Go Back

Thama Chapter 38

• 1. Nĩngĩ agĩthondeka kĩgongona kĩa mahaki ma njino na mũtĩ ta mũgaa; kũraiha gwakĩo gũgĩtuĩka mĩkono ĩtano, na kwarama gwakĩo gũgĩtuĩka mĩkono ĩtano, gĩgĩgĩtuĩka gĩĩ thikwea; ningĩ kũraiha na igũrũ gwakĩo, gũgĩtuĩka mĩkono ĩtatũ.
• 2. Ningĩ agĩthondeka hĩa igũrũ tuune-inĩ twakĩo tũna; nacio hĩa icio igĩtuĩka kĩndũ o ro kĩmwe nakĩo; nake agĩkĩhumba igũrũ guothe na gĩcango.
• 3. Agĩcoka agĩthondeka indo ciothe cia kĩgongona kĩu, nacio nĩ nyũngũ, na ihakũri, na mbakũri, na njibe cia mĩthece ĩtatũ, o na ngĩo; nacio indo icio ciothe cia kĩgongona kĩu, agĩcithondeka na gĩcango.
• 4. Ningĩ agĩgĩthondekera kĩrũgara gĩa gĩcango, agĩgĩĩkĩra mũhurahuro wa mũnyamũ ũrĩa ũrigicũkĩte kĩgongona, nĩguo kĩrigicũke na thĩ gĩcoke kĩambate gĩkinye igũrũ gatagatĩ ga kĩgongona.
• 5. Agĩcoka agĩthondeka icũhĩ inya cia gwĩkĩrũo mĩthia-inĩ ĩrĩa ĩna ya kĩrũgara kĩu gĩa gĩcango, nĩguo ituĩke cia gũtonyagio mĩtĩ ĩrĩa mĩraya.
• 6. Ningĩ agĩthondeka mĩtĩ ĩo mĩraya na mũtĩ ta mũgaa, akĩmĩhumba igũrũ guothe na gĩcango.
• 7. Nayo mĩtĩ ĩo mĩraya agĩcoka akĩmĩtonyia icũhĩ-inĩ icio ciarĩ mĩena-inĩ ya kĩgongona kĩu, nĩguo gĩkuuagwo nayo; kĩgongona kĩu agĩgĩthondeka na mbaũ ciĩkĩrĩtwo mĩena yothe, nĩguo kĩgĩe irima gatagatĩ-inĩ gacio.
• 8. Nakĩo kĩnyũngũ gĩa gwĩthambĩrũo agĩgĩthondeka na gĩcango, o nakuo kũgũrũ gwakĩo agĩgũthondeka na gĩcango nakĩo gĩcango kĩu kĩoimĩte tũcango-inĩ twa kwĩrora twa atumia arĩa monganaga mahoere mũromo-inĩ wa hema-ya-gũtũnganwo.
• 9. Ningĩ agĩthondeka rũirigo rũa nja ya gĩikaro kĩu; nacio ciandarũa cia nja ĩo cia mwena wa gũthini, ũrĩa ũrorete gũthini, igĩtuĩka cia gatani ya ndigi njeke ciogothetwo, nakuo kwarama gwacio kwa mũkĩgiĩ gũgĩtuĩka mĩkono igana;
• 10. na itugĩ ciacio ciarĩ mĩrongo ĩĩrĩ, na makinya ma cio mĩrongo ĩĩrĩ, ma gĩcango; na tũhocio twa itugĩ icio, hamwe na tũthanju twacio twa gũcinyitithania twarĩ twa betha.
• 11. Ningĩ mwena wa gathigathini hakĩgĩa ciandarũa cia mĩkono igana, o nacio itugĩ cia mwena ũcio ciarĩ mĩrongo ĩĩrĩ, na makinya ma cio mĩrongo ĩĩrĩ ma gĩcango; natuo tũhocio twa itugĩ icio, na tũthanju twacio twa gũcinyitithania twarĩ twa betha.
• 12. Ningĩ mwena wa ithũĩro hakĩgĩa ciandarũa cia mĩkono ĩtano, na itugĩ ciacio ikũmi, na makinya ma cio ikũmi o ro ũguo; natuo tũhocio twa itugĩ icio, o na tũthanju twacio twa gũcinyitithania twarĩ twa betha.
• 13. Nakuo kwarama kwa mũkĩgiĩ gwa ciandarũa cia mwena wa irathĩro, ũrĩa ũrorete na kũrĩa riũa rĩrathagĩra, kwarĩ mĩkono mĩrongo ĩtano.
• 14. Nakuo kwarama kwa mũkĩgiĩ gwa ciandarũa cia mwena ũmwe wa mũromo wa nja ĩo gũgĩtuĩka mĩkono ikũmi na ĩtano; nacio itugĩ ciacio igĩtuĩka ithatũ, na makinya ma cio matatũ;
• 15. o naguo mwena ũrĩa ũngĩ wa mũromo ũcio hagĩtuĩka o ta ũguo; hagĩkĩgĩa ciandarũa cia mĩkono ikũmi na ĩtano mũromo-inĩ guoko gũkũ o na guoko kũrĩa kũngĩ, hamwe na itugĩ ciacio ithatũ, o na makinya ma cio matatũ.
• 16. Ciandarũa icio ciothe ciairigĩte mĩena yothe ya nja ĩo irigicĩirie igĩtuĩka cia gatani ya ndigi njeke ciogothetwo.
• 17. Namo makinya ma itugĩ icio maarĩ ma gĩcango; na tũhocio twa itugĩ icio, o na tũthanju twacio twa gũcinyitithania twarĩ twa betha; nakuo igũrũ mĩthia-inĩ ya itugĩ kwahumbĩtwo guothe na betha. Nacio itugĩ ciothe cia mĩena yothe ya nja ĩo igĩkĩgĩa na tũthanju twa gũcinyitithania twa betha.
• 18. O naguo tama wa kweheheragio wa mũromo-inĩ wa nja ĩo ya hema watumĩtwo na ndigi cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo, ũgatumwo nĩ mũndũ mũũhĩgĩrĩru ũtumi ũcio; nakuo kwarama kwaguo kwa mũkĩgiĩ kwarĩ mĩkono mĩrongo ĩĩrĩ; o nakuo kũraiha na igũrũ kwaguo, naguo ũguo nĩ ta kuuga wariĩ wa na igũrũ, kwarĩ mĩkono ĩtano, o ta ũrĩa ciandarũa ciothe cia mĩena-inĩ ya nja ĩo ciatariĩ.
• 19. Na itugĩ ciaguo cia kũũcuuria cia gĩcango ciarĩ inya, na makinya ma cio mana maarĩ o ma gĩcango; na tũhocio twa itugĩ icio twarĩ twa betha, nakuo igũrũ mĩthia-inĩ yacio, hamwe na tũthanju twa gũcinyitithania, guothe kwahumbĩtwo na betha.
• 20. Nacio higĩ ciothe cia gĩikaro kĩu, hamwe na higĩ iria irutagwo wĩra nacio hau nja yakĩo, ciarĩ cia gĩcango.
• 21. Na rĩrĩ, icio nĩcio indo ciothe iria ciathondekirũo nĩ ũndũ wa gĩikaro kĩu, o gĩikaro kĩu kĩa ũira, o ta ũrĩa ciatarithirio nĩ Ithamaru ũcio mũrũ wa Haruni mũthĩnjĩri-Ngai nĩ getha imenyũo ũrĩa ciigana, o ta ũrĩa Musa aathanĩte gwĩkwo nĩ ũndũ wa ũtungati wa Alawii ũrĩa maatungataga.
• 22. Nake Bezaleli wa Uri mũrũ wa Huri, wa mũhĩrĩga wa Juda, nĩwe wathondekire indo icio ciothe, o icio Jehova aathire Musa ithondekwo.
• 23. Nake aakoragwo me na Oholiabu mũrũ wa Ahisamaku, wa mũhĩrĩga wa Dani, ũrĩa warĩ mũkururi tũhiga mũũgĩ, na mũũhĩgĩrĩru wĩra wa mĩthemba yothe ya ũũgĩ, na mũtumi mũũgĩ wa ndigi cia rangi wa bururu, na wa zambarau, na wa gakarakũ, o na gatani ya ndigi njeke ciogothetwo.
• 24. Na rĩrĩ, thahabu ĩrĩa yothe yarutĩirũo wĩra wa gũthondeka handũ hau haamũre, o thahabu ĩo yahothirũo nĩ andũ-rĩ, yarĩ taranda mĩrongo ĩĩrĩ na kenda na cekeri magana mũgwanja ma mĩrongo ĩtatũ, o ta ũrĩa cekeri cia handũ hau haamũre ciaiganaga igĩtarũo.
• 25. Ningĩ betha ĩrĩa yarutirũo nĩ andũ a kĩrĩndĩ kĩu magĩtarũo yarĩ taranda igana rĩmwe, na cekeri ngiri ĩmwe na magana mũgwanja ma mĩrongo mũgwanja na ithano, o ta ũrĩa cekeri cia handũ hau haamũre ciaiganaga igĩtarũo;
• 26. o mũndũ aarutire beka ĩmwe, naguo ũguo nĩ ta kuuga nuthu ya cekeri, o ta ũrĩa cekeri ya handũ hau haamũre yaiganaga ĩgĩtarũo, na gũgĩĩkwo ũguo nĩ andũ othe, o mũndũ akĩhĩtũka athiĩ harĩa andũ arĩa maarĩkĩtie gũtarũo maaikarĩte; nao andũ arĩa maarutire cekeri icio nĩ arĩa maakinyĩtie mĩaka mĩrongo ĩĩrĩ na magakĩria hau, nao maarĩ andũ ngiri magana matandatũ na ithatũ, cia magana matano ma mĩrongo ĩtano.
• 27. Nacio taranda icio igana cia betha igĩtuĩka cia gũthondeka makinya ma handũ hau haamũre, o na cia gũthondeka makinya ma gĩtama kĩrĩa kĩnene gĩa kũhakania; makinya igana rĩmwe magĩthondekwo na taranda igana rĩmwe, o ikinya rĩmwe taranda ĩmwe.
• 28. Ningĩ cekeri icio cia betha ngiri ĩmwe ya magana mũgwanja ma mĩrongo mũgwanja na ithano, agĩcitura cia gũthondeka tũhocio twa itugĩ-inĩ na cia gũcihumba igũrũ mĩthia-inĩ, o na cia gũthondeka tũthanju twa gũcinyitithania.
• 29. Nakĩo gĩcango kĩrĩa kĩahothirũo kĩarĩ gĩa taranda mĩrongo mũgwanja na cekeri ngiri igĩrĩ cia magana mana gĩgĩtarũo.
• 30. Agĩgĩthondeka nakĩo makinya ma mũromo wa hema-ya-gũtũnganwo, na kĩgongona gĩa gĩcango, na kĩrũgara gĩakĩo gĩa gĩcango, o na indo ciothe cia wĩra wa kĩgongona kĩu,
• 31. hamwe na makinya mothe ma itugĩ cia kũrigicĩria nja ya gĩikaro kĩu, na makinya ma mũromo wa nja ĩo, na higĩ ciothe cia gĩikaro kĩu, o na higĩ ciothe cia nja ĩo yakĩo.

Home