Go Back

Thama Chapter 29

• 1. Na rĩrĩ, ũndũ ũyũ nĩguo ũkameka, nĩguo maamũrũo matherio mandungatagĩre wĩra-inĩ ũcio wa athĩnjĩri-Ngai. Nyita ndegwa ĩmwe ĩtarĩ ngũrũ, na ndũrũme igĩrĩ itarĩ kaũgũ,
• 2. na woe mĩgate ĩtarĩ mĩimbie, na tũmĩgate tũkimanie na maguta tũtarĩ tũimbie, o na tũmĩgate tũngĩ tũhũthũ tũtarĩ tũimbie tũhake maguta igũrũ, nayo yothe ĩkorũo ĩthondeketwo na mũtu mwega wa ngano mũhinyu mũno.
• 3. Ũcoke wĩkĩre mĩgate ĩo gĩkabu-inĩ kĩmwe, ũmĩtwaranĩrie na ndegwa ĩo na ndũrũme icio cierĩ, ĩrĩ o gĩkabu-inĩ kĩu.
• 4. Ningĩ Haruni na ariũ ake, ũmatware mũromo-inĩ wa hema-ya-gũtũnganwo, ũmathambie na maĩ.
• 5. Ũcoke woe nguo icio ũhumbe Haruni kanjũ ũcio, na nguo ĩo ndaya ya ebodi, na ebodi yo nyene, o na gakuo ga gĩthũri. Thutha wa ũguo ũmũhotore mwĩnyitio ũrĩa ũgemetio wega wa ebodi;
• 6. na ũmwĩkĩre kĩremba mũtwe; nako gatanji karĩa kaamũre ũgekĩre kĩremba-inĩ igũrũ.
• 7. Hĩndĩ ĩo ũcoke woe maguta ma gũitanĩrĩrio, ũkĩmũitĩrĩrie mũtwe.
• 8. O nao ariũ ake ũmarehe, ũmahumbe makanjũ.
• 9. Ningĩ ũkamahotora mĩĩhotoro, ũhotore Haruni we mwene, na ariũ ake, na ũmohe tũkũbia mĩtwe; magĩtũũre marutaga wĩra ũcio wa athĩnjĩri-Ngai, naguo ũndũ ũcio ũtuĩke kĩrĩra kĩa watho wa kũrũmagĩrĩrũo tene na tene; ũguo nĩguo ũkaamũra Haruni na ariũ ake, ũmatherie.
• 10. Nayo ndegwa ĩo ũkamĩtwara na hau kabere ka mũromo wa hema-ya-gũtũnganwo, nake Haruni na ariũ ake maigĩrĩre moko mao mũtwe wayo,
• 11. ũcoke ũthĩnjĩre ndegwa ĩo mũromo-inĩ wa hema-ya-gũtũnganwo mbere ya Jehova.
• 12. Ningĩ woe thakame ĩmwe ya ndegwa ĩo ũmĩĩkĩre hĩa-inĩ cia kĩgongona na kĩara gĩaku; nayo thakame ĩo ĩngĩ yothe ũmĩite hau thĩ kĩgongona-inĩ;
• 13. na woe rũambũ ruothe, na habaya wa ini-inĩ, na higo cierĩ, o na ngurunyu ciacio, nacio icio ciothe ũcicinĩre kĩgongona-inĩ igũrũ.
• 14. No rĩrĩ, nyama cia ndegwa ĩo, o na rũũa, o na tatha hamwe na maĩ mayo, ũgacicinĩra na mwaki na kũu gĩthaka-inĩ mbarĩ ĩrĩa ĩngĩ ya kĩraaro; ndegwa ĩo-rĩ, nĩyo ya igongona rĩa mehia.
• 15. Ningĩ ũcoke woe ndũrũme ĩmwe, nake Haruni na ariũ ake maigĩrĩre moko mao mũtwe wa ndũrũme ĩo.
• 16. Nayo ndũrũme ĩo, ũmĩthĩnje, woe thakame yayo, ũmĩminjaminjĩrie kĩgongona igũrũ mbarĩ ciothe.
• 17. Ningĩ ũtinangie ndũrũme ĩo icunjĩ, ũcoke ũmĩthambie nyama ciayo cia nda, na magũrũ mayo, ũciigĩrĩre igũrũ rĩa icunjĩ icio ingĩ cia nyama ciayo, hamwe na mũtwe wayo.
• 18. Nayo ndũrũme ĩo yothe ũmĩcinĩre igũrũ rĩa kĩgongona; ndũrũme ĩo nĩyo ĩrutĩirũo Jehova ya ihaki rĩa njino, na nĩyo ya mũtararĩko mwega, o na nĩyo kĩndũ kĩrĩa kĩrutĩirũo Jehova na ũndũ wa gũcinwo na mwaki.
• 19. Nayo ndũrũme ĩrĩa ĩngĩ ũcoke ũmĩoe, nake Haruni na ariũ ake maigĩrĩre moko mao mũtwe wayo.
• 20. Nawe ũcoke ũthĩnje ndũrũme ĩo, woe thakame ĩmwe yayo ũmĩĩkĩre mũthia-inĩ wa gũtũ kwa ũrĩo kwa Haruni, o na wĩkĩre mĩthia-inĩ ya matũ ma ũrĩo ma ariũ a Haruni, o na ciara-inĩ iria nene cia moko mao ma ũrĩo, na ũmĩĩkĩre ciara-inĩ iria nene cia magũrũ mao ma ũrĩo, ũcoke ũminjaminjĩrie thakame ĩo kĩgongona-inĩ kĩu igũrũ mbarĩ ciothe.
• 21. Ningĩ woe thakame ĩmwe thĩinĩ wa ĩrĩa ĩrĩ igũrũ rĩa kĩgongona, o na maguta mamwe ma marĩa maitanagĩrĩrio, ũmaminjaminjĩrie Haruni, na nguo ciake, na ariũ ake me hamwe nake, o na nguo ciao; nake atuĩke nĩaamũrũo aatherio, hamwe na nguo ciake, na ariũ ake me hamwe nake, o na nguo ciao.
• 22. Ningĩ woe maguta ma ndũrũme ĩo, na maguta ma gĩthita kĩayo, o na rũambũ, na habaya wa ini-inĩ, na higo cierĩ, na ngurunyu ciacio, o na kĩero gĩa kũgũrũ kwayo kwa ũrĩo, nĩ ũndũ ndũrũme ĩo nĩyo ya kũmaamũra matuwo atheru;
• 23. ningĩ woe mũgate ũmwe, o na kamũgate kangĩ gakimanie na maguta, o na kangĩ ka mũthemba mũhũthũ, ũcirute gĩkabu-inĩ kĩu kĩa mĩgate ĩo itaimbitio, o kĩu kĩigĩtwo mbere ya Jehova;
• 24. nacio indo icio ciothe ũgaciigĩrĩra hĩ-inĩ cia Haruni, o na hĩ-inĩ cia ariũ ake, ũcoke ũcithũngũthĩrie mbere ya Jehova, ituĩke indo iria arutĩirũo cia gũthũngũthio.
• 25. Ningĩ ũcoke ũcioe, ũcirute hĩ-inĩ ciao, ’ũcicinĩre igũrũ rĩa ihaki rĩu rĩa njino, o kĩgongona-inĩ kĩu igũrũ, ituĩke mũtararĩko mwega wa kũiguwo nĩ Jehova; narĩo rĩu rĩtuĩke igongona rĩrutĩirũo Jehova rĩa gũcinwo na mwaki.
• 26. O na ningĩ woe gĩthũri kĩa ndũrũme ĩo ya gũtua Haruni atĩ nĩ mwamũrĩre wĩra ũcio wake mũtheru, nawe ũgagĩthũngũthĩria mbere ya Jehova gĩtuĩke kĩndũ kĩrĩa arutĩirũo gĩa gũthũngũthio; nakĩo gĩtuĩke rũgai rũaku.
• 27. Na rĩrĩ, nĩũkaamũra gĩthũri kĩa igongona rĩu rĩa gũthũngũthio, o kĩu gĩthũngũthĩtio, ũgĩtherie, o na kĩero kĩa igongona rĩa kũiyũkio na igũrũ kĩrĩa kĩiyũkĩtio na igũrũ, nacio nĩ icunjĩ cia ndũrũme ĩo ya gũtua Haruni atĩ nĩ mwamũrĩre wĩra ũcio wake mũtheru, cia gũtuĩka rũgai rũake, na rũgai rũa ariũ ake;
• 28. nacio icunjĩ icio irĩtuĩkaga cia Haruni, o na ariũ ake, cia rũgai rũrĩa maagĩrĩirũo nĩ kũheagwo nĩ ciana cia Isiraeli tene na tene; nĩ ũndũ icunjĩ icio nĩirutĩirũo Jehova na ũndũ wa kũiyũkio na igũrũ; nacio icunjĩ icio ituĩke nĩcio ciana cia Isiraeli irĩrutagĩra Jehova na ũndũ wa kũiyũkio na igũrũ ciumĩte magongona-inĩ ma cio ma ũiguano, o marĩa irutagĩra Jehova na ũndũ wa kũiyũkio na igũrũ.
• 29. Nacio nguo icio nyamũre cia Haruni igatuĩka cia ariũ ake arĩa magacoka ithenya rĩake, nao magaitagĩrĩrio maguta maciĩhumbĩte, o na maamũrĩrũo wĩra ũcio mũtheru maciĩhumbĩte.
• 30. Na rĩrĩ, mũriũ ũrĩa ũgatuĩka mũthĩnjĩri-Ngai ithenya rĩake, agaikara mĩthenya mũgwanja aciĩhumbĩte agĩtonya hema-inĩ-ya-gũtũnganwo, arute wĩra wake handũ harĩa hatheru.
• 31. Ningĩ woe ndũrũme ĩo ya kũmwamũra atuwo mũtheru ũrugĩre nyama ciayo handũ hatheru.
• 32. Na nĩ wega Haruni na ariũ ake marĩĩre nyama cia ndũrũme ĩo, o na mĩgate ĩo ĩrĩ gĩkabu-inĩ, hau mũromo-inĩ wa hema-ya-gũtũnganwo.
• 33. Acio nĩo makarĩa indo icio cia horohio o icio maamũrĩtwo magatherio nacio; no itikanarĩo nĩ mũndũ ũngĩ nĩ ũndũ nĩ nyamũre.
• 34. Na rĩrĩ, gacunjĩ o na kamwe ka nyama icio cia kũmaamũra, kana ka mĩgate ĩo, kangĩgatigara gakinyie rũcinĩ rũrũ rũngĩ-rĩ, matigari macio nĩmacinwo na mwaki; matikanarĩo, nĩ ũndũ nĩ maamũre.
• 35. Maũndũ macio nĩmo ũgekaga Haruni, o na ariũ ake; o ta ũrĩa maũndũ mothe marĩa ngwathĩte matariĩ-rĩ, ũguo noguo ũgeka; nawe ũkanina matukũ mũgwanja ũkĩmaamũrĩra wĩra ũcio mũtheru.
• 36. Na mũthenya o mũthenya, ũkarutaga ndegwa ĩmwe ya igongona rĩa mehia nĩ ũndũ wa horohio; na rĩrĩ, nĩũgatheragia kĩgongona kĩu ũkĩruta horohio icio cia gũgĩtheria; na ũgagĩitĩrĩria maguta nĩguo ũkĩamũre ũgĩtherie.
• 37. Ũkanina matukũ mũgwanja o ũkĩruta horohio icio cia kĩgongona kĩu, ũgĩkĩamũra ũgĩtherie; nakĩo kĩgongona kĩu nĩgĩgatuĩka kĩamũre mũno mũno; na kĩndũ o gĩothe kĩrĩa gĩkahutia kĩgongona kĩu-rĩ, gĩgatuĩka o kĩamũre.
• 38. Na rĩrĩ, nyamũ iria ũkarutaga cia gũtwarũo kĩgongona-inĩ nĩ ici: nĩ tũtũrũme twĩrĩ tũtakĩrĩtie mwaka ũmwe, natuo ũgatũrutaga mũthenya o mũthenya hĩndĩ ciothe.
• 39. Gatũrũme kamwe gatuo ũgakarutaga rũcinĩ, o nako gatũrũme karĩa kangĩ ũgakarutaga hwaĩ-inĩ;
• 40. na rĩrĩa ũkũruta gatũrũme kau kamwe ũgakarutanagĩria na mũtu ũrĩa mwega mũhinyu mũno ibaba ithatũ, ũtukanĩtio na maguta marutĩre wĩra wa kũhũrahũrũo magakeerũo wega, ta ma kĩbaba kĩmwe na nuthu; hamwe na ndibei ta ya kĩbaba kĩmwe na nuthu, ĩtuĩke kĩndũ gĩa kũnyuwo kĩa igongona.
• 41. Nako gatũrũme karĩa kangĩ ũgakaruta igongona hwaĩ-inĩ, na ũgekage o ta ũrĩa ũgwĩka ka rũcinĩ ũhoro-inĩ wa ihaki rĩa mũtu, o na ũhoro-inĩ wa kĩndũ kĩu gĩa kũnyuwo kĩa igongona, nĩguo indo icio ituĩkage cia mũtararĩko mwega, na ituĩke indo iria irutĩirũo Jehova cia gũcinwo na mwaki.
• 42. Na atĩrĩrĩ igongona rĩu nĩrĩo rĩgatuĩka ihaki rĩa njino rĩa gũtũũra rĩrutagĩrũo mbere ya Jehova hĩndĩ ciothe njiaro-inĩ cianyu ciothe o kũu mũromo-inĩ wa hema-ya-gũtũnganwo. Hau nĩho ngatũnganaga na inyuĩ nĩguo ngwaragĩrie ndĩ ho.
• 43. Ningĩ hau nĩho ngatũnganaga na ciana cia Isiraeli, nayo Hema ĩo yonagwo ĩrĩ kĩndũ kĩamũre gĩtheru nĩ ũndũ wa ũrĩa riri wakwa ũgakengaga ho.
• 44. Ningĩ hema-ya-gũtũnganwo o na kĩgongona kĩu nĩngaciamũra ndĩcitherie; nake Haruni na ariũ ake ndĩmaamũre ndĩmatherie, nĩ getha mandungatagĩre wĩra-inĩ ũcio wa athĩnjĩri-Ngai.
• 45. Na niĩ nĩngatũũrania na ciana cia Isiraeli njikare hamwe nacio, nduĩke Ngai wacio.
• 46. Nacio nĩikamenya atĩ niĩ nĩ niĩ Jehova Ngai wacio ũrĩa wacirutire bũrũri wa Misiri, nĩguo ndũũranie nacio; niĩ nĩ niĩ Jehova Ngai wacio.

Home