Go Back

Thama Chapter 25

• 1. Jehova agĩkĩaria na Musa, akĩmwĩra atĩrĩ,
• 2. Arĩria ciana cia Isiraeli, ũciĩre i’hothere indo imwe ciacio cia kũndutĩra; mũndũ o wothe ũrĩa ũkũigua ngoro yake ĩkĩenda kũndutĩra kĩndũ-rĩ, mwĩtagiei mũhothi wakwa.
• 3. Nacio indo iria ũrĩhothithagia kũrĩ cio cia kũndutĩra nĩ ici, nĩ thahabu, na betha, o na icango,
• 4. na ndigi cia rangi wa bururu, na wa zambarau, na wa gakarakũ, na gatani ĩrĩa njega, o na ngore cia mbũri;
• 5. na njũa cia ndũrũme itoboketio rangi-inĩ igatunĩha, o na njũa cia pomboo, na mbaũ cia mũtĩ ta mũgaa,
• 6. na maguta ma gwakio, na mahuti manungi wega ma gwĩkĩrũo maguta-inĩ ma gũitanĩrĩrio, o na ma gũthondeka ũbumba ũrĩa ũnungaga wega;
• 7. na tũhiga tũrĩa twĩtagwo onigithi, o na tũhiga tũngĩ twa gũthecererũo ebodi-inĩ, o na gakuo-inĩ ga gĩthũri kĩa mũthĩnjĩri-Ngai ũrĩa mũnene;
• 8. ma’thondekere handũ haamũre ha gũikara nĩ getha njikarage thĩinĩ wao.
• 9. Na rĩrĩ, o ta ũrĩa maũndũ mothe matariĩ marĩa ngũkuonia ma ũrĩa gĩikaro kĩu gĩgaikara, o na ma ũrĩa indo cia gwĩkĩrũo kuo thĩinĩ igaikara-rĩ, ũguo noguo ũgathondeka.
• 10. Nĩmagathondeka ithandũkũ rĩa mbaũ cia mũtĩ ta mũgaa; na kũraiha kwarĩo gũtuĩke mĩkono ĩĩrĩ na nuthu, na kwarama kwarĩo gũtuĩke mũkono ũmwe na nuthu, na kũraiha na igũrũ kwarĩo gũtuĩke mũkono ũmwe na nuthu.
• 11. Nawe nĩũkarĩĩkĩra thahabu ĩrĩa therie mũno mbarĩ ciothe, ũrĩĩkĩre thĩinĩ o na igũrũ; na ũrĩrigicĩrie mĩena yothe mũnyamũ wa thahabu mĩthia-inĩ yarĩo ya igũrũ.
• 12. Ũcoke ũthondeke icũhĩ inya cia thahabu, ũciĩkĩre magũrũ-inĩ mana marĩo; nacio icũhĩ icio-rĩ, igĩrĩ igĩe mwena ũmwe, na igĩrĩ igĩe mwena ũrĩa ũngĩ warĩo.
• 13. Ningĩ wacũhie mĩtĩ mĩraya ya mũthemba ta mũgaa, ũmĩĩkĩre thahabu igũrũ guothe,
• 14. na mĩtĩ ĩo mĩraya ũmĩtonyie icũhĩ-inĩ icio irĩ mĩena-inĩ ya ithandũkũ rĩu, nĩguo rĩkuuagwo nayo.
• 15. Mĩtĩ ĩo mĩraya-rĩ, nĩĩgaikaraga o icũhĩ-inĩ cia ithandũkũ rĩu, na ndĩkarutagwo.
• 16. Naguo ũira ũrĩa ngakũhe ũwĩkĩre ithandũkũ-inĩ rĩu thĩinĩ.
• 17. Ningĩ ũthondeke gĩikaro-gĩa-tha na thahabu ĩrĩa therie mũno; kũraiha gwakĩo gũtuĩke mĩkono ĩĩrĩ na nuthu, na kwarama gwakĩo gũtuĩke mũkono ũmwe na nuthu;
• 18. ũcoke ũthondeke makerubi merĩ ma thahabu, ũmature, mekĩrũo mĩthia-inĩ yerĩ ya gĩikaro-kĩu-gĩa-tha,
• 19. ũthondeke kerubi ĩmwe ĩikare mũthia ũmwe, nayo kerubi ĩrĩa ĩngĩ ĩikare mũthia ũrĩa ũngĩ; na makerubi macio matuĩke kĩndũ o ro kĩmwe na gĩikaro-kĩu-gĩa-tha manyitaine nakĩo mĩthia-inĩ yakĩo.
• 20. Namo makerubi macio matambũrũkie mathagu mamo na igũrũ, mahumbe gĩikaro-gĩa-tha namo maroranĩtie mothiũ, namo mothiũ ma makerubi macio maikare marorete gĩikaro-kĩu-gĩa-tha.
• 21. Nakĩo gĩikaro-kĩu-gĩa-tha ũkĩigĩrĩre igũrũ rĩa ithandũkũ rĩu, na ithandũkũ-inĩ rĩu thĩinĩ wĩkĩre ũira ũrĩa ngakũhe.
• 22. Hau nĩho ngacemanagia nawe, ndĩ igũrũ rĩa gĩikaro-gĩa-tha, gatagatĩ ka makerubi macio merĩ me igũrũ rĩa ithandũkũ rĩa ũira, twaranĩrie nawe maũndũ mothe marĩa ngagwatha nĩ ũndũ wa ciana cia Isiraeli.
• 23. Ningĩ nĩũgathondeka metha ya mbaũ cia mũtĩ ta mũgaa, kũraiha kwayo gũtuĩke mĩkono ĩĩrĩ, na kwarama kwayo gũtuĩke mũkono ũmwe, o na kũraiha na igũrũ kwayo gũtuĩke mũkono ũmwe na nuthu.
• 24. Ũcoke ũmĩĩkĩre thahabu ĩrĩa therie mũno igũrũ rĩayo guothe, na ũmĩrigicĩrie mĩena yothe mũnyamũ wa thahabu.
• 25. O na ningĩ ũmĩĩkĩre kabaũ gaceke mĩena yothe kamĩrigicĩrie; nako kaarame o ta ũrĩa rũhĩ rũaramĩte, ningĩ kabaũ kau gaceke ũgekĩre mũnyamũ wa thahabu igũrũ rĩako guothe.
• 26. Ũcoke ũmithondekere icũhĩ inya cia thahabu, ũciĩkĩre mĩthia-inĩ yayo yothe ĩna ya igũrũ.
• 27. Nacio icũhĩ icio ikuhanĩrĩrie na kabaũ kau gaceke karigicĩirie metha, ituĩke handũ ha gũtonyagio mĩtĩ ĩrĩa mĩraya ya gũkuuaga metha ĩo.
• 28. Nayo mĩtĩ ĩo mĩraya ũmĩacũhie ya mũthemba ta mũgaa, nĩguo metha ĩkuuagwo nayo, ũcoke ũmĩhumbe igũrũ guothe na thahabu.
• 29. Ningĩ ũcoke ũthondeke thani ciayo, o na iciko ciayo, o na ikobo, o na mbakũri ciayo cia gũitaga kĩrĩa gĩkũrutwo gĩa kũnyuwo, nacio indo icio ciothe ũcithondeke na thahabu ĩrĩa therie mũno.
• 30. Na rĩrĩ, igũrũ rĩa metha ĩo-rĩ, njigagĩra mĩgate ĩrĩa ĩkaigagwo mbere yakwa o hĩndĩ ciothe.
• 31. Ningĩ ũcoke ũthondeke mũtĩ wa kũigĩrĩrũo matawa na thahabu ĩrĩa therie mũno; naguo mũtĩ ũcio ũtuĩke wa gũturũo, gĩtina kĩaguo hamwe na mũtĩ waguo o ro ũguo; ningĩ ikombe ciaguo na ikonyo ciaguo, o na mahũa maguo-rĩ, ciothe ithondekwo irĩ kĩndũ o ro kĩmwe inyitaine naguo.
• 32. Nĩ wega hagĩe honge ithathatũ ciumĩte mĩena-inĩ yaguo; honge ithatũ cia mũtĩ wa kũigĩrĩrũo matawa ciume mwena ũmwe, nacio honge iria ingĩ ithatũ cia mũtĩ ũcio wa kũigĩrĩrũo matawa ciume mwena ũrĩa ũngĩ waguo;
• 33. ningĩ rũhonge-inĩ rũmwe hagĩe ikombe ithatũ itariĩ ta mahũa ma mũrothi, o ihũa na gĩkonyo kĩarĩo, ningĩ rũhonge-inĩ rũrĩa rũngĩ hagĩe ikombe ithatũ itariĩ ta mahũa ma mũrothi, o ihũa na gĩkonyo kĩarĩo; honge icio ciothe ithathatũ ciumĩte mũtĩ-inĩ ũcio wa kũigĩrĩrũo matawa ithondekwo o ũndũ ũmwe.
• 34. O naguo mũtĩ-inĩ ũcio wa kũigĩrĩrũo matawa guo wene hagĩe ikombe inya itariĩ ta mahũa ma mũrothi, hamwe na mahũa na ikonyo ciamo;
• 35. ningĩ hagĩe gĩkonyo kĩmwe kĩgwatanĩtie honge igĩrĩ; nakĩo gĩtuĩke o ro kĩmwe na mũtĩ ũcio; o ũguo taguo hagĩe gĩkonyo o kĩmwe kĩngĩ kĩgwatanĩtie honge ingĩ igĩrĩ, nakĩo gĩtuĩke o ro kĩmwe na mũtĩ ũcio; o na ningĩ-rĩ, hacoke hagĩe gĩkonyo kĩmwe kĩngĩ o ro ũguo, kĩgwatanĩtie honge igĩrĩ, o nakĩo kĩu gĩtuĩke o ro kĩmwe na mũtĩ ũcio wa kũigĩrĩrũo matawa; ũhoro wa honge icio ithathatũ ciumĩte mũtĩ-inĩ ũcio wa kũigĩrĩrũo matawa ũgĩtuĩke o ũguo.
• 36. Na rĩrĩ, ikonyo ciaguo, o na honge ciaguo inyitane irĩ o kĩndũ kĩmwe naguo, naguo mũtĩ ũcio wa kũigĩrĩrũo matawa wothe ũgakorũo ũthondeketwo na thahabu ĩrĩa theru mũno ĩturĩtwo.
• 37. Ningĩ ũthondeke matawa maguo, mũgwanja, namo matawa macio maakagio, nĩ getha ũtheri wamo waarage harĩa hang’ethanĩire naguo.
• 38. Naguo mwĩhato waguo, o na thani cia mũrarĩ wa ndambĩ ciaguo, icio cierĩ ithondekwo na thahabu ĩrĩa therie mũno.
• 39. Ningĩ mũtĩ ũcio na indo ciothe ciaguo, ithondekwo na thahabu ĩrĩa therie mũno, nayo ĩgĩthimwo-rĩ, ũritũ wayo ũtuĩke taranda ĩmwe.
• 40. Na ũmenyerere ũcithondeke o ta ũrĩa mũhianĩre wacio ũtariĩ, ũrĩa wonetio wĩ kĩrĩma igũrũ.

Home