Go Back

Thama Chapter 6

• 1. Nake Jehova akĩĩra Musa atĩrĩ, Rĩu nĩũkuona maũndũ marĩa ngwĩka Firauni, tondũ o hĩndĩ ĩrĩa agakorũo ekĩtwo ũndũ wa hinya, noguo akaareka mathiĩ; o na ningĩ tondũ wa ũrĩa agakorũo ekĩtwo ũndũ wa hinya, noguo akamaingata moime bũrũri wake.
• 2. Nake Ngai akĩarĩria Musa, akĩmwĩra atĩrĩ, Niĩ nĩ niĩ JEHOVA,
• 3. na nĩ niĩ ndoimĩrĩire Iburahimu, o na Isaaka, o na Jakubu, ndĩ Mũrungu-Mwene-Hinya, no rĩrĩ, ha ũhoro wa rĩĩtwa rĩakwa JEHOVA, ndiakorirũo ’menyekete nĩo.
• 4. O na ningĩ nĩ’handĩte kĩrĩkanĩro gĩakwa nao gĩa atĩ nĩngamahe bũrũri wa Kanaani, o bũrũri ũrĩa maatũũrĩte ũgeni-inĩ, kũu maaikarĩte marĩ ageni.
• 5. O na ningĩ atĩrĩ, nĩnjiguĩte mũcayo wa ciana cia Isiraeli kũu itũũragio ũkombo-inĩ nĩ andũ a Misiri, ngaririkana kĩrĩkanĩro gĩakwa.
• 6. Tondũ ũcio, thiĩ wĩre ciana cia Isiraeli atĩrĩ, Nĩ niĩ Jehova, na nĩngũmwaũra mĩrigo ĩo mũigĩrĩirũo nĩ andũ a Misiri, o na nĩngũmwehereria ũkombo ũcio mamũtũirie naguo, ndĩmwĩhatũrĩre ndambũrũkĩtie guoko, o ngĩtuanagĩra matuĩro manene;
• 7. njoke ndĩmuoe mũtuĩke andũ akwa, na niĩ nduĩke Ngai wanyu; na nĩmũkũmenya atĩ niĩ nĩ niĩ Jehova Ngai wanyu, o ũrĩa wa kũmwaũra mĩrigo ĩo mũigĩrĩirũo nĩ andũ a Misiri.
• 8. Na nĩngũmũtwara mũkinye bũrũri ũrĩa ndehĩtire nĩ ũndũ waguo njoete guoko na igũrũ, ngiuga atĩ nĩngahe Iburahimu, na Isaaka, o na Jakubu; na nĩguo ngũmũhe ũtuĩke igai rĩanyu. Niĩ nĩ niĩ Jehova.
• 9. Nake Musa akĩhe ciana cia Isiraeli ũhoro ũcio, no rĩrĩ, itiathikĩrĩirie Musa nĩ ũndũ wa ũrĩa ciaiguĩte ũũru na ngoro ciacio, na tondũ wa ũrĩa ciahinyagĩrĩrio na ũhoro ũcio wa ũkombo.
• 10. Nake Jehova akĩarĩria Musa, akĩmwĩra atĩrĩ,
• 11. Thiĩ ũtonye kwa Firauni, mũthamaki wa Misiri, ũmwarĩrie, ũmwĩre areke ciana cia Isiraeli ciume bũrũri wake.
• 12. Nake Musa akĩarĩria Jehova akĩũria atĩrĩ, Andũ a Isiraeli makĩregete gũ’thikĩrĩria-rĩ, kaĩ Firauni arĩkĩnjigua atĩa, ndĩkĩrĩ mũndũ wĩ mĩromo ĩtarĩ mĩruu?
• 13. Noguo Jehova aarĩirie Musa na Haruni, agĩkĩmahe watho makinyĩrie ciana cia Isiraeli o na Firauni mũthamaki ũcio wa Misiri, atĩ ciana cia Isiraeli ciumio bũrũri wa Misiri.
• 14. Nao andũ aya nĩo ciongo cia nyũmba cia maithe mao. Ariũ a Reubeni, irigithathi rĩa Isiraeli, nĩ aya: nĩ Hanoku, na Palu, na Hezironi, na Karimi; acio nĩo mbarĩ cia Reubeni.
• 15. Nao ariũ a Simeoni nĩ Jemueli, na Jamini, na Ohadi, na Jakini, na Zoharu, na Shaulu, ũrĩa mũrũ wa mũndũ mũka Mũkanaani; acio nĩo mbarĩ cia Simeoni.
• 16. Namo marĩĩtwa ma ariũ a Lawii nĩmo maya, kũringana na ũrĩa maaciaranĩrĩirũo: nĩ Gerishoni, na Kohathu, na Merari; nayo mĩaka ya Lawii ĩrĩa aatũũrire nĩ mĩaka igana rĩa mĩrongo ĩtatũ na mũgwanja.
• 17. Nao ariũ a Gerishoni nĩ aya: nĩ Libini na Shimei, kũringana na ũrĩa mbarĩ ciao ciatarainie.
• 18. Nao ariũ a Kohathu nĩ aya: nĩ Amuramu na Iziharu, na Hebironi, na Uzieli; nayo mĩaka ĩrĩa Kohathu aatũũrire nĩ mĩaka igana rĩa mĩrongo ĩtatũ na ĩtatũ.
• 19. Nao ariũ a Merari nĩ aya: nĩ Mahali na Mishi. Acio nĩo mbarĩ cia Alawii, kũringana na ũrĩa maithe ma cio maaciaranĩrĩirũo.
• 20. Nake Amuramu akĩhikia Jokebedi, ũrĩa warĩ tatawe, nake akĩmũciarĩra Haruni na Musa; nayo mĩaka ĩrĩa Amuramu aatũũrire nĩ mĩaka igana rĩa mĩrongo ĩtatũ na mũgwanja.
• 21. Nao ariũ a Iziharu nĩ aya: nĩ Kora, na Nefegu, na Zikiri.
• 22. Nao ariũ a Uzieli nĩ aya: nĩ Mishaeli, na Elizafani, na Sithiri.
• 23. Nake Haruni akĩhikia Elisheba mwarĩ wa Aminadabu, ũrĩa mwarĩ wa nyina na Nahashoni, nake akĩmũciarĩra Nadabu na Abihu, o na Eleazaru na Ithamaru.
• 24. Nao ariũ a Kora nĩ aya: nĩ Asiru, na Elikana, na Abiasafu; acio nĩo mbarĩ cia Akora.
• 25. Nake Eleazaru, mũrũ wa Haruni, akĩhikia mũirĩtu ũmwe wa Putieli, nake akĩmũciarĩra Finehasi. Andũ acio nĩo ciongo cia nyũmba cia maithe ma Alawii, kũringana na ũrĩa mbarĩ ciao ciatarainie.
• 26. Haruni ũcio na Musa nĩo arĩa Jehova aarĩirie, akĩmera ũũ: Umiai ciana cia Isiraeli bũrũri wa Misiri kũringana na ũrĩa mbũtũ ciacio itariĩ.
• 27. Acio no-o maarĩirie Firauni mũthamaki wa Misiri, atĩ ciana cia Isiraeli ciumio bũrũri wa Misiri; Musa na Haruni-rĩ, nĩo acio.
• 28. Na gũgĩkinya atĩrĩ, atĩ mũthenya ũrĩa Jehova aarĩirie Musa kũu bũrũri wa Misiri,
• 29. Jehova aamwarĩirie, akĩmwĩra atĩrĩ, Niĩ nĩ niĩ Jehova; ĩra Firauni, mũthamaki wa Misiri, maũndũ mothe marĩa ngũkwĩra.
• 30. Nake Musa agĩkĩarĩria Jehova, akĩmwĩra ũũ: Atĩrĩrĩ, niĩ-rĩ, ndĩ mũndũ wĩ mĩromo ĩtarĩ mĩruu; Firauni arĩkĩnjigua atĩa?

Home