nayo mbura ĩo ya mbembe ĩkĩhũra indo ciothe cia bũrũri wothe wa Misiri iria ciarĩ mĩgũnda, o na aakorũo nĩ andũ kana nyamũ; nayo mbura ĩo ya mbembe ĩkĩhũra tũhuti tuothe tũrĩa twamerete mĩgũnda, o na ĩkiunanga mĩtĩ yothe ĩrĩa yarĩ kuo.
• 26. No rĩrĩ, bũrũri wa Gosheni wiki, kũrĩa andũ a Isiraeli maatũire, nokuo gũtoirire mbura ya mbembe.
• 27. Nake Firauni akĩrekania, agĩĩta Musa na Haruni, akĩmera atĩrĩ, Rĩu nĩ hĩndĩ njĩhĩtie; Jehova nĩwe mũthingu, niĩ o na andũ akwa tũrĩ aaganu.
• 28. Hoyai Jehova, nĩ gũkorũo marurumĩ maya manene, o na mbura ĩno ya mbembe, nĩciiganĩte; rĩu nĩngũmũreka mũthiĩ, na mũtigũcoka gũikara o na hanini.
• 29. Nake Musa akĩmwĩra atĩrĩ, O rĩmwe ndoima itũũra rĩrĩ-rĩ, nĩngwambararĩria Jehova moko, namo marurumĩ nĩmegũthira, na gũticoka kũgĩa mbura ĩngĩ ya mbembe, nĩguo mũmenye atĩ Jehova nĩwe mwene thĩ.
• 30. No rĩrĩ, ha ũhoro waku wee mwene, o na wa ndungata ciaku, nĩnjũĩ atĩ o na rĩu mũtiĩtigĩra Jehova Ngai.
• 31. Na rĩrĩ, ũguta o na cairi nĩcio ciathũkĩrio, tondũ cairi yarĩ na magira, o naguo ũguta nĩwarĩ na kĩro.
• 32. No rĩrĩ, ngano o na guthemethu itiathũkirio, tondũ itianenehete.
• 33. Nake Musa akiuma kũu itũũra-inĩ, akĩehera harĩ Firauni, akĩambararĩria Jehova moko, namo marurumĩ o na mbura ya mbembe igĩthira, o nayo mbura ĩgĩtiga kuura thĩ.
• 34. Ningĩ Firauni ona atĩ mbura ya mbembe o na marurumĩ igũthira, agĩkĩrĩrĩria kwĩhia, akĩĩũmia ngoro, we mwene, o na ndungata ciake.
• 35. Ngoro ya Firauni ĩgĩkĩũma, akĩrega kũreka ciana cia Isiraeli ithiĩ, o ta ũrĩa Jehova oigĩte na kanua ka Musa.

Home