Go Back

Thaburi Chapter 94

• 1. Ĩ JEHOVA, wee Mũrungu ũrĩa ũrĩhanagĩria, we Mũrungu ũrĩa ũrĩhanagĩria-rĩ, cangarũrũka!
• 2. Ĩambararie, wee mũtuanĩri wa andũ othe a thĩ, arĩa eĩkĩrĩri-rĩ, ũkĩmathukĩre o ũrĩa maagĩrĩirũo.
• 3. Arĩa aaganu, Jehova, nĩ hingo ĩigana atĩa megũtũũra marũhagia? ĩ nĩ hingo ĩigana atĩa andũ arĩa aaganu mekũrekwo makenũrũrũkage?
• 4. O nĩ andũ a mũhahĩ, kwaria maaragia o na mwĩng’ang’io; acio othe eki maũndũ ma waganu, mĩikarĩre yao no ya mwĩtĩo.
• 5. Nĩ kũhehenja mahehenjaga kĩrĩndĩ gĩaku, Jehova, igai rĩaku magakĩrĩnyarira.
• 6. Moragaga mũtumia wa ndigwa o na mũgeni ũrĩa ũmaakĩrĩire, na magaita ciana cia ngoriai.
• 7. Makoigaga, Jehova ndangĩona! Ngai wa Jakubu-rĩ, ndangĩrũmbũria!
• 8. Mũtigĩcũranie, inyuĩ inunwa ici mwĩ kĩrĩndĩ-inĩ; inyuĩ irimũ ici-rĩ, mũgakĩũhĩga rĩ?
• 9. ũrĩa wahandire gũtũ, nĩwe ũtangĩigua? ũrĩa wakũmbire riitho, nĩwe ũtangĩona?
• 10. Ũrĩa ũtaaraga ndũrĩrĩ-rĩ, nĩakĩage gũkũmana, o we ũcio ũrutaga andũ ũhoro?
• 11. Jehova nĩoĩ meciria ma andũ, atĩ nĩ kĩndũ gĩa tũhũ.
• 12. Gũkena no mũndũ ũrĩa wee, Jehova, ũtaaraga, o ũcio ũrutaga ũhoro wa kĩrĩra gĩaku,
• 13. Nĩ getha ũmũheage ũhurũko matukũ marĩa ma ũũru, o nginya mũndũ ũrĩa mwaganu agakorũo enjeirũo irima.
• 14. Amu Jehova ndarĩ hĩndĩ agate kĩrĩndĩ gĩake, igai rĩake ndangĩrĩtiganĩria.
• 15. Amu-rĩ, mũtuĩre wa cira nĩ gũcoka ũgacokerera ũthingu, nao andũ othe a ngoro nũngĩrĩru nĩguo makarũmagĩrĩra.
• 16. Nũ ũngĩũkĩra kũndũĩrĩra harĩ arĩa mekaga ũũru? nũ ũgũkĩrũgamania na niĩ ndĩ harĩ arĩa eki waganu?
• 17. Guca Jehova aarĩ mũteithia wakwa, ngoro yakwa nĩĩngĩathiire o narua gũtũũra ũkiri-inĩ.
• 18. Hĩndĩ ĩrĩa ndoigĩte, Kũgũrũ gwakwa nĩgũkũhigũka-rĩ, nĩ ũtugi waku, Jehova, wandiirĩrĩire.
• 19. Rĩrĩa nyingĩhĩirũo thĩinĩ wakwa nĩ mĩtangĩko ũhoreria waku nĩguo ũngenagia ngoro.
• 20. Atĩrĩ, gĩtĩ kĩrĩa gĩa ũthamaki wa waganu-rĩ, kĩrĩ hĩndĩ kĩngĩgĩa ngwatanĩro nawe, o gĩa acio mahaaragĩria ũũnũhu na njĩra ya gwathithia watho?
• 21. Nĩ kũrũrũnganĩra marũrũnganagĩra muoyo wa mũndũ ũrĩa mũthingu, magagĩtuĩra mwene thakame ĩo ĩtehĩtie atĩ oragwo.
• 22. No rĩrĩ, Jehova egũtũũra e rĩangĩro rĩakwa rĩake iraya na igũrũ; Ngai wakwa-rĩ, nĩwe ndũmba yakwa ya ihiga ya kũrahĩra.
• 23. Nake no akamacokereria waganu wao, amanine na njĩra ya ũũru o ũcio wao ene; Jehova Ngai witũ-rĩ, akamanina, o kũmanina.

Home