Go Back

Thama Chapter 13

• 1. Nake Jehova akĩarĩria Musa, akĩmwĩra atĩrĩ,
• 2. Nyamũrĩra marigithathi mothe, ũmatherie; o kĩndũ kĩrĩa gĩothe kĩrĩambaga kuuma nda ya nyina thĩinĩ wa ciana cia Isiraeli, o na angĩkorũo nĩ mũndũ, o na kana nyamũ-rĩ, kĩu nĩ gĩakwa.
• 3. Nake Musa akĩĩra andũ atĩrĩ, Ririkanagai mũthenya ũyũ wa ũmũthĩ, atĩ nĩguo mũthenya ũrĩa mwoimire Misiri, o nyũmba ya ũkombo; nĩ ũndũ Jehova aamũrutire kũndũ gũkũ na hinya wa guoko gwake; mũtikanarĩe mũgate mũimbie mũthenya wa ũmũthĩ mwaka o mwaka.
• 4. Nĩ ũndũ ũmũthĩ nĩguo mwoimagara mũthiĩ, mweri-inĩ ũyũ wĩtagwo Abibu.
• 5. Na nĩgũgakinya atĩrĩ, atĩ hĩndĩ ĩrĩa Jehova agagũkinyia bũrũri wa Akanaani, na Ahiti, na Amori, na Ahivi, o na Ajebusi, ũrĩa ehĩtire akĩĩra mathoguo atĩ nĩagakũhe, o bũrũri ũrĩa ũiyũrĩte iria na ũũkĩ-rĩ, ũndũ ũcio wa gũtungatĩra Jehova nĩũkawĩkaga mweri o ro ũyũ.
• 6. Mĩgate ĩo ĩtarĩ mĩimbie-rĩ, ũkamĩrĩaga matukũ mũgwanja, na mũthenya wa mũgwanja ũtuwo wa gĩathĩ kĩa Jehova.
• 7. Mĩthenya ĩo yothe mũgwanja-rĩ, kũrĩrĩagwo o mĩgate ĩtarĩ mĩimbie; na gũtikanoneke mũgate mũimbie kũrĩa guothe ũrĩ, kana ndawa ĩo ya kũimbia mũgate yoneke bũrũri waku wothe.
• 8. Naguo mũthenya o ro ũcio, o mũndũ wanyu nĩerage mũriũ atĩrĩ, Njĩkaga ũũ nĩ ũndũ wa ũrĩa Jehova ekire nĩ ũndũ wakwa hĩndĩ ĩrĩa ndoimire Misiri.
• 9. Naguo nĩguo ũgũtuĩka rũũri rũĩkĩrĩtwo guoko gwaku, o na kĩririkania gĩĩkĩrĩtwo gatagatĩ-inĩ ka maitho maku, nĩ getha waragie ciugo cia watho wa Jehova na kanua gaku; nĩ gũkorũo Jehova aakũrutire bũrũri wa Misiri na guoko kwĩ hinya.
• 10. Tondũ ũcio tũũra ũririkanaga mũtugo ũyũ ngũtuĩrĩire o ihinda rĩaguo rĩakinya mwaka o mwaka.
• 11. NA nĩgũgatuĩka atĩrĩ, atĩ hĩndĩ ĩrĩa Jehova agagũkinyia bũrũri wa Akanaani, na akũhe guo o ta ũrĩa ehĩtire agĩkwĩrĩra, o na akĩĩrĩra mathoguo-rĩ,
• 12. nĩũkaamũragĩra Jehova o kĩrĩa gĩothe gĩkarigithathwo; o narĩo irigithathi o rĩothe rĩrĩa ũgakorũo narĩo rĩa ũhiũ waku-rĩ, njamba ciothe nĩ cia Jehova.
• 13. Irigithathi o rĩothe rĩa ndigiri, ũkarĩkũũraga na kori, na ũngĩaga kũrĩkũũra-rĩ, nĩũkariunaga ngingo; o namo marigithathi mothe ma andũ thĩinĩ wa ihĩĩ ciaku, nĩ gũkũũra ũkamakũũraga.
• 14. Na nĩgũgatuĩka atĩrĩ, atĩ matukũ marĩa magoka ciana ciaku ciaya gũkũũria atĩrĩ, Ũũ nĩ atĩa wĩkaga? ũgacicokeria ũciĩre atĩrĩ, Jehova aatũrutire bũrũri wa Misiri na hinya wa guoko gwake, agĩtũruta nyũmba ya ũkombo;
• 15. na gũgĩkinya atĩrĩ, atĩ hĩndĩ ĩrĩa Firauni omĩtie ngoro yake akarega kũreka tũthiĩ, Jehova akĩũraga marigithathi mothe ma bũrũri wa Misiri, ma andũ o na ma ũhiũ. Ũndũ ũcio nĩguo ũtũmaga ndutĩre Jehova igongona rĩa kĩrĩa gĩothe kĩrigithathagwo kĩa njamba; no rĩrĩ, marigithathi mothe ma ihĩĩ ciakwa nĩ gũkũũra ndĩmakũũraga.
• 16. Naguo ũndũ ũcio nĩguo ũrĩtuĩkaga rũũri rũĩkĩrĩtwo guoko gwaku, o na ũtuĩkage kĩririkania gĩĩkĩrĩtwo gatagatĩ-inĩ ka maitho maku; nĩ ũndũ Jehova aatũrutire bũrũri wa Misiri na hinya wa guoko gwake.
• 17. Na gũgĩkinya atĩrĩ, atĩ hĩndĩ ĩrĩa Firauni aakorirũo arekete andũ mathiĩ-rĩ, Ngai ndaamagereirie bũrũri wa Afilisiti, o na harĩa njĩra ĩo yarĩ nguhĩ; nĩ gũkorũo Ngai oigire atĩrĩ, Ndiĩka ũguo, nĩ getha hihi andũ aya matikae kwĩrira mangĩcemania na mbaara, nao macoke Misiri;
• 18. no rĩrĩ, Ngai aamagereirie njĩra ya werũ-inĩ gũkuhĩ na Iria Itune; nacio ciana cia Isiraeli cioimire bũrũri wa Misiri ciĩohete indo ciacio cia mbaara.
• 19. Nake Musa agĩkuua mahĩndĩ ma Jusufu agĩthiĩ namo; nĩ ũndũ Jusufu nĩaahatĩrĩirie ciana icio cia Isiraeli ciuge na mwĩhĩtwa atĩ nĩigeka ũndũ ũcio, akiuga atĩrĩ, Ti-itherũ Ngai nĩagoka kũmũng’ethera; na nĩ wega mũgakuua mahĩndĩ makwa mũmarute gũkũ mũthiĩ namo.
• 20. Nao makĩgwata rũgendo rũao moimĩte Sukothu, makĩamba hema ciao Ethamu, ndere-inĩ cia werũ.
• 21. Nake Jehova aathiaga mbere yao mũthenya arĩ gĩtugĩ-inĩ gĩa itu rĩirũ, akamonagia njĩra; na ũtukũ agathiĩ mbere yao arĩ gĩtugĩ-inĩ gĩa ũtheri wa mwaki, akamamũrĩkagĩra njĩra; nĩ getha mahotage gũthiĩ mũthenya, o na ũtukũ.
• 22. Na rĩrĩ, gĩtugĩ kĩu gĩa itu kĩa mũthenya, na kĩu gĩa ũtheri wa mwaki gĩa ũtukũ, itirĩ hĩndĩ cieheraga harĩ andũ.

Home