Go Back

Thama Chapter 12

• 1. Nake Jehova akĩarĩria Musa na Haruni kũu bũrũri wa Misiri, akĩmera atĩrĩ,
• 2. Mweri ũyũ nĩguo ũgatuĩka mweri wa mbere ya mĩeri ĩrĩa ĩngĩ harĩ inyuĩ, na ũtuĩke mweri wanyu wa kwambagĩrĩria mwaka naguo.
• 3. Arĩria kĩrĩndĩ gĩothe gĩa Isiraeli, ũkĩĩre atĩrĩ, Mũthenya wa ikũmi wa mweri ũyũ wakinya-rĩ, nĩgĩgecarĩria tũtũrũme kana tũrũũhĩ; o mũndũ ecarĩrie kamwe, o ta ũrĩa mũciĩ wake ũtariĩ; nako gatũrũme kamwe gatuĩkage ka mũciĩ ũmwe.
• 4. Na rĩrĩ, andũ a mũciĩ ũmwe mangĩnyiha a kũnina gatũrũme kamwe-rĩ, mwene mũciĩ ũcio nĩeturanagĩre na mũndũ ũngĩ ũrĩa maakanĩtie, nao magakĩruta kamwe ga kũigana andũ a mĩciĩ ĩo o ta ũrĩa maigana magĩtarũo. Gatũrũme kamwe nĩgagataragĩrũo andũ a gũkarĩa o ta ũrĩa mũrĩĩre wa mũndũ o mũndũ ũtariĩ.
• 5. Nako gatũrũme kau no mũhaka gagakorũo gatarĩ na kaũũgũ, na gakorũo gatakĩrĩtie mwaka ũmwe, na ningĩ-rĩ, mũgakanyita rũũru-inĩ rũa ng’ondu, o na kana rũa mbũri.
• 6. Nĩmũgakaiga gaikare o nginya rĩrĩa mũthenya wa ikũmi na ĩna wa mweri o ro ũcio ũgakinya; na mũthenya ũcio-rĩ, kĩrĩndĩ gĩothe gĩa Isiraeli gĩgathĩnja tũtũrũme tũu hwaĩ-inĩ.
• 7. Na nyũmba ĩrĩa yothe gatũrũme kau gakarĩĩrũo nĩ andũ-rĩ, nĩmakoya thakame yako, mamĩhake hingĩro cia mĩena yerĩ ya mũromo wa nyũmba ĩo, na mamĩhake hingĩro ĩrĩa ĩkĩgamagio mũromo-inĩ igũrũ.
• 8. Nao makarĩa nyama ciako ũtukũ o ro ũcio, ihĩhĩtio na mwaki, macirĩanĩrie na mĩgate ĩtarĩ mĩimbie; na macarie nyeni ndũrũ marĩanĩrie nyama icio nacio.
• 9. Mũtikarĩe gatũrũme kau ge gethĩ, kana karugĩtwo na maĩ, no nĩkahĩhio na mwaki karĩ mũrũrũmbo o ro ũguo; mũtwe, na mathagiro, o na nyama ciothe cia nda ihĩhio inyitaine o ro ũguo.
• 10. Na mũtikanatigarie gacunjĩ o na kamwe karaare gakinyie rũcinĩ; no rĩrĩ, tũcunjĩ tuothe tũrĩa tũgakorũo tũtigarĩte nginya rũcinĩ-rĩ, tũcinei na mwaki.
• 11. Naguo ũrĩa mũgakorũo mũikarĩte mũkĩrĩa gatũrũme kau-rĩ, nĩ ũũ, atĩ mũkorũo mwĩhotorete njohero cianyu, na mwĩkĩrĩte iratũ magũrũ, o na mũnyitĩte mĩtirima na moko; na mũkarĩe na ihenya ta mũhiũhĩte; ĩo nĩyo Bathaka ya Jehova.
• 12. Nĩ gũkorũo ũtukũ ũcio nĩngagera bũrũri wa Misiri njũrage marigithathi mothe bũrũri ũcio wa Misiri, ma andũ, na ma ũhiũ; o nacio ngai ciothe cia Misiri ningacicirithia; niĩ nĩ niĩ Jehova.
• 13. Nayo thakame ĩo nĩyo ĩgatuĩka kĩmenyithia kĩa nyũmba iria mũikarĩte; na rĩrĩ, ndona thakame ĩo, nĩngamwagarara, na mũtikahũrũo na ihũra rĩu rĩmũnine ngĩhũra bũrũri wa Misiri.
• 14. Na mũthenya ũcio ũgatuĩka wa kũmũririkanagia maũndũ, na mũũtue wa gĩathĩ kĩa Jehova; njiaro-inĩ cianyu ciothe-rĩ, mũthenya ũcio mũrĩũtuaga wa gĩathĩ, naguo ũndũ ũcio ũtuĩke mũtugo ũrĩa ndĩmũtuĩrĩire wa tene na tene.
• 15. Mĩthenya mũgwanja noyo mũrĩrĩaga mĩgate ĩtarĩ mĩimbie, na mũthenya wa mbere wa mĩthenya ĩo nĩguo mũkeheria ndawa ĩo yume nyũmba cianyu; tondũ-rĩ, mũndũ o wothe ũrĩa ũkarĩa mũgate mũimbie kuuma mũthenya wa mbere, o nginya mũthenya wa mũgwanja wa matukũ macio-rĩ, nĩakaingatwo athengio harĩ andũ a Isiraeli.
• 16. Naguo mũthenya wa mbere wayo nĩmũrĩgĩaga na ũũngano mwamũre ũkoniĩ andũ othe, ningĩ mũthenya wa mũgwanja mũkagĩa na ũũngano mwamũre ũkoniĩ andũ othe o ro ũguo. Gũtirĩ wĩra o na ũrĩkũ ũkarutwo mĩthenya ĩo, thengia o wa irio iria mũndũ aagĩrĩirũo nĩ kũrĩa; wĩra ũcio wiki noguo mũkaruta.
• 17. Nĩ wega mũmenyagĩrĩre gĩathĩ kĩu kĩa mĩgate itarĩ mĩimbie; nĩ gũkorũo mũthenya ũcio nĩguo wakwa wa kũruta mbũtũ cianyu ciothe bũrũri wa Misiri; tondũ ũcio mũrĩmenyagĩrĩra mũthenya ũcio njiaro-inĩ cianyu ciothe; naguo ũndũ ũcio ũtuĩke mũtugo ũrĩa ndĩmũtuĩrĩire wa tene na tene.
• 18. Mũthenya wa ikũmi na ĩna wa mweri ũcio wa mbere, o hwaĩ-inĩ-rĩ, mũrĩrĩaga mũgate ũtarĩ mũimbie, o nginya hwaĩ-inĩ wa mũthenya wa mĩrongo ĩĩrĩ na ũmwe.
• 19. Mĩthenya ĩo mũgwanja-rĩ, hatikanoneke nyũmba o na ĩmwe yanyu ĩigĩtwo ndawa ya kũimbia mũgate; nĩ gũkorũo mũndũ o wothe ũrĩa ũkarĩa mũgate mũimbie nĩakaingatwo athengio harĩ kĩrĩndĩ gĩa Isiraeli, o na angĩkorũo nĩ mũgeni, kana akorũo aciarĩirũo bũrũri ũcio.
• 20. Mũtikanarĩe kĩndũ o na kĩ gĩĩkĩrĩtwo ndawa ya kũimbia mũgate; ciikaro-inĩ cianyu ciothe-rĩ, mũrĩrĩaga o mĩgate ĩtarĩ mĩimbie.
• 21. Hĩndĩ ĩo Musa agĩgĩĩtithia athuri othe a Isiraeli, agĩkĩmera atĩrĩ, Ta thiĩi mwĩnyitĩre tũtũrũme mũtũtware matũũra-inĩ manyu o ta ũrĩa mĩciĩ yanyu ĩtariĩ, mũgathĩnje Bathaka.
• 22. Na mũcoke muoe kĩohe kĩmwe kĩa mathangũ ma mũthobi, mũgĩtobokie thakame-inĩ ĩrĩa ĩrĩ mbakũri, mũcoke mũhake thakame ĩo ĩrĩ mbakũri hingĩro-inĩ ĩrĩa ĩkĩgamagio igũrũ mũromo-inĩ wa nyũmba, o na hingĩro-inĩ cia mĩena yerĩ yaguo. Na hatikagĩe mũndũ o na ũmwe ũkũhĩtũka mũromo-inĩ wa nyũmba yake oime nja nginya o rũcinĩ.
• 23. Tondũ Jehova ekũgera bũrũri wothe wa andũ a Misiri, nĩguo amahũre; na ona thakame hingĩro-inĩ ĩo ĩkĩgamagio mũromo igũrũ, na amĩone hingĩro-inĩ cia mĩena yerĩ yaguo-rĩ, Jehova nĩekwagarara mũromo ũcio, na ndakareka mũninani atonye nyũmba cianyu amũhũre.
• 24. Naguo ũndũ ũcio nĩmũkaũmenyagĩrĩra ũtuĩke mũtugo ũrĩa ndĩmũtuĩrĩire, inyuĩ o na ariũ anyu, tene na tene.
• 25. Na nĩgũgakinya atĩrĩ, atĩ rĩrĩa mũgakinya bũrũri ũrĩa Jehova akamũhe, o ta ũrĩa aamwĩrĩire, ũndũ ũcio wa kũmũtungatĩra mũkawĩkaga.
• 26. Na rĩrĩ, hĩndĩ ĩrĩa ciana cianyu ikamũũria ũũ: Gĩtũmi kĩa ũndũ ũyũ mwĩkaga wa gũtungatĩra Jehova-rĩ, nĩ kĩ?
• 27. nĩmũgakĩmacokeria mũmere atĩrĩ, Nĩ igongona rĩa Bathaka ya Jehova, o we ũrĩa waagararire nyũmba cia ciana cia Isiraeli Misiri, hĩndĩ ĩrĩa aahũrire andũ a Misiri, akĩhonokia nyũmba ciitũ. Nao andũ makĩinamia mĩtwe, makĩhoya Jehova, makĩmũgooca.
• 28. Nacio ciana cia Isiraeli igĩthiĩ, igĩĩka o ta ũguo o ta ũrĩa Jehova aathĩte Musa na Haruni-rĩ, ũguo noguo ciekire.
• 29. Na gũgĩkinya atĩrĩ, atĩ o ũtukũ gatagatĩ, Jehova akĩũraga marigithathi mothe ma bũrũri wa Misiri, aambĩrĩirie o irigithathi rĩa Firauni ũrĩa waikaragĩra gĩtĩ kĩa ũnene, o nginya irigithathi rĩa mũndũ ũrĩa muohe korokoro-inĩ, na marigithathi mothe ma ũhiũ.
• 30. Firauni agĩgĩũkĩra ũtukũ, we mwene o na ndungata ciake ciothe, o na andũ othe a Misiri, nakuo kũu Misiri gũkĩgĩa kĩrĩro kĩnene mũno; nĩ ũndũ gũtiarĩ nyũmba o na ĩmwe ĩtaarĩ mũndũ mũkuũ.
• 31. Nake agĩĩta Musa na Haruni o hĩndĩ ĩo ya ũtukũ, akĩmera atĩrĩ, Ũkĩrai muume mwehere thĩinĩ wa andũ akwa, inyuene, o na ciana cia Isiraeli, mũthiĩ mũgatungatĩre Jehova, o ta ũguo muugĩte.
• 32. Oyai mbũri cianyu, o na ng’ombe cianyu ciothe, mũthiĩ nacio, o ta ũguo muugĩte, mwĩthiĩre; niĩ o na niĩ-rĩ, ndathimai.
• 33. Nao andũ a Misiri makĩhĩkĩrĩria andũ a Isiraeli mũno, makĩmaingata moime bũrũri ũcio na ihenya, nĩ ũndũ moigaga atĩrĩ, Hĩ, kaĩ ithuothe tũrĩ akuũ-ĩ!
• 34. Nao andũ acio a Isiraeli magĩthiĩ na kĩmere kĩao kĩa mũtu wa ngano gĩtarĩ kĩimbie, o na mbakũri ciao iria ciamandagĩrũo mĩgate irĩ njoherere nguo-inĩ, igakuuo na ciande ciao.
• 35. Nacio ciana cia Isiraeli igĩĩka o ta ũrĩa Musa aaciĩrire, igĩgĩĩtia andũ a Misiri indo cia betha, o na indo cia thahabu, o na nguo;
• 36. nake Jehova agĩtũma andũ acio metĩkĩrĩke nĩ andũ a Misiri; tondũ ũcio magĩgĩĩtĩkĩra kũmahe indo o ta iria metagia. Magĩgĩtaha andũ a Misiri indo ciao.
• 37. NACIO ciana cia Isiraeli ikĩgwata rũgendo ciumĩte Ramesese, igĩkinya Sukothu; nao arũme oiki arĩa metwaraga na magũrũ thengia twana, maarĩ ta ngiri magana matandatũ.
• 38. Na magĩthiĩ na kĩrĩndĩ kĩa andũ a mĩthemba mĩingĩ mathombocanĩte, o na ũhiũ mũingĩ wa mbũri na ng’ombe.
• 39. Nao makĩruga mĩgate ĩtaimbĩtio ya kĩmere kĩa mũtu kĩu maarutĩte Misiri, nĩ ũndũ kĩmere kĩu gĩtiekĩrĩtwo ndawa ya kũimbia; nĩ gũkorũo nĩ kũingatwo maaingatirũo na hinya moime Misiri, na matiigana kũhota kũrũgama kuo o na hanini, kana magĩĩthondekera irio cia rĩĩgu.
• 40. Na rĩrĩ, ihinda rĩrĩa ciana cia Isiraeli ciatũũrire Misiri-rĩ, rĩarĩ mĩaka magana mana ma mĩrongo ĩtatũ.
• 41. Na gũgĩkinya atĩrĩ, atĩ mĩaka ĩo magana mana ma mĩrongo ĩtatũ yathira-rĩ, mũthenya o ro ũcio nĩguo mbũtũ icio ciothe cia ita ya Jehova cioimire bũrũri wa Misiri.
• 42. Ũtukũ ũcio nĩguo wagĩrĩire kũmenyererũo wamũrĩrũo Jehova, nĩ ũndũ wa ũrĩa aacirutire bũrũri ũcio wa Misiri. Ũtukũ ũcio nĩ wa Jehova wa kũmenyererũo mũno nĩ ciana cia Isiraeli ciothe, nĩguo iwamũrage njiaro-inĩ ciacio cia hingo ciothe.
• 43. Nake Jehova akĩĩra Musa na Haruni ũũ: Mũtugo ũrĩa ndĩmũtuĩrĩire ũkoniĩ Bathaka nĩ ũyũ, atĩ gũtirĩ mũndũ mũgeni o na ũmwe ũkarĩa Bathaka ĩo
• 44. no rĩrĩ, ndungata ya mũndũ o wothe ĩngĩkorũo nĩ kũgũrũo ĩgũrĩtwo na mbia, warĩkia kũmĩruithia-rĩ, thutha ũcio nĩĩmĩrĩage.
• 45. No mũũki arĩ mũrũrĩrĩ, na ndungata ya mũcara, matikanamĩrĩe.
• 46. Nĩĩrĩagĩrũo o nyũmba o nyũmba ĩmwe thĩinĩ; mũtikanoimie kanyama o na kanini kayo nja karutwo nyũmba, kana muune ihĩndĩ o na rĩmwe rĩayo.
• 47. Na no mũhaka kĩrĩndĩ gĩothe gĩa ciana cia Isiraeli kĩririkanage ũhoro ũcio, gĩkĩwĩkaga.
• 48. Na rĩrĩ, mũũki mũrũrĩrĩ angĩũka atũũranie nawe na ende kũrĩa Bathaka ya Jehova-rĩ, andũ ake othe arũme nĩmaruithio, na thutha wa ũguo acoke gũkuhĩhĩria Bathaka-inĩ ĩo amĩrĩe; na thutha ũcio atuĩke o ta mũndũ ũciarĩirũo bũrũri wanyu. No rĩrĩ, gũtirĩ mũndũ o na ũmwe ũtaruithĩtio ũngĩmĩrĩa.
• 49. Watho ũrĩgĩtuĩkaga o ũmwe wa gwatha mũndũ ũrĩa ũciarĩirũo bũrũri wanyu, o na wa mũũki ũrĩa ũtũũranĩtie na inyuĩ.
• 50. Nacio ciana cia Isiraeli ciothe igĩgĩĩka; o ta ũguo o ta ũrĩa Jehova aathire Musa na Haruni meke-rĩ, ũguo noguo andũ acio mekire.
• 51. Na gũgĩkinya atĩrĩ, atĩ mũthenya o ro ũcio Jehova agĩkĩruta ciana cia Isiraeli bũrũri ũcio wa Misiri irĩ mbũtũ nene.

Home