Go Back

Thama Chapter 36

• 1. Nao Beza-leli na Oholiabu nĩo mekũruta mawĩra macio, me na mũndũ o wothe ũrĩa ũrĩ na ngoro ya ũũgĩ, ũrĩa wĩkĩrĩtwo ũũgĩ thĩinĩ wayo nĩ Jehova hamwe na ũmenyi maũndũ, nĩguo amenyage ũrĩa ekũruta mawĩra mothe makoniĩ handũ harĩa haamũre, o ta ũrĩa maũndũ mothe matariĩ marĩa Jehova aathanĩte mekwo.
• 2. Nake Musa agĩgĩĩta Bezaleli na Oholiabu, o na mũndũ o wothe ũrĩa warĩ na ngoro ya ũũgĩ, ũrĩa wekĩrĩtwo ũũgĩ thĩinĩ wayo nĩ Jehova, o mũndũ o wothe ũrĩa waiguaga ngoro yake ĩkĩhĩahĩa athiĩ wĩra-inĩ ũcio akaũrute;
• 3. nao makĩnengerũo nĩ Musa indo ciothe iria ciarutĩtwo, magĩcioya, nacio nĩcio ciarutĩtwo nĩ ciana cia Isiraeli nĩ getha ituĩke cia kũrutĩrũo wĩra wa handũ hau haamũre, nĩguo hathondekwo nacio. Nacio ciana cia Isiraeli ikarokaga gũthingatia indo ingĩ iria ciarutaga rũcinĩ o rũcinĩ na ngoro ikwĩendera.
• 4. Nao andũ arĩa othe maarĩ na ũũgĩ, acio maarutaga wĩra wothe wa handũ hau haamũre, magĩthiĩ othe, o mũndũ oimĩte wĩra-inĩ wake ũrĩa aarutaga,
• 5. magĩkĩarĩria Musa, makĩmwĩra atĩrĩ, Andũ mekũrehe indo nyingĩ gũkĩra iria ciiganĩire wĩra ũrĩa Jehova aathanire ũrutwo.
• 6. Nake Musa agĩkĩheana ũhoro agĩathana, nao magĩgĩtũma ũhunjanĩrio kũndũ guothe kĩraaro-inĩ gũkĩĩranwo atĩrĩ, Mũndũ o na ũrĩkũ, mũndũ mũrũme, o na kana mũndũ-wa-nja, nĩatige gũcoka gũthondeka kĩndũ o na kĩmwe kĩngĩ gĩa kũrutwo nĩ ũndũ wa handũ hau haamũre. Andũ magĩkĩgirio gũtwara indo ingĩ,
• 7. nĩ ũndũ iria maarutĩte nĩciaiganĩte cia kũruta wĩra waho nacio, o na igakĩra.
• 8. Na mũndũ o wothe ũrĩa warĩ na ngoro ya ũũgĩ thĩinĩ wa arĩa maarutaga wĩra ũcio, agĩgĩthondeka gĩikaro kĩu; magĩgĩtuma matama ikũmi ma gũcunjura, ma gatani ya ndigi njeke ciogothetwo, na ndigi cia rangi wa bururu, na wa zambarau, o na wa gakarakũ, magemetio na mĩhianano ya makerubi ĩtumanĩirio namo nĩ mũndũ mũũhĩgĩrĩru wĩra ũcio.
• 9. Ũraihu wa tama o tama ũgĩkorũo wĩ wa mĩkono mĩrongo ĩĩrĩ na ĩnana, o nakuo kwarama gwa tama o tama gũgĩkorũo gwĩ kwa mĩkono ĩna; namo matama macio maacunjurĩtio magĩkorũo nĩmaigananĩte na mĩena yothe makĩgerũo.
• 10. Nao makĩnyitithania matama matano hamwe makĩmaturumithania o namo matama macio mangĩ matano makĩmanyitithania hamwe makĩmaturumithania o ro ũguo.
• 11. Ningĩ magĩkundĩkĩrĩra ciana cia ndigi cia rangi wa bururu, magĩcoka magĩciĩkĩra mwena-inĩ wa tama wa mbere, maambĩrĩirie mũthia-inĩ wa harĩa matama mekũnyitithanĩrio; o na ningĩ magĩĩka o ta ũguo mũthia-inĩ wa tama wa kerĩ ũrĩa ũrigĩtie mũthia wa na nja, o handũ harĩa ũkũnyitithanĩrio na ũrĩa ũngĩ.
• 12. Magĩgĩkundĩka ciana mĩrongo ĩtano cia ndigi, magĩciĩkĩra tama-inĩ ũmwe, o na magĩkundĩka ciana ingĩ mĩrongo ĩtano cia ndigi, magĩciĩkĩra mwena-inĩ wa tama ũcio ũngĩ wa kerĩ harĩa ũkũnyitithanĩrio na ũrĩa ũngĩ; nacio ciana icio igĩikara iringanĩte.
• 13. Na ningĩ magĩthondeka ngathĩka mĩrongo ĩtano cia thahabu, makĩnyitithania matama macio nacio; gĩikaro kĩu gĩgĩgĩtuĩka kĩndũ kĩmwe.
• 14. Ningĩ magĩthondeka matama ma gũcunjurio ma ngore cia mbũri, namo magĩtuĩka hema ya kũhumba gĩikaro kĩu; namo matama macio, makĩmathondeka ikũmi na ũmwe.
• 15. Naguo ũraihu wa tama o tama ũgĩtuĩka mĩkono mĩrongo ĩtatũ, na kwarama gwa tama o tama gũgĩtuĩka mĩkono ĩna, namo matama macio ikũmi na ũmwe magĩkorũo maigananĩte na mĩena yothe makĩgerũo.
• 16. Matama matano-rĩ, makĩmanyitithania makĩĩikaria mwanya, o namo matama marĩa mangĩ matandatũ makĩmanyitithania o ro ũguo, makĩĩikaria mwanya.
• 17. Ningĩ magĩkundĩkĩrĩra ciana mĩrongo ĩtano cia ndigi, magĩcoka magĩciĩkĩra mũthia-inĩ wa tama ũmwe handũ harĩa matama mekũnyitithanĩrio; na ningĩ magĩkundĩkĩrĩra ciana ingĩ mĩrongo ĩtano magĩciĩkĩra mũthia-inĩ wa tama wa kerĩ o handũ harĩa matama mekũnyitithanĩrio na marĩa mangĩ.
• 18. Ningĩ magĩthondeka ngathĩka mĩrongo ĩtano cia gĩcango, nĩguo manyitithanie matama ma hema ĩo ĩtuĩke o ta kĩndũ kĩmwe.
• 19. Ningĩ magĩthondekera hema ĩo kĩandarũa kĩa njũa cia ndũrũme itoboketio rangi-inĩ igatunĩha, ya kũmĩhumbĩra o na ningĩ magĩthondeka kĩandarũa kĩngĩ kĩa njũa cia pomboo gĩa gwĩkĩrũo igũrũ rĩa kĩu kĩngĩ.
• 20. Nacio mbaũ cia gwaka gĩikaro kĩu magĩciatũra cia mũtĩ ta mũgaa, nacio igĩikara irũgamĩte na igũrũ.
• 21. Naguo ũraihu wa rũbaũ o rũbaũ ũgĩtuĩka mĩkono ikũmi, o nakuo kwarama gwacio, o rũbaũ, gũgĩtuĩka mũkono ũmwe na nuthu.
• 22. Naruo rũbaũ o rũbaũ, rũkĩgĩa na tũng’ote twĩrĩ twa kũnyitithania, nacio mbaũ icio igĩikara ĩnyitithanĩtio natuo; ũguo nĩguo maathondekire mbaũ ciothe cia gĩikaro kĩu.
• 23. Magĩgĩthondeka mbaũ cia gĩikaro kĩu; magĩthondeka mĩrongo ĩĩrĩ cia gwĩkĩrũo mwena wa gũthini, o ũcio ũrorete na kũu gũthini;
• 24. magĩcoka magĩthondeka makinya mĩrongo ĩna ma betha ma kũgĩa na thĩ ya mbaũ icio mĩrongo ĩĩrĩ, hagĩkĩgĩa makinya merĩ ma kũigĩrĩrũo rũbaũ rũmwe, nĩ getha tũng’ote tũu twĩrĩ twaruo twa kũnyitithania tũtonyagio thĩnĩ wamo, o na ningĩ hakĩgĩa makinya mangĩ merĩ ma kũigĩrĩrũo rũbaũ rũngĩ rũa kerĩ, nĩ getha tũng’ote twaruo twa kũnyitithania tũtonyagio thĩinĩ wamo.
• 25. O naguo mwena ũrĩa ũngĩ wa kerĩ wa gĩikaro kĩu, nĩguo mwena wa gathigathini, makĩũthondekera mbaũ ingĩ mĩrongo ĩĩrĩ,
• 26. hamwe na makinya ma cio mĩrongo ĩna ma betha; o makinya merĩ makaigĩrĩrũo rũbaũ rũmwe, o namo makinya mangĩ merĩ makaigĩrĩrũo rũbaũ rũmwe rũngĩ o ro ũguo.
• 27. Na rĩrĩ, mwena wa na thutha wa gĩikaro kĩu, nĩguo ũrĩa ũrorete ithũĩro, makĩũthondekera mbaũ ithathatũ.
• 28. Ningĩ magĩthondeka mbaũ igĩrĩ cia gwĩkĩrũo tuune-inĩ twerĩ twa mwena ũcio wa na thutha wa gĩikaro kĩu.
• 29. Na rĩrĩ, mbaũ icio igĩĩkĩrũo o igĩrĩ igĩrĩ irutĩtio o mũhuro, nacio igĩthiĩ inyitithanĩtio o ro ũguo ciambatanĩtie igĩkinyĩra gĩcũhĩ kĩrĩa kĩarĩ o igũrũ mũno gĩa koine-inĩ; nacio mbaũ icio cierĩ magĩcithondeka igĩikara o ro ũguo; magĩgĩĩka o ro ũguo tuune-inĩ twerĩ.
• 30. Naho handũ hau hagĩkĩgĩa mbaũ inyanya, hamwe na makinya ma cio ma betha, namo makinya macio magĩtuĩka ikũmi na matandatũ; hagĩkĩgĩa o makinya merĩ ma kũigĩrĩrũo rũbaũ rũmwe.
• 31. Ningĩ magĩthondeka mĩgamba ya mũtĩ ta mũgaa, ĩtano yayo ĩgĩtuĩka ya kũnyitithania mbaũ cia mwena ũmwe wa gĩikaro kĩu,
• 32. nayo mĩgamba ĩngĩ ĩtano ĩgĩtuĩka ya kũnyitithania mbaũ cia mwena ũrĩa ũngĩ wakĩo, o nayo mĩgamba ĩngĩ ĩtano ĩgĩtuĩka ya kũnyitithania mbaũ cia mwena wa na thutha wa gĩikaro kĩu, nĩguo ũrĩa ũrorete ithũĩro.
• 33. Nao magĩthondeka mũgamba wa gatagatĩ ka mbaũ iria irũngiĩ ũkinye mũthia ũyũ na mũthia ũrĩa ũngĩ.
• 34. Nacio mbaũ icio irũngiĩ ciothe magĩcihumba igũrũ guothe na thahabu; na icũhĩ ciacio cia gũtonyio mĩgamba magĩcithondeka cia thahabu; na ningĩ mĩgamba o nayo makĩmĩhumba igũrũ guothe na thahabu.
• 35. O na ningĩ magĩtuma gĩtama kĩrĩa gĩa kũhakania na ndigi cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo; magĩcoka magĩkĩgemia na mĩhianano ya makerubi, itumanĩtio nakĩo nĩ andũ arĩa ohĩgĩrĩru wĩra ũcio.
• 36. Magĩcoka magĩgĩthondekera itugĩ inya cia mũtĩ ta mũgaa, magĩcihumba igũrũ guothe na thahabu; o natuo tũhocio twacio tũgĩtuĩka twa thahabu; magĩcoka magĩcithondekera makinya mana ma betha.
• 37. Naguo mũromo wa Hema-rĩ, magĩũtumĩra tama ũngĩ wa kweheheragio ũthondeketwo nĩ mũndũ mũũhĩgĩrĩru ũtumi wa ndigi cia rangi wa bururu, na wa zambarau, na wa gakarakũ, hamwe na gatani ya ndigi njeke ciogothetwo.
• 38. Na magĩthondeka itugĩ ithano nĩ ũndũ wa tama ũcio hamwe na tũhocio twacio; nakuo igũrũ mĩthia-inĩ ya itugĩ icio, hamwe na tũthanju twa gũcinyitithania, magĩkũhumba guothe na thahabu namo makinya ma cio matano maarĩ ma gĩcango.

Home