Go Back

Thama Chapter 1

• 1. ATĨRĨRĨ, maya nĩmo marĩĩtwa ma ciana cia Isiraeli, iria ciathiire igĩtonya Misiri; nacio ciothe, mũndũ o mũndũ arĩ hamwe na andũ a nyũmba yake, ciatwaranire na Jakubu.
• 2. Nao nĩ Reubeni, na Simeoni, na Lawii, na Juda,
• 3. na Isakaru, na Zebuluni, na Benjamini,
• 4. na Dani, na Nafitali, na Gadi, na Asheri.
• 5. Nao andũ othe a rũciaro rũa Jakubu maarĩ andũ mĩrongo mũgwanja; nowe Jusufu, o na mbere ĩo, aakorirũo arĩ o kũu Misiri.
• 6. Nake Jusufu agĩkua, o na ariũ a ithe othe, a nao andũ othe a ihinda rĩu magĩthira.
• 7. Nacio ciana cia Isiraeli igĩciara mũno, nacio igĩkĩrĩrĩria kũingĩha o kũingĩha, igĩthegea mũno, nacio igĩthiĩ ikĩgĩaga na hinya o mũno mũno; nacio ikĩiyũra thĩ ĩo yothe.
• 8. NA RĨRĨ, hĩndĩ ĩo gũkĩgĩa mũthamaki ũngĩ wa gũthamaka bũrũri ũcio wa Misiri, nake agĩkorũo atoĩ ũhoro wa Jusufu.
• 9. Nake akĩĩra andũ ake ũũ, Atĩrĩrĩi, andũ aya, ciana ici cia Isiraeli, nĩikĩingĩhĩte mũno, o na ningĩ nĩitũkĩrĩtie hinya;
• 10. tondũ ũcio, nĩ wega tũtware andũ aya na ũũgĩ, nĩ getha mangĩingĩha, na gũcoke hihi gũũke ita-rĩ, matigathiĩ meturanĩre na andũ arĩa mangĩkorũo marĩ ũthũ na ithuĩ, macoke mahũrane na ithuĩ, nao moime bũrũri ũyũ more.
• 11. Tondũ ũcio makĩmaigĩra akaburũ nĩguo mamanyarire na mĩrigo ĩrĩa maamaigagĩrĩra. Nao magĩgĩakĩra Firauni matũũra ma kũigagwo indo, namo nĩmo metagwo Pithomu na Ramesese.
• 12. No rĩrĩ, o na kũngĩtuĩka atĩ andũ acio nĩmaakĩragĩrĩria kũmanyarira, ũguo noguo nao maakĩragĩrĩria kuongerereka, o na ningĩ magĩkĩrĩrĩria kũiyũra kũndũ guothe. Nao makĩigua ũũru mũno nĩ ũndũ wa ciana icio cia Isiraeli.
• 13. Nao andũ a Misiri makĩrutithia ciana cia Isiraeli wĩra na hinya mũno;
• 14. nao magĩtũma mĩtũũrĩre yacio ĩgĩe na ruo rũkĩru nĩ ũndũ wa thĩna, nĩ ũndũ wa wĩra ũrĩa ciarutithagio wa hinya, wa gũthondeka thimiti, o na kũũmba matubarĩ, o na mĩthemba mĩingĩ ya wĩra ũrĩa warutagwo mĩgũnda. O ũguo taguo, mawĩra-inĩ mothe marĩa maacirutithagia nĩmaacihinyagĩrĩria mũno.
• 15. Nake mũthamaki ũcio wa Misiri akĩarĩria atumia a Ahibirania arĩa maaciarithanagia, nao ũmwe etagwo Shifira, nake ũrĩa ũngĩ agetwo Pua,
• 16. agĩkĩmera atĩrĩ, Hĩndĩ ĩrĩa mũgũciarithia atumia a Ahibirania, o hĩndĩ ĩrĩa me rũtĩ-inĩ, mũngĩona atĩ nĩ kahĩĩ gaaciarũo-rĩ, koragei; no kangĩkorũo nĩ kaana ga kairĩtu, nĩkarekwo gaikare.
• 17. No rĩrĩ, atumia acio aciarithania nĩmetigĩrĩte Ngai, nao matiigana gwĩka ta ũguo maathĩtwo nĩ mũthamaki ũcio wa Misiri, no kũreka maarekire twana twa tũhĩĩ tũikare muoyo.
• 18. Nake mũthamaki ũcio wa Misiri agĩĩta aciarithania acio, akĩmoria atĩrĩ, Nĩ kĩ gĩtũmĩte mwĩke ũndũ ũcio, mũkahonokia twana twa tũhĩĩ atĩ nĩguo tũtũũre muoyo?
• 19. Nao aciarithania acio makĩĩra Firauni atĩrĩ, Gĩtũmi nĩ rĩrĩ, nĩ ũndũ atumia a Ahibirania matitariĩ ta atumia a andũ a Misiri; tondũ nĩ ahiũ mũno, nao mohokaga matarĩ marakinyĩrĩrũo nĩ mũciarithania.
• 20. Nake Ngai agĩgĩĩka aciarithania acio maũndũ mega; nao andũ acio a Isiraeli magĩgĩthegea mũno, o na makĩgĩa na hinya mũnene.
• 21. Na gũgĩkinya atĩrĩ, atĩ tondũ wa ũrĩa aciarithania acio metigĩrĩte Ngai, agĩtũma nyũmba ciao ciĩhande.
• 22. Nake Firauni agĩatha andũ ake othe, akĩmera atĩrĩ, Mwana o wothe ũrĩa ũrĩciaragwo wa kahĩĩ, mũikagiei rũũĩ; na ũrĩa wothe ũrĩkoragwo arĩ wa kairĩtu-rĩ, mũkareka aikare muoyo.

Home